Naiˍ htangˍ 13

Baˍnaˍbaˆ nae Sawˉluˆ yaˉ yetˍ na Hpaˍcaoˍ beu kanˉ vaˍ naeˍ uiˉ saˍ laiˍ cheˉ yuˉ jiˉ

1Anˍtiˉokˆ Hkritˆ yanˍ ang muˉ hkaoˉ veu, pa rawˉ hpaet nae maˍ naeˍ uiˉ changˉ uiˉ ca jiˉ. Changˉ hingˉ uiˉ aˍ Baˍnaˍbaˆ, Niˇgaˍ nae maengˉ jiˉ Siˉmunˍ, Kuˆreˍneˍ ang meungˉ changˉ Luˆkiˆ, ang suingˉ Heˍrot Anˍtiˆpaˆ beu ang changˍ Maˍneˍ nae Sawˉluˆ yawng yaˇ. 2Yawng Ang suingˉ Hpaˍcaoˍ na koˉ koiˍ yao ang caˍ cheˉ yao ca beu, Ang hkawˍ laˉ ang seungˍ sangˉ ciˍ jiˍ. Ga piˉ vaˍ jiˍ kanˉ na Baˍnaˍbaˆ nae Sawˉluˆ vaˍ naeˍ uiˉ saˍ laiˍ, yaˉ yetˍ na cheˉ yuˉ yao chiˉ voˍ nae ha biˍ jiˍ.

3Haeˉ mae beu, yawng ang caˍ cheˉ yao, ang buinˉ paˉ peunˉ naeˉ nawngˍ veu, yaˉ yetˍ htaˍ veu laˍ puˍ boeˉ nga biˍ yao poiˉ aeˉ jiˉ.

Kuˇpaˉruˆ cunˉ veu Pawˉluˆ nae Baˍnaˍbaˆ ang buinˉ tangˍ maˍ jiˍ

4Ang hkawˍ laˉ ang seungˍ sangˉ Baˍnaˍbaˆ nae Sawˉluˆ yaˉ yetˍ na piˉ aeˉ jiˉ lawˉ Seˍluˍkiˆ vengˍ veu aeˉ jiˉ. Peunˉ na yao, Kuˇpaˉruˆ cunˉ veu heuˍ ta yao aeˉ jiˉ. 5Kuˇpaˉruˆ cunˉ Saˍlaˍmiˆ vengˍ veu yaˇ yetˍ hkeu lae beu, Yuˉdaˆ changˉ uiˉ beu hpawm lang kyaˉ hkaoˉ veu htiˍ baˍ uiˍ beu Hpaˍcaoˍ beu ang buinˉ tangˍ maˍ biˍ jiˍ. Yoˉhanˍ muiˍ yaˉ yetˍ na pawngˍ van jiˉ.

