2 Ekuruhungi 8
8
Oviungura vyarwe vyombara Salomo
(1Ozo 9:10-28)
1Salomo wa tunga ondjuwo ya Muhona nondjuwo ye youhona moure wozombura omirongo vivari. 2Wina wa tungurura ovihuro ombara Hiram mbye mu pere, na hindi Ovaisrael ve kature mu vyo. 3Eye wa huura ehi ra Hamat nora Soba, 4na kazeuparisa otjihuro Tadmor, mokuti onguza. Eye wa tungurura ovihuro avihe mOhamat muyamu pwikirwa ovikurya. 5Salomo wina wa tungurura ovihuro mbi: Bet-Horon Tjokombanda na Bet-Horon Tjokehi, vi rire ovihuro ovinamasa mbi nomivero vyotumbo novipate, 6notjihuro Baalat, novihuro avihe maa pwikire ovikurya, novihuro muyamu kara oukambe nomatemba we wovita. Eye wa kayendisa omeripuriro we aehe wokutunga mOjerusalem na mOlibanon, na mehi arihe maa honaparere. 7Salomo wa kuta ovandu avehe moviungura vyoṋiṋikizire mbe ha ṱire i Ovaisrael, okutja Ovaamori nOvahetite nOvaperesi nOvahevi nOvajebusi mbe ha ri ovotjiwaṋa tja Israel, 8okutja ozondekurona zawo za karerera okurira ovakarere nga ku ndinondi. 9Salomo ka ungurisire Ovaisrael oviungura vyoṋiṋikizire. Owo va ri ovarwe ve wovita novahongore ve, novatye vomatemba we wovita, novakavire ve voukambe. 10Salomo wa ri novatjevere omasere yevari nomirongo vitano vovaungure voviungura vyoṋiṋikizire mba ri moviungura vyomatungiro pekepeke.
11Salomo wa twara omukazendu we, omusuko wombara ya Engipte, okuza mOtjihuro tja David kondjuwo ndje mu tungira. Eye wa tja: “Omukazendu wandje ke nokutura mondjuwo youhona ya David, ombara ya Israel; orondu poṋa apehe pu pa ri Otjipwikiro tjOmerikutiropamwe wa Muhona opopayapuke.”
12Salomo wa punguhira Muhona ozombunguhiro kotjipunguhiro tja tunga komurungu wondjuwo ya Muhona. 13#Num 28:9, 10 Num 28:11-15 Eks 23:14-17; 34:22, 23; Num 28:16—29:39; Deu 16:16Eye wa punguha ozombunguhiro ozoningiririsiwa otja kondyero yomatwako wa Moses Eyuva arihe, okutja Omasabata nOmikandi wOmatendameno wOmueze na wina omikandi vitatu vyombura, okutja Omukandi wOzomboroto nḓe hi nosurise, Omukandi wOmakondero wOvihape, nOmukandi wOviranda vyOmaso. 14Otja komarakiza wa ihe David, Salomo wa zikamisa oviungura vyeyuva arihe vyovapristeri, novyOvalevi mbaa ve vatere ovapristeri okuimbura omatangero, na mokuungura oviungura vyawo. Eye wina wa zika ovatjevere vondjuwo ya Muhona, novimbumba pekepeke okuungura oviungura vyawo vyeyuva arihe pomuvero auhe otja komarakiza wa David, omukarere wa Ndjambi. 15Omaraerero David nga yandjere kovapristeri nOvalevi wozondjuwo zomapwikiro noviṋa vyarwe ya yenenisiwa nawa tjinene.
16Koruveze ndwi oviungura avihe vya Salomo tjandje vya manuka. Okuza komazikameno wondjuwo ya Muhona nga komamanukiro wayo oviungura avihe vya kayendere nawa.
17Tjazumba Salomo wa ya kOesjon-Geber na kOelat pomukuro wOmuronga Mediterania mehi ra Edom. 18Ombara Hiram we mu hindira ozondjuwozomomeva kehi yondyero yovahongore ve omuini, nu nḓa ri novaungure ovatjiwe vomokuvare. Owo va kayenda mokuvare puna ovarumendu va Salomo kehi ra Ofir, nave kaeterera Salomo ongoldo yondjinda ndja kapita ozokirograma 15,000.
Currently Selected:
2 Ekuruhungi 8: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.