Luke 20
20
1Da neħ heˑniˑya'wă̱ħˑo̱h, ne swă̱ˑnĭs'hăăt ne' neħˑho'o̱ˑweh' dwă̱ˑnĭs'hăˑdeeˑnyo̱k', he'no̱ħˑweeħ' haˑgo̱ˑiˑo̱ˑnyaˑnih' no̱ˑgweh', noˑno̱h'saˑdo'gă̱hˑdiħ'gĕh, neħ' kuh hotˑhăăh'go̱h ne gaˑi'wiˑyòòh, neħ naˑdih'să̱ˑnoˑwaˑnă̱s haˑdi'yaħˑdo̱nˑtwʋs', kuh ne shaˑgo'diˑyaˑdo̱o̱ˑnih, ho̱ˑwa̱'yaħˑdo'waħˑo̱h, neħ hă̱ˑneħ' naˑdi'gă̱hˑjis'ho̱ħˑo̱h,
2Neħ no̱ˑwa̱s'nyeħˑseeh, hoˑnă̱ă̱', Daˑgwa'oˑwih, Gaˑă̱ˑo̱ˑweeh' niˑdi'saħˑhas'desˑhă̱ˑo̱o̱h', heˑneħˑhuh' niˑsaˑye'ă̱ˑa̱nˑdyeħ nă̱ˑgă̱ă̱' no̱ħˑo'iˑoħ'dă̱ħˑsho̱ħ? neħ giħˑshă̱h neh, so̱ˑneˑgă̱ħ' hyaħ'hasˑdesˑhăˑwiih'?
3Neħ ne' detˑhos'nyeħˑo̱h, haˑgo̱'yă̱ˑo̱h'seeh, joˑi'waat nă̱ă̱ħ iiħ ă̱ˑgwa'a̱nˑdo̱o̱ħ; neħ ne' dă̱chˑgwaˑwă̱ˑno̱ħˑsăˑgòħ;
4Neħ ne' bapˑtism ne John haˑye'ăħˑdah'gwaħ, neħ' gă̱h ne gă̱ˑo̱'yaħˑgĕh dya'weehˑdo̱h, o̱ˑgii', o̱ˑgwee'neh?
5Oˑnă̱h desˑho'ditˑtă̱ˑo̱ˑnyo̱ħ' deˑoˑdiˑyaħ'doˑweh'daˑno̱ħ naaˑdi'yaħˑdiih, hoˑnă̱ă̱', Neħ' giħˑshă̱h nă̱nˑdwiħ', gă̱ˑo̱ˑyaħˑgĕh dyaˑweehˑdo̱h', ă̱ˑă̱ħ' ne'huh, A di' naeh goˑwaah' deħˑsheˑswa'iˑwaˑgwĕnˑniˑyòs'do̱o̱ħ?
6Neħ gwaa giħˑshă̱h nă̱nˑdwiħ, O̱ˑgwe'neh; gaˑgweeˑgo̱h' naeh no̱ˑgweh' ă̱ˑyo̱k'hiħˑsgwe'oħˑyaak; neħ să̱ħˑă̱h' naeh noˑdi'waˑgwĕnˑni'yòsˑdo̱h heh, hoˑdo'gă̱sˑda'niˑak ne John.
7Neħ ne' detˑho'disˑnyeħ'o̱h, Neħ ne tă̱ħ'ă̱h deħˑo̱ˑgwă̱ˑno̱h'do̱ħ he'o̱ˑweh niˑdyaˑweeˑno̱o̱h.
8Oˑnă̱h ne Jeˑsus haˑgo̱ˑyă̱ˑo̱hˑseeh, Tă̱ħˑă̱h' kuh nă̱ă̱ħ' iiħ taa'gwaˑoˑwih, heˑniˑdwa'geħˑhas'desˑhă̱'o̱o̱h, he neħˑhuh niˑwaˑgyeˑă̱nˑdyeħ' nă̱ˑgă̱ă̱' no̱ħˑo'iˑoħ'dă̱ħˑsho̱ħ.
