Markut 2

Yesu a̱ creng a̱ntyok ta̱ruk nkap

(Matta 9:1-8; Luka 5:17-26)

1Da̱ba nom a̱ bvwa, Yesu a̱ brek, a̱ nwa ka̱yat Ka̱fa̱rna̱hum, ba hok nkhang na̱n shyi ka̱ryi. 2Ba̱nyet ba̱gingang a̱ tung. Ka̱bvwa ka a̱ hweyak, hat ka̱nu ka̱ryi ka. Yesu a̱ nwa ba̱ tyyei Ka̱sham Ba̱ryat ka. 3Ba̱yanyet a̱ ba ba̱ a̱ntyok hywu ta̱ruk nkap. Ba̱nyet ba̱naai mba a̱ yin ku ccok. 4Ba maai a̱ si tat ba̱ nu di Yesu ba, rot ka̱tswa ba̱nyet ka. Ba ryin kyang yya a̱ wrak a̱ ta̱kyak a̱kup u a̱n tyyi dibvong ba̱ didri bu ka̱rek ka Yesu na̱n shyi ni. Wwon ba si kyyek ba̱ a̱ntyok hywu nu na̱ myyi tazwa kyang kwai ka. 5Ka̱ram ka Yesu na̱n dyi tyyi rya mba na ni, a̱ hywa da̱ a̱ntyok hywu nu, “Ka̱won, ba na̱ tssu a̱ka̱tukyya nwan nu.”

6Ba̱malam truwang ba̱yaan a̱ yin shyi i swat ka̱ yemi a̱ hwa ka̱yat mpfwa mba, 7“Hywak a̱nzan a̱yin a̱ni na̱n hywa a̱mi? A̱ yya Ka̱za ryihywat! A̱nyan a̱ maai a̱ cii a̱ka̱tukyya ban bu Ka̱za ba̱ diyin?”

8Yesu a̱ bvwo kyang a ba shyi hwa na ka̱yat mpfwa mba ka ni. A̱ hywa da̱ mba, “A̱nzan a̱n byyi yin yya a̱huhwa nkyang ani ka̱yat mpfwa nyin? 9A̱nzan a̱ yet a̱hyom u, di ba hywa da̱ a̱ntyok hywu ta̱ruk nkap u, ‘Ba na̱ tssu a̱ka̱tukyya nwan nu,’ ki ba hywa da̱ nu, ‘Ta̱za, sook kyang kwai nwan na i cong’? 10Ma, rot yi gi bvwo Ka̱won A̱neywu a̱ maai a̱ tssu a̱ka̱tukyya ka̱yat ka̱sa,” -- a̱ bo hywa da̱ a̱ntyok hywu ta̱ruk nkap u, 11“N hywa da̱ nwan, ‘Ta̱za, sook kyang kwai nwan na i kat!’ ”

12A̱ntyok a̱ywu a̱ ta̱za ba ahwa, a̱ sook kyang kwai nu na, a̱ wruk a̱ta̱ssi ba̱nyet ka. Sa̱rei mba ba pyyem na̱nu a̱ dyep Ka̱za, a̱ hywa, “Zi ka̱n dyi taka̱i ani ba.”

Yesu bu Lawi

(Matta 9:9-13; Luka 5:27-32)

13Yesu a̱ bo brek a̱ nat ka̱bvwa kei ka shyi i ka̱byen Galili ka ni. Ba̱nyet ba̱gingang a̱ tung da̱ nu, na̱ nwa ba̱ zzek. 14Ka̱ram ka na̱n shyi swrap a ni, a̱ ryi a̱yin na̱ swat ka̱bvwa sseng diga̱ndu nkasuwa ka, ba ku yei Lawi, ka̱won Alfa. Lawi a̱ yi yya pfong ssang diga̱ndu. Yesu a̱ hywa da̱ nu, “Ta̱za n tssup.” Na̱ ta̱za a̱ tssup Yesu.

