Naiˍ htangˍ 2
2
Ang hkawˍ laˉ ang seungˍ sangˉ lui jiˉ
1Peˍteˍkoˆteˍ poiˍ nuing hkeu laˉ yao yumˉ naeˉ uiˉ changˉ hkaˉ hko laˉ hko htiˍ tawngˍ veu chawnˉ lang jiˉ. 2Haeˉ mae beu, tiˍ chitˍ nae hawˉ manˉ ang haengˍ taw laˉ naeˉ lawˉ ang tangˍ hingˍ buingˍ htaˍ veu buingˉ luiˍ yao, yumˉ hkaoˉ veu ca naeˉ uiˉ changˉ hkaˉ hko laˉ hko ang tangˍ hingˍ na ya kyaˍ jiˍ. 3Haeˉ mae beu, yawng maenˍ haˍ laˍ mae miˍ htawˍ ang laemˍ uiˍ na ya myangˉ jiˉ. Changˉ hkaˉ hko laˉ hko uiˉ kawngˉ maenˍ haˍ htiˍ baˍ uiˍ peungˍ lang yao aeˉ jiˉ na ya myangˉ jiˉ. 4Changˉ hkaˉ hko laˉ hko uiˉ hkaoˉ veu Ang hkawˍ laˉ ang seungˍ sangˉ puing laˉ yao, Ang hkawˍ laˉ maˇ yawng na piˉ ciˍ piˉ htamˉ jiˉ laˉ mae hao changˉ ceuˉ uiˉ beu ciˍ tangˍ uiˍ ciˍ jiˍ. 5Haeˉ mae beu, Hpaˍcaoˍ na saˍ nyamˉ naeˉ Yuˉdaˆ changˉ uiˉ aˍ Yeˍruˆsaˍlaemˍ vengˍ hkaoˍ veu ca jiˉ. Yawng ngaˍ nuingˉ chaˍ htaˍ veu ca naeˉ ang meungˉ ang byaˍ veu lui jiˉ changˉ uiˉ yaˇ. 6Ang tangˍ hingˍ na ya kyaˍ beu, changˉ ang byaˍ uiˍ muiˉ awkˍ taw luiˍ yao chawnˉ hko lui lang jiˉ. Aˉ mae yao nae baoˉ vaˍ, hkaˍ tawng changˉ ceuˉ beu ang tangˍ hingˍ na ya kyaˍ laeˍ yao yawng muiˉ kuitˆ manˍ hko laeˍ jiˍ. 7Aˉ, hkaˍ muˍ hkai yao ca naeˉ changˉ ningˉ uiˉ Gaˍliˉlaeˉ changˉ uiˉ baˍ aˍ la. 8Gu hkaˉ hko laˉ hko aˍ sangˍ yang keutˆ yaˍ lui jiˉ ang meungˉ tangˍ na ya kyaˍ jiˍ ningˉ ngaˍ aˉ mae jeuˇ. 9Gu aˍ Paˍtiˆ changˉ, Meˍdiˆ changˉ, Eˉlanˍ changˉ, Meˍsoˉpoˉtaˍmiˆ ang meungˉ veu duingˉ naeˉ uiˉ changˉ, Yuˉdaˆ ang meungˉ nae Kaˍpaˍdawˆkiˆ ang meungˉ veu duingˉ naeˉ uiˉ changˉ, Poˍtuˆ ang meungˉ nae Aˍsiˆ ang meungˉ veu duingˉ naeˉ uiˉ changˉ, 10Hpuˍgiˆ ang meungˉ nae Paˍpuˆliˆ ang meungˉ veu duingˉ naeˉ uiˉ changˉ, Eˉjiˆtuˆ ang meungˉ nae Kuˆreˍneˍ vengˍ ang huiˍ na chaˍ lang naeˉ uiˉ Liˍbuˆ ang meungˉ changˉ, Roˉmaˆ vengˍ veu lui jiˉ uiˉ hkaekˆ changˉ uiˉ, Yuˉdaˆ changˉ na baˍ upˍ, Yuˉdaˆ ang liˍ ang kawngˍ na caiˍ yao htamˍ naeˍ uiˉ changˉ na baˍ upˍ. 11Kaˍreˍteˍ changˍ nae Aˍrapˆ changˉ uiˉ Hpaˍcaoˍ beu huiˍ sutˆ nae kanˉ hingˉ awˍ lawng hao ciˍ sangˍ laˍ naeˍ na gu aˍ sangˍ yang beu ciˍ tangˍ hingˍ nae ya kyaˍ byaˇ nae yawng ciˍ jiˍ. 12Yawng hkaˉ hko laˉ hko kuitˆ manˍ hko laeˍ yao htiˍ hu nae htiˍ hu, Ba ciˉ jeuˇ hpeuˍ laˉ jiˉ nae naˉ lang jiˉ. 13Changˉ htiˍ baˍ baˍ nawˍ, Changˉ ningˉ uiˉ aˍ makˍ sa pit ang chaˉ ang suiˍ tangˉ maoˍ laeˍ jiˍ nae ciˍ yao hpaˉ batˆ jiˉ.
