Maˍkuˆ 5
5
Deˍ yaˍ uiˍ na kaˍ taw jiˉ
1Hingˉ nawngˍ veu Yeˍsuˆ nae yang ta peˍ uiˍ Gaˍliˉlaeˉ lang awng hingˉ pakˍ kyaˍ Gaˍdaˍraˆ vengˍ veu hkeu lae jiˉ. 2Yeˍsuˆ heuˍ htaˍ veu lungˍ nga aeˉ yao tiˍ chitˍ nae baˍ seungˍ baˍ sangˍ nae deˍ yaˍ awngˉ ngangˉ biˍ jiˍ mangˉ changˉ htiˍ hu laˍ pumˍ veu awkˍ taw luiˍ yao, Yeˍsuˆ na hap lui lang jiˉ. 3Changˉ hingˉ maˇ laˍ pumˍ veu ca yao, yang na nawˍ changˉ htiˍ hu nae muiˉ samˉ laˍ tuiˍ nae hpui yao muiˉ baˍ kaˍ yaˍ taw. 4Aˉ mae yao nae baoˉ vaˍ, yang na laˍ puˍ laˍ hkuiˍ veu samˉ laˍ tuiˍ nae aˉ lawˍ cangˍ hpui chiˉ yao muiˉ yaˇ samˉ laˍ tuiˍ hingˍ na kuinˍ teuk laeˍ nae ca jiˉ. Laˍ tuiˍ hingˍ uiˉ na ang byaˍ tawnˍ kuinˍ teuk laeˍ nae yang na nawˍ changˉ htiˍ hu nae muiˉ baˍ chu kaˍ yaˍ taw. 5Yaˇ laˍ pumˍ veu nae hkawngˉ kyaˉ miˉ kuingˍ uiˍ beu ta ta miˍ hkiˍ nuing kawngˉ veu haoˉ kuˉ yao law ba ang hemˉ uiˉ nae yang ang to hingˉ na hkaet daˉ laeˍ yao ca jiˉ. 6Yeˍsuˆ ang veuˍ veu laˉ naeˉ na changˉ hingˉ mangˉ ya myangˉ beu huinˍ na aeˉ yao, Yeˍsuˆ tawngˍ naˍ veu hpaˍ tuˍ laˍ hku nae ha aeˉ jiˉ. 7Huiˍ mawng yaeˉ sutˆ nae Ang suingˉ Hpaˍ caoˍ beu Ang yaˍ Yeˍsuˆ veuˉ, nang nae gaˉ yetˍ aˉ mae yeˍ lang yang lang ga naeˇ. Ga na baˍ hkanˍ baˍ chuiˍ yaˍ laˍ naeˍ uiˉ saˍ laiˍ Ang suingˉ Hpaˍ caoˍ beu ang maengˉ veu nae nang na ga maˉ manˉ yaˇ paˉ laˍ naeˍ nae ang seng kaˍ haengˍ nae paˉ jiˉ. 8Haeˉ mae paˉ jiˉ hingˉ ngaˍ Yeˍsuˆ nawˍ yang na deˍ yaˍ veuˉ, changˉ ningˉ mangˉ kawngˉ awkˍ taw lui nae ciˍ sangˍ jiˍ. 9Haeˉ mae beu, Yeˍsuˆ yang na nang ang maengˉ yangˍ aˉ mae nae naˉ yao ga ang maengˉ yangˍ Leˍgaoˍ#5:9 Leˍgaoˍ nae maenˉ jiˉ ningˉ ngaˍ luk suik hko hingˍ hu na ha naeˉ. Changˉ ningˉ mangˉ hkaoˉ veu deˍ yaˍ ang byaˍ ca naeˉ. nae hpaw