6Yawng cunˉ hingˉ hkaoˉ veu htiˍ tawngˍ peunˉ yao htiˍ tawngˍ aeˉ yao, Paˍhpuˆ vengˍ veu hkeu aeˉ beu, Baˍyeˍsuˆ nae maengˉ jiˉ Yuˉdaˆ changˉ htiˍ hu na ya myangˉ lang jiˉ. Yaˇ maenˍ bawˍ bawˍ naeˍ uiˉ ang hkiˍ pa rawˉ hpaet aˍ tuˆ htiˍ hu mangˉ yaˇ. 7Changˉ hiˉ maˇ, Seˍraˍgiˆ Pawˉluˆ nae maengˉ jiˉ ang kuitˆ ang haoˉ hkiˍ uiˍ ang suingˉ huiˍ kawngˉ ca naeˇ yaˇ. Ang suingˉ huiˍ hiˍ maˇ, Hpaˍcaoˍ beu ang tangˍ na ya kyaˍ yao, Baˍnaˍbaˆ nae Sawˉluˆ yaˉ yetˍ na haoˉ jiˉ. 8Hta yao muiˉ Eˉluˆmaˍ#13:8 Eˉluˆmaˍ nawˍ Baˍyeˍsuˆ yaˇ nawˍ ang suingˉ mangˉ Yeˍsuˆ na baˍ ya yumˉ naeˉ uiˉ saˍ laiˍ yaˉ yetˍ na haenˉ tap jiˉ. (Eˉluˆmaˍ nae ha naeˉ ningˉ ngaˍ maenˍ bawˍ bawˍ naeˍ uiˉ na ha siˉ naeˉ). 9Haeˉ mae beu, Pawˉluˆ nae maengˉ jiˉ Sawˉluˆ htiˍ hu maˇ, Ang hkawˍ laˉ ang seungˍ sangˉ htiˍ puing nae ca yao, maenˍ bawˍ bawˍ naeˍ mangˉ na hu chawk chawk yao ha biˍ jiˍ yang, 10Saˍtanˍ beu ang yaˍ veuˉ, nang beu tiˍ kaeˍ kaeˍ nae uiˉ nae ang haiˉ kanˉ htiˍ puing ang ca yaˇ. Ang sui ang pawng hkaˉ hko laˉ hko uiˉ beu lanˍ suˍ htiˍ hu mangˉ muiˉ naˇ hpeuˍ naeˍ yaˇ. Ang suingˉ Hpaˍcaoˍ beu kaˉ ba ang sui ang pawng htiˍ baˍ uiˍ na piˉ koiˍ laˉ naeˉ uiˉ saˍ laiˍ naˇ baˍ saoˍ laeˍ nae vaˍ yao ca ngaeˉ laˍ. 11Ya muiˉ Ang suingˉ Hpaˍcaoˍ beu tanˇ hkoˇ nang htaˍ veu hkeu lui yao, naˇ mae paw paw yao ang nyamˍ ang mangˍ miˍ nuingˍ na baˍ ya myangˉ nae ha biˍ jiˍ. Htiˍ chitˍ nae yang htaˍ veu buingˍ hkaiˍ laˍ mae hkeu lui yao, yang beu laˍ puˍ hingˍ na chuingˉ ngangˉ naeˉ nae, yang hao na saˉ cangˉ jiˉ. 12Ningˉ mae hpeuˍ laˉ jiˉ hingˉ na ang suingˉ huiˍ mangˍ ya bae beu, yang yumˉ jiˉ. Aˉ mae yao nae baoˇ, Hpaˍcaoˍ maˍ biˍ jiˍ tangˍ hingˍ na yang manˍ jiˍ.

Piˆsiˇdiˆ ang meungˉ Anˍtiˉokˆ vengˍ hkaoˍ veu ca beu awˍ lawng

13Pawˉluˆ nae yang beu ang changˍ htiˍ baˍ uiˍ, Paˍhpuˆ vengˍ veu hta yao, Paˍpuˆliˆ ang meungˉ Peˍraˍgeˍ vengˍ veu heuˍ ta yao laeˍ jiˉ. Hiˉ keung Yoˉhanˍ yaˉ yetˍ na hpakˍ lang yao, Yeˍruˆsaˍlaemˍ vengˍ veu aeˉ laeˍ jiˍ. 14Haeˉ mae beu, Yaˉ yetˍ Peˍraˍgeˍ vengˍ veu ca yao, Piˆsiˇdiˆ ang meungˉ Anˍtiˉokˆ vengˍ veu hkeu lui jiˉ. Vanˍ sin nuing veu yaˉ yetˍ Yuˉdaˆ changˉ ceuˉ hpawm lang kyaˉ veu lae yao duingˉ lae jiˉ. 15Ang liˍ ang kawngˍ ang laiˍ hingˍ nae pa rawˉ hpaet uiˉ beu ang laiˍ hingˍ hao hpatˆ peunˉ yao, Yuˉdaˆ changˉ ceuˉ hpawm lang kyaˉ veu ang kaeˍ htiˍ baˍ uiˍ, yaˉ yetˍ kawngˉ changˉ piˉ lae yao, yaˍ changˍ mawngˉ namˉ htiˍ baˍ yawng veuˉ, changˉ ningˉ uiˉ na kaˍ piˍ seuˍ ang tangˍ ang ca nae baoˇ piˍ htaengˍ vo nae ha biˍ jiˍ. 16Haeˉ mae beu, Pawˉluˆ hta laˉ yao laˍ puˍ kang nae aˍ ciˍ caeoˍ jo nae ha biˍ yao, Iˉsaˍreˍlaˆ changˉ ceuˉ uiˉ nae Hpaˍcaoˍ na hkae naeˉ uiˉ changˉ ceuˉ htiˍ baˍ yawng veuˉ, naˉ baoˍ. 17Iˉsaˍreˍlaˆ changˉ ceuˉ uiˉ beu Hpaˍcaoˍ nae, gu beu ang puˉ yaˍ mangˍ htiˍ baˍ na cheˉ yuˉ yao, yawng Eˉjiˆtuˆ ang meungˉ hkaoˉ veu ca beu, yawng na chiˍ huiˍ chiˍ mawng jiˉ. Kaˉ nawngˍ veu Hpaˍcaoˍ nawˍ yang beu tanˉ hkoˇ hingˉ nae Eˉjiˆtuˆ ang meungˉ veu chuingˉ awkˍ nga aengˉ jiˉ. 18Changˍ kawngˍ ang kui veu hanˍ cheˍ pi laˉ mawk, yawng vaˍ jiˍ ang liˍ htiˍ baˍ uiˍ na yang otˆ jiˉ. 19Hkaˍnanˍ ang meungˉ veu ca naeˉ changˉ cetˍ ceuˍ uiˍ na Hpaˍcaoˍ tiˍ kangˍ peunˍ yao,

