Luke 13
13
1Neħ' naˑdi'yahˑdă̱ˑo̱ˑnyo̱k' ne' neħˑhoˑo̱ˑweh', deˑwa'dyesˑdo̱h, neħ waˑo̱'wa̱ˑoˑwiħ he'niˑoˑdiˑyaħ'daˑwă̱ħ'o̱h neh Galˑiˑleans neħ' naˑdit'gwă̱hˑsaħ, ne' Piˑlate deˑo'yesˑdo̱h gă̱ă̱s' haaˑdi'yaħˑdă̱ħ'daas.
2Oˑnă̱h' neˑJeˑsus detˑhos'nyeħˑo̱h haˑgo̱ˑyă̱ˑo̱h'seeh, Iˑswee diˑgă̱h nă̱ˑgă̱ă̱' Galˑiˑleans neħ si'gwaa hoˑdi'wa'neħˑa'go̱o̱ˑno̱ħ', naˑeh' neeˑaˑdiˑgweeˑgo̱h' ne Galˑiˑleans, neħ' sho̱ o̱nˑdaˑga'iˑo̱ˑniħ' he'neħˑhuh no̱ħˑde'oˑno̱n'do̱h'ho̱ˑga'nyas'o̱h nă̱ˑgă̱ă̱ heˑniˑya'wă̱ħˑo̱h?
3Neħ' noħˑgwă̱'o̱s, Tă̱ħ'ă̱h; neħ gwaa' nă̱ˑgă̱'a̱a̱k daħˑdeˑjiˑswă̱ħ'niˑgo̱'ă̱nˑdeeˑnyo̱o̱ħ', gaˑgweeˑgo̱h' ne'huh eˑswaˑiˑwah'do̱ħ.
4Neħ giħˑshă̱h' kuh ne deˑgyo̱ħ' sgaˑeħ' iˑgă̱ă̱' ni'ă̱ˑno̱nˑdiih, ne' deˑoˑdiˑyaħ'daˑihˑdo̱h shaħˑgaħ'hnyeˑnă̱ħt' ne Silˑoˑam tgasˑdă̱'ooˑdʋk, neħ kuh ne' waˑoˑdiˑnyòħ, neħ' gă̱h niˑsweeh' neħ si''gwaa aeħ' he'niˑoˑdii''waˑneħ'aˑgo̱'no̱ħ naˑeh' heˑniˑyòħ'dă̱ă̱h nee'aˑdiˑgweeˑgo̱h no̱ˑgweh' ne Jeˑruˑsaˑlem ha'diˑno̱ˑgek?
5Neħ noħˑgwa'ooˑwiħ, Tă̱ħ'ă̱h ne'huh, neħ gwaa' nă̱ˑgă̱'a̱a̱k deħˑjiˑswaˑdat'heˑwah'do̱o̱ħ, daħˑdeˑjiˑswă̱ħˑniˑgo̱'ă̱nˑdeˑnyo̱o̱ħ, gaˑgweeˑgo̱h ne'huh neħˑhuh' nă̱ˑyaˑwă̱h eˑswaˑiˑwah'do̱ħ.
6Neħ' gwaħˑhuh' waas'nyehˑdʋk nă̱ˑgă̱ă̱' de'ga'yă̱ˑo̱nˑdăăh'go̱h; Neħ' naaˑyaħ'daˑdooˑgă̱ă̱h' ne'o̱ˑgweh hotˑho̱n'dòòt ne fig no̱ħˑgă̱'o̱nˑdoħ'dă̱ħ gaˑyă̱n'twaħˑo̱h he'o̱ˑweh' hoˑyă̱nt'to̱h noˑnyo̱'gwiħˑsăħ; da neħˑhuh' hoˑyo̱s'o̱h, hehˑgăˑiħ neħ naaˑwih'saˑgo̱h a'diħˑgwah' oˑdo̱o̱ˑniih; neħ ne tă̱ħ'ă̱h deˑoˑgă̱ă̱ħ.
