Maˍkuˆ 6
6
Yeˍsuˆ nawˍ yang keutˆ yaˍ jiˍ vengˍ veu mae kaˍ ya kyaˉ baˍ ca
1Yeˍsuˆ maˇ hingˉ keung veu awkˍ taw aeˉ yao yang na keutˆ yaˍ jiˍ vengˍ veu hkeu lae laeˍ jiˍ. Yang beu ta peˍ uiˍ muiˉ kaˉ nawngˍ veu hkeˍ yao lae jiˉ. 2Yuˉdaˆ changˉ ceuˉ beu vanˍ sin nuing hkeu laˉ yao, Yuˉdaˆ changˉ ceuˉ hpawm lang kyaˉ hkaoˉ veu yang seungˍ maˍ jiˍ. Ya kyaˍ jiˍ changˉ hkaˉ hko laˉ hko uiˉ muiˉ manˍ hko yao, changˉ niˇ maˇ ningˉ uiˉ na aˉ keung jeuˇ ya jiˉ. Changˉ ningˉ mangˉ ya jiˉ pingˍ nyaˍ nae, yang laˍ puˍ hingˍ nae ha naeˉ laˍ htiˍ laek hkaˍ naˍ ningˉ ngaˍ aˉ mae jeuˇ. 3Yaˇ la saˉ maˉ baˍ aˍ la. Maˍriˆ beu ang yaˍ baˍ aˍ la. Yaˍkok, Yoˉteˍ, Yuˉdaˆ nae Siˉmunˍ yawng beu ang aiˉ mangˉ baˍ aˍ la. Yang mi uiˍ muiˉ gu kawngˉ htuˍ yaˍ laˉ mae nawˇ ca ngaeˉ baˍ aˍ la nae ciˍ yao, Yeˍsuˆ na yawng baˍ hu siˉ. 4Yeˍsuˆ maˇ pa rawˉ hpaet nawˍ hkaˍ tawng keutˆ yaˍ jiˍ vengˍ hkaˍ tawng yaˍ changˍ mawngˉ namˉ uiˉ kawngˉ veu nae hkaˍ tawng yumˉ changˉ uiˉ beu mae kaˍ ya kyaˉ baˍ ca nae ha biˍ jiˍ. 5Yeˍsuˆ nawˍ changˉ daˉ htiˍ baˍ uiˍ na laˍ puˍ boeˉ biˍ yao, taeng pyo biˍ jiˍ hingˉ baˍ baoˇ hingˉ keung veu laˍ htiˍ tanˉ hkoˇ aˉ mae uiˉ na muiˉ baˍ ha saˍ. 6Yeˍsuˆ maˇ yawng baˍ yumˍ nae hingˉ na manˍ yao, ang tawngˍ htang veu ca naeˉ hkawngˍ uiˍ beu saˉ kvaˍ aeˉ yao seungˍ maˍ jiˍ.
Ta peˍ htiˍ cheˍ nyiˍ hu uiˉ na piˉ aeˉ jiˉ.
7Haeˉ mae beu, Yeˍsuˆ maˇ ta peˍ htiˍ cheˍ nyiˍ hu uiˉ na haoˉ yao, nyiˍ hu htiˍ ku nae piˉ aeˉ jiˉ. Deˍ yaˍ baˍ seungˍ baˍ sangˍ nae uiˉ na kaˍ yaˍ hkiˍ naeˍ uiˉ saˍ laiˍ yawng na aˉ hkvangˍ piˍ jiˍ. 8Caˇ, kaˉ ba veu saˍ laiˍ cingˍ hkongˍ htiˍ lumˍ naeˍ naˇ piˉ hanˉ jiˉ. Ang caˍ ang tangˉ pae hawngˍ nae hpuˉ uiˉ na muiˉ tawngˍ sitˍ veu kan laeˍ yao baˍ aeˍ jo nae ha biˍ jiˍ. 9Hkiˉ naw naw laeˍ yao hka lao muiˉ hkaˍ lao ang lumˉ ang canˉ aˍ tum aeˉ jo nae ha biˍ jiˍ. 10Yeˍsuˆ yawng na ha laeˍ biˍ jiˍ. Aˉ keung veu na baˍ upˍ yumˉ htiˍ yumˍ veu nawng awngˉ lae beu hingˉ yumˉ veu ca yao