Markut 1

Wa'azi Yohana A̱yya Baptisma

(Matta 3:1-12; Luka 3:1-18; Yohana 1:19-28)

1Ka̱sham Ba̱ryat ka̱son kanka tazwa Yesu Kristi, Ka̱won Ka̱za. 2Da̱ni di a̱ntyok tyyei ba̱ryat Ka̱za nu ban yei Ishaya na̱ yin jem ni:

“Ka̱za a̱ hywa, ‘Cyang a̱yin nu a̱ yet a̱pfong nzuk u ni nu n ni tom,

na̱ ni kwwat ka̱son nwan a̱ si byin a̱ jyi ryen na.’

3A̱yin shyi a̱ yei an tswa ka̱yit, a̱ hywa,

‘Yi jyi ryen A̱gwam Ka̱za na wwon;

i neyak na̱ta̱ryen na na̱ nin seyak i,

na tyyi ba̱ tuntwang.’ ”

4Rot a̱mi Yohana a̱ ba a̱ shyi ka̱yit, a̱ yya ba̱nyet baptisma a̱ bo ba̱ tyyei kyang a na̱n ba ni, a̱ hywa da̱ mba, “Yi wwon a̱ka̱tukyya nyin nu, ba ya yya baptisma, Ka̱za a̱ ga ya tssu a̱ka̱tukyya nyin nu.” 5Ba̱nyet ba̱gingang nyyai i ka̱byen Yahudiya nta̱mak bu Urushalima a̱ cong di Yohana. Koyan a̱ ba a̱ bu tyyei a̱ka̱tukyya nu, Yohana na̱ ba̱ yya baptisma a nyring ncen Urdun nu.

6Ba̱tro Yohana ba a̱ yin yet ba̱nying a̱cat rakuma, a̱ zzop kpa ndyang nu ka. Na̱ ya bu ba̱nkpyai, a̱ sswa ditong-ditong a̱n swat. 7A̱ tyyei ba̱nyet ba a̱ yya, “A̱tuba nu a̱ bai riryim nzuk ka ni a̱ n da̱u ba̱gingang. Nzuk n maai n ta̱kwut n ku byyik ryik kpatak nu ba. 8Nzuk, n ya yya baptisma di ba̱shekwot, ma ka̱ ba a̱ ni ya yya baptisma nu di Tswa Ka̱za.”

Ba yya Yesu baptisma, ka̱ta̱nyrang a̱ ku me

(Matta 3:13--4:11; Luka 3:21-22; 4:1-13)

9A̱zi nom iya Yesu a̱ ba nyyai Nazarat i ka̱byen Galili, Yohana a̱ bu ku yya baptisma a ncen Urdun na. 10Bu wruk Yesu a ncen na na̱ ryi Tazwa ji zi yrang, Tswa Ka̱za i kyyek zi diccu nu anye a̱bva a̱ bu ku nwa. 11A̱wwon diwan Ka̱za i hyok nyyai Tazwa, i hywa, “Ka̱won nzuk! N pfong ansham ba̱ nwan.”

12Bu ka̱baram Tswa Ka̱za ji i ku tyyi na̱ nat ka̱yit. 13Na̱ si shyi ka̱yit ka nom nswak naai, a̱ shyi bu nyam ka̱yit; Ka̱ta̱nyrang ka a̱ ku me. Ma ba̱pfong Ka̱za ba a̱ cong a̱ brang Yesu.

Yesu a̱ yei ba̱nyet bvei hwon ba̱naai

(Matta 4:12-22; Luka 4:14-15; 5:1-11)

14Ka̱ram a̱ya Yohana na̱ shyi a jaru nu, Yesu a̱ nat i ka̱byen Galili a̱ si kat a̱ tyyei Ka̱sham Ba̱ryat Ka̱za ka. 15A̱ hywa di ba̱nyet ba, “A̱tsatsak ka̱ram u a̱nu ni. Dityok Ka̱za ti ba nshishrek! Koyan a̱ wwon a̱ka̱tukyya nu nu, a̱ san Ka̱sham Ba̱ryat kani di ka̱ryong.”

