2 Ekuruhungi 10
10
Omahaṋikiro wouhona
(1Ozo 12:1-20)
1Rehabeam wa ya kOsikem Ovaisrael avehe vokomukuma wokeyuva kokunene ku va kawongarera okumuzika kutja a rire ombara. 2Jerobeam, omuzandu wa Nebat, tja zuva ombuze ndji (tjandje uri kOengipte kataurira mokutira ombara Salomo), neye otja kotoka konganda. 3Ovandu avehe vomihoko mbya tura komukuma wokeyuva kokunene va hinda ombuze okukemuisana; nowo avehe otji va ya pamwe ku Rehabeam nave katja nai ku ye: 4“Iho Salomo we tu tatumisa tjinene nu we tu ungurisa noutwe. Tji wa puparisa omauzeu nga no tjiti kutja tu hupe nawa, matu ku karere.”
5Rehabeam wa zira a tja: “Ndji peye omayuva yetatu okuripura notjiṋa hi. Tjazumba mu kotoke!” Novandu otji va ya.
6Tjazumba ombara Rehabeam otja kapura ovakururume, mba ri ovayandjandunge vaihe Salomo a tja: “Hi yandje eziriro riṋe kovandu mba?”
7Owo va zira nai: “Tji mo tjindi ovandu mba nawa no kondjo okuvepa onyuṋe amo yandja eziriro nda yenene, mave ku karere nouṱakame aruhe.”
8Nungwari Rehabeam ka zuvire komaronga wovanene mba. Moruveze rwanao eye wa ya komitanda mbye kurira pamwe na ye, nu nambano mbya rira ovayandjandunge ve. 9Eye we ve pura a tja: “Mamu ndji pe ondunge iṋe ndji me sokutjita? Hi tje vi kovandu mba mbu mave ndji ningire kutja mbi puparise omauzeu wawo?”
10Owo va zira ave tja: “Ove ve raera nai: ‘Omunwe wandje kariwona omutindi pomavango wa tate.’ 11Tate wa twa omitwaro omizeu ku eṋe; ami me tjiti kutja vi ririre ko omizeu. Eye ee mu tono nozongora; nungwari ami me mu tono nozongora zomakuiya!”
12Kombunda yomayuva yetatu Jerobeam novandu ve va kotoka ku Rehabeam otja pe ve raerere. 13Ombara kai zuvire komaronga wovakururume, notji ya hungira noukukutu novandu, 14otja omitanda pu ve mu rongere. Eye wa tja: “Tate wa twire omitwaro omizeu ku eṋe; ami me tjiti kutja vi ririre ko omizeu. Eye ee mu tono nozongora; nungwari ami me mu tono nozongora zomakuiya.” 15Indji ya ri ombango ya Muhona, Ndjambi, kutja ihi tja hungirire ku Jerobeam, omuzandu wa Nebat, notjinyo tjomuprofete Ahija, tji yenenisiwe. Ombara opu i ha zire okupuratena kotjiwaṋa.
16 #
2Sam 20:1
Ovaisrael tji va muna kutja ombara kai nokupuratena ku wo otji va ravaera ave tja: “David neṱunḓu re nga ze po! Owo hapo ve tu ungurira tjike? Vaisrael, indjeye tu yaruke kozoyetu! Rehabeam nge ri nane omuini.”
Komuhingo mbwi Ovaisrael otji va yaruka kozoyawo. 17Rehabeam otja honaparera Ovaisrael imba mba tura mehi ra Juda porwe.
18Tjazumba ombara Rehabeam wa hinda Adoniram, omutjevere wovaungure voviungura vyoṋiṋikizire, a yende kOvaisrael; nungwari Ovaisrael ve mu zepa nomawe. Kamanga ombara Rehabeam opa rondera metemba re rovita na taurire kOjerusalem. 19Okuza koruveze ndo nga ku ndinondi ovandu mba turire mouhona wa Israel, imbwi wokeyuva kokunene, otji va pirukira ouhona wa David.
Currently Selected:
2 Ekuruhungi 10: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.