Lukas 23

Jesus komurungu wa Pilatus

(Mt 27:1-2, 11-14; Mk 15:1-5; Jhn 18:28-38)

1Ovandu avehe va sekamene nave twara Jesus komurungu wa Pilatus. 2Narire tji va utu okumupa ondjo amave tja: “Omundu ngwi twe mu muna kutja omupukise wotjiwaṋa tjetu nu u tji tjaera okusuta otjisuta tjouhona kombara ya Roma, nu u tja eye onguri Omutwirisiwa, ombara.”

3Pilatus we mu purire a tja: “Oove ngu u ri ombara yOvajuda?”

Jesus wa zira nai: “Opo mbo pu mo hee.”

4Tjazumba Pilatus arire tja tja kovapristeri oviuru novimbumba vyovandu: “Ami hi nokumuna mo ondjo momundu ngwi.”

5Nungwari owo va kara pokumupa ondjo tjinene amave tja: “Omundu ngwi u hohiza ovandu nomahongero we okutjita ezunganeno mehi arihe ra Judea. Wa utira mOgalilea nga tje ya ngunongwi.”

Jesus komurungu wa Herodes

6Nu Pilatus tja zuva omambo nga, wa pura a tja: “Omundu ngwi hapo Omugalilea?” 7Eye tja tjiwa kutja Jesus wa zire korukondwa rwehi, ndi honaparerwa i Herodes, arire tje mu hindi ku Herodes ngwa ri mOjerusalem momayuva ngo. 8Herodes wa nyanda tjinene tja muna Jesus, eye tjinga e mu zuvire na vangere okumumuna okuza korukuru. Eye wina aaze ri kutja e mu mune ama tjiti otjihimise nangarire tjimwe. 9Herodes opa purira Jesus omapuriro omengi, nungwari Jesus ka zirire ko. 10Ovapristeri oviuru nozonongo zomambo va kuramene mbo tjandje mave yandja ondjo tjinene ku Jesus. 11Herodes novarwe ve wovita va nyekerera Jesus nokumuyamburura; tjazumba arire tji ve mu zarisa ombanda ombwa oheze nave mu yarura ku Pilatus. 12Meyuva tjingero ndo Herodes na Pilatus otji va rira omapanga, tjandje komurungu wanao owo va ri ovanavita.

Jesus ma pangurwa kokuṱa

(Mt 27:15-26; Mk 15:6-15; Jhn 18:39—19:16)

13Pilatus wa woronganisa ovapristeri oviuru novanane notjiwaṋa 14na tja ku wo: “Mwa eta omundu ngwi ku ami otja ngu ri omupukise wotjiwaṋa. Nambano ami mbe mu konḓonona komurungu weṋu, nu hi mwine mo ondjo mu ye moviṋa, mbi mamu tja eye omunandjo. 15Nu Herodes wina ka mwine mo ondjo mu ye, opa zu okumuhinda a kotoke ku eṱe. Omundu ngwi ke notjiṋa tja tjita puma sokuṱira. 16Ami otji me mu tono, tjazumba e mu kutura a i.”#23:16: Omatjangwa omakwao ya weza po ezeva ndi: 17 Nu aruhe meyuva rOpaska Pilatus ee ve pitisire omupandekwa umwe motjovakamburwa.

18Nungwari otjimbumba atjihe tja ravaera atji tja: “Kemuzepe! Tu kuturira Barabas!” 19Barabas wa yumbirwe motjovakamburwa mena rezunganeno nda tjitirwe motjihuro na mena ronḓepero.

20Pilatus wa vanga okukutura Jesus, notje riyarikaṋa rukwao kotjimbumba kutja e mu kuture. 21Nungwari owo va ravaerera ko ave tja: “Mu papera kotjikoroise! Mu papera kotjikoroise!”

22Pilatus wa tjere ku wo porutjatatu: “Nu hapo eye wa tjita ouvi watjike? Ami hi nokumuna otjiṋa tja tjita pa sokuṱira! Ami me mu tono ozongora tjazumba e mu kutura.”

23Nungwari owo va ravaerera ko nomaraka omanene tjinene kutja Jesus nga paperwe kotjikoroise, nu korusenina omaravaerero wawo arire tji ya toṋa. 24Pilatus otja pangura Jesus kokuṱa, otja owo punga ava ningira. 25Eye we ve kuturira omundu ngu yave vanga, ingwi ngwa yumbirwe motjovakamburwa mena rezunganeno nonḓepero. Nu ingwi Jesus we mu yandja ku wo kutja ve tjite ku ye otja kombango yawo.

Jesus ma paperwa kotjikoroise

(Mt 27:32-44; Mk 15:21-32; Jhn 19:17-27)

26Ovarwe wovita va twara Jesus okukemupapera kotjikoroise, nu ngunda amave i, arire tji va hakaene nomurumendu ngwa zire kOkirene wena Simon ngwaa hiti motjihuro okuza kotjikunino. Owo ve mu kambura, ave mu twike otjikoroise nave mu toorisa tjo ama kongorere Jesus.