20Yang changˉ htiˍ baˍ hingˍ uiˉ beu ang meungˉ yangˍ Iˉsaˍreˍlaˆ changˉ uiˉ na piˍ jiˍ. Ningˉ hkaˉ hko laˉ hko ningˉ ngaˍ hanˍ pakˍ ngaˍ cheˍ pi mangˍ jiˍ yaˇ. Hingˉ nawngˍ veu, pa rawˉ hpaet Saˍmoeˍlaˆ beu coe veu tiˍ hkeu, Hpaˍcaoˍ yawng na aˉ muˍ tatˆ naeˉ uiˉ piˍ jiˍ. 21Haeˉ mae beu, yawng ang suingˉ paˉ yao, Benˍyaˍmenˍ beu ang ceuˉ ang cat Kiˆsaˆ beu ang yaˍ Sawˉluˆ htiˍ hu hanˍ cheˍ pi beu tiˍ hkeu ang suingˉ hpeuˍ naeˍ nae Hpaˍcaoˍ yawng na piˍ jiˍ. 22Hpaˍcaoˍ yang na yuˉ yao paek taw peunˉ naeˉ nawngˍ veu, yawng beu ang suingˉ hpeuˍ biˍ naeˍ nae, Daˍvet na yuˉ huiˍ laeˍ jiˍ. Ga nuing ba cap naeˉ uiˉ changˉ, Yeˍsaeˉ beu ang yaˍ Daˍvet na ga ya myangˉ nga byaˇ. Yaˇ ga beu a loˍ na htiˍ puing vaˍ naeˍ uiˉ saˍ laiˍ yaˇ nae ha biˍ jiˍ. 23Hpaˍcaoˍ saˉ caˉ piˍ saˍ jiˍ lawˉ, Daˍvet beu ang ceuˉ ang canˉ hkaoˉ veu Iˉsaˍreˍlaˆ changˉ uiˉ saˍ laiˍ htaiˍ awkˍ naeˍ yumˉ suingˉ mangˉ Yeˍsuˆ na yang taw laˉ biˍ jiˍ. 24Yeˍsuˆ baˍ taw laˉ beu hingˉ huˍ veu, Yoˉhanˍ nawˍ naˍ hokˍ na kuitˆ puiˉ laeˍ naeˍ uiˉ na chaˍ lang naeˉ baˆtiˆsamˍ awˍ lawng Iˉsaˍreˍlaˆ changˉ hkaˉ hko laˉ hko uiˉ na maˍ biˍ jiˍ. 25Yoˉhanˍ nawˍ, yang beu kanˉ saˉ vaˍ peunˍ nae beu yang ciˍ jiˍ. Gaˇ aˍ sangˍ nae nawng kuitˆ yao ca ngaeˇ. Gaˇ changˉ hiˉ mangˉ baˍ aˍ. Caˇ, changˉ hiˉ maˇ ga nawngˍ veu lui yao ca ngaeˉ. Yang beu hkiˉ naw laˍ tuiˍ hingˍ na hpuiˉ biˍ yao muiˉ gaˇ baˍ kuingˍ nae yang ciˍ jiˍ.

