Naiˍ htangˍ 14

Pawˉluˆ nae Baˍnaˍbaˆ yaˉ yetˍ Iˉkawˉniˆ vengˍ veu ca beu

1Yaˉ yetˍ Iˉkawˉniˆ vengˍ veu hkeu yao, Yuˉdaˆ changˉ ceuˉ hpawm lang kyaˉ hkaoˉ veu htuˍ yaˍ laˉ mae awngˉ lae jiˉ. Hiˉ keung yaˉ yetˍ maenˍ nae maˍ biˍ yao, Yuˉdaˆ changˉ nae Heˍlaˍsaˆ changˉ uiˉ ang byaˍ yumˉ saˉ laˉ jiˉ. 2Caˇ, baˍ yumˍ nae uiˉ Yuˉdaˆ changˉ htiˍ baˍ uiˉ aˍ, Changˉ ceuˉ htiˍ baˍ uiˍ na htuing nga biˍ yao, yaˍ changˍ mawngˉ namˉ uiˉ na hu buinˉ naeˉ uiˉ saˍ laiˍ ha jiˉ. 3Yaˉ yetˍ hiˉ keung veu ang mangˍ ca yao, Yeˍsuˆ hkaoˉ veu nuing ba hatˆ nae taeng nga laeˍ yao maˍ biˍ jiˍ. Ang suingˉ Yeˍsuˆ muiˉ, yaˉ yetˍ na cuˉ yao na mek laek hkaˍ naˍ ha taw naeˉ uiˉ laˍ htiˍ tanˇ hkoˇ uiˉ piˍ naeˍ hkaoˉ veu yang beu ang buinˉ tangˍ maˍ naeˍ uiˉ ang tangˍ saˍ laiˍ saˉ hkiˉ hkamˉ jiˉ. 4Caˇ, vengˍ changˍ htiˍ baˍ uiˍ, nyiˍ muˍ hpeuˍ laˉ yao, htiˍ baˍ uiˉ aˍ Yuˉdaˆ changˉ uiˉ kaˉ seu ca yao, htiˍ baˍ uiˉ aˍ naiˍ htangˍ uiˍ kaˉ seu ca jiˉ. 5Pawˉluˆ nae Baˍnaˍbaˆ na baˍ saˍ baˍ nyamˍ nae ha yao law ba paek naeˉ saˍ laiˍ Changˉ ceuˉ htiˍ baˍ uiˍ nae Yuˉdaˆ changˉ htiˍ baˍ uiˉ aˍ, yawng awn hoˉ htiˍ baˍ uiˍ kawngˉ htuˍ yaˍ laˉ mae kuitˆ chae laeˍ jiˍ. 6Ningˉ na yaˉ yetˍ ya bae beu, Luˆkawˉniˆ ang meungˉ hkaoˉ veu ca naeˉ Luˉtaˍraˆ vengˍ, Deˍbeˍ vengˍ nae, ang tawngˍ htang veu hpangˉ nga aengˉ jiˉ. 7Ang meungˉ hingˉ hkaoˉ veu muiˉ, yaˉ yetˍ ang buinˉ tangˍ maˍ biˍ jiˍ.

