Naiˍ htangˍ 5

Aˍnaˍniˆ nae Saˍhpiˉraˍ awˍ lawng

1Aˍnaˍniˆ nae maengˉ jiˉ changˉ htiˍ hu mangˉ nae yang hkaˍ ba Saˍhpiˉraˍ yaˉ yetˍ muiˍ nuingˉ chaˍ htiˍ tawngˍ kawngˍ jiˍ. 2Yaˉ yetˍ ang biˍ bongˉ hkai yaˍ lang yao, nuingˉ changˍ huˍ hingˍ hkaoˉ veu htiˍ pun yuˉ taw saˍ yao, htiˍ pun hingˉ naeˍ naˉ naiˍ htangˍ uiˍ tawngˍ naˍ veu hanˉ yao chiˉ laˉ jiˉ. 3Peˍtruˆ yang na ha biˍ jiˍ yang, Aˍnaˍniˆ veuˉ, Ang hkawˍ laˉ ang seungˍ sangˉ mangˉ na tuingˍ keˍ keˍ naeˍ na baˍ upˍ, nuingˉ chaˍ huˍ hpuˉ htiˍ pun yuˉ taw saiˍ na baˍ upˍ, nang ningˉ mae ha siˉ naeˉ uiˉ nuing ba htiˍ puing nae ca laˉ naeˉ uiˉ saˍ laiˍ aˉ mae jeuˇ Saˍtanˍ nang na piˉ kuitˆ awkˍ ga laˍ jiˍ. 4Nuingˉ chaˍ hingˉ ngaˍ baˍ kawngˍ awkˍ ngangˍ beu nang beu baˍ aˍ la. Kawngˍ yao ya jiˉ hpuˉ hingˉ muiˉ nang keungˍ hpeuˍ naeˍ baˍ aˍ la. Ba ceuˉ ha yao ningˉ mae ha naeˉ nae nang nuing ba hingˉ kuitˆ awkˍ ga yaeˇ. Naˇ changˉ yaˍ na tuingˍ keˍ keˍ naeˍ baˍ aˍ, Hpaˍcaoˍ na tuingˍ keˍ keˍ byaˇ nae ha biˍ jiˍ. 5Ciˍ tangˍ hingˍ na yaˍ kyaˍ beu Aˍnaˍniˆ heung nga aengˉ yao siˉ jiˉ. Hingˉ awˍ lawng na yaˍ kyaˍ jiˉ changˉ uiˉ muiˉ hkae hko jiˉ. 6Haeˉ mae beu, yaˍ hkaˍ uiˍ hta laˉ yao, yang na htao nga yao hyang aeˉ jiˉ. 7Hingˉ nawngˍ veu sumˍ naˍ riˍ laˍ mae ca yao yang hkaˍ ba mangˉ awngˉ laˉ laeˍ jiˍ. Aˉ mae hpeuˍ laˉ jeuˇ nae yaˇ baˍ bae. 8Peˍtruˆ yang na ha biˍ jiˍ hingˉ ngaˍ, Naˉ yetˍ nuingˉ chaˍ kawngˍ jiˍ hingˉ ngaˍ ningˉ mawk naˇ laˍ nae naˉ yao, Uiˉ yaˇ, ningˉ mawk naeˍ naˇ ya jiˉ nae yang ciˍ jiˍ. 9Peˍtruˆ yang na ha biˍ jiˍ yang, Naˉ yetˍ aˍ, ba ceuˉ ha yao nuing ba htiˍ suiˍ laˍ mae chiˉ yao Ang suingˉ Hpaˍcaoˍ beu Ang hkawˍ laˉ na camˍ siˍ naeˇ. Hu bao, nang bongˉ na hyang aeˉ jiˉ uiˉ langˉ kaw htang veu hkeungˉ laˉ laeˍ jaˇ. Nang na muiˉ yawng ham aengˉ laˍ naeˍ yaˇ nae ha biˍ jiˍ. 10Tiˍ chitˍ nae hkaˍ ba yaˍ mangˍ muiˉ Peˍtruˆ tawngˍ naˍ veu siˉ jiˉ. Yaˍ hkaˍ uiˍ awngˉ nga langˉ yao hkaˍ ba yaˍ mangˍ siˉ jiˉ na ya myangˉ laˉ jiˉ. Yang na muiˉ yawng ham yao yang bongˉ htang veu hyang lae jiˉ. 11Hkrit na yumˉ naeˉ ang muˉ hkaoˉ veu ca naeˉ changˉ uiˉ nae ningˉ awˍ lawng na yaˍ kyaˍ jiˉ changˉ uiˉ hkaˉ hko laˉ hko uiˉ muiˉ hkae hko jiˉ.