26Aˍbraˍhamˍ ang ceuˉ canˉ ang luˍ han uiˉ nae, nawng hkaoˉ veu Hpaˍcaoˍ na hkae naeˉ yaˍ changˍ mawngˉ namˉ yawng veuˉ, Hpaˍcaoˍ gu na htaiˍ awkˍ naeˍ uiˉ awˍ lawng piˉ kyaˍ peunˍ la byaˇ. 27Aˉ mae yao nae baoˉ vaˍ, Yeˍruˆsaˍlaemˍ vengˍ hkaoˍ veu ca naeˉ changˉ uiˉ aˍ yawng beu awn hoˉ htiˍ baˍ uiˍ na nae, yang na baˍ bae. Cu sinˉ pa rawˉ hpaet uiˉ hpatˆ yao ca naeˉ ang laiˍ hingˍ na muiˉ baˍ naˍ hki baˍ bae. Caˇ, yang na aˉ muˍ tatˆ biˍ naeˍ hkaoˉ veu yang ang tangˍ hingˍ na taeng puing lui biˍ jiˍ. 28Yang beu siˉ yao kuingˉ nae uiˉ ang si naˍ hokˍ na yawng baˍ myangˍ nae yao muiˉ, yang na ya saeˍ naeˍ uiˉ saˍ laiˍ ang suingˉ Piˉlatˆ kawngˉ paˉ jiˉ. 29Yang awˍ lawng na taemˉ yao hkaˉ chiˉ jiˉ laˉ mae yawng ha puing hko naeˉ nawngˍ veu, yang na laˍ kang htaˍ veu yuˉ lungˍ luiˍ yao, law ba ang hkawngˉ veu hyang aeˉ jiˉ. 30Caˇ, Hpaˍcaoˍ nawˍ yang na siˉ naeˉ hkaoˉ veu piˉ teˍ laˉ laeˍ jiˍ. 31Gaˍliˉlaeˉ ang meungˉ veu ca yao, Yeˍruˆsaˍlaemˍ vengˍ veu tiˍ hkeu yang kawngˉ aeˉ myangˉ jiˉ uiˉ changˉ uiˉ na ang nyamˍ iˉ yaˍ mangˍ nae yang ang to hingˉ piˉ myangˉ jiˉ. Changˉ hingˉ uiˉ aˍ, ya muiˉ hao tawngˍ naˍ veu saˉ hkiˉ hkamˉ naeˉ changˉ hpeuˍ byaˇ. 32Ang puˉ yaˍ mangˍ uiˍ na Hpaˍcaoˍ saˉ caˉ piˍ saˍ jiˍ lawˉ, mawnˍ pyawˉ naeˉ ang buinˉ tangˍ ningˍ yaˉ yetˍ nawng na maˍ laˍ naeˍ yaˇ. 33Hpaˍcaoˍ nawˍ, gu beu ang puˉ uiˉ na saˉ caˉ piˍ saˍ jiˍ lawˉ puing hko laˉ byaˇ. Yawng beu ang yaˍ hpeuˍ naeˍ uiˉ gu na yang taeng puing laˍ naeˍ yaˇ. Chiˍ mawng naeˉ ang laiˍ nyiˍ lumˍ htiˍ lumˍ hkaoˍ veu taemˉ jiˉ lawˉ,

Naˇ ga beu Ang yaˍ mangˍ yaˇ.

Miˉ nuing gaˇ nang beu Ang vangˉ mangˉ hpeuˍ laˉ byaˇ nae taemˉ yao chiˉ saˍ jiˍ.

34Hingˉ htaˍ veu muiˉ, Hpaˍcaoˍ nawˍ, Yeˍsuˆ na siˉ kyaˉ veu teˍ laˍ laeˍ yao, puˍ naeˍ kuingˉ naeˉ uiˉ hkaoˉ veu htiˍ cangˍ nae muiˉ baˍ ya hkeu aeˉ laeˍ nae Hpaˍcaoˍ ningˉ mae ciˍ jiˍ. Daˍvet nawˍ, seungˍ sangˉ nae yiˍ naenˉ naeˉ uiˉ ang buinˉ htiˍ baˍ uiˍ na ya jiˉ lawˉ, ga nawng na hingˉ mae piˍ laˍ nae yaˇ nae ha biˍ jiˍ. 35Chiˍ mawng naeˉ ang laiˍ hkaoˍ veu awˍ htaˍ veu htiˍ tawngˍ taemˉ saˍ jiˍ. Nang beu Changˉ ang seungˍ sangˉ uiˉ aˍ, puˍ naeˍ keungˉ naeˉ uiˉ myangˉ hpuˍ naeˍ uiˉ na nang ya hkamˉ yuˉ naeˉ baˍ aˍ nae ha saˍ jiˍ.