9Oˑnă̱h' hohˑsaaħ' ne waa'go̱sˑnyeħs' ne gă̱nˑdyòh'gwaħˑgĕh' nă̱ˑgă̱ă̱' desˑga'yă̱ˑa̱nˑdăăhˑgo̱h; Neħ naˑyaħ'daˑdooˑgă̱ă̱h' no̱'gweh, hoˑyă̱ntˑwaħˑo̱h noˑnyo̱'gwiħˑsăħ', oħˑo̱h'saħ, neħ' naˑdi'yă̱ntˑho̱ħ'geˑoˑno̱ħ' hoˑwa̱nt'haħˑdo̱o̱ˑniih, neħ' naeh, ne weeˑă̱h' dyo̱ˑă̱nˑjaˑdeħ' he'aˑweeˑno̱o̱h, hă̱ˑa̱'niisˑheħt' gwaħˑhuh'.
10Neħ dih noˑnă̱h' hoħˑga'eeħ, heˑniˑwa'dyă̱ntˑhwaaˑgwʋs', heˑo'haħˑo̱h noˑhaħ'shăħ heˑtă̱ˑniħ'dyo̱ħ naˑdi'yă̱ntˑho̱ħ'geˑoˑno̱ħ, neħ no̱'daˑo̱ˑwa̱ˑyo̱ħ' noˑdo̱ˑniih' heˑgaˑyă̱ntˑho̱h' noħˑo̱hˑsaħ; neħ' dih naˑdi'yă̱ntˑho̱ħ'geˑoˑno̱ħ, daˑo̱ˑwa̱ˑyaħ'daˑgwăă'sho̱o̱ħ, sho̱, sho̱'wa̱nˑdoˑwiih' kuh, deħˑtaħ'gwĭsˑdă̱ħ' deˑa'wiħ.
11Da neħ' aeħ noˑyaħ' detˑhoh'haħˑo̱h naaˑhaħˑshăħ; neħ' kuh aeħ ne' waˑo̱ˑwa̱ˑyaħ'daˑgwăă'sho̱o̱ħ, gaˑno̱h'go̱nˑdas'yoˑwaaˑnă̱h', kuh, he'no̱o̱ˑwa̱ˑyeeħ; sho̱ˑwa̱nˑdoˑwiih' kuh, deħˑtaħ'gwĭsˑdă̱ħ' deˑa'wiħ.
12Neħ' aeħ ne' detˑhoh'haħˑo̱h neh, să̱h, haˑdo̱ħ'taħ; neħ' ha'eħˑgwah, ne' waˑo̱ˑwa̱ˑyă̱ă̱ˑă̱s, asˑdee'gwaa kuh hesˑho̱ˑwa̱ˑyaħ'doħˑyaaˑgo̱h.
13Oˑnă̱h haˑwă̱ă̱ naˑyaħ'daˑgwĕnˑniˑyòħ' he'gaˑyă̱ntˑho̱h' noħˑo̱h'saħ, Aˑnă̱ˑgyeeħ'? Neħ hă̱ˑeeˑhaħt ne' no'o̱hˑgwaħ' he'aaˑwak; dyă̱ˑgwah' sho̱ ne'huh naeh ăˑo̱ˑwa̱ˑyaħ'daˑnooˑo̱k', noˑnă̱h' ă̱ˑo̱ˑwa̱ˑgă̱ħ.
14Neħ dih noˑnă̱h' naˑdiˑyă̱ntˑho̱ħ'geˑoˑno̱ħ' waˑo̱ˑwa̱ˑgă̱ħ', deˑo'ditˑhă̱ˑo̱ˑnyo̱ħ' naaˑdi'yaħˑdiiħ, hoˑnă̱ă̱', Neħ nă̱ˑgă̱ă̱ neh, haˑi'waˑgwĕnˑniˑyòħ; Nyòħ', She'dwaaˑnyòh; iiħ di naeh ă̱ˑyo̱ˑgwaˑwă̱sˑteħt heˑniˑo̱'ă̱nˑjaˑgwĕnˑniˑyòħ.
15Oˑnă̱h' asˑdeh' ho̱ˑsa'o̱ˑwa̱'yaħˑdoħ'yaak heˑni gaˑyă̱ntˑho̱h noħˑo̱h'saħ, waˑo̱ˑwa̱ˑnyòħ' kuh. Aˑno̱o̱' oˑnă̱h' nă̱ˑo̱ˑgo̱ˑyeeħ' Naˑyaħ'daˑgwenˑniˑyòħ'?