7Oˑnă̱h' haˑwă̱ˑo̱hˑseeh ne' deˑoosˑnyeħ heˑgaˑyă̱nˑto̱h' nooˑnyo̱'gwiħˑsăħ, Satˑga'ă̱ˑo̱h, neħ nă̱ˑgă̱ă̱ oˑnă̱h' să̱h niˑyòsˑhăˑgee iˑgyo̱h' neħˑhuh tgihˑsaakˑheħs naˑyoˑdo̱'niˑaak nă̱ˑgă̱ă̱' găˑiħ fig no̱ħˑgă̱ˑo̱nˑdoħ'dă̱ħ, tă̱ħ'ă̱h dih deħˑges'hă̱ˑnyeħs, iˑjaħk dih; a'naħˑot' gai'o̱ˑnih' heh neħˑhuh' haeħˑgwah tiˑyo'do̱ˑă̱nˑjaˑdi'yo̱hˑgo̱h?
8Neħ ne' detˑhos'nyeħˑo̱h, haˑwă̱'o̱hˑseeh, Syaħˑdaˑgwĕnˑniˑyòħ', să̱ˑno̱h' sho̱ haħˑdă̱h'syă̱ˑo̱ˑnyo̱o̱h' ha'eħˑgwah nă̱ˑgă̱ă̱' yòsˑhăăˑdeħ, heˑniˑyòòˑweħ' dă̱kˑheh'daˑno̱ħ'gwatˑho̱o̱ħ ho'o̱nˑdoot, neħ' kuh nă̱ˑgiħ'daˑyă̱ntˑhòħ.
9Neħ' giħˑshă̱h' nă̱ˑwa̱nˑdo̱ˑniħ', [neħˑhuh'jih wa'eh;] tă̱ħˑă̱h' giħˑshă̱h, ă̱ˑga'at ne' neħ, oˑnă̱h' waeh ă̱h'syaħk sħo̱.
10Neħ he'o̱ˑweh shaˑgo'iˑo̱ˑnyaˑniˑak sgaˑno̱h'saat hă̱ˑno̱nt'gă̱ˑnĭs'atˑhaħ', naˑwĕnˑdaˑdo'gă̱hˑdo̱ħ'gĕh;
11Neħ' ne' jatˑga'ă̱ˑo̱h, yeˑyaħ'daˑdo'gă̱ă̱ˑno̱ħ ne yaˑgo̱o̱ˑgweh', neħ' goˑdyă̱ˑniˑno̱ħ' notˑhwa'isˑhăħ noˑyaħ'daˑjiiˑyòħ' deħˑgaħ'hasˑdeesˑhăăt, deˑgyo̱ħ' sgaˑeħ' niˑyòs'hăˑgee no̱ħˑo̱'nisˑheħt, neħ' ne deˑyaˑgoˑdyaħ'dakˑdoˑno̱ħ, aˑgwʋs' neħ ne tă̱ħ'ă̱h deħˑjeˑgweˑnyo̱sˑgwaħ no̱ˑsaˑyo̱t'gesˑgòħ.
12Neħ' noˑnă̱h ne Jeˑsus' oħˑshaˑgooˑgă̱ħ', neħ ne sha'goˑno̱ˑgo̱h, shaˑgaˑwă̱ˑo̱h'seeh kuh, Iis' neh si'o̱h, oˑnă̱h' naˑeh' sahˑsa'desˑhă̱ˑa̱nˑdaaˑgòħ', heˑniˑsa'yaħˑdaaˑwă̱s' saˑyeˑno̱ˑwa̱ħˑko̱ħ.
13Oˑnă̱h' oħˑshaˑgoˑnis'ohˑda'ă̱ħ; neħ ne' waħˑo'go̱nˑdaaˑdyeħ' saˑyo̱n'dyaħˑdaˑgwaˑihˑsiħ', oħˑto̱ˑwa̱ˑă̱h'să̱ˑo̱ˑnyo̱o̱ħ, gwaħˑhuh', Na'wĕnˑniˑyòħ.
