Lukas 19

Jesus na Sakeus

1Jesus wa hitire mOjeriko na tuurunga mu tjo. 2Nu mwa ri omurumendu wena Sakeus, omunane wovasutise votjisuta tjouhona, nu ngwa ri omutumbe. 3Eye wa kondja okumuna Jesus, nungwari mena rouingi wovandu eye kaa sora okumumuna, tjinga a ri okasupi momuseka. 4Sakeus otja tupuka komurungu wovandu na karonda komukuyumbwa kutja a sore okumuna Jesus, orondu Jesus tjinga aa twara ondjira ndjo. 5Nu Jesus weya poṋa mbo, nu tja yera omeho, arire tja munu Sakeus na tja: “Sakeus, hakahana okuheruka, orondu ndino me sokukauhara moyoye.”

6Sakeus wa herukire tjimanga na kasekirisa Jesus nenyando enene. 7Nu avehe mba munine otjiṋa hi va unaunine ave tja: “Tara, omundu ngwi ma kasekira poyomunauvi!”

8Nungwari Sakeus wa sekamene na tja ku Muhona: “Muhona, orumbembera rumwe rwouini wandje me yandja kovasyona, nu tji mba rya otjiṋa tjomundu mouhasemba, me mu yarurire tjo potune.”

9Jesus wa tja ku ye: “Ndinondi ondjuwo ndji ya munu ondjamo, orondu omundu ngwi wina eye ondekurona ya Abraham. 10Omuna wOmundu we era okupaha nokuhupisa imba mba pandjara.”

Omasanekero wovimariva ovingoldo

(Mt 25:14-30)

11Novandu ngunda amave puratene komambo nga, Jesus wa hungira komurungu ne ve serekarerere omasanekero. Eye wa ri pokuhita mOjerusalem, novandu otji yave tjangovasi ouhona wa Ndjambi u ri pokuya. 12Nu otja tja nai: “Pa ri omurumendu ngwa zire monganda ohona, nu arire tja i kehi rokokure a kazikwa okurira ombara, tjazumba a kotoke. 13Nu ngunda e hiya ya, wa isanene ovakarere ve omurongo ne ve pe auhe otjimariva otjingoldo na tja ku wo: ‘Ungureye na vyo nga tji mba kotoka.’ 14Nungwari ovandu vehi rawo ve mu tondere, notji va hinda ovahindwa ve mu tezere nu ve katje nai: ‘Omundu ngwi katu nokumuvanga kutja a rire ombara yetu.’

15“Nungwari omurumendu ngwi wa kazikwa okurira ombara, narire tja kotoka. Tjimanga a rakiza kutja ovakarere ve imba ka yandjere ovimariva ve ye komurungu we, a tjiwe kutja auhe wa ungura pu pe ṱeki pi notjimariva otjingoldo. 16Omutenga weya a tja: ‘Muhona, potjimariva ihi tjimwe otjingoldo tji we ndji pere mba munina po ovimariva omurongo ovingoldo.’ 17Omuhona wa tja: ‘Okokuwa, oove omukarere omuṱakame. Ove tjinga awa ṱakama mouṋa ouṱiṱi, nambano otjinga ame ku ziki u honaparere ovihuro omurongo.’ 18Nomukarere outjavari weya a tja: ‘Muhona, potjimariva ihi tjimwe otjingoldo tji we ndji pere mba munina po ovimariva vitano ovingoldo.’ 19Nu ku ingwi eye wa tja: ‘Ove mo honaparere ovihuro vitano.’

20“Omukarere omukwao outjatatu weya a tja: ‘Muhona, otjimariva tjoye otjingoldo tji mba horekere merapi, otjo hi, kambura. 21Ami mba tira ove, tjinga au nombeze. Ove u kambura ihi tji tji he ri otjoye, nu u konda mbi u ha kunine.’ 22Omuhona arire tja tja ku ye: ‘Me ku pangura nomambo wotjinyo tjoye omuini, mukarere omuvi. Ove iyo tjiwa kutja mbi nombeze, nokutja mbi kambura ihi tji tji he ri otjandje, nu mbi konda mbi mbi ha kunine. 23Nokutjavi tji u ha twire ovimariva vyandje mondjuwo yomapwikiro? Nu ami tji mba kotoka, nu tji mbe kevinana mombwiko, mbi munine po otjimariva otjitjoziwa.’