36Daˍvet nawˍ yang htiˍ coe hkaoˉ veu, Hpaˍcaoˍ a loˍ capˆ naeˉ laˉ mae ha peunˉ saˍ yao siˉ jiˉ. Yang puˉ htiˍ baˍ uiˍ kawngˉ hao yang na chiˉ pawˉ yao, yang puˍ keungˉ nga aengˉ jiˉ. 37Caˇ, Hpaˍcaoˍ piˉ taeˍ laˉ naeˍ jiˍ maˇ puˍ keungˉ naeˉ na baˍ ya myangˉ. 38Ningˉ pa nae, yaˍ changˉ mawngˉ namˉ htiˍ baˍ yawng veuˉ, ningˉ na bae bu. Changˉ ningˉ mangˉ pa nae naˍ hokˍ poiˉ taw naeˉ uiˉ awˍ lawng nawng na hkai bae laˍ naeˍ yaˇ. 39Yang na hkaˉ yumˉ naeˉ uiˉ changˉ hkaˉ hko laˉ hko uiˉ aˍ naˍ hokˍ hkaoˍ veu ya caeˉ naeˉ yaˇ, Moˉseˍ beu ang liˍ ang kawngˍ veu piˉ caeˉ yao baˍ kaˍ nae uiˉ ang ceuˉ hkaˉ hko laˉ hko veu ang piˉ caeˉ taw yaˇ. 40-41Hpaˍcaoˍ beu pa rawˉ hpaet uiˉ ciˍ jiˍ.

Baˍ saˍ baˍ nyamˍ nae ciˍ naeˍ uiˉ changˉ yawng veuˉ, hu manˍ laeˍ yao kangˍ chaw aengˉ bao,

Aˉ mae yao nae baoˉ vaˍ, nawng coe hingˉ uiˉ hkaoˉ veu ga kanˉ htiˍ lumˍ vaˍ naeˍ yaˇ.

Ningˉ awˍ lawng ningˉ changˉ htiˍ hu hu nawng na

hkai laˍ yao muiˉ, nawng yumˉ naeˉ uiˉ baˍ aˍ nae hkai saˍ jiˍ. Hingˉ pa nae, yawng ciˍ naeˍ laˉ mae nawng htaˍ veu baˍ ya hkeu lui naeˉ uiˉ saˍ laiˍ, saˍ tiˍ ca bu nae, Pawˉluˆ ciˍ sangˍ jiˍ.

42Pawˉluˆ nae Baˍnaˍbaˆ yaˉ yetˍ Yuˉdaˆ changˉ ceuˉ hpawm lang kyaˉ veu awkˍ taw aengˉ beu, awˍ lawng ningˉ uiˉ na nawngˍ cangˍ sin veu muiˉ hkai laeˍ lao nae, changˉ ang byaˍ uiˍ yaˉ yetˍ na paˉ jiˉ. 43Hpawm lang kyaˉ veu changˉ uiˉ hpakˍ ngangˍ lang beu, Yuˉdaˆ changˉ uiˉ nae Hpaˍcaoˍ na koˉ koiˍ naeˍ Yuˉdaˆ ang liˍ ang kawngˍ caiˍ yaˍ naeˍ uiˉ changˉ ang byaˍ Pawˉluˆ nae Baˍnaˍbaˆ kawngˉ hkeˍ aeˉ jiˉ. Hpaˍcaoˍ beu ang buinˉ hkaoˉ veu yiˍ naenˉ hkiˍ naeˍ uiˉ saˍ laiˍ, yaˉ yetˍ yawng na maˍ biˍ yao yawng na kaˍ piˍ jiˍ.