Naiˍ htangˍ uiˍ beu naˍ mek laek hkaˍ naˍ nae manˍ kyaˍ uiˍ

12Naiˍ htangˍ uiˍ muiˉ changˉ uiˉ tawngˍ naˍ veu naˍ mek laek hkaˍ naˍ nae manˍ kyaˍ uiˍ ang byaˍ ha yao piˉ hu jiˉ. Yawng nuing ba htiˍ suiˍ laˍ mae taengˍ laeˍ yao, Sawˉlaˆmunˍ beu cawngˉ ang hkumˍ kaˍ seu cu lang ga jiˉ. 13Awˍ htaˍ veu changˉ htiˍ hu nae muiˉ yawng kawngˉ baˍ keo lae caw. Hta yao muiˉ, changˉ ang byaˍ uiˍ yawng na saˍ nyamˉ yao chiˍ huiˍ chiˍ mawng jiˉ. 14Ang suingˉ Hpaˍcaoˍ na Yumˉ naeˉ saˉ naeˉ uiˉ changˉ kaˍ hpaˍ yaˍ hkaˍ ba yaˍ uiˍ muiˉ, changˉ ang muˉ uiˉ kawngˉ awngˉ laˉ jiˉ. 15Peˍtruˆ kaˉ ba yawˍ yao aeˉ beu, yang beu chaˍ chaˍ plengˉ hingˉ changˉ daˉ htiˍ hu hu na htawngˉ yang biˍ naeˍ uiˉ saˍ laiˍ, changˉ daˉ uiˉ na hao paˍ yao kaˉ ba htang veu yumˍ pamˍ nae yuˍ kyaˍ uiˍ htaˍ veu chiˉ lui jiˉ. 16Yeˍruˆsaˍlaemˍ vengˍ htang veu ca naeˉ uiˉ vengˍ nae hkawngˍ changˍ htiˍ baˍ uiˍ muiˉ changˉ ang byaˍ laˍ chawnˉ hko jiˉ. Changˉ daˉ htiˍ baˍ uiˍ nae deˍ yaˍ ang haiˉ awngˉ ngangˉ biˍ jiˍ uiˉ na suiˍ langˉ yao yawng na taeng pyo biˍ jiˍ.