14Oˑnă̱h ne' tă̱ˑno̱h'do̱ˑo̱ħ' hă̱ˑno̱nt'gă̱ˑnĭs'atˑhaħ, gaˑno̱ħ'kwă̱sˑhăăˑgo̱o̱h' desˑhoˑwă̱ˑno̱ħ'săˑgwă̱h, neh gaˑi'o̱ˑnih ne Jeˑsus, sasˑhaˑgoˑjă̱ħt' naˑwĕnˑdaˑdo'gă̱hˑdo̱ħ'gĕh, neħ' kuh naˑgo̱ˑyă̱'o̱hˑseeh no̱ˑgweh', Neħ' ne yeeˑiħ' niˑwă̱'nĭsˑhăăˑgeeh niˑga'iˑwaˑyă̱nˑdah'go̱h no̱ˑgweh' nă̱ˑyo̱nˑdyeˑoħ'daat; neħˑhuh dih' ne' neħ heˑniˑwă̱ˑnĭsˑhăˑgeeh gaˑoħ' daˑswat'go̱nˑdʋk, saˑyech'hiˑjă̱ħt ne swaˑno̱o̱k'daˑnih; să̱ˑno̱h' naeh' naˑwĕnˑdaˑdo'gă̱hˑdo̱ħ'gĕh.
15Neħ Naˑyaħ'daˑgwĕnˑniˑyòħ' oˑnă̱h' desˑhoˑwă̱ˑno̱ħ'săˑgwă̱h, haˑwă̱ă̱', Iis' ne deˑsat'go̱hˑsaaˑneet! tă̱ħ'ă̱h gă̱h nă̱ˑgă̱ă̱ ne jiˑswa'yaħˑdaasˑho̱ħ naˑwĕnˑdaˑdo'gă̱hˑdo̱ħ'gĕh deħˑas'hă̱ˑo̱nˑdaˑgwʋs' noos'heeˑnă̱ħ' oˑno̱ħ'gaˑes, neħ giħˑshă̱h ne gă̱ˑo̱nˑdaˑnă̱h'gwih deˑwa'o̱hˑdees, he'o̱ˑweh' deˑga'dasˑtaħ, a'asˑhaaˑiħ aˑaˑneˑgeˑăħ'daˑnii'no̱ħ?
16Da tă̱ħ'ă̱h gă̱h' kuh haˑeħˑgwah deħˑga'iˑwaˑyă̱nˑdah'go̱h nă̱ˑgă̱ă̱ yaˑgo̱o̱ˑgweh, neħ naeh shaˑgo'aˑwak neh' Aˑbraˑham, neħ' shaˑgòs'hă̱ˑo̱nt Naˑnĭs'heˑoˑno̱ħ, nă̱ˑgă̱ă̱' oˑnă̱h' deˑgyo̱ħ' sgaˑeħ niˑyòs'hăˑgee no̱ħˑo̱'nisˑheħt, no̱ˑsaˑyo̱nˑdaˑdes'hă̱ˑo̱nˑdaˑgòħ na'wĕnˑdaˑdo'gă̱hˑdo̱ħ'gĕh?
17Neħˑhuh noˑnă̱h' neħ' shaˑă̱ħ' nă̱ˑgă̱ă̱ no̱ħˑo'iˑoħ'dă̱ħˑsho̱ħ', haˑdiˑgweeˑgo̱h' no̱ˑwa̱'iˑwas'waˑă̱s waˑă̱ˑno̱nˑde'ă̱h; da neħ' ne gaˑgweeˑgo̱h' no̱ˑgweh' waˑă̱ˑno̱nˑdo̱h'ho̱ˑă̱ħ', neħ dyoˑi'waħ heˑdeˑga'ă̱hˑsaaˑo̱ħ' he'no̱ˑo̱nˑdyeeħ' neˑyò'iˑwaˑgweeˑgo̱h.
18Oˑnă̱h' haˑwă̱ă̱', Aˑă̱ă̱ħ no̱o̱'' naħˑot' ne tăˑno̱h'do̱ˑo̱ħ'shăˑgwĕnˑniˑyòħ Na'wĕnˑniˑyòħ', desˑgyaˑdyeˑă̱h'? neħ'kuh neh, a'naħˑot' ă̱ă̱ħ' no̱o̱ gwʋs' do̱'saˑgyă̱'o̱ˑdaˑak'?