16Yesu a̱ bu shyi cong mbeyang kei i ka̱byen Galili, a̱ ryi ba̱nyet bvei hwon ba̱ mba ba̱ hwa, Siman ba̱ a̱shishyi nu nu Andrawut, ba bvei hwon ji da̱ riryek. 17Yesu a̱ hywa da̱ mba, “Yi n tssup n si ya zzek pyyem ba̱nyet da̱ni di yin pyyem hwon ji ni.” 18Ba kai ba̱riryek mba ba a̱ krok ba ahwa a̱ drok a̱ ku tssup.

19Na̱ shek-shek a̱ bo ryi Yakubu ba̱ a̱wumba nu Yohana, ba̱hwai Zabadi, ba shyi a kpongo mba nu a̱ shyi jyi ba̱riryek ba. 20Bu ba̱ ryi na Yesu a̱ ba̱ yei; ba drok a̱tyyi mba nu a̱ wwon bu ba̱nyet mpfong ba ka̱yat kpongo ka a̱ ku tssup.

Yesu ba̱ a̱ntyok byyi a̱ka̱tuk tswa

(Luka 4:31-37)

21Ba drok ka̱ yemi a̱ ba ka̱nkrang ka ban yei Ka̱fa̱rna̱hum i. Nom pfwi ba̱nyet Yahuda na krang ba, na̱ nwa bat a̱duwa ba̱nyet Yahuda na ban yei sinagog u ni, a̱ zzek ba̱nyet ba. 22Ba̱nyet ba a̱ hok zzek nu na ni a̱ ma pyyem bu na̱nu rot ka̱sak ka na̱n zzek i. Nu di na̱ yet ba̱malam ba a̱ zzek truwang ni ba, na̱ si wa bvwo zzek a a̱ ba̱ ran.

23Bu ka̱ram iya, a̱yanyet a̱ nyyai a̱ ba. A̱ yin byyi a̱ka̱tuk tswa. Na̱ nwa ka̱yat bat ka, a̱ tyyi kun, 24a̱ hywa, “A̱nzan zi yet ba̱ nwan, Yesu, a̱ntyok Nazarat? A ba i gi za hwwei o? N na̱ bvwo ba̱zizrak, Ka̱za nka a̱ na̱ tom a yet Ka̱won nka.”

25Yesu a̱ kam a̱ka̱tuk tswa nu, a̱ hywa da̱ nu, “Tyyi nyong, wruk ka̱ yemi wwon a̱yin a̱ni ba̱nyying ka!”

26A̱ka̱tuk tswa nu a̱ jim a̱ntyok a̱ywu di cet, a̱ tyyi kun ba̱ tazwa, a̱ seyak a̱ wruk. 27Ba̱nyet ba a̱ bo ryi a̱ yya ka̱hat, a̱ nwa ya zzim a̱ yya, “O! A̱nzan a̱ bo ri-ryi na ni? A̱hwai zzek a̱ bo ba, hat a̱ ma tssa-tssap a̱ka̱tuk tswa zi ma̱ ku tyong ba̱t za̱m!”

28Ka̱baram ba̱ cincong nkhang Yesu i wruk tat ka̱sa ba hok sa̱rei ka̱byen Galili.

Yesu a̱ creng ba̱nyet ba̱gingang

(Matta 8:14-17; Luka 4:38-41)

29Yesu a̱ bo sseng i bat a̱duwa na ba; a̱ wruk a̱ nat gbang ba̱nyet Siman bu Andrawut, Yakubu bu Yohana a̱ ba̱ tssup. 30Ba si nwa gbang ba̱nyet Siman bu Andrawut ka a̱ shya a̱kwo a̱ra̱mbyring Siman nu na̱ ya pfong ba, ba̱soza ba ku ya, na̱ shyi i myyi. Yesu na̱ si nwa-nwa ba ku tyyei. 31Yesu a̱ seyak a̱ nwa a̱ nat da̱ a̱kwo Siman nu, a̱ si ku pyyem mbvak, a̱ ku yrek. Na̱ creng a̱ ta̱za ba ahwa a̱ ba̱ wan kyangya.