15Nom yaan, Yesu bu na̱won pfong nu na a̱ si swrang a gbang Lawi a̱ shyi ya kyangya bu ba̱nyet ssang diga̱ndu nkasuwa bu ba̱nyet a̱ka̱tukyya, rot ntaka̱i ba̱nyet iya ba̱gingang yin ku tssup. 16Ba̱malam truwang ba̱yaan, ba ba̱ yei ba̱nyet Farisa, ba tssup zzek Musa na ba̱t. Ba ryi ka̱sak ka Yesu na̱n za bu ba̱nyet iya ni, ba zzim na̱won pfong nu na, a̱ hywa, “A̱nzan a̱n byyi na̱n za kyangya bu ba̱nyet sseng diga̱ndu nkasuwa bu ba̱nyet a̱ka̱tukyya?”

17Yesu a̱ hok kyang a ba ryat i, a̱ hywa da̱ mba, “Ba̱nyet ba a̱ swat kinkrang ni a̱ cat a̱ntyok dikan ba, se ba̱nyet ba a̱ yya nhywu ni. N ba i hywak a̱zizrak ba̱nyet ba, ma i hywak a̱shishik ba̱nyet.”

Ba̱ryat a̱zumi

(Matta 9:14-17; Luka 5:33-39)

18Ka̱ram iya na̱won pfong Yohana A̱yya Baptisma bu ba̱nyet Farisa ba yya a̱zumi. Ba̱yanyet a̱ nyyai a̱ ba di Yesu, a̱ bu ku zzim, a̱ hywa, “A̱nzan a̱n byyi na̱won pfong Yohana A̱yya Baptisma bu na̱nyi ba̱nyet Farisa na ban yya a̱zumi, ma na̱won pfong nwan na a̱ yya ba?”

19Yesu a̱ hywa da̱ mba, “I hwa nyin na ba̱nyet ba a̱ shyi ka̱bvwa nyreng ni a̱ ni cong ka̱nu ka kwot o? Kun dyi a̱mi ba. Ka̱ a̱ntyok nyreng u a̱ ri shyi ba̱ mba, ban wi ya kyangya ba. 20Ma ka̱ram a̱ shyi a̱ ri bai ba ni yen drok ba̱ a̱ntyok nyreng u a̱ ba̱ wwon. Ka̱ram iya a̱mi ba ni nwa yya a̱zumi nu.

21“A̱yin a̱n shyi a̱ ni sook a̱hwai ka̱zwwan a̱tro a̱n jyi a̱kukwo a̱tro ba. Ka̱ yya a̱mi se a̱tro nu a̱ wa brang bu sam a. 22Brak, a̱yin a̱n shyi a̱ ni sook nkwwa a̱ tyyi a gugwak dong ba; ka̱ rak, nkwwa na i tyong weyang ba̱sa̱rei, na̱ si wai nkwwa na, dong a i hwwei. Ba na tyyi a̱hwai nkwwa a tsatsak dong.”

Ba̱ryat pfwi ka̱tuk A̱sa̱ba̱t

(Matta 12:1-8; Luka 6:1-5)

23Nom pfwi yaan Yesu bu na̱won pfong nu na ba cong, a̱ si nwa i ka̱byen yak a ban yei alka̱ma ni. Na̱won pfong nu na a̱ nwa kprem alka̱ma nu a̱ shwam. 24Ba̱nyet Farisa na hywa di Yesu, “Da̱ cyang na̱won pfong nwan na. Ba yya kyang a truwang zin bvwo yya nom pfwi ni.”

25Yesu a̱ hywa da̱ mba, “Nyin ma, yi ka̱n twang kyang a Dawuda na̱ yin yya ni baa, ka̱ram ka nu bu ba̱nyet ka̱cyet nu ba ban hok cihywat ba̱t a̱ cat kyang a ba ni ya ni? 26Ka̱sak ka na̱ yi nwa i bat Ka̱za, ka̱ram iya Abiyata na̱ yet a̱gba̱dang gado Ka̱za nu. A̱ sook burodi na ba wrak Ka̱za ni, nying na bu ba̱gado Ka̱za mba a̱ na ya ni, a̱ bo wrak ba̱nyet ka̱cyet nu ba ba ya.”

27A̱ bo hywa, “Ka̱za a̱ yya nom pfwi domin a̱yin, ma ka yya a̱yin domin nom pfwi ba. 28Rot a̱mi Ka̱won A̱neywu a̱ shyi tazwa nom pfwi.”

Currently Selected:

Markut 2: kaj

Highlight

Copy