19Neħ ne'huh desˑgyaˑdyeeˑă̱h' noˑno̱h'gwă̱ˑo̱ˑjiˑwaaˑgă̱h' joˑno̱h'gwă̱ˑo̱nt, deˑoh'gwă̱h no̱o̱'gweh, neħˑhuh' heˑoˑdyo̱o̱h' hoo'yă̱ntˑho̱h' ne niˑgaˑă̱ˑdaħ'aˑah; neħ noħ'waˑdoˑdyaak, gă̱ˑo̱n'dasˑdă̱ă̱ħ' kuh oˑdo̱ħ'o̱h; neħ ne' jiħˑdăħˑo̱o̱sˑho̱ħˑo̱h' neeħ'tgă̱h waˑdiiˑdyeħs' neħˑhuh' wă̱ˑno̱n'dătˑhaħ' wă̱ˑnă̱'no̱ˑeesˑtaħ' kuh, heh, oħˑhah'dăă'gwaˑo̱ħ.
20Da neħ' aeħ' ne' saˑă̱ħ, Ga'ă̱ˑo̱ˑweeh' no̱ħˑdă̱s'gyă̱ˑo̱nˑdăăk' heh', tă̱ˑno̱h'do̱ˑo̱ħ'shăˑgwĕnˑniˑyòħ Na'wĕnˑniˑyòħ'?
21Neħ' desˑgyaˑdyeeˑă̱h' ne' yesˑheħˑătˑgă̱h'dahˑgwaħ, neħ' ne deˑya'gòhˑgwă̱h ne yaˑgo̱o̱ˑgweh, otˑheħ'shăˑgo̱o̱h' waħˑo̱h'set, să̱h' niˑga'no̱hˑho̱h ne yo̱nˑdă̱'no̱ħˑge'ăhˑdah'gwaħ, heˑniˑyòòˑweħ' gaˑgweeˑgo̱h' hwaħ'ootˑgă̱h.
22Oˑnă̱h' hohˑdă̱nˑdyo̱o̱h' deˑah'no̱nˑdo̱'gòhˑdaa'no̱o̱ˑneħ' ne gaˑno̱n'doˑwaˑnă̱s' kuh ne niˑga'no̱nˑdaħsˑas'ho̱ħˑo̱h hoˑdiˑo̱ˑnya'niˑaaˑdyeħ, neħˑhuh'gwa heh, tgaˑno̱nˑdaˑyă̱ħ' ne Jeˑruˑsaˑlem hwaˑweˑno̱o̱'dyeħ.
23Oˑnă̱h' shaˑyaħ'daat haˑwă̱'o̱hˑseeh, Syaħˑdaˑgwĕnˑniˑyòħ, neħ' gă̱h ne' dòhˑgaaħˑah' ă̱ˑsho̱ˑwa̱nˑdi'yaħˑdaaˑgòħ? Neħ' naˑgo̱ˑyă̱ˑo̱h'seeh,
24Jaˑdeħ'hasˑdo̱o̱k' ne' neħˑhuh' iˑgă̱ă̱' haˑeˑswaˑyo̱ħ' heh, tgahˑho'gaˑă̱nt' ne niˑgah'hoˑaħ'aˑah; neħˑsă̱ħ'ă̱h nòħˑgwă̱'o̱s, Gotˑgaħ'deħ, ne'huh ă̱ˑyo̱nˑdă̱ˑno̱ħ'geeˑăt' na'aˑyeˑyo̱ħ, neħ' gwaa' ne tă̱ħ'ă̱h deħˑaaˑo̱h a'yeˑgweeˑniħ,
25Noˑnă̱h' ă̱ˑyò'ăhˑdo̱'o̱o̱k naˑaˑno̱h'saˑgwĕnˑniˑyòħ' dă̱ntˑho'daħˑo̱'o̱o̱k, ă̱sˑhòh'hoˑdo̱o̱k' gwaħˑhuh. Neħ ne'oˑnă̱h' ă̱ˑwa̱h'saˑwă̱ħ nas'deh dă̱nˑdiswaˑdaħ'syo̱o̱h, neħ neh ă̱nˑdi'swahˑhoˑaħˑesˑyo̱'o̱o̱k', ă̱ˑswa'do̱ˑo̱o̱k', Syaħˑdaˑgwĕnˑniˑyòħ', Syaħˑdaˑgwĕnˑniˑyòħ', daˑgwah'hoˑdo̱o̱ˑgwʋs; neħ'ne dă̱chˑheˑswaˑwă̱'no̱ħˑsăăˑgòħ, neħ neh ă̱sˑhe'swă̱ˑo̱s tă̱ħˑă̱h niiħ' deħ'gwaˑyă̱n'deeˑih, he'o̱ˑweh no̱nˑdeˑswe'no̱'o̱k.
