Yohana 1

Diwan sucet

1Nyyai Ka̱za ka ka̱n yya ka̱sa ka ba, Diwan ti yin shyi, a̱ bo shyi bu Ka̱za, a̱ bo yet kyang yring bu Ka̱za. 2Nyyai bu ka̱son ka Diwan ti yin shyi bu Ka̱za. 3Nu a̱ yin yet ryen na Ka̱za kan yya kozan kyang ni. Kyang n shyi ba yin yya a̱n ku sang ba. 4Diwan ti a̱mi yet sucet a; sucet a i wrak ba̱nyet ba ka̱bvwa sai. 5Ka̱bvwa sai ka a̱ yin sai ka̱yat ndyin, a̱ sswa cet ndyin na.

6Ka̱za a̱ yin tom a̱pfong nka ban yei Yohana. 7Nu a̱ yin bu tyyei ba̱nyet ba ka̱bvwa sai ka a̱ yin cong a̱ bai ni. A̱ yin ba ba̱ tyyei ba ga shim ba̱ryat nu ba a̱ ba̱ san a̱n yya ka̱ryong. 8Nu a̱ yin yet ka̱bvwa sai ka ba, ma a̱ yin ba a̱ ga bu ba̱ tyyei bai ka̱bvwa sai a. 9Nu a̱ yin yet ka̱bvwa sai ka̱ryong ka a̱ yin ba ka̱sa ka ni a̱ bu tat sa̱rei ba̱nyet ka̱sa ba a̱ssi na.

10A̱ yin shyi ka̱sa ka, ba yya ka̱sa ka ba̱ nu, ma ka̱sa ka a̱ ku bvwo ba. 11A̱ yin ba di ba̱nyet nu, ma ba̱nyet nu ba a̱ bu rak ku san na. 12Ma sa̱rei ba̱nyet ba a̱ yin ku san a̱ ku ryi ndya mba na ni, na̱ ba̱ ryi cet ba yet na̱won Ka̱za. 13Yet na̱won mba na nyyai da̱ a̱ra̱ntyok ba̱ a̱ra̱mbyring ba. Wato ba ba̱ tyei da̱ni di ba tyei na̱won ka̱sa na ni ba. Ka̱za di bvak nka a̱mi a̱ yet A̱tyyi mba nu.

14Diwan ti i brak tyyi a̱yin i yen swat ka̱yat njit, a̱ shyi bu aliheri ba̱gingang a̱ bo yet ka̱ryong. Zi ryi shii nu na, shii a na̱ san rot nu ba̱diyin a̱ yet Ka̱won Ka̱za ka ni.

15Yohana a̱ tyyei ba̱nyet ba tazwa Diwan ka, a̱ yrek diwan nu ti a̱ hywa, “A̱ntyen a̱ni a̱mi n dyat n hywa da̱ nyin, ‘A̱yanyet a̱ ri bai riryim nzuk a̱ shii a̱ n dan ba̱gingang, rot a̱n shyi nyyai ba ka̱ n byin ba.’ ”

16Rot a̱gba̱dang za̱nang nu nu, zi shya za̱nang tazwa za̱nang. 17Ka̱za a̱ yin wrak Truwang ji an bvak Musa, ma za̱nang ji bu ka̱ryong i hyok an bvak Yesu. 18A̱yin a̱n shyi a̱ ka̱n dyi Ka̱za ba, se bu Ka̱won nu ka ba̱diyin. Nka a̱mi a̱ shyi shishrek bu Ka̱za a̱ bo ba a̱ bu tyyei Ka̱za ka.

Wa'azi Yohana A̱yya Baptisma

(Matta 3:1-12; Markut 1:1-8; Luka 3:1-18)

19Ba̱cecet ba̱nyet Yahuda Urushalima ba a̱ yin tom ba̱gado Ka̱za bu ba̱nyet brang ba̱gado Ka̱za ba si zzim Yohana a̱ hywa, “A yet a̱nyan?”

20Yohana a̱ si ba̱ nyyak kyang ba. A̱ ba̱ kok ka̱ryong ka ba̱zizrak. A̱ hywa da̱ mba, “Nzuk n yet Kristi nu ba.”

21Ba bo ku zzim, “To, nwan yet a̱nyan? Nwan yet Iliya nu o?”

Yohana a̱ hywa, “Kaai, nzuk ba.”

Ba bo zzim, “Nwan yet A̱ntyok tyyei ba̱ryat Ka̱za nu o?”

Na̱ bo ton.

22Ba hywa da̱ nu, “Nde, da̱ za tyyei a̱yin nu a yet i zi gi brek si tyyei ba̱nyet ba a̱ za tom ni. Nwan, a ya yei a̱nyan?”

23Yohana a̱ ba̱ shim mi ka̱yat ba̱ryat Ishaya a̱ntyok tyyei ba̱ryat Ka̱za, a̱ hywa,

“Nzuk n yet diwan ti yei ka̱yat ka̱yit i n yya,

‘Yi jyi na̱ta̱ryen A̱gwam Tazwa na na̱ nin cong ni.’ ”

24Ba̱nyet Farisa na a̱ ma yin tom ba̱pfong ba. 25Ba zzim Yohana a̱ hywa, “To, da̱ nwan yet Kristi ba, da̱ nwan yet Iliya ba, da̱ nwan yet A̱ntyok tyyei ba̱ryat Ka̱za nu ba, a̱nzan a̱n byyi an yya baptisma nu?”

26Yohana a̱ hywa, “Nzuk n yya baptisma nzuk u di ba̱shekwot, ma a̱yanyet a̱n shyi ka̱yat nyin da̱ nyin ba ku bvwo ba. 27Nu a̱ bai riryim nzuk, ryik a̱kpatak nu ma n maai n kpo byyik ba.”