awkˍ taw aeˉ laeˍ naˇ nae beu tiˍ hkeu hingˉ yumˉ veu ca voˍ. 11Aˉ keung veu na baˍ upˍ nawng na baˍ hap yuˉ laˍ. Nawng tangˍ na muiˉ baˍ naˍ la nae baoˉ vaˍ, hingˉ keung veu ca yao, awkˍ taw luiˍ beu, yawng ca naeˉ kaˉ seu saˉ hkiˉ piˉ hpeuˍ naeˍ uiˉ saˍ laiˍ nawng beu laˍ hkuiˍ hpaˍ vaˍ#6:11 Ningˉ ngaˍ Hpaˍ caoˍ ciˍ yanˍ naeˍ uiˉ saˍ laiˍ chiˉ saˍ jiˍ. veu hka laˉ ang du hingˉ kyangˍ kla laeˍ sao nae ha biˍ jiˍ. 12Haeˉ mae beu, ta peˍ uiˍ muiˉ awkˍ taw aengˉ yao changˉ uiˉ nuing ba penˉ laeˍ naeˍ uiˉ saˍ laiˍ, ang buinˉ tangˍ maˍ aeˉ jiˉ. 13Yawng muiˉ deˍ yaˍ uiˍ na kaˍ taw yao, changˉ baˍ ca baˍ duingˍ bui nae uiˉ na muiˉ na manˍ laeˍ biˍ yao, piˉ ca piˉ duingˉ buiˍ laˉ laeˍ jiˍ.
Baˆ tiˆ samˍ piˍ naeˍ Yoˉhanˍ siˉ jiˉ
14Yeˍsuˆ beu ang maengˉ hingˉ ngaˍ huiˍ laˉ yao hkunˉ hawˉ hkamˉ Heˍrot muiˉ ya kyaˍ jiˍ. Changˉ htiˍ baˍ uiˍ a baˆ tiˆ samˍ saˍ laˉ Yoˉhanˍ maˇ siˉ jiˉ changˉ uiˉ hkaoˉ veu taeˍ laˉ laeˍ byaˇ. Hingˉ pa nae yang hkaoˉ veu laˍ htiˍ tanˉ hkoˇ uiˉ na ha awkˍ taw naeˉ nae hkai lang jiˉ. 15Changˉ htiˍ baˍ uiˉ aˍ, Yaˇ Eˉliˉyaˆ mangˉ yaˇ nae ha yao, changˉ htiˍ baˍ uiˉ aˍ hkaw taeˉ beu pa rawˉ hpaetˆ uiˉ htiˍ hu hu hkaoˉ veu pa rawˉ hpaet yaˇ nae ha jiˉ. 16Heˍrot ya kyaˍ yao ningˉ maˇ ga ang tuˍ tawnˍ yao sae jiˉ Yoˉhanˍ mangˍ taeˍ laˉ laeˍ jiˍ nae ha jiˉ. 17Hpeuˍ peunˍ laˉ jiˉ awˍ lawng ningˉ ngaˍ ningˉ mae yaˇ. Heˍrot nawˍ yang hpaeˉ Hpiˉliˆpuˆ beu hkaˍ ba Heˍrawˉdiˆ na yuˉ jiˉ. Hingˉ pa nae yang changˉ poiˉ yao, Yoˉhanˍ na chu yao, htawngˉ hkaoˉ veu lawngˉ nga jiˉ. 18Yoˉhanˍ maˇ nang hpaeˉ beu hkaˍ ba mangˉ na yuˉ naeˉ ningˉ ngaˍ Moˉseˍ beu ang liˍ ang kawngˍ veu baˍ yaˍ nae ha biˍ jiˍ. 19Heˍrawˉdiˆ nawˍ Yoˉhanˍ na ang hu buinˉ nae saeˍ siˍ yao muiˉ aˉ hkvangˍ baˍ ya. 20Aˉ mae yao nae baoˉ vaˍ, Yoˉhanˍ nawˍ changˉ ang sui ang pawng changˉ ang seungˍ ang sangˉ hpeuˍ naeˍ na hkunˉ hawˉ hkamˉ Heˍrot ang bae nae Yoˉhanˍ na hkae yao maenˍ nae hak sa jiˉ. Yoˉhanˍ maˍ jiˍ tangˍ na hkunˉ hawˉ hkamˉ ya kyaˍ beu, yang nuing ba hkaoˉ veu suk sak yao muiˉ nuing ba mawnˍ mawnˍ saˍ saˉ nae naˉ jiˉ. 21Tawngˍ tin veu aˉ hkvangˍ ya jiˉ. Hkunˉ hawˉ hkamˇ Heˍrot maˇ yang keutˆ yaˍ jiˍ nuing hkeu beu poiˍ jiˍ. Yang awˍ veu ang suingˉ uiˉ luk suikˆ htiˍ baˍ uiˍ nae Gaˍliˉlaeˉ ang meungˉ hkaoˉ veu laˍ htiˍ ang ca changˉ uiˉ na haoˉ yao poiˍ lamˍ yao caˍ tangˉ jiˉ. 22Heˍrawˉdiˆ beu, ang yaˍ yaˍ biˍ mangˍ hangˍ hpeunˍ veu laˉ yao yen beu Heˍrot nae yang kawngˉ caˍ tangˉ jiˉ uiˉ muiˉ nuing ba buiˍ jiˍ. Heˍrot muiˉ nang hkaˉ loˉ siˉ naeˉ uiˉ paˉ laˍ bao. Nang na ga piˍ laˍ vaˍ nae hkaˍ ba yaˍ mangˍ na ha biˍ jiˍ. 23Htiˍ cangˍ nang hkaˉ paˉ laˍ naeˍ uiˉ, Ga beu ang meungˉ ningˉ htiˍ kvak ga piˍ laˍ vaˍ nae yang na ha laeˍ biˍ jiˍ. 24Haeˉ mae beu, hkaˍ ba yaˍ mangˍ muiˉ awkˍ taw aengˉ yao, ba ciˉ jeuˇ paˉ aeˉ ceuˉ nae yang muing mangˉ na naˉ aeˉ jiˉ. Yang muing mangˉ muiˉ baˆ tiˆ samˍ saˍlaˉ Yoˉhanˍ beu ang tuˍ hingˍ na paˉ voˍ nae ha biˍ jiˍ. 25Hkaˍ ba yaˍ mangˍ muiˉ ang vaiˍ nae ang suingˉ ang huiˍ mangˍ kawngˉ awngˉ lae yao baˆ tiˆ samˍ saˍ laˉ Yoˉhanˍ mangˍ beu ang tuˍ hingˍ ta laiˉ htaˍ nawˆ ya muingˉ ga na piˍ lao nae ha biˍ jiˍ. 26Ang suingˉ maˇ nuing ba hkaoˉ veu baˍ pyawˍ. Hta yao muiˉ, yang ciˍ yao chiˉ jiˉ saˉ caˉ hingˉ na nae hangˍ hpeunˍ htaˍ veu duingˉ yao ca naeˉ yang changˍ uiˍ beu mae kaˍ na hu yao hkaˍ ba yaˍ mangˍ na baˍ hteng nae ca jiˉ. 27Haeˉ mae beu, hkunˉ hawˉ hkamˉ maˇ hawˍ yao ca naeˉ luk suikˆ changˉ htiˍ hu mangˉ na, Yoˉhanˍ beu ang tuˍ hingˍ tawnˍ chae yao hanˉ nangˉ lao nae ha biˍ jiˍ. Changˉ hingˉ mangˉ muiˉ aeˉ yao, htawngˉ hkaoˉ veu Yoˉhanˍ beu ang tuˍ hingˍ na tawnˍ aeˉ jiˉ. 28Ang tuˍ hingˍ na hangˍ hpeunˍ ta laiˉ htaˍ veu chiˉ yao hkaˍ ba yaˍ mangˍ na piˍ jiˍ. Nae yao, ang yaˍ mangˍ muiˉ ya muing mangˉ na piˍ jiˍ. 29Yoˉhanˍ beu, ta peˍ uiˍ muiˉ hingˉ awˍ lanwg na ya kyaˍ yao, yang ang to hingˉ na hanˉ yao, haw ba lawngˍ hkawngˍ hkawngˍ chawˍ veu hpum aeˉ jiˉ.