26Oˑnă̱h' ă̱ˑswah'saˑwă̱ħ' nă̱ˑswiħ', Neħˑhuh naˑeh' o̱ˑgwa'dekˑho̱'nyasˑo̱h, o̱ˑgwaa'neˑge'ă̱h kuh hee'seˑgat, neħˑhuh' gwaħˑhuh' saˑdi'o̱ˑnya'nisˑo̱h, he'deˑyo̱ˑgwaˑno̱nˑdaˑgwĕnˑdeeˑnyo̱ħ.
27Neħ gwaa' ne' dă̱ntˑhă̱ħ, neħ' noħˑgwaa'o̱o̱ˑwiħ, tă̱ħ'ă̱h niiħ' deħˑgwa'yă̱nˑdeeˑih' he'o̱ˑweh' no̱nˑdeˑswe'no̱ˑo̱o̱k; swatˑhăăˑdaat niiħ' heˑniˑgyaħ'daˑdeħ, gaˑgweeˑgo̱h' ne' waˑeetˑgă̱ħ' swaˑi'oħˑdeh'go̱h.
28Neħˑhuh ne' neħ dă̱ˑyo̱h'să̱ntˑhwah'so̱ˑo̱o̱k dă̱ntˑhă̱ˑno̱nˑdyòħ'găă'nyeˑaak' kuh, noˑnă̱h' ă̱sˑheˑswaˑgă̱ħ' neh, Aˑbraˑham, kuh neh, Iˑsaˑac, kuh' ne Jaˑcob, gaˑgweeˑgo̱h' gwaħˑhuh' no'diˑdoˑgă̱s'daˑni'ak, he'o̱ˑweh' tă̱ˑno̱h'do̱ˑo̱ħ'shăˑgwĕnˑniˑyòħ' Na'wĕnˑniˑyòħ, neħ naeh, niis' nas'deh hă̱ˑjech'chiˑyaħ'dòħˑya'go̱ˑo̱o̱k.
29Neħ' nă̱nˑtă̱'nehˑdaa'no̱o̱ħ, ne tgăăh'gwitˑgă̱ħs, heˑgăăhˑgwă̱ħs' kuh, neħ kuh notˑho'weħˑgĕh, kuh, nă̱nˑdyek, neħˑhuh' ă̱ă̱ˑno̱nˑdyă̱ă̱ħ' he'o̱ˑweh' tă̱ˑno̱h'do̱ˑo̱ħˑshăˑgwĕnˑniˑyòħ' Na'wĕnˑniˑyòħ.
30Da neħ' ne' jatˑga'ă̱ˑo̱h, neħ' gyee ne'huh nee no̱ħ'gă̱ă̱ħ goˑăh'go̱h neh, oˑă̱nˑdo̱o̱h' ă̱ˑjo̱nˑdo̱ħ, neħ' kuh gyee no'ă̱nˑdo̱o̱h' goˑdo̱ħ'o̱ˑo̱nˑdyeħ, neħ' naeh' nee no̱ħˑgă̱ă̱ħ ă̱ˑjaˑgaˑo̱ˑnyaħt.
