Lukas 13

Ritanaureye kourunde weṋu poo mamu ṱu

1Momayuva ngo pa ri ovandu tjiva mba serekarerera Jesus Ovagalilea imba Pilatus mba tja ngave ṱe ngunda amave punguhire Ndjambi ozombunguhiro zovinamuinyo. 2Jesus we ve zirire a tja: “Mamu tjangovasi Ovagalilea mba mba ṱa momuhingo mbo, va ri ovanauvi tjinene pOvagalilea imba ovakwao avehe are? 3Kako ka tji pe ri! Me mu raere, tji mu hi nakuritanaura kourunde weṋu, eṋe wina mamu ṱu momuhingo mbwa sana ngo. 4Nu wina mamu tjangovasi ovandu imba omurongo na hambondatu mba ṱira mOsiloam, indu oruhungu tji rwa wira kombanda yawo, va ri ovarunde tjinene povature avehe va Jerusalem are? 5Kako ka tji pe ri! Nu me mu raere kutja tji mu hi nakuritanaura, eṋe amuhe mamu ṱu momuhingo tjingewo.”

Omasanekero womukuyumbwa mbu ha twako ovihape

6Jesus wa hungira omasanekero nga ku wo a tja: “Omundu worive wa ri nomukuyumbwa mbwa kunine motjikunino tje tjomivite. Neye tja ya komukuyumbwa okukapora omakuyu, nu e he keyevaza ko, 7arire tja tja komuungure wotjikunino: ‘Tara, ya rire oure wozombura ndatu tji mbi ya mba okuyekunikora omakuyu komukuyumbwa mbwi, nu hi vaza ko ovikurya. U ka! Mau manene tjike inga omasa wehi ehapise uriri nai?’ 8Nungwari ingwi omuungure wotjikunino wa zira a tja: ‘U esa oure wombura ndji rukwao, mbi twere okukondorokisa wo, nu mbi twe mo ombumbi. 9Ngahino ombura, ndji mai yende owo mau twako omakuyu, nu tji pe ha karere nao, arire tji wa ke!’ ”

Jesus ma verukisa omukazendu omuremane mesabata

10Otjikando tjimwe mesabata Jesus aa hongo ovandu mosinagoge. 11Nu pa ri omukazendu ngwa ri nombepo ohakohoke ndje mu verisire oure wozombura omurongo na hambondatu; eye wa ri ongota nu kaa sora okuyeruruka oparukaze. 12Jesus tja muna omukazendu ngwi we mu isana na tja ku ye: “Mukazendu, ove wa kuturwa kouvere woye!” 13Eye wa yambeka omake we ku ye, nu tjimanga omukazendu a yeruruka, nu a tanga Ndjambi.

14 # Eks 20:9, 10; Deu 5:13, 14 Omunane wosinagoge wa pindika mena rokutja Jesus wa verukisa omukazendu mesabata, narire tja tja kovandu: “Omayuva hamboumwe uriri omundu ma yandjerwa okuungura, nga rire mu mwe ya okuyekuverukisiwa, nungwari amu ya mesabata, kako!”

15Muhona we mu zirire a tja: “Vanatjavivi eṋe! Owaṋi mokati keṋu ngu hi nakukutura ongombe ye poo okasino ke ketemba mesabata, nu e ke twara korwi? 16Nu omukazendu ngwi, ondekurona ya Abraham, ngwa pandekerwe i Satan oure wozombura omurongo na hambondatu, ka sere okukuturwa komapando ngo mesabata are?” 17Nu Jesus tja za nokuhungira omambo nga, ovanavita na ye arire tji va ṱohoṋi; nungwari ihi otjimbumba tjovandu tja yorokera ovihimise avihe eye mbyaa tjiti.

Omasanekero wondwi yomuti omumosteri

(Mt 13:31-32; Mk 4:30-32)

18Jesus wa purire a tja: “Ouhona wa Ndjambi wa sana ku tjike, nu me u sasaneke na tjike? 19Owo u ri otja ondwi yomumosteri omundu ndja toora ne keikuna motjikunino tje. Oyo ya hapa ai rire omuti omunene, nozonḓera aze tungu oviruwo mozondavi zawo.

Omasanekero wosurise

(Mt 13:33)

20“Norukwao ouhona wa Ndjambi me u sasaneke na tjike? 21Owo u ri otja osurise omukazendu ndja runga mumwe noruhere orunguvize rwozorita omirongo vine nga oruhere aruhe tji rwa suru!”

Omuvero omumango

(Mt 7:13-14, 21-23)

22Jesus wa ryangere movihuro na movirongo ama hongo ovandu, nu e ri mouyenda we kOjerusalem. 23Omundu umwe we mu pura a tja: “Muhona, hapo ovandu mbu mave yamwa owo ouṱiṱi?”

Jesus we ve zirire a tja: 24“Kondjeye okuhitira momuvero imbwi omumango, orondu me mu raere, ovengi mave roro okuhita, nungwari kamaave sora. 25Omuini wondjuwo ma sekama, nu ma pata imbwi omuvero, eṋe imba mbu mwa kurama pendje, mamu utu okukongora omuvero amamu tja: ‘Muhona, arikana tu patururira!’ Neye otji ma ziri a tja: ‘Ami hi mu i kutja oweṋe ovatjiṋe.’ 26Tjazumba eṋe mamu ziri nai: ‘Eṱe aa tu ri nu aa tu nu puna ove, nove iyo hongo movirongo vyetu!’ 27#Psa 6:8Nungwari eye ma tja nai rukwao: ‘Ami hi mu i kutja oweṋe ovatjiṋe. Zapweye pu ami, eṋe amuhe vatjite wouvi!’ 28#Mt 22:13; 25:30#Mt 8:11, 12Eṋe, tjiri, mamu riri nu mamu kweye omayo tji mamu munu Abraham na Isak na Jakob novaprofete avehe mouhona wa Ndjambi, eṋe ngunda amwa imbirahiwa pendje! 29Ovandu mave zu komuhuka na kongurova na komukuma wokeyuva kokunene nowokeyuva kokumuho, nu ave ya okukara pehi pomariro mouhona wa Ndjambi. 30#Mt 19:30; 20:16; Mk 10:31Nu imba nambano mbe ri ovasenina mave rire ovatenga, nu imba nambano mbe ri ovatenga ave rire ovasenina.”

Jesus wa suvera otjihuro Jerusalem

(Mt 23:37-39)

31Momayuva ngo Ovafarisei tjiva ve ere ku Jesus nave tja ku ye: “Twende, u ze mo muno, orondu Herodes ma vanga okukuzepa.”

32Jesus we ve zirire a tja: “Twendeye mu katje nai kombandje ndjo: ‘Ami me pitisa ozombepo ozohakohoke, nu ndino na muhuka me verukisa ovandu, nu meyuva oritjatatu otji me mana oviungura vyandje.’ 33Nungwari ndino na muhuka na muhuka yandina mbi sokukara mouyenda wandje; orondu kakokuwa omuprofete okuṱira kwarwe pendje na mOjerusalem.

34“Jerusalem, Jerusalem! Ove wa zepa ovaprofete, nu wa zepa nomawe imba Ndjambi mba hindire kove. Tjiri, itungapi tji mba vanga okuwonga ovature voye avehe tjimuna onḓera onḓenḓu tjinga ai wongera ouzerona wayo kehi yovivava vyayo, nungwari eṋe kamu vangere ko! 35#Psa 118:26Purateneye, otjihuro tjeṋu matji sewa tjo. Tjiri, me mu raere, kamaamu ndji munu nga meyuva ndi eṋe ndi mamu ravaere nai: ‘Nga serwe ondaya ingwi ngu meya mena ra Muhona!’ ”

Currently Selected:

Lukas 13: HRR-UNI

Highlight

Copy