2 Ekuruhungi 12
12
Ovaengipte mave rwisa Ovajuda
(1Ozo 14:25-28)
1Nu kombunda Rehabeam tja za nokuzikamisa ouhona we otja ombara onamasa, eye nOvaisrael avehe otji va isa Omatwako wa Muhona. 2Mena rokutja owo kava ri ovaṱakame ku Muhona, Sisak, ombara ya Engipte, wa rwisa Jerusalem mombura oitjatano youhona wa Rehabeam. 3Eye wa hongorera otjimbumba tjovita tjomatemba wovita 1 200, novakavire voukambe 60,000, novarwe wovita ovengi mbe ha sora okuvarwa puna ovarwe wovita vOvalibie novOvasuki novOvaetiopi. 4Eye wa huura ovihuro vya Juda mbya zeuparisiwa, na ryama nga kOjerusalem.
5Semaja omuprofete wa ya kombara Rehabeam na kovanane va Juda, mba woronganena mOjerusalem tji va taura ku Sisak. Semaja we ve raera nai: “Ombuze ya Muhona ku eṋe oyo ndji: ‘Eṋe mwe ndji esa; nambano ami otji mbe mu esa mouvara wa Sisak!’ ”
6Ombara novanane ve risusuparisa nave tja: “Muhona eye omusemba.”
7 Muhona tja muna otjiṋa hi, eye wa hungira rukwao ku Semaja ne mu raere nai: “Owo tjinga ave risusuparisa, ami hi nokuveyandeka. Meve yama tjimanga, nu Jerusalem katji nokumuna omasa womazenge wandje, Sisak tji me tji rwisa. 8Nungwari Sisak meve havere, nowo otji mave rihongo okupangura pokati kokukarera ami nokukarera ovahona wokombanda yehi.”
9 #
1Ozo 10:16, 17; 2Eku 9:15, 16 Ombara Sisak weya kOjerusalem na huura ovihuze vyondjuwo ya Muhona novyondjuwo youhona. Eye wa huura oviṋa avihe, wina otuvao twongoldo tu twa ungurirwe i ombara Salomo. 10Moruveze rwatwo Rehabeam wa ungura otuvao twongoporo ne tu yandja kovahongore vaimba mbaa ve tjevere pomahitiro wondjuwo youhona. 11Aruhe ombara tjaa i kondjuwo ya Muhona, ovatjevere ave tjindi itwi otuvao, nu tjazumba ave tu yarura ketuwo rovatjevere. 12Ombara Rehabeam tjinga e risusuparisa komurungu wa Muhona, omazenge wa Muhona otji ye he mu yandekere oparukaze; notji pa kara nawa mOjuda.
13Rehabeam wa honapara mOjerusalem na ryamisa ouvara we otja ombara. Eye wa ri nozombura omirongo vine na imwe tja rira ombara, nu wa honapara oure wozombura omurongo na hambombari mOjerusalem, ihi otjihuro Muhona tja toorora mokati komihoko avihe vyOvaisrael, tji rire poṋa eye pu me rikotamenenwa. Ina ya Rehabeam wa ri Naama, Omuamoni. 14Rehabeam wa tura ondjo, tjinga e ha kondjere okutjita ombango ya Muhona.
15Ovitjitwa vya Rehabeam okuza kombutiro nga kondjandero nomatjangero weṱunḓu re vya tjangwa mEkuruhungi romuprofete Semaja, na mu indi romumune Ido. Rehabeam na Jerobeam aruhe aave kara novita kumwe. 16Rehabeam wa koka na pakwa momaendo wozombara mOtjihuro tja David, nomuzandu we Abija we mu pingena okurira ombara.
Currently Selected:
2 Ekuruhungi 12: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.