Changˉ ngaˍ hingˍ hu na ang caˍ piˉ yaˍ jiˍ
30Naiˍ htangˍ uiˍ Yeˍsuˆ kawngˉ chawnˉ nangˉ laˉ laeˍ yao, yawng vaˍ saˍ jiˍ kanˉ uiˉ nae seungˍ maˍ saˍ jiˍ kanˉ uiˉ Yeˍsuˆ na hkai laeˍ biˍ jiˍ. 31Yeˍsuˆ mangˉ muiˉ nawng ngaˍ changˉ baˍ ca nae ang kyap uiˉ beu nawng htiˍ yaˍ nae laˉ yao tiˍ chitˍ saoˍ a laeˍ beun nae yawng na ha biˍ jiˍ. Haeˉ mae ha biˍ jiˍ hingˉ ngaˍ awngˉ laˉ naeˉ changˉ nae awkˍ naeˍ uiˉ changˉ ang byaˍ nae yawng ngaˍ ang caˍ caˍ laeˍ nyamˍ muiˍ baˍ ca. 32Haeˉ mae yao, yawng ngaˍ changˉ baˍ ca nae ang kyap uiˉ beu yawng htiˍ yaˍ nae heuˍ ta yao awkˍ taw aengˉ jiˉ. 33Yawng awkˍ taw yao aeˉ naeˉ na changˉ ang byaˍ uiˍ myangˉ yao vengˍ changˍ nae hkawngˍ changˍ uiˍ muiˉ hingˉ keung veu miˉ keungˍ kaˍ seu nae huinˍ na aeˉ yao yawng huˍ veu hkeu hko aeˉ lang jiˉ. 34Yeˍsuˆ heuˍ htaˍ veu lungˍ aeˉ beu, changˉ ang byaˍ uiˍ na myangˉ jiˉ. Changˉ ningˉ uiˉ aˍ po hing hu baˍ ca nae soˉ uiˉ laˉ mae hpeuˍ jaˇ nae kuitˆ yao, yawng na saˍ kyaˍ kyaˍ naeˍ uiˉ nuing ba nae ang byaˍ ceuˍ seungˍ maˍ jiˍ. 35Miˍ nuingˍ kla aeˉ yao ta peˍ uiˉ aˍ Yeˍsuˆ kawngˉ lae yao ningˉ keung aˍ changˍ kawngˍ nae ca seuˍ tangˉ seuˍ muiˍ baˍ ca. Ang nyamˍ muiˍ baˍ ca jiˉ laˇ. 36Changˉ ningˉ uiˉ na ang tawngˍ ang htang veu ca naeˉ hkawngˍ uiˍ beu aeˉ yao yawng saˍ laiˍ caˍ seuˍ tangˉ seuˍ piˉ yuˉ yaiˍ aeˉ laeˍ biˍ baiˉ seuˍ nae ha biˍ jiˍ. 37Yeˍsuˆ maˇ nawng yawng na caˍ seuˍ tangˉ seuˍ piˉ yaˍ vo nae ha laeˍ biˍ jiˍ. Ta peˍ uiˍ muiˉ gu aˍ hpuˉ nyiˍ pakˍ pyaˍ nae hkaoˍ munˉ vuiˉ aeˉ yao yawng na ya piˉ yaˍ naeˍ la nae ha biˍ jiˍ. 38Yeˍsuˆ mangˉ muiˉ nawng beu hkaoˍ munˉ aˉ mawk ang ca nae aeˉ yao hu aeˉ bao nae ha biˍ jiˍ. Yawng muiˉ bae yao hkaoˍmunˉ ngaˍ suiˍ nae nuingˍ taeˍ nyiˍ mangˍ ang ca jaˇ nae ha biˍ jiˍ. 39Haeˉ mae yao, Yeˍsuˆ nawˍ changˉ uiˉ na mawˍ kaˍ ang nyungˉ uiˉ beu chawnˉ lawnˉ nae piˉ duingˉ voˍ nae ta peˍ uiˍ na ha biˍ jiˍ. 40Changˉ uiˉ muiˉ htiˍ pakˍ hu, ngaˍ cheˍ hu ga nae chawnˉ lang yao duingˉ jiˉ. 41Yeˍsuˆ hkaoˍ munˉ ngaˍ suiˍ nae nuingˍ taeˍ nyiˍ mangˍ hingˍ na yuˉ yao buingˍ htaˍ veu hu laeˍ yao ang buinˉ na chiˍ mawng laeˍ jiˍ. Hkaoˍ munˉ yangˍ hpaetˍ yao changˉ uiˉ na peungˍ bu nae ta peˍ uiˍ na biˍ jiˍ. Nuingˍ taeˍ nyiˍ mangˍ hingˍ na muiˉ changˉ uiˉ na peungˍ biˍ jiˍ. 42Changˉ uiˉ caˍ yao kawˉ hko jiˉ. 43Hingˉ nawngˍ veu caˍ kawˍ yao hkaoˍ munˉ ang hpaetˍ nae nuingˍ taeˍ canˉ laˉ jiˉ uiˉ na kaw chawnˉ yao htiˍ cheˍ nyiˍ bungˍ chawnˉ ya laeˍ jiˍ. 44Caˍ jiˍ hkaˍ hpaˍ yaˍ ang hkawˍ uiˍ ngaˍ hingˍ hu ca jiˉ.