32Ka̱jenshring ka bu yya, nom a bu som ka̱nu, ba̱nyet a̱ nwa tang-dang a̱ cong a̱ nwai di Yesu bu ba̱nyet nhywu, bu ba̱nyet ba a̱ka̱tuk tswa na̱ shyi ka̱yat mba ni. 33Ba̱nyet ka̱nkrang ba a̱ tung a̱ bu tyyi a̱ hywat ka̱ryi ka Yesu na̱n shyi ni. 34Na̱ creng ba̱nyet nhywu ba̱gingang, a̱ bo nyying a̱ka̱tuk tswa di ba̱yanyet. A̱ ni nang a̱ka̱tuk tswa nu ka̱nu krang kyang ba, rot ba yin bvwo kyang a na̱ yet i.

Yesu a̱ yya wa'azi i ka̱byen Galili

(Luka 4:42-44)

35Ka̱ntson tat ka, ba̱ shong a̱ntson, Yesu a̱ wruk i ka̱ryi iya; a̱ wruk i ka̱nkrang ka a̱ nat ka̱yit a̱ ga si yya a̱duwa. 36Ma Siman bu ba̱nyet ka̱cyet nu ba a̱ wruk a̱ ku cat. 37Ba si ku shya, a̱ hywa da̱ nu, “Koyan a̱ ma shyi bu na̱ cat.”

38Yesu a̱ hywa da̱ mba, “Dolet zi nwai kpikpit na̱nkrang a, i tyyei ba̱nyet ba Ka̱sham Ba̱ryat Ka̱za ka, rot nkpa n nin ba.”

39A̱ ta̱za a̱ cong a̱ tyak na̱nkrang ka̱byen Galili na, a̱ ba̱ zzek Ka̱sham Ba̱ryat Ka̱za ka a bat a̱duwa na a̱ bo nyying a̱ka̱tuk tswa.

Yesu a̱ creng a̱ntyok gbap

(Matta 8:1-4; Luka 5:12-16)

40A̱ntyok gbap a̱yaan a̱ ba di Yesu, a̱ bu ta̱gbok a̱ta̱ssi nu ka a̱ ku naai, a̱ hywa da̱ nu, “Ka shim i n creng, ku ni na̱ bvwa dikwu ba.”

41Yesu a̱ hok dizot nu ba̱t, a̱ neyak bvak nu na a̱n da a̱ntyok gbap u; a̱ hywa da̱ nu, “N shim a creng ba̱t.” 42Yesu na̱ bu tun bvak nu na, gbap a a̱ tyak i rwam a̱ntyok iya. 43Yesu a̱ ku tun na̱ nat, a̱ bo ku kam 44a̱ hywa da̱ nu, “Cyang, ka a du tyyei a̱yin ba, wwon i nat si tyyei gado Ka̱za nu na̱ na̱ cyang, i si wrak Ka̱za za̱nang ji Musa na̱ yi ya tyyei i, koyan a̱ ga ryi ka̱sak ka an creng i.”

45A̱wwon a̱ntyen a̱ywu na̱ drok-drok ka̱bvwa Yesu ka a̱ nwa kok ba̱nyet i ka̱sak ka Yesu na̱n ku creng i. Ka̱sak ka na̱n dyat a̱ ra̱u ni, Yesu a̱ bo hwo-hok ansham nwa ka̱yat ka̱nkrang ba̱nyet ba ku cyang ba. A̱ wruk a̱ swat ba̱zan diyin, ba̱nyet ba̱gingang a̱ wwut a̱ cong da̱ nu nyyai ko ke.

Currently Selected:

Markut 1: kaj

Highlight

Copy