Luˉtaˍraˆ vengˍ veu Pawˉluˆ na hao law ba paek jiˉ

8Luˉtaˍraˆ vengˍ hkaoˍ veu laˍ hkuiˍ ang hkleuk htiˍ hu duingˉ yao ca jiˉ. Yang keutˆ yaˍ lui beu nae laˍ hkeuˍ ang hkleuk nae yao, kaˉ ba htiˍ cangˍ nae muiˉ baˍ yawˍ myang. 9Yaˇ Pawˉluˆ maˍ biˍ naeˍ na naˉ yao ca jiˉ. Pawˉluˆ yang na maenˍ nae hu yao, pyo laˉ naeˉ nae yang yumˉ naeˉ nuing ba ca naeˉ na bae jiˉ. 10Haeˉ mae beu, ang tangˍ kaˍ haenˍ nae haoˉ yao, Pawngˉ nae cung ngangˉ voˍ nae yang na ha biˍ jiˍ. Yang peuk laˉ yao, kaˉ ba yawˍ aengˉ jiˉ. 11Pawˉluˆ niˉ mae ha naeˉ na changˉ ang muˉ uiˉ ya myangˉ beu, yawng ngaˍ Luˆkawˉniˆ tangˍ ciˍ yao, hpaˍcaoˍ htiˍ baˍ uiˍ, changˉ yaˍ laˍ mae taeng yao gu kawngˉ lungˍ nga luingˉ byaˇ nae, ang tangˍ kaˍ haengˍ nae haoˉ jiˉ. 12Yawng ngaˍ Baˍnaˍbaˆ na Cuˇsaˆ nae maengˉ biˍ jiˍ. Pawˉluˆ nawˍ ya caeˉ hkaˍ muˍ hkai naeˉ pa, yang na nawˍ Heˍmeˍ nae maengˉ biˍ jiˍ. 13Vengˍ ang ngiˉ veu Cuˇsaˆ beu deˍ yaˍ cawngˉ htiˍ cawngˍ ca jiˉ. Cuˇsaˆ beu deˍ yaˍ cawngˉ hingˉ na chaˍ lang naeˉ pa rawˉ hek htiˍ hu maˇ, aˍ myangˍ htiˍ baˍ nae vae yaˍ uiˍ vengˍ langˉ kaw veu hanˉ na luingˉ yao, changˉ ang muˉ uiˉ kawngˉ htuˍ yaˍ laˉ mae yaˉ yetˍ na tanˍ biˍ ceuˉ nae kuitˆ yao ca jiˉ. 14Caˇ, naiˍ htangˍ Baˍnaˍbaˆ nae Pawˉluˆ yaˉ yetˍ hingˉ awˍ lawng na ya kyaˍ beu nuing ba baˍ buiˍ nae hkaoˉ veu, yaˉ yetˍ beu ang kaˍ tum hingˉ na chit lakˍ yao changˉ ang muˉ hkaoˉ veu huinˍ awngˍ nga aengˉ yao ciˍ jiˍ yang, 15Ang changˍ htiˍ baˍ yawng veuˉ, ba ceuˉ ha yao niˉ mae ha naeˇ. Gaˉ yetˍ muiˍ nawng laˉ mae changˉ ang yaˍ naeˍ naˇ. Ang buinˉ baˍ ca nae ningˉ kanˉ uiˉ na paek nga saˍ yao, teˍ yaˍ yao ca naeˉ Hpaˍcaoˍ kawngˉ hpap yao lui laeˍ naeˍ saˍ laiˍ, gaˉ yetˍ nawngˍ na mawnˍ pyawˉ naeˉ uiˉ ang buinˉ tangˍ maˍ laˍ naeˍ yaˇ. Teˍ yaˍ yao ca naeˉ Hpaˍcaoˍ maˇ buingˍ htaˍ, nuingˉ chaˍ, chaˍ maeˍ langˍ ba nae hingˉ uiˉ hkaoˉ veu hkaˉ ca naeˉ uiˉ na peungˍ cawngˉ jiˉ mangˉ yaˇ. 16Caeˉ langˉ saˍ jiˍ coe htiˍ baˍ uiˍ beu, changˉ ceuˉ hkaˉ hko laˉ hko na aˍ sangˍ yang beu aˍ loˍ hkaoˍ veu ha voˍ nae Hpaˍcaoˍ nawˍ poiˉ yao chiˉ jiˉ. 17Caˇ, yang awˍ lawng saˉ hkiˉ hkamˉ naeˉ uiˉ na yang chiˉ saˍ jiˍ. Aˉ mae yao nae baoˉ vaˍ, yang maenˍ naeˍ kanˉ na vaˍ yao, buingˍ htaˍ veu miˍ hawˍ piˉ lui jiˉ. Ang suiˍ ang nuing suiˍ luiˍ naeˍ uiˉ saˍ laiˍ ang nyamˍ piˍ jiˍ. Caˍ keungˍ tangˍ kawˉ htiˍ puing piˉ yaˍ yao, nuing ba buiˍ yao mawnˍ pyawˉ beu htiˍ hkeu yang piˍ laˍ naeˍ nae yaˉ yetˍ kaˍ haengˍ haoˉ jiˉ. 18Ningˉ mae ciˍ yao muiˉ, changˉ ang muˉ uiˉ yaˉ yetˍ na baˍ ya tanˍ laˉ naeˉ uiˉ saˍ laiˍ, haenˉ yao baˍ kaˍ yaiˍ seuˉ seu hpeuˍ jiˍ. 19Hingˉ nawngˍ veu, Anˍtiˉokˆ vengˍ nae Iˉkawˉniˆ vengˍ veu duingˉ naeˉ Yuˉdaˆ changˉ htiˍ baˍ uiˇ, changˉ ang muˉ uiˉ na hkai capˆ lang yao, Yawng Pawˉluˆ na law ba paek jiˉ. Yang siˉ byaˇ nae kuitˆ yao, yang na vengˍ ang nyiˉ veu seu yao paek aeˉ jiˉ. 20Caˇ, ta peˍ uiˍ yang na cung cawtˍ piˍ yao, yang hta laˉ yao vengˍ hkaoˍ veu aeˉ laeˍ jiˍ. Kaˉ nawngˍ veu htiˍ nuing hingˉ ngang beu Pawˉluˆ Baˍnaˍbaˆ kawngˉ htuˍ yaˍ laˉ mae Deˍbeˍ vengˍ veu aeˉ laeˍ jiˍ.

