Lukas 7

Ongamburiro yomuhongore Omuroma

(Mt 8:5-13)

1Nu Jesus tja manene okuraera ovandu omambo we aehe, wa ire kOkapernaum. 2Pa ri omuhongore wotjimbumba tjovarwe wovita ngwa ri nomukarere omusuverwa ku ye; nomukarere ngwi wa verere tjinene, nu wa ri pokuṱa. 3Omuhongore ngwi tja zuvire Jesus, arire tja hindi ovanene tjiva vOvajuda okukemuningira kutja e ye okuverukisa omukarere we. 4Nowo ve ya ku Jesus nave riyarikaṋa tjinene ku ye nave tja: “Omundu ngwi, tjiri, wa pu pokuvaterwa i ove. 5Tara, eye wa suvera otjiwaṋa tjetu, nu we tu tungira osinagoge.”

6Jesus opa ira puna wo. Nu eye ngunda e ri ohumburuko kaṱiṱi nondjuwo, omuhongore arire tja hindi omapanga we kutja ve katje nai ku ye: “Muhona, arikana o ri pe oviungura ovingi, orondu hi pwire kutja ove u hite mondjuwo yandje. 7Nu opu mba zu okurivara omuini kutja hi sere okuya kove. Hungira indi erakizambo uriri, nomukarere wandje ma veruka. 8Ami omuini wina owami omundu ngu mbi ri kehi youvara wovanane wokombanda, nu mbina ovarwe wovita kehi yandje. Mbi tja nai ku umwe: ‘Twende,’ a i; nu e tja komukwao: ‘Indjo,’ eya; nu e tja komukarere wandje: ‘Tjita nai,’ nu a tjiti nao.”

9Jesus tja zuva omambo nga wa himisirwe iyo murumendu ngwi tjinene; eye wa tanaukira kotjimbumba tjovandu mbaa ve mu kongorere na tja: “Tjiri, ami me mu raere, hi na pu mba muna ongamburiro ndji ṱa mba, nangarire mOisrael!”

10Novahindwa tji va kotoka kondjuwo, va vaza ingwi omukarere a veruka.

Jesus ma pendura omuzandu womuhepundu movakoke

11Tjimanga kombunda yanao Jesus wa ire kotjirongo tji tji isanewa kutja Nain, ama kongorerwa i ovahongewa ve notjimbumba otjinene tjovandu. 12Nu eye tje ya pomuvero wotjirongo ho, otji papitisiwa omukoke umwe ngwaa twarewa okukapakwa; neye wa ri omuatje omukwatwa erike waina omuhepundu, novandu ovengi tjinene votjirongo tjandje ve ri puna ingwi omukazendu. 13Muhona tja muna omukazendu ngwi, we mu ṱira ondjenda na tja: “O riri!” 14Tjazumba otje ya popezu, a ṱunu ko ruara, nu imba mba toorere arire tji va kurama. Jesus wa tja: “Muzandona, ami me ku raere, penduka!” 15Ingwi omukoke arire tja kengama, nu a utu okuhungira. Nu Jesus we mu yandja ku ina.

16Avehe va kamburwa i omburuma, nu ave hivirike Ndjambi ave tja: “Mwa penduka omuprofete omunene mokati ketu, nu Ndjambi wa varura otjiwaṋa tje!”

17Ombuze yotjiṋa hi Jesus tja tjita ya zuvaka mehi arihe ra Judea na motukondwa atuhe ongondoroka.

Ovandu mba hindwa i Johanes Omupapitise

(Mt 11:2-19)

18Ovahongewa va Johanes tji ve mu serekarerera oviṋa avihe mbi, eye wa isana ovahongewa vevari, 19nu e ve hindi kutja ve kapure Muhona nai: “Hapo oove ngwi ngu kwa za mo ya, poo ingee ngatu undje warwe?”

20Novarumendu mbo tji ve ya ku Jesus va tja: “Johanes Omupapitise we tu hindi tu ku pure kutja hapo oove ngwi ngu kwa za mo ya poo ingee ngatu undje warwe?”

21Moiri tjingeyo ndjo Jesus tjandje wa verukisa ovandu ovengi komitjise, komihihamo, nokupitisa ozombepo ozohakohoke mu wo, nokumunisa ovapoṱu ovengi. 22#Jes 35:5, 6 Jes 61:1Eye wa zira nai kovahindwa va Johanes: “Twendeye mu karaere Johanes imbi mbi mwa munu na mbi mwa zuu: Ovapoṱu nambano mave munu, oviṱeṱu mavi ka wondja, imba mba vera omutjise wongana va kohororwa, ozomboro nambano maze zuu, ovaṱi mave pendurwa movakoke, nOmbuze Ombwa mai zuvarisiwa kovasyona. 23Nomuṋingandu ingwi ngu hi nakuivaiva mu ami!”