Langˉ htaˍ veu Yeˍsuˆ kaˉ ba yawˍ jiˍ
45Changˉ ang muˉ ang byaˍ uiˍ na baˍ poiˍ ngangˉ laeˍ beu, yang ta peˍ uiˍ na muiˉ heuˍ htaˍ veu piˉ ta lae yao lang awng htiˍ pakˍ kyaˍ Baetˍsaiˉdaˉ vengˍ veu yang kaˉ huˍ veu piˉ lae lang jiˉ. 46Changˉ uiˉ na hpakˍ nga saˍ yao Yeˍsuˆ nawˍ miˉ kuingˍ veu ang buinˉ paˉ lae jiˉ. 47Miˍ hkiˍ beu, hkeu yao heuˍ maˇ lang awng kawngˉ nuingˉ veu hkeu jiˉ. Yeˍsuˆ nawˍ miˉ kuingˍ veu yang htiˍ yaˍ ca jiˉ. 48Hawˉ manˉ taw naeˉ kaˉ seu baˍ yaˍ nae yao heuˍ htaˍ veu ca naeˉ yang ta peˍ uiˍ hunˉ hanˉ naeˉ na Yeˍsuˆ ya myangˉ yao saw hta sumˍ naˍ riˍ veu langˉ htaˍ veu kaˉ ba yawˍ yao yawng kawngˉ aeˉ yao hpaiˍ aeˉ jeuˉ nae kuitˆ jiˉ. 49Ta peˍ uiˍ Yeˍsuˆ langˉ htaˍ veu kaˉ ba yawˍ nae na myangˉ beu deˍ yaˍ nae kuitˆ yao kaˍ haengˍ nae haoˉ jiˉ. 50Yawng hkaˉ hko laˉ hko Yeˍsuˆ na myangˉ yao hkae did did hko jiˉ. Yeˍsuˆ maˇ tiˍ chitˍ nae yang ta peˍ uiˍ na, Baˍ manˍ baˍ hawngˍ jo. Ga yaˇ. Ba hkae jo nae ha biˍ jiˍ. 51Yeˍsuˆ yawng ca naeˉ heuˍ htaˍ veu ta laengˉ yao, hawˉ manˉ yangˍ saoˍ saw jiˉ. Yawng manˍ hko jiˉ. 52Ta peˍ uiˉ aˍ hkaoˍ munˉ lawng hingˉ na baˍ na bae nae yawng beu nuing ba kaenˍ hka naeˉ hingˉ pa nae hpeuˍ jiˍ.
Geˍneˍsaˍraeˆ vengˍ veu hpa yat changˉ uiˉ na taeng pyo biˍ jiˍ
53Yawng muiˉ lang awng htiˍ pakˍ kyaˍ Geˍneˍsaˍraeˆ vengˍ veu hkeu lae yao, heuˍ mangˍ na saoˍ biˍ jiˍ. 54Heuˍ htaˍ veu lungˍ kla luiˍ yao, changˉ uiˉ Yeˍsuˆ na tiˍ chitˍ nae cuiˍ yaˍ jiˍ. 55Hingˉ naiˍ hkaoˍ veu ca naeˉ changˉ daˉ uiˉ kawngˉ huinˍ yao up kyaˍ biˍ jiˍ. Hingˉ pa nae baˍ ca baˍ duingˍ bui nae changˉ uiˉ na yawng yuˍ pamˍ htaˍ veu ham yao, Yeˍsuˆ kawngˉ laˉ jiˉ. 56Yeˍsuˆ laˉ jiˉ vengˍ veu nae hkawngˍ uiˍ beu na baˍ upˍ changˉ uiˉ aˍ baˍ ca baˍ duingˍ bui nae uiˉ na katˆ uiˉ beu chiˉ saˍ yao yawng na Yeˍsuˆ beu hkaˍ lao hingˉ piˉ vaˍ lao nae paˉ laˉ jiˉ. Yeˍsuˆ beu hkaˍ lao tawngˍ tin hingˉ na ya vaˍ jiˉ changˉ uiˉ muiˉ hpa yat pyo laˉ laeˍ jiˍ.
Currently Selected:
Maˍkuˆ 6: pyy
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