Suˉriˆ ang meungˉ Anˍtiˉokˆ vengˍ veu laˉ laeˍ jiˍ

21Deˍbeˍ vengˍ hingˍ hkaoˉ veu Pawˉluˆ nae Baˍnaˍbaˆ yaˉ yetˍ mawnˍ pyawˉ naeˉ uiˉ ang buinˉ tangˍ maˍ biˍ yao, changˉ ang byaˍ na taˍ peˍ hpeuˍ laˉ biˍ jiˍ. Nae yao, Luˉtaˍraˆ vengˍ, Iˉkawˉniˆ vengˍ nae Piˆsiˇdiˆ ang meungˉ Anˍtiˉokˆ vengˍ hkaoˍ veu aeˉ laeˍ jiˍ. 22Taˍ peˍ uiˍ nuing ba yiˍ naenˉ laˉ yao, yumˉ naeˉ hkaoˉ veu yiˍ hkiˍ naeˍ uiˉ saˍ laiˍ, yawng na kaˍ piˍ jiˍ. Hpaˍcaoˍ upˆ peungˍ nae na hap yuˉ naeˉ uiˉ saˍ laiˍ gu tuk naeˉ hpan naeˉ na ang byaˍ ya hkamˉ buˉ naeˉ yaˇ nae yawng na maˍ biˍ jiˍ. 23Yawng ang caˍ cheˉ yao, ang buinˉ paˉ naeˉ hkaoˉ veu, Hkritˆ yanˍ ang muˉ kaˉ hko laˉ hko saˍ laiˍ awnˍ hoˉ yaˍ manˍ htiˍ baˍ uiˍ na cheˉ taw yao, yawng yumˉ yao ca naeˉ Ang suingˉ Hpaˍcaoˍ beu laˍ puˍ hkaoˍ veu ap yao piˍ jiˍ.

Suˉriˆ ang meungˉ Anˍtiˉokˆ vengˍ veu aeˉ laeˍ jiˍ

24Peunˉ na yao, Pawˉluˆ nae Baˍnaˍbaˆ yaˉ yetˍ Piˆsiˇdiˆ ang meungˉ veu hpai nga aengˉ yao Paˍpuˆliˆ ang meungˉ veu hkeu aeˉ jiˉ. 25Peˍraˍgeˍ vengˍ hkaoˍ veu ang buinˉ tangˍ maˍ peunˍ yao, yaˉ yetˍ Aˍtaˍliˆ vengˍ veu aeˉ laeˍ jiˍ. 26Hiˉ keung veu heuˍ ta yao, Suˉriˆ ang meungˉ Anˍtiˉokˆ vengˍ veu aeˉ laeˍ jiˍ. Vengˍ hingˍ hkaoˉ veu caeˉ langˉ saˍ beu yaˉ yetˍ Hpaˍcaoˍ beu kanˉ vaˍ naeˍ uiˉ saˍ laiˍ, ang buinˉ piˍ jiˉ mangˉ Hpaˍcaoˍ beu laˍ puˍ hkaoˍ veu, hao yaˉ yetˍ na ap yao piˍ saˍ jiˍ. Ya muiˉ kanˉ hingˉ na yaˉ yetˍ vaˍ puing byaˇ. 27Yaˉ yetˍ hkeu laˉ beu, Hkritˆ yanˍ ang muˉ na haoˉ chawnˉ jiˉ. Hpaˍcaoˍ yaˉ yetˍ na cuˉ yao ha jiˉ uiˉ kanˉ na baˍ upˍ, Changˉ ceuˉ htiˍ baˍ uiˍ yumˉ taw naeˉ uiˉ saˍ laiˍ, Hpaˍcaoˍ langˉ kaw hpawng biˍ jiˍ na baˍ upˍ, yaˉ yetˍ ha biˍ jiˍ. 28Hingˉ keung veu, yaˉ yetˍ ta peˍ uiˍ kawngˍ iˉ yaˍ ang mangˍ ca jiˉ.

Currently Selected:

Naiˍ htangˍ 14: pyy

Highlight

Copy