24Ovahindwa va Johanes tji va zapo, Jesus wa uta okuhungira ohunga na Johanes kotjimbumba a tja: “Tji mwa ya ku Johanes mokuti onguza mwa ira okukamuna tjike? Oruu ndu maru hingwa i yombepo, 25poo mwa ira okukamuna tjike? Omundu ngwa zara ozombanda ozombwa? Ovandu mbe zara ozombanda ozombwa nu mba vyara mbe kara mozondjuwo zouhona! 26Ndji raereye kutja hapo eṋe mwa ira okukamuna tjike? Omuprofete? Tjiri, me mu raere, eye omunene pomuprofete. 27#Mal 3:1Orondu Johanes onguri tjike ngwi ngu maku zu nai momatjangwa: ‘Ndjambi ma tja: Tara, ami me hindi omuhindwa wandje komurungu woye kutja e kekuṱunine ondjira yoye.’ ” 28Jesus wa weza a tja: “Ami me mu raere, Johanes omunene povandu avehe mba kwatwa kombanda yehi. Nungwari ingwi ngu ri okaṱiṱiṱiṱi mouhona wa Ndjambi, eye omunene pu Johanes.”

29 # Mt 21:32; Lk 3:12 Ovandu avehe tji va zuva nai; avehe, nu tjinene ovasutise votjisuta tjouhona, va yakura kutja Ndjambi omusemba, owo tjinga ava kara nonḓuviro komarakiza wa Ndjambi omasemba, nave papitisiwa i Johanes. 30Nungwari imba Ovafarisei nozonongo zomambo va nakaura omambo wa Ndjambi, nga hungirirwa wo nu ave panḓa okupapitisiwa i Johanes.

31Jesus wa hungira komurungu a tja: “Hapo ovandu vanambano mba va sokusasanekwa na tjike? 32Owo ve ri otja ovanatje, mba haama poruveze romarandisiro, nu mbu mave ravaerasana nai: ‘Twe mu tonene ozohiva, neṋe amu ha pundu; twa imbura omaimburiro womutambo, neṋe amu ha kamburire!’ 33Johanes Omupapitise weya, e ritjaera kovikurya nu a ha nu omavinu, neṋe mwa tja: ‘Eye u nombepo ohakohoke!’ 34Omuna wOmundu tje ya, eye aa ri nu aa nu, neṋe mu tja: ‘Tareye omundu ngo omunararu, nomunwe womavinu, nepanga rovasutise votjisuta tjouhona novanauvi!’ 35Nungwari imba avehe mbe ri ovanatje va Ndjambi mave raisa kutja Ounongo wa Ndjambi owo ouatjiri.”

Jesus pondjuwo ya Simon Omufarisei

36Omufarisei umwe wa ṋangere Jesus okuyekurya puna ye, nu Jesus wa kahita mondjuwo ye na kakara pehi potjiriro. 37#Mt 26:7; Mk 14:3; Jhn 12:3Nu motjirongo ho mwa ri omukazendu omurunde. Neye tja tjiwa kutja Jesus u ri potjiriro mondjuwo yOmufarisei, arire tja eta ekende nde urire nomaze omavawa, 38a kakurama kongotwe ya Jesus pozombaze ze ama riri nokuningenisa ozombaze za Jesus nomahoze we. Nu omukazendu ngwi wa yeka ozombaze za Jesus nozondjise zotjiuru tje, e ze hupite, nu e ze hu nomaze omavawa. 39Nomufarisei ngwi ngwa ṋangere Jesus tja muna otjiṋa hi, we rihungirira a tja: “Omundu ngwi, tjiri, andakuzu omuprofete, atja tjiwa kutja omukazendu ngu ma ṱunu ku ye ngwi ouṋe; atja tjiwa kutja eye omukazendu omurunde!”

40Jesus wa hungira na tja ku ye: “Simon, mbi notjiṋa okukuraera!”

Eye a ziri a tja: “Osemba, Muhonge, ndji raera!”

41Jesus wa hungira a tja: “Pa ri ovarumendu vevari, mba ri nozondjo zomuyazemise wovimariva. Umwe wa ri nozondjo zovimariva ovisilveri omasere yetano, nomukwao wa ri nozondjo zovimariva ovisilveri omirongo vitano. 42Nowo tjinga ave ha ri notjiṋa tji mave sutu na tjo, omuyazemise arire tje ve isire aveyevari. Ngu me mu suvera tjinene pomukwao ouṋe?”

43Simon wa zira nai: “Me tjangovasi eye ngwi ngwa isirwa ozondjo ozengi pomukwao.”

Jesus wa tjere: “Ove wa ziri osemba.” 44Okuzambo Jesus wa tanaukira komukazendu na tja ku Simon: “Omukazendu ngwi mo mu munu? Tara, ami mba hiti moyoye nove ko ndji pere omeva okurikoha na wo ozombaze, nungwari eye wa ningenisa ozombaze zandje nomahoze we, nu e ze yeka nozondjise zotjiuru tje. 45Ove ko na pu we ndji hupite, nungwari eye okuza nga mba hiti mwi ngamba wa panḓere pokuhupita ozombaze zandje. 46Ove ko na pu we ndji tirire omaze womiṋinga motjiuru, nungwari eye wa hu ozombaze zandje omaze omavawa. 47Opu me zu okukuraera omaurunde we omengi ya isirwa, eye tja suvere tjinene. Nungwari ingwi ngwa isirwa kaṱiṱi, ma raisa orusuvero oruṱiṱi.”

48Jesus wa tja komukazendu: “Ourunde woye ove wa isirwa.”

49Nu imba mba ri puna ye potjiriro va uta okurihungirira kutja: “Hapo omukendu ngwi ngu isira ourunde?” 50Nungwari Jesus wa tjere komukazendu: “Ongamburiro yoye ye ku vatere; Twende mohange.”

Currently Selected:

Lukas 7: HRR-UNI

Highlight

Copy