28Ba yin ri-ryat ani Baitanya a̱mi, ma̱nyyi ncen Urdun, ka̱rek ka Yohana na̱ yin yya baptisma nu ni.

A̱truk Ka̱za

29Ka̱ntson a̱ wo tat Yohana a̱ ryi Yesu na̱ cong a̱ bai da̱ nu, na̱ hywa, “Cyang A̱truk Ka̱za nu a̱ sook a̱ka̱tukyya ka̱sa nu ni. 30Nu a̱mi n dyat n ya tyyei n hywa, ‘A̱yanyet a̱ ri bai riryim nzuk, ma a̱ shii a̱ n dan ba̱gingang, rot a̱n shyi nyyai ba ka̱ n byin ba.’ 31N ku bvwo i nyyai ba, ma n ba n yya baptisma di ba̱shekwot, na̱ ga shya diwat ti Isreila ba nin ku bvwo ni.”

32Yohana a̱ wrak shaida a̱ hywa, “N dyi Tswa Ka̱za ji zi kyyep nyyai Tazwa zi diccu nu anye a̱bva i swrang ba̱ nu. 33N yin ku bvwo ba, se a̱tuba nu a̱ n tyyi yya baptisma nu di ba̱shekwot ba ni nu a̱ hywa da̱ nzuk, ‘A ni ryi Tswa Ka̱za zi kyyep tazwa a̱yin. Nu a̱mi a̱ ni yya baptisma nu di Tswa Ka̱za ji.’ 34N dyi da̱ a̱ssi nzuk, nkpa n ni ya tyyei ka̱sak ka nu a̱ yet Ka̱won Ka̱za ka ni.”

Na̱won pfong ka̱tsitsrang Yesu na

35Ka̱ntson a̱ wo tat, Yohana na̱ shyi sseng bu na̱won pfong na̱yaan nu ba̱mba ba̱hwa, 36na̱ bu ryi Yesu na̱ cong, na̱ hywa, “Di A̱truk Ka̱za nu.”

37Ba̱pfong iya ba̱mba ba̱hwa ba bu hok a̱mi a̱ brak a̱ tssup Yesu. 38Yesu a̱ brak a̱ ba̱ ryi ba ku tssup a̱ ba̱ zzim a̱ hywa, “A̱nzan yi cat?”

Ba hywa, “Rabbi, a wu swat ke?” (Rabbi nu a̱ yet Malam.)

39Yesu a̱ hywa da̱ mba, “Yi ba zi nat yi si ryi.” Ba ku tssup a̱ si ryi ka̱rek ka, a̱ zzwang kpikpit nom iya ba̱ nu. (Nom a yin shyi di tswam nyaai ni.)

40A̱tuba a̱yring ba ku yei Andrawut, a̱wumba Siman Bitut. 41Andrawut a̱ nat a̱ si cat a̱wumba nu nu, Siman, a̱ hywa da̱ nu, “Zi shya Almasihu nu!” wato, Kristi. 42Wwon a̱ nat bu Siman di Yesu.

Yesu a̱ si ku cyang a̱ hywa, “Nwan yet Siman ka̱won Yohana. Ba ni na̱ yei Kefat.” Diyrek ti yet tiyring bu Bitut u, wato “kpang”.

Yesu a̱ yei Filibut bu Natana'ilu

43Ka̱ntson tat, Yesu a̱ ryi ku myim da̱ nat Galili, a̱ shya Filibut a̱ hywa da̱ nu, “N tssup.” 44Filibut a̱ yin yet a̱ntyok Baitsaida, ka̱nkrang mba bu ka̱yring bu Andrawut bu Bitut. 45Filibut a̱ si shya Natana'ilu, a̱ hywa da̱ nu, “Zi shya a̱tuba nu Musa na̱ yin jem nkhang nu na ka̱yat Truwang nu ka ni, ba̱nyet tyyei ba̱ryat Ka̱za ba̱yaan a̱ jem nkhang nu na, wato Yesu A̱ntyok Nazarat, a̱hwai Yusufu nu.”

46Natana'ilu a̱ hywa, “A̱tsatsak nkyang a̱ ka̱n hyok Nazarat ka̱ram ka̱yaan o?”

Filibut a̱ hywa, “Da̱ ba zi cong a si ku ryi.”

47Yesu na̱ bu ryi Natana'ilu na̱ bai da̱ nu na̱ hywa ntazwa nu, “Yi cyang a̱ntyok Isreila ka̱ryong, a̱tuba nu a̱ byyi hywak ni ba.”

48Natana'ilu a̱ ku zzim, a̱ hywa, “A yya ni n nin bvwo?”

Yesu a̱ hywa, “N bu na̱ ryi ka̱ram iya a swat dityin a̱bvap ti, Filibut na̱ ka̱n na̱ yei ba.”

49Natana'ilu a̱ hywa, “Malam, nwan a̱mi yet Ka̱won Ka̱za ka, A̱gwam Isreila!”

50Yesu a̱ hywa, “A shim rot n na̱ tyyei di n bu na̱ ryi a swat dityin a̱bvap ti e? A ni ryi nkyang ba̱gingang a̱ ra̱u ni ma.” 51A̱ bo hywa da̱ mba, “Ka̱ryong n ya tyyei, yi ni ryi Tazwa zi yrang, ba̱pfong Ka̱za ba ba ban a̱ bo kyyep tazwa Ka̱won A̱neywu.”

Currently Selected:

Yohana 1: kaj

Highlight

Copy