YouVersion Logo
Search Icon

زڪرياہ 13

13
گناهن کان پاڪ ٿيڻ
1انهيءَ ڏينهن دائود جي گھراڻي ۽ يروشلم جي رهاڪن کي سندن گناهن ۽ ناپاڪائيءَ کان ڌوئي پاڪ ڪرڻ لاءِ هڪڙو چشمو جاري ٿيندو.
2قادر‌مطلق خداوند فرمائي ٿو تہ ”انهيءَ ڏينهن آءٌ سڄي ملڪ مان سڀني بتن جو نالو نشان مِٽائي ڇڏيندس ۽ اڳتي انهن کي ڪوبہ ياد نہ ڪندو. آءٌ نبي سڏائيندڙن کي بہ ملڪ مان ڪڍي ڇڏيندس ۽ ماڻهن جي دلين مان ناپاڪ خواهشن کي ختم ڪري ڇڏيندس. 3اڃا بہ جيڪڏهن ڪو منهنجي نالي سان ڪوڙو پيغام ڏيندو، تہ پوءِ سندس ماءُ پيءُ جن کيس ڄڻيو آهي، سي پاڻ سندس موت جي فتويٰ ڏيندا، ڇاڪاڻ تہ هو مون خداوند جو نالو وٺي ڪوڙ ٿو ڳالهائي. سو جڏهن هو پيغام ٻڌائيندو تڏهن سندس پنهنجا ماءُ پيءُ ئي کيس خنجر هڻي ماري ڇڏيندا.
4انهيءَ ڏينهن نبي سڏائيندڙ پنهنجي پيغام ٻڌائڻ کان شرمندا ٿيندا. پوءِ اهي ماڻهن کي ٺڳڻ لاءِ وري نبين جي پائڻ وارا خسيس جبا نہ پائيندا. 5اٽلندو انهن مان هر ڪو چوندو تہ ’آءٌ نبي ناهيان. آءٌ تہ هڪ هاري آهيان ۽ ننڍپڻ کان وٺي منهنجو گذارو زمين تي آهي.‘ 6جيڪڏهن ڪو کانئس پڇندو تہ ’تنهنجي جسم تي نبين جهڙا هي زخم ڇا جا آهن؟‘ تہ هو جواب ڏيندو تہ ’هي اُهي زخم آهن جيڪي مون کي پنهنجي دوستن جي گھر ۾ رسيا آهن.‘“
خداوند جو ريڍار کي ڌڪ هڻڻ جو حڪم
7 # مت 26‏:31، مر 14‏:27 قادر‌مطلق خداوند فرمائي ٿو تہ
”آءٌ قوم جي #13‏:7 ريڍار ڏسو زڪرياہ 11‏:4.ريڍار کي تلوار هڻي ڪڍندس،
۽ پوءِ سندس رڍون ڇڙوڇڙ ٿي وينديون.
هائو، آءٌ سندس سڄي ڌڻ جي خلاف پنهنجو هٿ کڻندس.
سو اي تلوار! منهنجي ريڍار خلاف اُٿي کڙي ٿيءُ،
يعني انهيءَ جي خلاف جيڪو منهنجو خاص ٻانهو آهي.
8تڏهن سڄي ملڪ مان ماڻهن جا ٻہ حصا مارجي ويندا،
۽ رڳو ٽيون حصو وڃي بچندا.
9آءٌ انهيءَ ٽئين حصي کي پاڪ صاف ڪندس،
هائو، کين سون ۽ چانديءَ وانگر باهہ ۾ تپائي صاف ڪندس.
پوءِ هو منهنجو نالو وٺي پڪاريندا ۽ آءٌ کين ورندي ڏيندس.
هو چوندا تہ ’خداوند ئي اسان جو خدا آهي،‘
۽ آءٌ چوندس تہ ’هيءَ منهنجي قوم آهي.‘“

Currently Selected:

زڪرياہ 13: SB

Highlight

Share

Copy

None

Want to have your highlights saved across all your devices? Sign up or sign in