24“Tjazumba omuhona arire tja tja ku imba mba kuramene mbo: ‘Mu yekeye ihi otjimariva otjingoldo tje na tjo, nu mu tji yandje ku ingwi ngu novimariva ovingoldo omurongo.’ 25Nungwari owo va tja ku ye: ‘Muhona, eye u novimariva ovingoldo omurongo nu!’ 26#Mt 13:12; Mk 4:25; Lk 8:18Eye wa zirire a tja: ‘Me mu raere, auhe ngu notjiṋa, ma wezirwako komeho, nungwari ingwi ngu hi notjiṋa, ma yekwa nangarire ihi otjiṱiṱi tje na tjo. 27#Mt 25:14-30Nambano imba ovanavita na ami mbe hi nokuvanga kutja mbi rire ombara yawo, ve eteye nguno, mu ye okuvezepera komurungu wandje!’ ”

Omahitiro wa Jesus mOjerusalem

(Mt 21:1-11; Mk 11:1-11; Jhn 12:12-19)

28Jesus tja zire nokuhungira omambo nga, we ve hongorera okuyenda kOjerusalem. 29Nu tje ya popezu na Betfage na Betanie kOndundu yOmiṋinga, arire tja hindi ovahongewa vevari, 30na tja ku wo: “Twendeye kotjirongo hi na tji tji ri komurungu; nu ngunda amamu hiti mu tjo, mamu munu okasinona ku ka kutwa, nu ku ke hi na indu ka kavirirwe. Ke kutureye nu mu ke ete nguno. 31Nu tji pa ningi omundu ngu me mu pura kutja mamu tjitire tjike nao, mu raereye kutja Muhona me ke hepa.”

32Nowo va ya, nu ave kavaza avihe avi ri otja Jesus pe ve raerere. 33Nu ngunda amave ke kutura, oveni vako arire tji va tja ku wo: “Okasinona mamu ke kuturire tjike?”

34Owo va zirire ave tja: “Muhona me ke hepa.” 35Nowo ve ke eta ku Jesus. Tjazumba otji va yara ozombanda zawo kombanda yokasinona nave vatere Jesus okukekavira. 36Nu eye ngunda ama kavire, ovandu va yara ozombanda zawo mondjira.

37Nu Jesus tja vaza popezu na Jerusalem, pomarandatero wondjira kOndundu yOmiṋinga, otjimbumba otjinene tjovemukongorere arire tji tja utu okuhivirika Ndjambi nokumutanga neraka enene mena roviṋa avihe ovinene owo mbi va mwine, ave tja: 38#Psa 118:26“Ngai tangwe indji ombara ndji mai ya mena ra Muhona! Ohange meyuru nondatero ku Ndjambi wOkombandambanda!”

39Ovafarisei tjiva motjimbumba va hungira ku Jesus ave tja: “Muhonge, raera ovakongorere voye kutja ve mwine!”

40Jesus wa zirire nai: “Ami me mu raere, owo tji va mwina, omawe maye ravaere.”

Jesus ma riri Jerusalem

41Jesus tje ere popezu notjihuro, nu tje tji muna, we tji rira 42a tja: “Andakuzu ndinondi ove wina wa tjiwa imbi mbi mavi ku pe ohange, nungwari ovyo nambano vya undikwa kove. 43Omayuva maye ya ovanavita na ove tji mave ku yumbu orumbo, ave ku kovere nave ku pamisa kominda avihe. 44Owo mave ku nyono okumana puna ovature voye. Nu move kamaave isa ewe nangarire rimwe kombanda yekwao, ove tjinga au ha zemburukire oruveze Ndjambi ndwe ya okukuyama!”

Jesus ma i kondjuwo ya Muhona

(Mt 21:12-17; Mk 11:15-19; Jhn 2:13-22)

45Jesus wa hitire mondjuwo ya Muhona na utu okuramba imba mbaa ve randasanene mu yo, 46#Jes 56:7; Jer 7:11ama tja ku wo: “Kape tjangerwe nai are: ‘Ondjuwo yandje mai isanewa kutja ondjuwo yongumbiro.’ Nungwari eṋe mwe i isa po ondimba yovapunde!”

47 # Lk 21:37 Eyuva arihe Jesus aa hongo mondjuwo ya Muhona. Ovapristeri Oviuru nozonongo zomambo novanane votjiwaṋa aave vanga okumuzepa, 48nungwari owo kave mwine omuhingo mbu va sere okumuzepa na wo, otjiwaṋa atjihe tjinga aatji puratene ku ye nonyuṋe.

Currently Selected:

Lukas 19: HRR-UNI

Highlight

Copy