Peˍteˍkoˆteˍ nuing veu Peˍtruˆ ang buinˉ tangˍ maˍ jiˍ
14Haeˉ mae beu, Peˍtruˆ nawˍ naiˍ htangˍ htiˍ cheˍ nyiˍ hu uiˉ kawngˉ htuˍ yaˍ laˉ mae cung yao, ang tangˍ kaˍ haengˍ nae changˉ uiˉ na maˍ biˍ jiˍ. Yuˉdaˆ ang meungˉ veu duingˉ naeˉ changˉ uiˉ nae Yeˍruˆsaˍlaemˍ vengˍ hkaoˍ veu ca naeˉ changˉ hkaˉ hko laˉ hko uiˉ yawng veuˉ, ga beu ciˍ tangˍ ningˍ na naˉ yao, awˍ lawng ningˉ na bae biˍ bao. 15Changˉ hingˉ uiˉ aˍ nawng kuitˆ naeˉ laˉ mae makˍ sa pit ang chaˉ tangˉ maoˍ laeˍ jiˍ baˍ aˍ. Aˉ mae yao nae baoˇ vaˍ, ya muiˉ saw hta ang nyamˍ kaoˍ naˍ riˍ naeˍ naˇ cangˍ suing ngaeˉ. 16Ningˉ lawng ningˉ ngaˍ pa rawˉ hpaet Yawˉlaˆ ciˍ saˍ jiˍ laˉ mae hpeuˍ laˉ byaˇ.
17Hpaˍcaoˍ ciˍ jiˍ yang, Tawngˍ tin veu
ang nyamˍ#2:17 2 Ti 3:1 hingˍ hkaoˉ veu
changˉ ceuˉ uiˉ hkaˉ hko laˉ hko htaˍ veu ga beu Ang hkawˍ laˉ hingˉ piˍ naeˍ.
Nawng beu ang yaˍ ang hkyaˉ uiˉ pa rawˉ hpaet tangˍ ciˍ naeˍ.
Nawng beu yaˍ hkaˍ uiˍ yuˍ paˍ yongˍ na ya myangˉ naeˉ.
Nawng beu yaˍ mangˍ uiˍ muiˉ mae buinˉ buinˉ yaˍ naeˍ.
18Ang nyamˍ hingˉ nyamˍ uiˍ hkaoˉ veu
ga beu tawngˍ kaˍ htaiˍ veu yaˍ cenˍ kaˍ hpaˍ yaˍ nae hkaˍ ba yaˍ uiˍ muiˉ
ga beu Ang hkawˍ laˉ piˍ yao, yawng ngaˍ pa rawˉ hpaet hpeuˍ yao ang buinˉ maˍ naeˍ.
19Buingˍ htaˍ htaˍ kaˍ seu manˍ kyaˍ htiˍ baˍ uiˍ na baˍ upˍ,
tawngˍ kaˍ nuingˉ chaˍ htaˍ veu ca naeˉ siˍ,
miˍ htawˍ nae miˍ hkaoˍ naˍ mek laek hkaˍ na uiˍ naˍ baˍ upˍ ga maˍ biˍ naeˍ yaˇ.