jiˉ. Gu aˍ ang byaˍ ca nae yaˇ nae ha biˍ jiˍ. 10Ang meungˉ ningˉ naiˍ hkaoˍ veu gu na aˍ kaˍ taw aengˉ laˍ jo nae Yeˍsuˆ na ang byaˍ paˉ jiˉ. 11Hingˉ htang miˉ kuingˍ uiˍ beu vaˍ yaˍ ang muˉ htiˍ muˍ ka yaˍ yao ca jiˉ. 12Deˍ yaˍ uiˍ muiˉ vaˍ yaˍ uiˍ kawngˉ piˉ awngˉ aeˉ lao nae paˉ jiˉ. 13Yeˍsuˆ mangˉ muiˉ aˉ hkvangˍ piˍ yao, deˍ yaˍ uiˍ muiˉ changˉ hingˉ mangˉ hkaoˉ veu awkˍ taw aeˉ yao, vaˍ yaˍ uiˍ kawngˉ awngˉ aeˉ yao nyiˍ hengˍ mangˍ laˉ mawk ca jiˉ vaˍ yaˍ ang muˉ uiˉ ang hpyang hingˉ huinˍ hko aengˉ yao, lang awng veu kla cimˉ saeˍ hko aeˉ laeˍ jiˍ. 14Vaˍ yaˍ po naeˉ changˉ uiˉ muiˉ huinˍ taw yao vengˍ changˍ nae hkawngˉ kyaˉ veu duingˉ naeˉ changˉ uiˉ na ha kyaˍ biˍ yao, changˉ uiˉ muiˉ hpeuˍ laˉ jiˉ hingˉ na hu myangˉ naeˉ uiˉ saˍ laiˍ awkˍ taw luiˍ jiˍ. 15Yeˍsuˆ kawngˉ hkeu lui yao, Leˍgaoˍ nae maengˉ jiˉ deˍ yaˍ awngˉ ngangˉ biˍ jiˍ maˇ ang kaˍ tum tum yao duingˉ naeˉ na ya myangˉ beu hkae hko jiˉ. 16Yawng ya myangˉ jiˉ changˉ uiˉ muiˉ deˍ yaˍ awngˉ ngangˉ biˍ jiˍ mangˉ beu nae hpeuˍ laˉ jiˉ hingˉ changˉ hkeu lui naeˉ uiˉ na hkai bae biˍ jiˍ. 17Haeˉ mae yao, yawng ngaˍ Yeˍsuˆ na yawng ca kyaˉ duingˉ kyaˉ ang meungˉ naiˍ hawˆ awkˍ taw aengˉ bao nae paˉ jiˉ. 18Yeˍsuˆ heuˍ htaˍ veu ta lae beu deˍ yaˍ awngˉ nga saˍ biˍ jiˍ mangˉ muiˉ Yeˍsuˆ kawngˉ piˉ hkeˍ lao nae Yeˍsuˆ na paˉ jiˉ. 19Hta yao muiˉ, Yeˍsuˆ baˍ piˍ hke aeˉ nae nang yumˉ nae nang yumˉ changˉ uiˉ kawngˉ aeˉ yao nang htaˍ veu Hpaˍ caoˍ taeng pyo laˍ jiˍ hingˉ nae nang na aˉ mawk saˍ kyaˍ kyaˍ laˍ jiˍ hingˉ yawng na hkai bae bu nae ha biˍ jiˍ. 20Haeˉ mae beu, yang awkˍ taw aengˉ yao yang htaˍ veu Yeˍsuˆ aˉ mawk taeng pyo biˍ jiˍ hingˉ na Deˍkaˍpawˆliˆ ang meungˉ veu hkai kyaˍ biˍ yao changˉ uiˉ muiˉ manˍ hko jiˉ.
Yaˍiˉruˆ beu ang yaˍ hkaˍ ba yaˍ mangˍ nae Yeˍsuˆ beu hkaˍ lao na vaˍ jiˍ hkaˍ ba yaˍ
21Yeˍsuˆ heuˍ ta yao, yang laˉ jiˉ lang awng htiˍ pakˍ kyaˍ kaˍ seu hpaiˍ yao, lang awng htang veu ca beu, changˉ ang muˉ ang byaˍ yang kawngˉ laˉ chawnˉ hko jiˉ. 22Haeˉ mae beu, Yaˍiˉruˆ nae maengˉ jiˉ Yuˉdaˆ changˉ ceuˉ hpawm lang kyaˉ veu kanˉ chu naeˉ awn hoˉ htiˍ hu mangˉ hkeu lui jiˉ. Yeˍsuˆ na myangˉ yao, laˍ hkuiˍ tawngˍ naˍ veu bawk ngangˉ jiˉ. 23Ga beu ang yaˍ hkaˍ ba yaˍ mangˍ saˉ siˉ nae hpeuˍ la byaˇ. Yang hpa yat hingˉ pyo aengˉ yao, a sak ya teˍ yaˍ hkiˍ naeˍ uiˉ saˍ laiˍ lui yao, yang htaˍ veu laˍ puˍ boeˉ lui biˍ yao, taeng pyo lao nae paˉ jiˉ. 24Haeˉ mae yao, Yeˍsuˆ maˇ yang kawngˉ htuˍ yaˍ laˉ mae aeˉ jiˉ. Changˉ ang byaˍ uiˍ muiˉ Yeˍsuˆ nawngˍ veu hkeˍ yao, yang na naengˍ yang jiˉ. 25Haeˉ mae beu, htiˍ cheˍ nyiˍ pi siˍ hkaˉ naeˉ uiˉ hpa yat ca jiˉ hkaˍ ba yaˍ htiˍ hu ang ca. 26Chiˍ kaˍ taeng naeˉ uiˉ saˍ laˉ uiˉ kawngˉ htiˍ hu peunˉ yao htiˍ hu beu taeng laeˍ nae yang beu hpuˉ uiˉ hko hko yao muiˉ hpa yat hingˉ ngaˍ baˍ pyo laˉ nae htaˍ veu ya caeˉ nae haengˍ laˉ jiˉ. 27Hkaˍ ba yaˍ hiˍ maˇ Yeˍsuˆ awˍ lawng na ya kyaˍ jiˍ. 28Yeˍsuˆ beu, hkaˍ lao hingˉ na ya vaˍ baoˉ vaˍ, ga beu hpa yat ningˉ pyo laˉ naˇ nae yumˉ yao changˉ ang byaˍ kawngˉ nuingˉ veu Yeˍsuˆ nawngˍ veu lae yao hkaˍ lao hingˉ na vaˍ lae jiˉ. 29Tiˍ chitˍ nae yang beu hpa yat siˍ hkaˉ naeˉ hingˉ chin ngangˉ yao, yang ang to veu hpa yat yangˍ pyo aeˉ byaˇ nae bae laeˍ jiˍ. 30Yeˍsuˆ maˇ yang beu ang to hkaoˉ veu laˍ htiˍ tanˉ hkoˇ awkˍ naeˍ na tiˍ chitˍ nae bae yao, changˉ ang byaˍ ca naeˉ kaˉ seu hpaw aeˉ yao, Ga beu hkaˍ lao nawˆ aˍ sangˍ vaˍ langˍ ngaeˇ nae naˇ jiˉ. 31Yeˍsuˆ beu, ta peˍ uiˍ muiˉ, Changˉ ang muˉ ang byaˍ nang na vaˍ yang laˍ naeˍ na nang ya bae yao muiˉ, Ba ceuˉ ha yao ga na aˍ sangˍ jeuˇ vaˍ yang laˍ jiˍ nae ang naˉ laˍ jiˉ leˍ nae Yeˍsuˆ na ha biˍ jiˍ. 32Yeˍsuˆ maˇ vaˍ yang jiˉ mangˉ na ya myangˉ naeˉ uiˉ saˍ laiˍ changˉ hingˉ mangˉ na cawtˍ nae kiˍ hu cangˉ jiˉ. 33Haeˉ mae beu, hkaˍ ba yaˍ maˇ yang ang to veu aˉ mae hpeuˍ laˉ jeuˇ nae