Naiˍ htangˍ uiˍ na hkanˍ yaˍ chuiˍ yaˍ jiˍ

17Haeˉ mae beu, yit pa rawˉ hek ang kaeˍ nae yawng beu Saˍduˆkaeˉ changˉ ang muˉ hkaoˉ veu ca naeˉ uiˉ changˉ hkoiˉ naeˉ uiˉ nuing ba nae, 18naiˍ htangˍ uiˍ na hpui yao htawngˉ hkaoˉ veu lawngˉ nga jiˉ. 19Caˇ, muˍ hkiˍ beu, Ang suingˉ Hpaˍcaoˍ beu buingˍ htaˍ naiˍ htangˍ htiˍ hu maˇ, htawngˉ veu langˉ kaw hingˉ hpawng nga lui yao, yawng na suiˍ awkˍ nga aengˉ yao ha biˍ jiˍ yang, 20Nawng aeˉ yao, ang buinˉ paˉ kyaˉ cawngˉ ang huiˍ veu cung yao ang hkawˍ laˉ a sak ang suiˍ teˍ yaˍ naeˍ ningˉ awˍ lawng na chaˍ lang naeˉ uiˉ tangˍ changˉ uiˉ na maˍ bu nae ha biˍ jiˍ. 21Ciˍ tangˍ hingˍ na yawng ya kyaˍ yao saw hta ang daˍ beu, ang buinˉ paˉ kyaˉ cawngˉ vanˉ ang huiˍ hkaoˍ veu awngˉ lae yao maˍ biˍ jiˍ. Yit pa rawˉ hek ang kaeˍ nae yang beu ang changˍ htiˍ baˍ uiˍ lui yao, aˉ muˍ tatˆ naeˉ uiˉ ang muˉ nae Iˉsaˍreˍlaˆ changˉ uiˉ hkaoˉ veu yaˍ mangˍ yaw hka htiˍ baˍ uiˍ na haoˉ chawnˉ lang jiˉ. Haeˉ mae beu, naiˍ htangˍ uiˍ na suiˍ laˉ voˍ nae hawˍ yao ca jiˉ luk suikˆ htiˍ baˍ uiˍ na htawngˉ hkaoˉ veu piˉ aeˉ jiˉ. 22Caˇ, yawng htawngˉ hkaoˉ veu hkeu aeˉ beu naiˍ htangˍ uiˍ na baˍ myangˍ. Hingˉ pa nae, yawng aeˉ laeˍ beu ciˍ jiˍ yang, 23Htawngˉ langˉ kaw ningˉ maeˍ nae hpiˍ yao, htawngˉ veu hawˍ hu uiˉ muiˉ langˉ kaw ang nyiˉ kaˉ seu haw yao ca naeˉ na gu ya myangˉ yaeˉ yaˇ. Hta yao muiˉ, gu langˉ kaw hingˉ na hpawng nga beu ang hkaoˉ veu changˉ htiˍ hu na muiˉ baˍ myangˍ nae ha biˍ jiˍ. 24Ang buinˉ paˉ kyaˉ cawngˉ ang huiˍ veu luk suikˆ yinˍ cangˉ mangˉ nae yit pa rawˉ hek ang huiˍ yawng muiˉ ningˉ na ya kyaˍ yao, aˉ mae hpeuˍ laˉ jeuˇ nae yawng baˍ kuitˍ awkˍ laeˍ taw. 25Haeˉ mae beu, changˉ htiˍ hu awngˉ nga langˉ yao ciˍ jiˍ yang, Htawngˉ hkaoˉ veu nawng lawngˉ nga jiˉ changˉ uiˉ aˍ cawngˉ ang huiˍ veu cung yao, changˉ ang byaˍ uiˍ na seungˍ maˍ yao ca ngaeˉ nae yawng na ha laˉ biˍ jiˍ. 26Haeˉ mae beu, Cawngˉ ang huiˍ veu luk suikˆ yinˍ cangˉ nae luk suikˆ htiˍ baˍ uiˍ aeˉ yao, naiˍ htangˍ uiˍ na haoˉ lui naeˉ nae lui jiˉ. Caˇ, changˉ ang byaˍ uiˍ yawng na law ba paek laˍ vaˍ na hkae yao, naiˍ htangˍ uiˍ na hkaˉ puiˍ hkaˍ ha nae baˍ ha. 27Yawng na suiˍ langˉ yao, aˉ muˍ tatˆ naeˉ uiˉ tawngˍ naˍ veu piˉ cung jiˉ. Haeˉ mae beu, yit pa rawˉ hek ang kaeˍ yawng na naˉ jiˉ yangˍ, 28Ang maengˉ ningˉ na cuˉ yao, nawng baˍ yaˍ maˍ baˍ ya upˍ nae gu nawng na saˍ tiˍ piˍ laˍ byaˇ. Hta yao muiˉ, nawng maˍ biˍ jiˍ uiˉ changˉ htiˍ baˍ Yeˍruˆsaˍlaemˍ vengˍ veu puing hko laˉ byaˇ. Yang siˉ jiˉ hingˉ ngaˍ, gu pa nae maˍ nae nawng naˍ hokˍ chiˉ yao ca jiˉ nae ha biˍ jiˍ. 29Peˍtruˆ nae naiˍ htangˍ uiˍ ciˍ jiˍ yang, Changˉ beu ciˍ tangˍ hingˍ htaˍ veu Hpaˍcaoˍ beu ang tangˍ hingˍ na gu ya naˉ yuˉ naeˉ yaˇ. 30Gu beu ang hpiˍ ang puˉ uiˉ beu Hpaˍcaoˍ nawˍ, nawng laˍ kang htaˍ veu htaˍ kap yao siˉ jiˉ Yeˍsuˆ na muiˉ piˉ teˍ laˉ laeˍ byaˇ. 