20Ang suingˉ Hpaˍcaoˍ beu nuing ang huiˍ nae manˍ kyaˍ uiˍ baˍ hkeu langˉ beu,
miˍ nuingˍ hingˍ maˇ plangˉ hkup nga aengˉ yao, awˍ ha hingˉ maˇ shiˍ hpeuˍ laˉ naeˉ.
21Haeˉ mae beu, Ang suingˉ Hpaˍcaoˍ na puing yao haoˉ naeˉ changˉ aˉ mangˉ na baˍ upˍ, Htaiˍ awkˍ naeˍ na ya hkamˉ buˉ naeˉ nae Yawˉlaˆ ciˍ saˍ jiˍ.
22Iˉsaˍreˍlaˆ changˉ yawng veuˉ, ciˍ tangˍ ningˍ na naˉ bao. Nawng bae jiˉ hingˉ lawˉ Hpaˍcaoˍ maˇ Naˍzaˍraet changˉ Yeˍsuˆ na cuˉ yao kanˉ ang huiˍ uiˍ nae manˍ kyaˍ uiˍ naˍ mek laek hkaˍ naˍ uiˍ na yang awˍ lawng nawng maenˍ nae ang bae yaˇ. 23Kaˉ huˍ veu Hpaˍcaoˍ bae laeˍ lang yao kuitˆ chae laeˍ jiˍ lawˉ, Yeˍsuˆ na nawng kawngˉ ap laˍ naeˍ yaˇ. Nawng ngaˍ changˉ haiˉ uiˉ htiˍ baˍ na cuˉ yao yang na laˍ kang htaˍ veu htaˍ kap byaˇ. 24Hta yao muiˉ, Hpaˍcaoˍ nawˍ yang na siˉ naeˉ uiˉ hkaoˉ veu piˉ caeˉ saˍ yao, yaˇ siˉ yao muiˉ yang na piˉ teˍ laˉ laeˍ byaˇ. Aˉ mae yao nae baoˇ, siˉ naeˉ hingˉ ngaˍ yang na baˍ hpui kaˍ yaˍ taw. 25Yang awˍ lawng hingˉ Daˍvet ningˉ mae ciˍ jiˍ.
Ang suingˉ Hpaˍcaoˍ nawˍ ga kawngˉ aˉ lawˍ beun muiˉ ca naeˉ na ga ya myangˉ ngaeˉ yaˇ. Ga yiˍ naenˉ hkiˍ naeˍ uiˉ saˍ laiˍ, ga beu laˍ maˍ kaˍ seu ca naeˉ yaˇ. 26Ningˉ pa nae ga beu nuing ba mawnˍ pyawˉ yao, miˍ tu ningˉ mawnˍ yao chiˍ mawng naeˉ. Ningˉ htaˍ veu muiˉ, ga beu ang to kuitˆ puiˉ laeˍ yao ca naeˉ yaˇ. 27Aˉ mae yao nae baoˇ vaˍ, naˇ ga ang hkawˍ laˉ ningˉ na siˉ naeˉ uiˉ ang meungˉ veu baˍ paek saˍ laˍ. Nang beu Changˉ ang seungˍ sangˉ htiˍ hu na kangˍ naeˍ chaw naeˉ uiˉ hkaoˉ veu baˍ piˍ hpeu laˉ. 28Ang hkawˍ laˉ teˍ yaˍ naeˍ uiˉ kaˉ ba nang ga na maˍ laˍ byaˇ. Nang beu mae kaˍ na ya myangˉ yao, mawnˍ naeˍ uiˉ puing laˉ naeˉ uiˉ saˍ laiˍ nang taeng laˍ naeˍ yaˇ nae Daˍvet ciˍ saˍ jiˍ.
