Johanes 4

Jesus nomukazendu Omusamaria

1Ovafarisei va zuvire kutja Jesus we ritakavarisire ovahongewa nokuvepapitisa okukapita Johanes. 2Jesus omuini hapo kaa papitisa ovandu; ovahongewa ve ombaa ve papitisa. 3Nu Jesus tja zuvire oviṋa mbi, arire tja zu mo mOjudea na yaruka kOgalilea; 4nu mokuyenda ngo a tuurungire mehi ra Samaria.

5 # Gen 33:19; Jos 24:32 Nu mOsamaria eye we ere kotjirongo tjena Sikar, tji tja ri popezu nehi romakunino Jakob nda yandjere komuzandu we Josef. 6Poṋa mbo pa ri ondjombo ya Jakob. Nu Jesus tjinga a urirwe mena rouyenda, arire tja kahaama pondjombo ndji. Noiri ya ri mangara oitjahamboumwe yongurova.

7Omukazendu Omusamaria we ere okuteka omeva, nu Jesus a tja ku ye: “Ndji pao omeva mbi nwe.” 8Ovahongewa ve tjandje nai va i kotjirongo okukaranda ovikurya.

9 # Esra 4:1-5; Neh 4:1, 2 Omukazendu wa zirire a tja: “Oove Omujuda, nami owami Omusamaria. Mo ndji ningirire tjike omeva okunwa?” Ovajuda nOvasamaria kaave wana.

10Jesus arire tja ziri a tja: “Andakuzu uri mo tjiwa imbi Ndjambi mbye yandja, nokutja ouṋe ngu me ku ningire omeva okunwa, itjo mu ningira, neye e ku pe omeva omanamuinyo.”

11Omukazendu wa tjere: “Muhona, ove ko notjiwote, nondjombo ongoto. Nambano nai omeva omanamuinyo mo isa pi? 12Ondjombo ndji twa pewa i tate mukururume Jakob, neye omuini wa nwine mu yo puna ovana ve nozonyanda ze. Oove omunene pu Jakob are?”

13Jesus a ziri a tja: “Auhe ngu ma nu omeva nga ma ṱonyota rukwao. 14Nungwari auhe ngu ma nu omeva ami ngu me mu pe kamaa ṱonyota rukwao. Omeva nga ami ngu me mu pe mu ye maye rire omburo yomeva omanamuinyo ngu maye mu pe omuinyo waaruhe.”

15Omukazendu a tja: “Muhona, ndji pao omeva nga sana ngo, ami himee ṱonyota rukwao, nu himee uhara a meya mba okuyekuteka omeva.”

16Jesus arire tja tja: “Twende u kaisane omurumendu woye, nu u kotoke.”

17Eye a ziri a tja: “Ami hi nomurumendu.”

Jesus a kotora a tja: “Ove mo sora tji motja ko nomurumendu. 18Ove wa kupirwe i ovarumendu vetano, nu ingwi ngu mu ri pamwe nambano eye kamurumendu woye. Ove we ndji raere ouatjiri.”

19Omukazendu arire tja tja: “Muhona, ami me munu kutja oove omuprofete. 20Ootate mukururume Ovasamaria aave rikotamene ku Ndjambi kombanda yondundu ndji, nungwari eṋe Ovajuda mu tja mOjerusalem omu tu sokurikotamena ku Ndjambi.”

21Jesus wa tjere ku ye: “Mukazendu, kambura mu ami, oruveze maru ya eṋe mu mu hi nokurikotamena ku Ndjambi kombanda yondundu ndji na mOjerusalem wina. 22Eṋe Ovasamaria kamu tjiwa kutja mu rikotamena ku aṋi, nungwari eṱe Ovajuda tu tjiwa, ondjamo tjinga ai zira mOvajuda. 23Nungwari oruveze maru ya nu nai rweya, ovakumbe vatjiri mu mave rikotamene ku Tate mOmbepo na mouatjiri, Tate tjinga e vanga kutja ovandu mbu mave rikotamene ku ye, ve rikotamene ku ye momuano mbo. 24Ndjambi eye Ombepo, nu imba mbu mave rikotamene ku ye, ve sokurikotamena ku ye mOmbepo na mouatjiri.”

25Omukazendu arire tja tja ku ye: “Ami me tjiwa kutja Omutwirisiwa mee ya, nu tje ya eye me tu raere oviṋa avihe.”

26Jesus a ziri a tja: “Owami ngu mbi ri ye, ami ngwi ngu me hungire na ove.”

27Tjimanga ovahongewa va Jesus va kotokere, nu ave kumwa tjinene tji va vazere Jesus ama hungire nomukazendu. Nungwari kape ningire umwe ngwa hungirire komukazendu kutja ma vanga tjike, poo ngwa purire Jesus kutja ma hungirire tjike nomukazendu ngwi.