31Iˉsaˍreˍlaˆ changˉ uiˉ naˍ hokˍ na kuitˆ puiˉ laeˍ yao, naˍ hokˍ poiˉ taw naeˉ uiˉ saˍ laiˍ, Hpaˍcaoˍ nawˍ yawng na up peungˍ naeˍ mangˉ hpeuˍ yao, htaiˍ awkˍ naeˍ mangˉ hpeuˍ biˍ naeˍ, yang beu laˍ maˍ kaˍ seu yang na chiˍ ta laeˍ saˍ biˍ byaˇ. 32Gu aˍ awˍ lawng ningˉ uiˉ na sak seˍ hkamˉ naeˉ uiˉ changˉ hpeuˍ naeˍ yaˇ. Yang beu ciˍ tangˍ hingˍ na naˉ yuˉ naeˉ uiˉ changˉ na Hpaˍcaoˍ piˍ saˍ jiˍ Ang hkawˍ laˉ ang seungˍ sangˉ muiˉ sak seˍ hkamˉ naeˉ mangˉ hpeuˍ jiˍ lawˉ yaˇ nae ha biˍ jiˍ. 33Ciˍ tangˍ hingˍ na yawng ya kyaˍ beu nuing ba yinˍ yao, naiˍ htangˍ uiˍ na saeˍ siˍ nae hpeuˍ laˉ biˍ jiˍ. 34Changˉ hkaˉ hko laˉ hko saˍ nyamˉ naeˉ Gaˍmaˍleˍlaˆ nae maengˉ jiˉ Hpaˍriˆsaeˉ htiˍ hu ca jiˉ. Yaˇ ang liˍ ang kawngˍ na maˍ naeˍ uiˉ changˉ htiˍ hu yaˇ. Kanˉ sing lang naeˉ hkaoˉ veu yang hta laˉ yao naiˍ htangˍ uiˍ na tiˍ hkaoˍ suiˍ taw aengˉ voˍ nae yang ang tangˍ piˍ jiˍ. 35Haeˉ mae beu, yang ciˍ jiˍ yang, Iˉsaˍreˍlaˆ changˉ yawng veuˉ, changˉ ningˉ uiˉ na nawng aˉ mae ha naeˉ nawng saˍ tiˍ maenˍ nae ca bu. 36Aˉ mae yao nae baoˇ, cangˉ saˍ jiˍ beu Htuˆdaˆ nae maengˉ jiˉ changˉ htiˍ hu hta laˉ yao, yaˇ ang suingˉ huiˍ htiˍ hu yaˇ nae yang ciˍ ngaeˉ. Yang nawngˍ veu hkeˍ yao aeˉ naeˉ uiˉ changˉ hanˍ pakˍ hu laˉ mae ca laˉ jiˉ. Yang na saeˍ peunˍ yao yang nawngˍ veu hkeˍ naeˍ kaˍ naeˍ uiˉ hpakˍ lang hpaeˉ lang yao kang chaw hko aengˉ byaˇ. 37Yang kangˍ chaw aengˉ yao, ang meungˉ changˉ uiˉ changˉ senˍ ca langˉ kaw beu, Yuˉdaˆ nae maengˉ jiˉ Gaˍliˉlaeˉ changˉ htiˍ hu mangˉ muiˉ taw laˉ yao ang meungˉ changˉ htiˍ baˍ baˍ uiˍ na yang nawngˍ veu hkeˍ lao nae pawngˉ yaˍ jiˍ. Yang muiˉ kangˍ hpya aengˉ yao yang beu ang tangˍ na naˉ yuˉ naeˉ uiˉ changˉ muiˉ hpak hko hpaeˉ hko lang byaˇ. 38Hingˉ pa nae, changˉ ningˉ uiˉ na a muiˉ htiˍ ceuˍ baˍ ha jo. Yawng namˉ yawng na nae ca bu. Yawng kuitˆ jiˉ hingˉ nae yawng vaˍ naeˍ kanˉ ningˉ, changˉ yaˍ uiˍ kawngˉ hpeuˍ laˍ jiˉ uiˉ nae baoˉ vaˍ, kangˍ hpya yao aeˉ naeˉ uiˉ yaˇ. 39Caˇ, Hpaˍcaoˍ kawngˉ hpeuˍ laˉ jiˉ uiˉ nae baoˉ vaˍ, nawng tiˍ chaw yao baˍ kaˍ. Nawng ngaˍ Hpaˍcaoˍ na haenˉ tap naeˉ uiˉ changˉ muiˉ hpeuˍ laˉ naeˉ nae ha biˍ jiˍ. 40Yang ciˍ naeˍ hingˉ na yawng naˉ yao naiˍ htangˍ uiˍ na haoˉ nga aengˉ laeˍ jiˍ. Yawng na tuiˍ peunˍ yao, Yeˍsuˆ beu ang maengˉ na cuˉ yao hao na baˍ ya pawngˉ yaˍ hkiˍ naeˍ uiˉ saˍ laiˍ yawng na ciˍ tangˍ piˍ yao poiˉ nga laeˍ jiˍ. 41Naiˍ htangˍ uiˍ a Ang suingˉ Yeˍsuˆ beu ang maengˉ pa nae baˍ saˍ baˍ nyamˍ nae ha laˍ yao muiˉ ang kuingˉ yaˇ nae Hpaˍcaoˍ maˍ yao chiˉ saˍ jiˉ lawˉ, kanˉ sing naeˉ ang muˉ tawngˍ naˍ veu mawnˍ mawnˍ pyawˉ pyawˉ awkˍ taw aengˉ jiˉ. 42Yawng cu nuing ang buinˉ paˉ kyaˉ cawngˉ ang huiˍ nae yumˉ hkaoˉ veu, Yeˍsuˆ nawˍ Hkrit mangˍ yaˇ nae aˉ mae beu muiˉ maˍ biˍ yao ang cup baˍ chae ang buinˉ maˍ jiˍ.

Currently Selected:

Naiˍ htangˍ 5: pyy

Highlight

Copy