29Yaˍ changˍ mawngˉ namˉ yawng veuˉ, gu beu ang puˉ Daˍvet awˍ lawng maenˍ nae hkai bae laˍ yao ang kaˍ yaˇ. Yaˇ siˉ yao hao yang na hpum nga byaˇ. Hingˉ htaˍ veu muiˉ, yang na hpum jiˉ hingˉ ngaˍ miˉ nuing tiˍ hkeu gu kawngˉ ca suiˍ naeˍ. 30Yaˇ pa rawˉ hpaet hpeuˍ yao yang beu ang luˍ hanˍ htiˍ hu na ang suingˉ hpeuˍ biˍ naeˍ nae Hpaˍcaoˍ saˉ caˉ ciˍ yao chiˉ saˍ jiˍ na hkamˉ yuˉ jiˉ nae yaˇ ang bae yaˇ. 31Hingˉ pa nae, Yeˍsuˆ Hkritˆ teˍ laˉ laeˍ naeˍ lawng hingˉ na kaˉ huˍ veu nae Daˍvet kuitˆ bae yao, Yeˍsuˆ Hkritˆ na siˉ naeˉ ang meungˉ veu baˍ paek saˍ nae htaˍ veu muiˉ, yang beu ang to baˍ ya puˍ baˍ ya keungˉ nae Daˍvet ciˍ jiˍ. 32Yeˍsuˆ ningˉ mangˉ na Hpaˍcaoˍ piˉ teˍ yaˍ laˉ laeˍ jiˍ. Gu hkaˉ hko laˉ hko muiˉ ningˉ awˍ lawng na sak seˍ hkamˉ naeˉ changˉ uiˉ yaˉ. 33Haeˉ mae yao, Hpaˍcaoˍ beu tanˉ hkoˉ laˍ maˍ kaˍ seu yang na yuˉ huiˍ yuˉ mawng yao, A vangˉ ciˍ jiˍ lawˉ, Ang hkawˍ laˉ ang seungˍ sangˉ hingˉ na Yeˍsuˆ ya naeˉ yaˇ. Ya muiˉ nawng ya kyaˍ yaˍ bae jiˉ lawˉ Ang hkawˍ laˉ mangˉ hawt laˍ naeˍ yaˇ. 34Daˍvet nawˍ buingˍ htaˍ htaˍ veu ta laengˉ jiˉ baˍ aˍ. Caˇ, yang ang to ciˍ jiˍ,
Ang suingˉ Hpaˍcaoˍ nawˍ ga beu Ang suingˉ mangˉ na ha biˍ jiˍ yang,
35Nang beu lanˍ suˍ uiˍ na nang beu laˍ hkuiˍ tawngˍ kaˍ veu ga chiˉ ka laˍ beu tiˍ hkeu,
ga beu laˍ maˍ kaˍ seu ca voˍ nae Daˍvet ciˍ jiˍ.
36Hingˉ pa nae Iˉsaˍreˍlaˆ changˉ hkaˉ hko laˉ hko ningˉ na maenˍ nae bae voˍ. Nawng laˍ kang htaˍ veu htaˍ siˍ jiˉ Yeˍsuˆ ningˉ mangˉ na Hpaˍcaoˍ nawˍ Ang suingˉ piˉ hpeuˍ laˉ jiˉ. Yaˇ Hpaˍcaoˍ sa luiˍ naeˍ nae satˉ caˉ chiˉ jiˉ Hkrit mangˍ yaˇ nae Peˍtruˆ ciˍ jiˍ. 37Haeˉ mae ya kyaˍ beu, changˉ uiˉ nuing ba manˍ hawngˉ yao, ang pawngˍ aiˉ yawng veuˉ, gu aˉ mae ya ha naeˉ nae Peˍtruˆ nae naiˍ htangˍ htiˍ baˍ uiˍ na naˉ jiˉ. 38Peˍtruˆ yawng na hkai biˍ jiˍ yang, Nawng beu naˍ hokˍ hingˍ na poiˉ taw naeˉ uiˉ saˍ laiˍ, changˉ uiˉ hkaˉ hko laˉ hko kuitˆ puiˉ laeˍ yao Yeˍsuˆ Hkritˆ beu ang maengˉ hkaoˉ veu baˆtiˆsamˍ hkamˉ yuˉ bao. Haeˉ mae ha baoˉ vaˍ, Ang hkawˍ laˉ ang seungˍ sangˉ beu lapˍ sawngˍ na ya naeˉ yaˇ. 39Aˉ mae yao nae baoˇ vaˍ, Hpaˍcaoˍ beu saˉ caˉ ningˉ ngaˍ, nawng saˍ laiˍ muiˍ, nawng yaˍ nawng hkyaˉ saˍ laiˍ muiˍ, veuˍ yao ca naeˉ yawng kawngˉ muiˉ gu beu Ang suingˉ Hpaˍcaoˍ hkaˉ haoˉ naeˉ uiˉ changˉ saˍ laiˍ muiˍ hpeuˍ naeˍ yaˇ nae ciˍ jiˍ. 40Yang ang byaˍ ceuˍ sak seˍ hkamˉ yao maˍ biˍ jiˍ hkaoˉ veu, Nuing ba koiˍ naeˍ ningˉ changˉ tuingˍ co hkaoˉ veu ya caeˉ taw hkiˍ naeˍ uiˉ saˍ laiˍ vaˍ vo nae yawng na kaˍ piˍ htaengˍ jiˍ.
41Ang buinˉ tangˍ hingˍ na nuing ba suiˍ hkaoˍ veu hkamˉ yuˉ jiˉ uiˉ aˍ baˆtiˆsamˍ hkamˉ yuˉ yao hingˉ nuing veu sumˍ hingˍ hu laˉ mawk changˉ uiˉ byaˍ laˉ jiˉ. 42Changˉ hingˉ uiˉ aˍ naiˍ htangˍ uiˍ maˍ biˍ naeˍ na naˉ yao, ang changˍ taeng lang yao, Ang suingˉ beu poiˉ caoˍ#2:42 Nht 2:46; Nht 20:7, 11 caˍ yao, ang buinˉ paˉ naeˉ hingˉ na aˉ lawˍ beun muiˉ ha yao ca jiˉ.
Yumˉ naeˉ uiˉ changˉ yawng piˉ yaˍ kamˍ yaˍ lang jiˉ
43Naiˍ htangˍ yawng na manˍ kyaˍ ang byaˍ nae na mek laek hkaˍ naˍ ang byaˍ uiˍ na ha yao, changˉ ang byaˍ uiˍ manˍ yao ca jiˉ. 44Yumˉ naeˉ saˉ naeˉ changˉ hkaˉ hko laˉ hko htiˍ muˍ laˍ mae taeng laeˍ yao, yawng beu ang keungˍ ang kawˉ uiˉ htuˍ yaˍ laˉ mae caiˍ yaˍ jiˍ. 45Ang keungˍ ang kawˉ uiˉ nae yawng beu ya kyaˉ teuk uiˉ na kawngˍ ka yao loˉ naeˉ uiˉ changˉ aˉ mangˉ na baˍ upˍ hkaˉ hko laˉ hko na peungˍ biˍ jiˍ. 46Cu nuing yawng ang buinˉ paˉ kyaˉ cawngˉ ang huiˍ veu lae naeˉ htaˍ veu muiˉ yawng yumˉ hkaoˉ veu hkaoˍ munˉ hpaetˍ yao mawnˍ pyawˉ naeˉ hkaoˉ veu nuing ba htiˍ suiˍ laˍ mae chiˉ yao yawng htuˍ yaˍ laˉ mae ang caˍ caˍ jiˍ. 47Yawng Hpaˍcaoˍ na chiˍ mawng yao changˉ uiˉ hkaˉ hko laˉ hko yawng na nuing ba capˆ jiˉ. Cu nuing Hpaˍcaoˍ maˇ htaiˍ awkˍ jiˍ na ya jiˉ changˉ uiˉ muiˉ yawng ang muˉ hkaoˉ veu piˉ byaˍ laˉ jiˉ.
Currently Selected:
Naiˍ htangˍ 2: pyy
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
