Lukas 4

Jesus ma rorwa

(Mt 4:1-11; Mk 1:12-13)

1Jesus wa za kOjordan e ura nOmbepo Ondjapuke; nOmbepo ye mu twarere mokuti onguza. 2Nu koṋa ngo eye oka karorerwa i Satan oure womayuva omirongo vine. Eye ke notjiṋa tjaa ri momayuva ngo, nowo tji ya yanda, arire tja ṱondjara.

3Satan wa tja ku ye: “Tjinangara oove Omuna wa Ndjambi, rakiza ewe ndi kutja ri rire omboroto.”

4 # Deu 8:3 Nungwari Jesus wa zira a tja: “Omatjangwa maye tja: ‘Omundu ka hupu momboroto porwayo.’ ”

5Nu Satan we mu twara kondongamo, nu e kemuraisira omauhona aehe wouye mombapaiziro yeho 6na tja ku ye: “Ami me ku pe ouvara auhe mbwi nounene wawo auhe, orondu vya yandjewa ku ami, nu me vi yandja ku ngamwa auhe ngu mba vanga. 7Nu ove tji we rikotamene ku ami, avihe mbi mavi rire ovyoye.”

8 # Deu 6:13 Jesus wa zira a tja: “Omatjangwa maye tja: ‘Rikotamena ku Muhona, Ndjambi woye, nu u karere ye erike!’ ”

9Okuzambo Satan we mu twara kOjerusalem, e kemutwa kondomba yondjuwo ya Muhona na tja ku ye: “Tjinangara oove Omuna wa Ndjambi, rurumina pehi. 10#Psa 91:11, 12Orondu omatjangwa maye tja: ‘Ndjambi me ku rakizire ovaengeri ve kutja owo ve ku ṱakamise nawa.’ 11Nu wina maye tja: ‘Owo mave ku toora momake kokutja nangarire ombaze yoye ai ha putara mewe.’ ”

12 # Deu 6:16 Nungwari Jesus wa zira a tja: “Omatjangwa maye tja: ‘Ko nokurora ko Muhona Ndjambi woye.’ ”

13Satan tja za nokurora Jesus momihingo pekepeke, arire tje mu esa oruveze okaṱiṱi.

Jesus ma utu oviungura vye mOgalilea

(Mt 4:12-17; Mk 1:14-15)

14Nu Jesus wa yaruka kOgalilea e nomasa wOmbepo Ondjapuke, nu ombuze ohunga na ye ya zuvakere mehi arihe ndo. 15Eye wa honga mozosinagoge, nu a hivirikwa i avehe.

Jesus ma nyengewa mOnasaret

(Mt 13:53-58; Mk 6:1-6)

16Kombunda yanao Jesus wa ire kOnasaret ke kurira, notja pa iririra eye wa ya kosinagoge mesabata. Nu tja sekama okuresa momatjangwa, 17arire tja pewa embo romuprofete Jesaja. Eye wa paturura embo ndi na munu poṋa pu pa tjangwa nai:

18 # Jes 61:1, 2 “Ombepo ya Muhona i ri kombanda yandje,

orondu eye we ndji toorora okutwara ombuze ombwa kovasyona.

Eye we ndji hinda okukatjivisa ouyara kovapandekwa,

nokukamunisa ovapoṱu,

nokukayandja onguturiro kovatatumisiwa,

19nokukazuvarisa kutja oruveze rwa yenene

Muhona ndu ma yama otjiwaṋa tje.”

20Tjazumba Jesus wa pata indi embo, a yandja komukarere nu arire tja haama mbo. Ovandu avehe mosinagoge va siririka omeho mu ye, 21ngunda ama tja nai ku wo: “Ndinondi omambo womatjangwa nga ya yenenisiwa otja punga amwe rizuvire oveni.”

22Owo avehe ve mu kamburira, nu va himisiwa i omambo omawa omapore nga za motjinyo tje, nu ave tja: “Eye kaye ngwi omuzandu wa Josef are?”

23Eye wa tja ku wo: “Tjiri, ami me tjiwa kutja eṋe mamu serekarere omuano mbwi ku ami: ‘Nganga ripanga omuini,’ nu mamu tja nai ku ami: ‘Eṱe twa zuva oviṋa avihe mbi wa tjita mOkapernaum. Tjita oviṋa tjingevyo mbyo muno mu wa kwaterwa.’ 24#Jhn 4:44Nungwari, tjiri, me mu raere, kape nomuprofete ngu yakurwa moṋa ma kwaterwa.