16Neħ' waeh nă̱nt'heħ ă̱ˑo̱ˑgo̱''iˑwahˑdo̱ħt' nă̱ˑgă̱ă̱' haˑdi'yă̱ntˑho̱ħ'geˑo̱ˑno̱ħ; neħ' noˑyaħ'sho̱ħ ă̱sˑhaˑgo̱ˑyo̱ħ' heˑgaˑyă̱ntˑho̱h' noħˑo̱h'saħ. Neħ' noˑnă̱h' waˑă̱'no̱ˑo̱o̱k', hoˑnă̱ă̱, Să̱ˑno̱h' ne' neħˑhuh hă̱ˑyaˑwă̱h, nă̱ˑgă̱ă̱h no̱ħˑo'iˑoħ'dă̱ħˑsho̱ħ.
17Neħ' naaˑgo̱'yatˑgat'hwaħˑo̱h haˑwă̱ă̱', A di'naeh' sho̱' nă̱ˑgă̱ă̱ ne'gaˑyaaˑdo̱o̱ħ', Neħ ne' gaħˑsgwaaˑaħ' noˑdis'wa'ă̱ħˑo̱h naaˑdi'no̱hˑso̱ˑnis, hoˑneeħˑo̱h deħˑa'o̱h' haħˑgwĭs'dă̱ħ a'waˑdes heˑniˑyòħˑdă̱ă̱h, neħ shaħˑgaat' ne' neħ gaħˑsgwăˑgwĕnˑniˑyòħ oˑdo̱ħ'o̱h hohˑnih'saˑgwaat.
18So̱n'diħˑgwa'naħˑot neħˑhuh' gaħˑsgwăăħ'gĕh ă̱ˑye'yaħˑdyeeˑnă̱ħt', neħ' neh dă̱ˑgas'heħˑăˑit niˑyo'isˑdaħs'aˑah ă̱ˑwa̱ˑdo̱ħ heˑyeˑyaħ'daˑdeħ; neħ gwaa' neh, so̱n'diħˑgwa'naħˑot, dă̱ˑo'yaħˑda'it, neħ' noħˑgă̱ˑă̱ħ, sho̱ ă̱ˑwa̱nˑdo̱ħ nă̱ˑgat'heħˑsyo̱ˑniħ' haˑyaħ'daˑdeħ, neħ nă̱nt'găˑă̱h neħ naeh dă̱ˑwaˑdoˑgwat.
19Oˑnă̱h' naaˑdih'să̱ˑnoˑwaˑnă̱s haˑdi'yaħˑdo̱nˑtwʋs', kuh ne shaˑgo'diˑyaˑdo̱o̱ˑnih', ne' neħ heˑniˑdyò'isˑdaħ'eeˑno̱ħ hoˑnih'saˑgo̱h na'o̱ˑwă̱'nisˑoh'daˑă̱ħ; neħ dih oħˑshaˑgoˑdis'haˑniħk' ne gă̱nˑdyòh'gwaħˑgĕh; neħ să̱ħ'ă̱h ne' waˑdiˑgaħ'ă̱ă̱ˑyo̱o̱ħ', he'oˑno̱o̱ˑho̱ħ' oħˑtoˑno̱nˑdooˑgă̱nt' heˑno̱'o̱ˑyeeħ' waas'nyeħt oħˑtaˑyă̱ˑa̱nˑdăăk.
20Neħ noˑno̱nt'gaˑă̱'o̱sˑo̱h, oħˑshaˑgoˑdih'haħˑsyo̱o̱ħ' kuh nă̱ˑo̱'no̱ntˑgaˑă̱ˑa̱n'dyeħˑseek, neħˑhuh' nă̱ˑoˑno̱nˑdye'ă̱ˑa̱nˑdyeħˑseek ne tgaˑi'waˑyeeˑiħ' iˑgă̱ă̱ no̱o̱'gweh, neħ naˑyòˑgwe'nyo̱ˑo̱o̱k iˑgă̱ă̱ na'ă̱ˑno̱nˑdyeˑno̱o̱ˑwa̱t' naˑwă̱ˑno̱ħ, neħˑhuh iˑgă̱ă̱' no̱ˑdaˑgaˑyeˑăħ'dak, neħˑhuh' ha'o̱ˑwa̱a̱ˑtgaħ' haħˑhas'desˑhăăˑgo̱o̱ ne tă̱ˑno̱h'do̱ˑo̱ħ.
21Neħ no̱ˑwa̱nˑdo̱s'o̱h, hoˑnă̱ă̱', Saˑdi'o̱ˑnyaˑnih, o̱ˑgwă̱'no̱hˑdo̱ħ' naeħ he'neħˑhuh'jihˑsho̱ħ ne' naħˑot' saaˑdo̱h' kuh ne' naħˑot' saˑdi'o̱ˑnyaaˑnih; tă̱ħˑă̱h' kuh deħˑsheˑgwʋs' so̱ˑgaaħ' no̱o̱ˑgweh, neħ gwaa' heˑyò'diˑwiˑno̱o̱h ne gaˑi'waˑgwĕnˑniˑyòħ' Naˑwĕnˑni'yòħˑgeˑkaaħ neħ saˑdiˑo̱ˑnyaˑnih.