27Otjimbumba otjingi tjovandu tja kongorera Jesus; nu mu tjo mwa ri ovakazendu mbaa ve mu ṱire oruhoze nokumurira. 28Nungwari Jesus wa tanaukira ku wo na tja: “Vakazendu va Jerusalem, amu ririre ami, nungwari ririreye oveni novanatje veṋu, 29orondu maku ya omayuva ovandu mu mave tja: ‘Ovaṋingandu ovakazendu ozongandji, nu ovaṋingandu imba mbe hi na indu va pandukire, nu mbe hi na indu va nyamisisire.’ 30#Hos 10:8; Omav 6:16Ma rire oruveze ovandu mu mave tja nai kozondundu: ‘Wireye kombanda yetu,’ nu kovivanda ave tja: ‘Tu horekeye!’ 31Nu tji pe ri nai komuti omutarazu, mape kara vi ku imbwi omukukutu?”

32Ovarumendu vevari varwe ovarunde wina va twarerwe okukaṱa puna Jesus. 33Tji ve ya poṋa paa pe isanewa kutja “opOtjikongo tjOtjiuru,” arire tji va papere Jesus kotjikoroise, na imba ovarunde vevari wina, umwe kokunene nomukwao kokumuho kwe. 34#Psa 22:18Jesus arire tja tja: “Tate, ve isira, orondu tji ve hi nokutjiwa ihi tji mave tjiti.”

Novarwe wovita va haṋasana ozombanda za Jesus mokuyumba ozohanga.

35 # Psa 22:7 Ovandu va kuramene mbo amave tarere, ovanane vOvajuda ngunda amave mu nyekerere amave tja: “Eye wa yama ovandu varwe; nge riyame omuini tjinangara eye tjiri Omutwirisiwa, omutoororwa wa Ndjambi!”

36 # Psa 69:21 Ovarwe wovita wina ve mu nyekerera; ve ya ku ye, ave mu pe omavinu omayake, 37nu ave tja: “Tjinangara oove ngu u ri ombara yOvajuda, riyama omuini!”

38Nu kombanda ye kwa tjangerwe omambo nga: “Ingwi eye ombara yOvajuda.”

39Umwe wa imba ovarunde, mba papererwe kotjikoroise we mu yamburura ama tja: “Tjinangara oove ngu u ri Omutwirisiwa, riyama omuini na eṱe!”

40Nungwari ingwi omukwao we mu vera nomambo na tja: “Ove nangwari ko nondira ku Ndjambi are? Ove u ri mombanguriro tjingeyo. 41Nungwari ombanguriro ndji twa pewa, yetu pwire, orondu eṱe twa pangurwa otja kovitjitwa vyetu, posi ya eye ke notjiṋa tja zunḓa.” 42Neye arire tja tja ku Jesus: “Muhona, arikana, ndji zemburuka tji wa hiti mouhona woye!”

43Jesus wa tjere ku ye: “Tjiri, me ku raere, ndino mo kakara puna ami moparadisa.”

Onḓiro ya Jesus

(Mt 27:45-56; Mk 15:33-41; Jhn 19:28-39)

44 # Eks 26:31-33 Nu ya ri oiri mangara oitjamurongo na mbari yomuhuka, neyuva arire tji ra zorere, nu kwa kara onḓorera kombanda yehi arihe nga koiri oitjatatu yomapeta. 45Ngunda eyuva ara zorere, erapi etjizikize rondjuwo ya Muhona ra tauka motumbembera tuvari. 46#Psa 31:5Nu Jesus wa ravaera neraka enene a tja: “Tate, ombepo yandje me i twa momake woye!” Tja za nokuhungira omambo nga, arire tja ṱu.

47Omuhongore wovita wa muna imbi mbya tjitwa, arire tja hivirike Ndjambi a tja: “Tjiri, omundu ngwi wa ri omuhinandjo!”

48Notjimbumba atjihe tjaimba mba woronganena mbo okutarera, nu mba muna imbi mbya tjitwa, avehe mba va yaruka kozoyawo amave ritono moviari okuraisa oruhoze rwawo. 49#Lk 8:2, 3Nu imba avehe mbaa ve tjiwa Jesus nawa, novakazendu mbe mu kongorera okuza kOgalilea aave tarere oviṋa mbi ava kurama ohumburuko.

Ombakero ya Jesus

(Mt 27:57-61; Mk 15:42-47; Jhn 19:38-42)

50-51Nu pa ri omurumendu wena Josef ngwa zire kotjirongo Arimatea, otjirongo tji tji ri mehi ra Judea. Eye wa ri omurumendu omuwa nomusemba ngwaa undju omeero wouhona wa Ndjambi. Nangarire kutja eye wa ri okaṋepo kotjira tjovapangure, ka itaverere ko kondyero na kovitjitwa vyawo. 52Omurumendu ngwi wa kahita moya Pilatus na kaningira orutu rwa Jesus. 53Tjazumba arire tja katurura orutu, e ru manga merapi ewa eheze ne ru twa meyendo nda kororerwe moruuwa orukukutu, nu mu mu hi na mwa pakerwe omundu. 54Oro ra ri eyuva romerirongerero, okutja oritjatano, nu tjandje indi esabata ri ri popezu.

55Ovakazendu mba mba kongorerere Jesus okuza kOgalilea, va ya puna Josef nave kamuna indi eyendo, norutu rwa Jesus kutja rwa pakwa vi. 56#Eks 20:10; Deu 5:14Tjazumba otji va yaruka kozoyawo nave kaṱunina orutu rwa Jesus ovyomoro omuwa nomaze wokutwirisa. Nu mesabata arire tji va suva otja tji pa zikamisiwa mOmatwako.

Currently Selected:

Lukas 23: HRR-UNI

Highlight

Copy