25 # 1Ozo 17:1 “Me mu raere ouatjiri kutja momayuva wa Elia mwa ri ovahepundu ovengi mOisrael, indu tji ku ha rokere oure wozombura ndatu nohinga, nu tji kwa ri ondjara onḓeu mehi arihe. 26#1Ozo 17:8-16Nungwari Elia ke na indu wa hindirwe ku umwe mOisrael, posi yomukazendu umwe omuhepundu ngwa turire mOsarepta mehi ra Sidon. 27#2Ozo 5:1-14Nu mwa ri ovandu ovengi mehi ra Israel mba ri nomutjise wongana momayuva womuprofete Elisa; nungwari kapa ri umwe wawo ngwa verukisirwe posi na Naaman, Omusirie.”

28Nu avehe mosinagoge tji va zuvire omambo nga arire tji va ṱomazenge. 29Owo va sekama ave nanene Jesus pendje yotjihuro nave mu twara kombanda kondomba yotjivanda ku kwa tungirwe otjihuro tjawo, kokutja vekemuundurire pehi okuza kombanda ngo, 30nungwari eye wa tuurunga mokati kovandu narire tja i.

Omundu ngwa ri nombepo ohakohoke

(Mk 1:21-28)

31Jesus wa ya kOkapernaum, otjihuro tji tji ri mehi ra Galilea, nu arire tja kahonga ovandu mesabata. 32#Mt 7:28, 29Owo va himisiwa i omahongero we, eye tjinga aa hungire nouvara. 33Nu mosinagoge mo mwa ri omundu ngwa ri nombepo ohakohoke mu ye; noyo ya ravaera neraka enene ai tja: 34“Ha! Otjiṋa tji u na tjo na eṱe otjikeṋa, Jesus wa Nasaret? Ove we era okutuyandeka are? Ami mbi ku i kutja oove aṋi: Oove omuhindwa omuyapuke wa Ndjambi!”

35Jesus wa rakiza indji ombepo a tja: “Muina, nu u pite momundu ngwi!” Ombepo ohakohoke otji ya vanda ingwi omundu pehi momurungu wawo nai piti mu ye nokuhinokumutjita otjipo.

36Ovandu avehe va himinwe tjinene nga tji va uta okupurasana ave tja: “Omangembo nga? Eye ma rakiza ozombepo ozohakohoke nouvara nomasa, nozo aze piti?” 37Ombuze ohunga na Jesus arire tji ya handjauka koṋa akuhe ongondoroka norukondwa rwa Kapernaum.

Jesus ma verukisa ovandu ovengi

(Mt 8:14-17; Mk 1:29-34)

38Jesus wa pitire mosinagoge na kahita mondjuwo ya Simon. Nu ina yomukazendu wa Simon wa ri notjindjumba otjizeu, nowo va hepurira Jesus omukazendu ngwi. 39Jesus weya, e mu kuramene na rakiza ihi otjindjumba kutja tji ze mo mu ye, notjo arire tji tja zu mo mu ye. Eye wa penduka tjimanga nu arire tje ve ṱunine omariro.

40Neyuva tji ratoko, avehe mba ri novavere vomitjise omihoko pekepeke, ve ve etere ku Jesus; eye wa yambeka omake ku wo avehe, nu e ve verukisa. 41Ozombepo ozohakohoke wina za pita movandu ovengi amaze uru nai: “Oove Omuna wa Ndjambi!”

Jesus wa rakizire ozombepo ozohakohoke nomambo ne he ze yandjere okuhungira, tjinga aaze tjiwa kutja eye onguri Omutwirisiwa.

Jesus ma zuvarisa mozosinagoge

(Mk 1:35-39)

42Tji pa tji Jesus wa pitire motjihuro, a i koṋa ka kakara erike. Ovandu va utire okumupaha, nu tji ve mu muna, va kondja kutja a ha i. 43Nungwari eye wa tja ku wo: “Ami me sokukazuvarisa Ombuze Ombwa youhona wa Ndjambi kovihuro vyarwe wina, orondu otjo otji mba hindirwa i Ndjambi.”

44Neye otjaa zuvarisa mozosinagoge mehi arihe ra Judea.

Currently Selected:

Lukas 4: HRR-UNI

Highlight

Copy