22Gaˑya'nesˑhăħˑgĕh gă̱h naas'haˑgwaaˑwĭsˑdeˑoˑe'giˑaak, ne Ceˑsar, o̱ˑgii', tă̱ħ'ă̱h?
23Neħ gwaa' ne waˑă̱'niˑno̱nˑdook' hoˑno̱n'doˑwăăsˑdo̱h' sho̱, neħ naˑgo̱ˑyă̱ˑo̱h'seeh, Aˑnaeh goˑwaa' sgwaħˑni'goˑdaˑgwas'?
24Daˑgyò'dahˑsaħs' ne' sgahˑsi'yo̱ħˑshăăt. So̱ naħˑot' ne gă̱ħ' haˑyaħ'daaħ', kuh ne' gaa'yaˑdo̱ˑnyo̱ħ', so̱' naħˑot'? Detˑhoˑdisˑnyeħ'o̱h hoˑnă̱ă̱', Cesar's.
25Neħ naˑgo̱'yă̱ˑo̱h'seeh, Neħˑhuh gwaa' sa'swaˑgo̱nˑdak' haˑyaħ'daˑdeħ ne Ceˑsar, ne no̱ħˑoˑiˑoħ'dă̱ħˑsho̱ħ' hoˑwă̱h' ne' Ceˑsar; neħ kuh haaˑyaħ'daˑdeħ' Na'wĕnˑniˑyòħ', ne' no̱ħˑo'iˑoħ'dă̱ħˑsho̱ħ' hoˑwă̱h Na'wĕnˑniˑyòħ.
26Neħ ne tă̱ħ'ă̱h deˑoˑdiˑgwe'nyo̱sˑo̱o̱ħ', na'aˑdiˑyeˑno̱o̱ħ' na'wă̱ˑno̱ħ he'aaˑdiˑgat' ne' gă̱nˑdyòh'gwaħˑgĕh; neħ ne' waˑoˑdi'waˑnăă'gòħ he'no̱ˑo̱ˑyeeħ' do̱nˑdaas'nyeħt, neħ kuh ne' taˑă̱ˑno̱nˑdyeeħ' sho̱.
27Oˑnă̱h' hoˑdi'yo̱sˑo̱h haˑyaħ'daˑdeħ, haˑdi'yaħˑdaˑdooˑgă̱ă̱h' ne Sadˑduˑcees, (ne' tă̱ħˑă̱h deˑaˑdi'waˑgwĕnˑniˑyòs'taħ, ne do̱ˑda'ă̱ˑno̱ntˑgă̱h' noˑni'eˑyo̱o̱h no̱ˑda'dehˑsa'do̱hˑgwaħˑgĕh,) neħ no̱ˑwa̱n'do̱s'o̱h,
28Hoˑnă̱ă̱', Saˑdiˑo̱ˑnyaˑnih, Moˑses' cho̱ˑgwa'yaˑdo̱ˑnii, Neħ' giħˑshă̱h neh, so̱ˑgaaħ' no̱'gweh deˑya'dă̱ˑno̱nˑdeeħ' a'ă̱ˑeeħ, ho'nyaaˑgo̱h, neħ' kuh nă̱ˑgă̱'a̱a̱k deˑok'saħˑdaaˑyă̱ħ' a'ă̱ˑeeħ, neħ ne' deˑya'dă̱ă̱ˑno̱nˑdăk' ă̱sˑhoˑdiˑnyaak', ne' yoħˑgă̱'o̱o̱ħ, neħ' dă̱ˑot'hwaˑji'nyaħˑgă̱ħ ne deˑya'dă̱ˑno̱nˑdăk.
29Neħ' dih gyee ne jaaˑdak' no̱ħˑdă̱ˑno̱n'dă̱'no̱nˑdăk; neħ noˑnyak'heħˑo̱h ne toˑdye'ă̱hˑdo̱h, haˑweeˑyo̱s'o̱h kuh, tă̱ħ'ă̱h deˑok'saħˑdaˑyă̱nˑdaħ'o̱o̱ħ.