44Nawngˍ cangˍ veu htiˍ sin, vanˍ sin nuing hkeuˉ yao, Hpaˍcaoˍ beu ang tangˍ na naˉ naeˉ nae vengˍ changˍ uiˍ hkaˉ hko laˉ hko chawnˉ hko laˉ lang jiˉ. 45Caˇ, Yuˉdaˆ changˉ uiˉ aˍ, changˉ ang muˉ uiˉ na myangˉ nga beu, hkoiˉ naeˉ uiˉ nuing ba htiˍ puing ca jiˉ. Pawˉluˆ ciˍ jiˍ hingˉ na yawng buingˉ haoˉ yao, yang na baˍ saˍ baˍ nyamˍ maˍ manˉ nae ciˍ jiˍ. 46Pawˉluˆ nae Baˍnaˍbaˆ yaˉ yetˍ nuing ba hatˆ naeˉ hkaoˉ veu ciˍ jiˍ yang, Hpaˍcaoˍ beu ang tangˍ ningˍ nawng na kaˉ huˍ veu ya upˍ kyaˍ laˍ naeˍ yaˇ. Caˇ, nawng ngaˍ Hpaˍcaoˍ beu ang tangˍ na paek taw saˍ yao, tuingˍ co tuingˍ cat a sak na ya yao baˍ kuingˍ lang nae nawng tawˉ nawng kuitˆ laeˍ yao, gaˉ yetˍ Changˉ ceuˉ htiˍ baˍ uiˍ kawngˉ lae naˇ. 47Aˉ mae yao nae baoˉ vaˍ,

Lok ningˉ cawtˍ beu tiˍ hkeu nang paˉ nae htaiˍ awkˍ naeˍ uiˉ na ya naeˉ uiˉ saˍ laiˍ,

Changˉ ceuˉ htiˍ baˍ uiˍ saˍ laiˍ ang chit hpeuˍ naeˍ uiˉ ga nang na chiˉ laiˍ yaˇ nae.

Ang suingˉ Hpaˍcaoˍ gaˉ yetˍ na ningˉ mae ciˍ tangˍ piˍ laˍ jiˍ yaˇ nae Pawˉluˆ ha biˍ jiˍ.

48Changˉ ceuˉ htiˍ baˍ uiˍ ang tangˍ ningˍ na ya kyaˍ beu, mawnˍ yao Hpaˍcaoˍ beu ang tangˍ na chiˍ huiˍ chiˍ mawng jiˉ. Tuingˍ co tuingˍ cat nae a sak na ya naeˉ uiˉ saˍ laiˍ cheˉ yao chiˉ jiˉ uiˉ changˉ ngaˍ yumˉ saˉ laˉ jiˉ.

49Haeˉ mae yao, Ang suingˉ Hpaˍcaoˍ beu ang tangˍ hingˍ nga ang meungˉ hingˉ naiˍ hkaoˍ veu cawtˍ ang maengˉ puing nga aengˉ jiˉ, 50Caˇ, Yuˉdaˆ changˉ uiˉ aˍ, Hpaˍcaoˍ na saˍ nyamˉ naeˉ uiˉ laˍ htiˍ ang ca uiˉ hkaˍ ba yaˍ htiˍ baˍ uiˍ nae, vengˍ hingˍ hkaoˉ veu ca naeˉ awn hoˉ htiˍ baˍ uiˍ na htuing nga biˍ jiˍ. Pawˉluˆ nae Baˍnaˍbaˆ na hkanˍ yaˍ chuiˍ yaˍ naeˍ na yawng ya caeˉ vaˍ yao, yaˉ yetˍ na ang meungˉ hingˉ naiˍ hkaoˍ veu hkeˍ taw jiˉ. 51Yaˉ yetˍ aˍ changˉ hingˉ uiˉ htaˍ veu nuing ba baˍ capˍ nae uiˉ na maˍ bae biˍ naeˍ uiˉ saˍ laiˍ, laˍ hkuiˍ hpaˍ vaˍ veu hka laˉ yangˍ kyangˍ nga laeˍ #13:51 Ningˉ ngaˍ baˍ hap yuˉ nae hingˉ na ha siˉ naeˉsaˍ yao Iˉkawˉniˆ vengˍ veu aeˉ jiˉ. 52Anˍtiˉokˆ vengˍ veu ta peˍ htiˍ baˍ uiˉ aˍ, mawnˍ pyawˉ naeˉ uiˉ na baˍ upˍ, ang hkawˍ laˉ ang seungˍ sangˉ na baˍ upˍ, htiˍ puing ca jiˉ.

Currently Selected:

Naiˍ htangˍ 13: pyy

Highlight

Copy