28Tjazumba omukazendu wa isa ehoro re romeva, a i kotjirongo na katja nai kovandu: 29“Indjeye mu katare omurumendu ngwe ndji raere oviṋa avihe mbi mba tjita. Eye ngahino kangu ri Omutwirisiwa are?” 30Nowo arire tji va piti motjirongo nave i ku Jesus.

31Nu tjandje nao ovahongewa ve mave mu ningire amave tja: “Muhonge, arikana ryaa ovikurya!”

32Nungwari eye wa zirire a tja: “Ami mbi novikurya okurya eṋe mbi mu hi nokutjiwa.”

33Ovahongewa opu va yarukira okupurasana ave tja: “Hapo, pe nomundu ngwe mu etere otjikurya?”

34Jesus arire tja tja: “Otjikurya tjandje okongwi okutjita ombango yaingwi ngwe ndji hinda, nokumana otjiungura tje. 35Eṋe mu nomuano mbu tja: ‘Ingee ku nomieze vine, nomakondero otji maye ya.’ Nungwari ami me mu raere kutja tareye nawa komahi womakunino; ovikunwa vya hapa nu vi ri pokukondwa! 36Ingwi ngu ma kondo ma munu ondjambi, nu ma nikorere omuinyo waaruhe ovinikorwa; omukune nomukonde aveyevari opu mave zu okunyanda omitima. 37Omuano mbwi ouatjiri: ‘Umwe ma kunu nomukwao a kondo.’ 38Ami mbe mu hinda okukawonga omakondero mehi romakunino, ndi mu ha ungurire; oro ra ungurirwe i ovakweṋu, neṋe amu munu ondjambi yoviungura vyawo.”

39Ovasamaria ovengi va kambura mu Jesus, ingwi omukazendu tjinga a tjere: “Eye we ndji raere oviṋa avihe mbi mba tjita.” 40NOvasamaria tji ve ya ku Jesus ve riyarikaṋa ku ye kutja a kare puna wo, neye arire tja kara oure womayuva yevari.

41Ovengi tjinene va kambura tjinga ava zuva ombuze ye, 42nowo ave tja komukazendu: “Eṱe nambano twa kambura, nu kamena raimbi mbi we tu raere, nungwari omena rokutja eṱe oveni twe mu zuu, nu matu tjiwa, tjiri, kutja eye Omukuture wouye.”

Jesus ma verukisa omuna womuungurire wouhongapare

43Nu kombunda yomayuva yevari nga, Jesus arire tja i kOgalilea, 44#Mt 13:57; Mk 6:4; Lk 4:24Eye omuini tjinga a tjere: “Hapo omuprofete ka pewa ondjozikiro mehi re omuini.” 45#Jhn 2:23Nu tje ya mOgalilea, ovature ave mu yakura nawa, owo tjinga ava ire komayuva wOpaska kOjerusalem nava kamunine oviṋa avihe eye mbya tjitire momayuva ngo.

46 # Jhn 2:1-11 Okuzambo Jesus wa yarukire kOkana kOgalilea, ingwi koṋa eye ka tanaurira omeva okurira omavinu. MOkapernaum mwa ri omuungurire wouhona ngwa ri nomuatje omuzandu ngwa vera. 47Neye tja zuva kutja Jesus weya kOgalilea okuza kOjuda, arire tja i ku ye okukemuningira kutja meye kOkapernaum e yokuverukisa omuatje we ngwa ri popezu nokuṱa. 48Jesus wa tjere ku ye: “Eṋe tji mu hi nokumuna ovizemburukiro novihimise, kamaamu kambura ko.”

49Omuungurire wouhonapare a ziri a tja: “Muhona indjo tu yende, omuatje wandje ngunda e hiya ṱa.”

50Jesus arire tja tja ku ye: “Yaruka koyoye, omuatje woye u nomuinyo!”

Omurumendu ngwi wa kambura momambo wa Jesus narire tja i. 51Nu ngunda e ri mondjira okuyaruka, ovakarere ve ve mu tjakanena nave tja: “Omuatje woye u nomuinyo!”

52Eye arire tje ve pura indwi oruveze eye ndwa kara nawa, nowo ave ziri ave tja: “Ya ri erero moimwe yomapeta, otjindjumba tji tje mu esire.” 53Ihe arire tja zemburuka kutja ya ri oiri tjingeyo ndji Jesus tja tjere ku ye: “Omuatje woye u nomuinyo.” Neye a kambura mu Jesus puna onganda ye aihe.

54Ihi tja ri otjiraisiro otjihimise otjitjavari Jesus tja tjitire indu tje ere kOgalilea okuza kOjudea.

Currently Selected:

Johanes 4: HRR-UNI

Highlight

Copy