30Neħ ne'waħ ne' dekˑnii haˑdo̱ħ'taħ shoˑdi'nyakˑheħˑo̱h, tă̱ħˑă̱h aˑeħ' deˑok'saħˑdaˑyă̱nˑdaħ'o̱h haˑweeˑyo̱s'o̱h.
31Neħ ne'waħ neh, să̱h haˑdo̱ħ'taħ shoˑdi'nyakˑheħ'o̱h; da'neħˑhuh' heˑya'wă̱ħˑo̱h haħˑde'oˑno̱s'ahˑdo̱h' ne jaaˑdak; neħ ne tă̱ħ'ă̱h deħˑso̱ˑgaaħ deˑok'saħˑdaˑyă̱nˑdaħˑo̱o̱ħ hoˑni'eeˑyo̱o̱h.
32Heˑyò'doħkˑdah'go̱h ne' gaˑgweeˑgo̱h, oˑnă̱h' ha'eħˑgwah gaˑweeˑyo̱s'o̱h ne ye'o̱h.
33Neħ'dih gaˑi'o̱ˑnih, noˑnă̱h' dă̱ntˑhă̱'no̱ntˑgă̱'o̱hˑso̱o̱ħ, so̱' naħˑot' ă̱ˑyoħ'gă̱ˑa̱a̱k' ne yeˑo̱h'? neħ să̱h'ă̱h ne jaaˑdak' niˑă̱ˑno̱nˑdi'no̱ħ shaˑgoˑdiˑyaħ'daˑwă̱ă̱'gă̱ˑo̱o̱ħ.
34Neħ ne Jeˑsus' detˑhos'nyeħˑo̱h, haˑgo̱'yă̱ˑo̱h'seeh, neħ noˑdek'saħˑdo̱ˑnii' he'yo̱ˑă̱nˑjaˑdeħ, ho'diiˑnyaas, neħ' kuh no̱'wa̱ˑdiˑnyak'daˑnih.
35Neħ gwaa', ne' neħˑhuh iˑgă̱ă̱' ă̱ˑyaˑgoˑyaħ'daˑă̱ħ nă̱ˑgaˑgweeˑniħ' he'niˑaˑdiˑyaħ'daˑno̱o̱ˑo̱ħ' nă̱ˑno̱nˑda'diˑwaˑgweeˑnyă̱ħ noˑyaħ' deˑdyo̱'ă̱nˑjaˑdeħ' neħ' kuh neh dă̱ntˑhă̱'no̱ntˑgă̱h' no̱nˑda'dehˑsa'do̱hˑgwaħ'gĕh tă̱ħˑă̱h' naeh to̱o̱'saˑoˑdiˑnyaakˑseek; tă̱ħˑă̱h gwaħˑhuh to̱o̱'saˑo̱ˑwa̱nˑdi'nyakˑda'niˑaak;
36Tă̱ħˑă̱h' kuh' wă̱ă̱ˑdo̱h' to̱ˑsa'ă̱ˑniˑeeh; neħ gwaa' dă̱sˑgyaˑdyeˑă̱ˑo̱o̱k heˑniˑyòħˑdă̱ă̱h naˑdiˑo̱ˑyaħ'geˑoˑno̱ħ; neħ' kuh hokˑsaħ'daħˑsho̱ħ' Na'wĕnˑniˑyòħ', heˑneħ' okˑsaħ'daħˑsho̱ħ' neh' deˑdyo̱ntˑgă̱'o̱ħˑdahˑgwaħ.
37Neħ' dih heh dă̱ntˑho̱'wa̱nˑdi'yaħˑda'ges'gòħ noˑniˑeeˑyo̱o̱, waeh' haˑeħˑgwah ne Moˑses' oˑyă̱nˑdeet' haˑo̱ˑniih' he'dyòsˑgoˑeˑot, noˑnă̱h neħ' shaˑo'yasˑdak Naˑyaħˑdaˑgwĕnˑniˑyòħ', neħ Haˑwĕnˑniˑyòħ' haˑyaħ'daˑdeħ neh, Aˑbraˑham, neħ kuh Haˑwĕnˑniˑyòħ' haaˑyaħ'daˑdeħ neh', Iˑsaac, neħ kuh Haˑwĕnˑniˑyòħ' haaˑyaħ'daˑdeħ' ne' Jaˑcob.