31Neħ shaħˑwă̱ă̱'nĭsˑhăăt, haˑdi'yaħˑdaˑdooˑgă̱ă̱h' ne Pharˑiˑsees neħˑhuh' hoˑdi'yo̱sˑo̱h, ho̱ˑwă̱'o̱hˑseeh, Ho'saˑjaˑgă̱ħt, saˑsat'hăˑdaat nekˑho'o̱o̱ˑweh; neħ să̱ħ'ă̱h ne' deˑo'do̱ˑă̱ˑjoˑnih nă̱ă̱'yaaˑnyòħ' neh, Herˑod.
32Neħ' naˑgo̱ˑyă̱ˑo̱h'seeh, Swah'dă̱nˑdih, sheˑswa'o̱o̱ˑwih' neh hoˑiˑgă̱ă̱' no̱ħ'gwatˑgwaa, Satˑga'ă̱ˑo̱h, neħ ne' skeˑyat'ditˑgă̱ă̱s naˑdi'nĭsˑhe'oˑno̱ħ, neħ kuh neh' skeˑjă̱ħ'daaˑno̱h' nă̱ˑgă̱ă̱' wă̱ˑnĭsˑhăˑdeħ, ă̱ˑyòòˑhă̱ħt', kuh; da neħ' neh, să̱h' dwă̱ˑnĭs'hăˑdeħ, oˑnă̱h' ă̱ˑgaˑdyă̱'nòħkˑdă̱ħ heˑniˑga'iˑwaˑyănˑdah'go̱h nĕk'huh.
33Neħˑhuh gwaa' naeh, neħ' naeh ne' tgaˑgo̱nt' ă̱ˑgeħ'seek nă̱ˑgă̱ă̱' wă̱ˑnĭs'hăˑdeħ, kuh nă̱ˑyòòˑhă̱ħt, kuh ne' wă̱ˑnĭs'hăˑdeħ ne' neħ ă̱ˑjo'no̱nˑdăăˑdyeħ; neħ să̱ħ'ă̱h ne' tă̱ħ'ă̱h naeh' deħˑoˑgweeˑnyo̱o̱h' no'yaħˑjih no̱nˑda'ă̱ˑeeħ noˑdo'gă̱sˑdaaˑnih' heˑniˑgaˑno̱nˑdaaˑyă̱ħ' ne Jeˑruˑsaˑlem.
34O Jeˑruˑsaˑlem, Jeˑruˑsaˑlem, iis ne sheˑnyòs' no'diˑdoˑgă̱s'daˑnih, sheħˑsgwe'oħˑyaas' kuh gă̱ă̱s' ne toˑwa̱n'dihˑhaħs' heh' syaħˑdaaˑdeħ, doˑgwah' no̱o̱ oˑnă̱h' no̱o̱ˑkeˑyaħ'deˑo'o̱h ne sakˑsaħ'daħˑsho̱ħ, neħˑhuh no̱o̱'wa̱ˑgyeeˑă̱h' heˑniˑga'yehˑhaħ ne daˑgăăħ'ă̱ă̱ħ noħˑga'yaħˑde'oˑeek noˑdit'hwasˑho̱ħˑo̱h gaˑnăˑgo̱sˑdaaˑgo̱'o̱ˑgwaa, tă̱ħˑă̱h gwaa' niis deħˑsaˑgaˑyă̱ħ'o̱h.
35Satˑgaˑă̱ˑo̱h, neħ nă̱nˑjoˑno̱hˑsos'gaħˑa'gă̱ˑo̱o̱k, sho̱, heˑsaˑno̱h'soot; neħ' ne doˑgă̱s oħˑgwă̱ˑa̱s Neħ ne tă̱ħˑă̱h to̱o̱'sasˑgwaˑgă̱h' heˑniˑyooˑweħ' hă̱ˑgaˑiˑwa'eeħ, noˑnă̱h' ă̱ˑswiħ', Hoˑdă̱ă̱ˑo̱h' ne' neħˑhuh daa'wehˑdah'go̱ˑo̱nˑdyeħ hohˑsă̱ˑno̱ˑgo̱o̱h Naˑyaħ'daˑgwĕnˑniˑyòħ.
Currently Selected:
Luke 13: SEE
Highlight
Share
Copy
Want to have your highlights saved across all your devices? Sign up or sign in
Gospels published by the American Bible Society in 1872, Psalms in 1892.
