Markut 16

Ta̱za Yesu i dibyyi ti

(Matta 28:1-8; Luka 24:1-12; Yohana 20:1-10)

1Nom pfwi a a̱ wu seyak, Maryamu Magadaliya bu Maryamu a̱naa Yakubu bu Salomi a̱ kwei turare a̱ naat i i ryak Yesu na, a̱ si krok i rwam nu na. 2A̱ta̱ntson ka̱tuk Ladi ba nyyai a̱ nat i ryak Yesu na nom a ku ta̱kyek. 3-4Ba cong a̱ yya, “Ka̱t da̱won njit, a̱nyan a̱ ma naat a̱ si za gbit kpang iya ka̱nu ryak ka?” (Rot kpang ji yi n yet a̱gba̱dang ba̱t.) Ba nan mpfwa mba na a̱ ryi ba wa ka̱n gbit kpang ji a̱ sak a̱za̱gbang a̱yring. 5Ba seyak a̱ nwa ka̱yat ryak ka a̱ si shya hwung a̱yin ku swat a̱za̱gbang bvak yak u a̱ kup ba̱ jijyat ba̱tro. Ka̱wun a̱ ba̱ pyyem.

6A̱ntyen a̱ywu a̱ hywa da̱ mba, “Yi ryok hok ka̱wun ba. N bvwo Yesu a̱ntyok Nazarat a̱mi yi cat, a̱tuba nu ba hywat i. A̱ shyi kyi ba. A̱ ka̱n ta̱za! Yi cyang ka̱bvwa ka ban ku myyi ni. 7Yi nat si tyyei na̱won pfong nu na nta̱mak bu Bitut, ‘A̱ ni yet ka̱son nyin a̱ nat ka̱byen Galili, ka̱ yemi yi naat sin ku ryi ka̱sak ka na̱ yin ya tyyei ni.’ ”

8Ka̱wun a̱ ba̱ pyyem ba wruk i ryak a ncyi. Di ba krang ba̱ a̱yin ba, rot ba pfong ka̱wun ba̱gingang.

RYEN NA BA YIN TYAK KPA Markut A NI

Yesu bu Maryamu Magadaliya

(Matta 28:9-10; Yohana 20:11-18)

[ 9Ka̱ram ka Yesu na̱n ta̱za ni, a̱ta̱ntson ka̱tuk Ladi, Maryamu Magadaliya a̱ yet ka̱son a̱ ku ryi. Nu a̱mi Yesu na̱ yin nyying a̱ka̱tuk tswa a̱tiyring da̱ nu. 10A̱ nat a̱ si tyyei ba̱nyet ka̱cyet nu ba. Ka̱ram iya ba shyi i ka̱nak. 11Ba bu hok Maryamu na̱ ba̱ tyyei di Yesu a̱ shyek, kuma a̱ ka̱n ku ryi, ba ton!

Yesu bu na̱won pfong na̱hwa

(Luka 24:13-35)

12Yesu a̱ yya a̱ bo trung diccu nu di ba̱nyet ba̱hwa a̱zi ryen, ba naat ka̱bankrang ka̱yaan, ma ba ku ryi a̱ bvwong ba, rot a̱ shei ryi nu na. 13Ba brek a̱ bu tyyei kpikpit a, ma ba bo ton.

Yesu bu ba̱pfong swak ba̱ yring

(Matta 28:16-20; Luka 24:36-49; Yohana 20:19-23; Npfong 1:6-8)

14A̱ngbom u, Yesu a̱ si ya trung di ba̱pfong nu ba swak ba̱ yring ba shyi ya kyangya. A̱ ba̱ byat rot wipfong mba na, nkpa yin byyi ban trong ka̱ram ka ba̱yanyet ban ba̱ tyyei di ba ku ryi a̱cet ni. 15A̱ hywa da̱ mba, “Nde, yi nwai sa̱rei ka̱sa ka yi tyyei Ka̱sham Ba̱ryat kani sa̱rei ba̱nyet ba a̱ hok. 16A̱yin nu a̱ san a̱n tyyi rya ni ba ku yya baptisma, Ka̱za a̱ ni ku san. Ma a̱yin nu a̱ rak ni, Ka̱za a̱ ni ku tyyi a shirya. 17Ba̱nyet ba a̱ san ba̱ryat nzuk ba a̱n tyyi ndya mba ni, Ka̱za a̱ ni ba̱ ryi cet nyying a̱ka̱tuk tswa i diyrek nzuk, a̱ ryat a̱riryem a̱yaan. 18Ki ba ma̱n pyyem ryik ko ba sswa ka̱sap, kyang ni ba̱ tyyi ba. Ki ba saai ba̱nyet nhywu mbvak, ba ni creng.”

Ba nat bu Yesu Tazwa

(Luka 24:50-53; Npfong 1:9-11)

19Ka̱ram ka A̱gwam Yesu na̱n tyak ba̱ryat bani ni, Ka̱za a̱ ku sook a̱ nat ba̱ nu Tazwa, na̱ si swrang bvak yak nka. 20Na̱won pfong a a̱ ma̱n nwai a̱ tyyei Ka̱sham Ba̱ryat ka ko ke. A̱gwam Yesu a̱ shyi ba̱ mba a̱ ba̱ brang, ba̱nyet ba a̱ ga bvwo wa'azi mba nu a̱ yet ka̱ryong, rot ba yya nkyang ka̱hat ba̱gingang.]

Currently Selected:

Markut 16: kaj

Highlight

Copy