38Neħ să̱ħ'ă̱h naˑeh ne tă̱ħˑă̱h neħ deˑa'go̱ˑwĕnˑniˑyòħ' noˑni'eˑyo̱o̱h, neħˑgwaa' ne yaˑgo̱o̱ˑheħ; gaˑgweeˑgo̱h' să̱ħˑă̱h neħˑhuh' yaˑgo̱h'hehˑgo̱h' he'aˑgat.
39Oˑnă̱h'ˑhaˑdi'yaħˑdaˑdooˑgă̱ă̱h ne shaˑgo'diˑyaˑdo̱ˑnih', toˑdis'nyeħˑo̱h', hoˑnă̱ă̱', Saˑdi'o̱ˑnyaˑnih, oħˑsyeeˑit' hoħˑses'nyeħt.
40Neħ noˑnă̱h' oħˑga'at ne' neħ, tă̱ħˑă̱h' deħˑsho'diˑgwe'nyo̱sˑo̱o̱ħ naaħˑgwĭs'dă̱ħ o̱ˑsa'o̱ˑwa̱ˑa̱nˑdo̱o̱ħ.
41Neħ na'go̱ˑyă̱'o̱hˑseeh, Aˑniˑdyòˑye'ăħˑdahˑgo̱o̱h', he'ă̱ˑno̱nˑdo̱h' haˑyaħ'daˑdeħ ne' Christ, Neħ' hoˑaaˑwak ne Daˑvid?
42Neħ kuh ne'aˑo̱hˑhwa̱ħ ne Daˑvid', haˑdo̱h' ne' gaˑya'do̱sˑhăăˑgo̱o̱ ne Gaˑă̱ˑno̱ħ', neħ Naˑyaħ'daˑgwĕnˑniˑyòħ' haˑwă̱'o̱hˑseeh Naˑgyaħ'daˑgwĕnˑniˑyòħ', Saˑdyă̱ă̱h gyă̱ˑneh'go̱'gwaa,
43Heˑniˑyòòˑweħ dehˑsă̱ă̱h'siħ'daˑgă̱ħ'săhˑgwaħ', ă̱kˑheˑyo̱ˑniħ no̱ˑsaħˑniˑgo̱'ă̱sˑwa'ă̱s.
44Syaħˑdaˑgwĕnˑniˑyòħ' waeh haˑdo̱h ne Daˑvid' hoˑyas'ho̱ˑnyo̱h, a' di niˑyòħ'dă̱ă̱h' heˑneħ' kuh', hoˑa'waak'?
45Oˑnă̱h' gă̱nˑdyòh'gwaˑgweˑgo̱hˑho no̱nt'ho̱nˑdeħ haˑgo̱'yă̱ˑo̱h'seeh naˑgo̱'iˑoˑnyaˑnih,
46Echˑhiħ'niˑgo̱'ă̱ˑă̱ħk' ne shaˑgo'diˑyaˑdo̱ˑnih; ne' deˑoˑno̱nˑdo̱'ă̱nˑjoˑnih' iˑgă̱ă̱', ne' wasˑyo̱'nyasˑhees' dă̱'no̱ntˑhaah'gwaħ'taak; kuh naa'diˑno̱'o̱hˑgwaħ ne dă̱ˑoˑno̱nˑdă̱'no̱ˑo̱ħk, he'o̱ˑweh' yo̱ntˑge'o̱nˑdah'gwaħ, kuh naˑgwʋs' heħˑtgă̱h' dyoˑno̱kˑdaˑyă̱nˑdo̱ħ' he'yo̱ntˑgă̱ˑnĭsˑat'haħ, kuh, heˑgwʋs' gaˑno̱k'daˑnoˑo̱ˑnyo̱ħ noˑna'eħ waˑă̱ˑno̱nˑdek'hweˑo'eek;
47Neh, shaˑgoˑdiˑno̱h'sahˑsaħ'ho̱ħ noˑdi'no̱hˑgwa'yesˑhaħˑsyo̱ħ, neħ kuh naa'yo̱chˑhihˑwăăh'gwaak' sho̱, yo̱ˑniisˑheħs gă̱ă̱s' ho'no̱nˑdă̱ˑno̱ˑyă̱ħ; neħ' shaħˑgaat ne'neħ si'gwaa gaˑe'wahˑdas'yoˑwaaˑnă̱h' ă̱ˑoˑdiˑyaħ'doˑwă̱ħt.
Currently Selected:
Luke 20: SEE
Highlight
Share
Copy
Want to have your highlights saved across all your devices? Sign up or sign in
Gospels published by the American Bible Society in 1872, Psalms in 1892.