hingˉ na bae laeˍ nae hkae dit dit yao kaˉ huˍ veu bawk kumˉ yangˉ yao hpeuˍ laˉ jiˉ awˍ lawng hingˉ maˉ manˉ uiˉ hkai bae hko biˍ jiˍ. 34Yeˍsuˆ mangˉ muiˉ, Hkaˍ ba yaˍ veuˉ, nang yumˉ naeˉ hingˉ nang na piˉ pyo laˉ laeˍ laˍ byaˇ. Mawnˍ pyawˉ naeˉ hkaoˉ veu aeˉ laeˍ bao nang beu hpa yat baˍ ca baˍ duingˍ bui nae uiˉ muiˉ lawtˍ hko byaˇ nae ha biˍ jiˍ. 35Haeˉ mae Yeˍsuˆ ha biˍ beu, Yuˉdaˆ changˉ ceuˉ hpawm lang kyaˉ veu awn hoˉ yumˉ changˉ uiˉ hkeu lui yao, Nang yaˍ maˇ siˉ byaˇ. Saˍ laˉ na baˍ ceuˉ ha yao tiˍ suk tiˍ sak biˍ naeˇ nae ha biˍ jiˍ. 36Yeˍsuˆ maˇ ciˍ tangˍ hingˍ na a yeˇ baˍ yuˍ nae Yuˉdaˆ changˉ ceuˉ hpawm lang kyaˉ veu awn hoˉ mangˉ na aˍ kuitˍ man laeˍ jo. Yumˉ naeˉ hingˉ ca bu nae ha biˍ jiˍ. 37Yeˍsuˆ maˇ Peˍtaˍruˆ, Yaˍkok nae Yaˍkok ang hpaeˉ Yoˉhanˍ yawng na caeˉ laˉ laeˍ yao htiˍ hu na muiˉ yawng kawngˉ baˍ piˍ hke laengˉ. 38Yuˉdaˆ changˉ ceuˉ hpawm lang kyaˉ veu awn hoˉ mangˉ yumˉ veu yawng hkeu lae yao, changˉ uiˉ aˍ ciˍ ciˍ caeoˍ caeoˍ kaˍ haenˍ nae ungˉ haoˉ yao shuk shak ca naeˉ na Yeˍsuˆ myangˉ lae jiˉ. 39Ang hkaoˉ veu awngˉ lae yao, ciˍ ciˍ caeoˍ caeoˍ nae baˍ ungˉ jo. Hkaˍ ba yaˍ ningˍ maˇ siˉ jiˉ baˍ aˍ. Yuˍ nuˍ naeˍ naˇ awngˉ ngangˉ jiˉ nae ha biˍ jiˍ. 40Haeˉ mae beu, yawng ngaˍ Yeˍsuˆ na ciˍ bawˍ bawˍ yao uiˉ biˍ jiˍ. Changˉ hkaˉ hko laˉ hko uiˉ na ang ngiˉ veu piˉ awkˍ taw aengˉ yao, hkaˍ ba yaˍ beu ang muing ang vangˉ nae Yeˍsuˆ beu, ta peˍ sumˍ hu uiˉ na haoˉ yao, hkaˍ ba yaˍ hingˍ mangˉ ca naeˉ hingˉ keung awngˉ lae jiˉ. 41Haeˉ mae beu, hkaˍ ba yaˍ hingˍ mangˉ laˍ puˍ veu chu yao, Taˍliˉtaˍ kuˇmiˆ nae ha biˍ jiˍ. Hingˉ a tekˆ paeˍ yangˍ maˇ, Hkaˍ ba yaˍ veuˉ, nang na ciˍ sangˍ laˍ naeˍ. Hta laˉ baoˇ nae yaˇ. 42Haeˉ mae beu, hkaˍ ba yaˍ maˇ hta laˉ yao kaˉ ba yawˍ jiˍ. Hkaˍ ba yaˍ maˇ a sak htiˍ cheˍ nyiˍ pi ca jiˉ. Haeˉ mae yao, changˉ uiˉ muiˉ manˍ hko jiˉ. 43Yeˍsuˆ muiˉ ningˉ lawng ningˉ na aˍ sangˍ na muiˉ baˍ hkai biˍ jo nae ha biˍ yao hkaˍ ba yaˍ mangˍ na ang caˍ ang tangˉ piˉ yaˍ vo nae ha biˍ jiˍ.
Currently Selected:
Maˍkuˆ 5: pyy
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.