Yohana 2

Nyreng i Kana i ka̱byen Galili

1Ka̱tuk nom tat ka nyreng i shyi Kana i ka̱byen Galili. A̱na Yesu nu a̱n shyi ka̱rek ka. 2Ba ma̱ yin yei Yesu bu na̱won pfong nu na ka̱rek nyreng ka. 3Ka̱ram ka ba̱shekwot a̱nap ba ban dat i, a̱na Yesu nu a̱ hywa da̱ nu, “Ba̱shekwot a̱nap ba a̱ ba̱ rat.”

4Yesu a̱ hywa da̱ nu, “Nna, a̱nzan a̱ yet ka̱ta nwan ka? Ka̱ram nzuk ka a̱ ka̱n ba ba.”

5A̱na Yesu nu a̱ hywa di ba̱kwwa ba. “Bu kyang a na̱ hywa di yi yya ni, yi yya.”

6To, mba ba̱nyet Yahuda na ba byyi tada tssu a̱tak. Rot a̱mi a̱cecet ndudon ba̱ nu a̱kitat a̱ yin shyi ka̱ yemi, a̱nu ni a̱ ni ya sup nyaai ko a̱kitat, ba ga ntyei ba̱shekwot tssu a̱tak ba. 7Yesu a̱ hywa di ba̱nyet mpfong ba, “Yi tyyi ba̱shekwot hywaai ndudon na.” Ba ma̱n tyei ba̱shekwot ba a̱n hywaai a̱ bu tat a mpfwa na. 8Yesu a̱ hywa, “Yi bvwa i si wrak a̱gba̱dang a̱kwak-ka̱son ka̱tung u.” Ba bvwa a̱ si ku ryi. 9Na̱ bu hwwuk ba̱shekwot ba a̱ brak a̱ tyyi ba̱shekwot a̱nap ba ni, a̱ bvwo ka̱rek ka ba̱shekwot a̱nap iya ba nyyai ni ba. (Ma ba̱kwwa ba a̱ bvwa ba̱shekwot ba a̱ si ku ryi ni a̱ yin bvwo). Na̱ yei a̱ntyok nyreng u 10a̱ hywa da̱ nu, “Koyan a̱ na yen ka a̱tsatsak ba̱shekwot a̱nap u ba sswa a̱ maai, na̱ si wruk ba̱ a̱bibyyi nu. Ma nwan a yen wwon a̱tsatsak u se naanini.”

11A̱nuni nu a̱ yin yet ka̱tsitsrang kyang ka̱hat ka Yesu na̱ yin yya ni. A̱ yin yya ka̱yaani Kana i ka̱byen Galili. A̱ yin tyyei shii nu na ka̱ yemi, na̱won pfong nu na a̱ ku ryi ka̱ryong.

12Ba bu tyak, Yesu, ba̱ a̱na nu nu, bu ba̱wumbeyang nu ba, bu na̱won pfong nu na a̱ drok a̱ nat Ka̱fa̱rna̱hum a̱ si yen bvwa nima̱ nom ba̱cincong.

Yesu a̱ nat a̱ si jrang bat Ka̱za

(Matta 21:12-13; Markut 11:15-17; Luka 19:45-46)

13Ka̱ram iya ba bvat ba̱cincong nwa a̱swa nu ba yin yei Swrap wwon nu ni (ka̱ram iya a̱mi ba̱nyet Yahuda na ba nan yring ka̱sak ka ba yin wruk Masar ka ni). Yesu a̱ brek a̱ ba Urushalima. 14A̱ si nwa i bat Ka̱za na a̱ shya ba̱yanyet ba zzap nyak bu bvon-tsaap bu ba̱ta̱nta̱ba̱ra, ba̱yanyet a̱ saai tebur a̱ swat a̱n ssek krum. 15Na̱ shya shan ndyik a̱n ba̱ nyying a̱ wruk i, sa̱rei bu nyak ji bu bvon-tsaap ji, a̱ yyit tebur ji a̱ tang a̱ wop krum ji. 16A̱ kam ba̱nyet zzap ba̱ta̱nta̱ba̱ra ba a̱ hywa, “Yi ba̱ kok wruk i kyi. Yi ryok brak ka̱ryi A̱tyyi nzuk n yya kasuwa ba” 17Na̱won pfong nu na a̱ yring ka̱sak ka ba̱ryat Ka̱za ba ban hywa, “Ka̱za, cat ka̱ryi nwan na ni n za!”

18Ba̱cecet ba̱nyet Yahuda ba a̱ nyyai a̱ bu ku yrek di zok, a̱ hywa, “A̱nzan kyang ka̱hat a ni yya n za tyyei ka̱sak ka an byyi cet nyying ba̱nyet ani ni?”

19Yesu a̱ hywa da̱ mba, “Yi hwwei bat Ka̱za na ni, n ni sook nnom tat n kpo nok.”

20Ba̱nyet Yahuda na i hywa, “Nwan za̱tuk? Dinok ti ba sook a̱rya nswak naai ba̱ a̱kitat a̱ si wa bvwa a̱n tyak ni, nti a ni tyak ka̱yat nnom tat o?”

21Ma bat iya a̱mi na̱ yin dyat ba; a̱ yin dyat rwam nu na a̱mi. 22Ma na̱won pfong nu na a̱ yin hok a̱ maai ba, se ka̱ram ka na̱n ta̱za i dibyyi ti ni ba si yring kyang a na̱ yin hywa ni, a̱ si san ba̱ryat Ka̱za ba di ka̱ryong bu kyang a Yesu na̱ yin hywa ni.

Yesu a̱ bvwo pfwa koyan

23Ka̱ram Swrap wwon ka Yesu na̱ shyi Urushalima ba̱nyet ba̱gingang a̱ ku ryi ndya mba na rot nkyang ka̱hat na ba yin dyi na̱ yya ni. 24Ma Yesu a̱ yen ya cam, rot a̱ yin bvwo ba̱nyet sa̱rei. 25Ku yet kyang a ba ni ku tyyei ni ba, rot a̱ bvwo rya koyan.

Currently Selected:

Yohana 2: kaj

Highlight

Copy