John 16
16
1Neħ nă̱ˑgă̱ă̱ no̱ħˑo'iˑoħ'dă̱ħˑsho̱ħ neˑwaħ oˑnă̱h' oħˑgwas'nyeħs, neħ na'gă̱ˑa̱a̱k iˑgă̱ă̱ daħˑdeˑswaˑdoˑdăăh'daˑniiħ.
2Neħ nă̱ˑyech'hiˑyaħˑditˑgă̱h hă̱ˑno̱ntˑgă̱ˑnĭsˑahˑda'no̱h; neħ ne doˑgă̱s neħ heˑniˑyò'isˑdaaħˑeeh daˑweħ' noˑnă̱h, neh, so̱nˑdiħˑgwa'naħˑot ă̱ˑyech'hiˑnyòħ neħˑhuh' nă̱ˑo'diħˑniˑgooħ''dă̱ˑa̱k, nă̱'neˑhe'ak, Haˑwĕnˑniˑyòħ' shaˑgwaˑdyeˑòħ'daˑdih.
3Da neħ nă̱ˑgă̱ă̱ no̱ħˑoˑiˑoħ'dă̱ħˑsho̱ħ neħˑhuh' nă̱ˑyech'hiˑyeeħ, neħ gaˑi'o̱ˑnih heh tă̱ħˑă̱h deˑo̱ˑwa̱ˑyă̱n'deħˑo̱h Nooħ'nih, tă̱ħˑă̱h kuh nă̱ă̱ħ' iiħ.
4Neħ gwaa' dih ne' gwaˑo̱ˑwiih nă̱ˑgă̱ă̱ no̱ħˑoˑiˑoħ'dă̱ħˑsho̱ħ, neħ' dih noˑnă̱h heˑniˑyò'isˑdaaħˑeeh' ă̱ˑgaaˑyo̱ħ, neħ nă̱ˑjis'swasˑhaˑaħt ne'neħ, neħ heh oˑnă̱h' naeh tgwaˑoˑwii ne'neħ. Neħ nă̱ˑgă̱ă̱ no̱ħˑoˑiˑoħ'dă̱ħˑsho̱ħ tă̱ħˑă̱h deħˑtgwa'oˑwii neˑchiˑwa'eeh sho̱nˑda'wahˑsaˑwă̱ħ, neħ oˑi'waħ heh' doˑgă̱ă̱' iˑdweħs.
5Neħ' dih nă̱ˑgă̱ă̱ ne'waħ oˑnă̱h' neħˑhuh ho̱ˑsaˑgeeħ heˑtaˑyaħ'daˑdeħ ne taˑgeh'haħˑo̱h; neħ dih neh deħˑso̱ˑgaaħ heˑniˑswaˑdii daˑga'o̱nˑdo̱ˑo̱ħ, Ga'ă̱ˑo̱ˑweh neˑgă̱ħ' hă̱hˑseeħ'.
6Neħ gwaa' gaˑiˑo̱ˑnih heh oˑnă̱h' oħˑgwa'oˑwiħ nă̱ˑgă̱ă̱ no̱ħˑo'iˑoħ'dă̱ħˑsho̱ħ, neħ noh'să̱nt oˑno̱h'heħˑo̱h ne swă̱ˑnyah'saˑgo̱o̱.
7Neħˑhuh gwa' naˑeh gaˑiˑwaˑgwĕnˑniˑyòħ noħˑgwa'oˑwiħ; Neħ doˑgă̱s' ne swasˑhă̱ˑno̱ˑnyas'hăħ no'yăħˑjih hă̱ˑgeeħ; neħ să̱ħ'ă̱h nă̱ˑgă̱'a̱k giħ'shă̱h o'yaħˑjih teħˑa'geˑno̱o̱ħ, tă̱ħˑă̱h' deħˑaˑo̱h o̱nˑdaˑweħ a'eˑswaˑyaħ'doˑwă̱ħt ne haˑdo̱'eˑsyo̱h'gwaħ kuh neh haˑdyeˑno̱ˑwa̱ħ'seh; neħ gwaa' giħˑshă̱h nă̱ˑgat'hăˑdat, ă̱ntˑhe'yaħˑdaˑnyet' naˑeh ne'neħ heˑswaˑyaħ'daˑdeħ.
8Neħ noˑnă̱h ă̱'o'yo̱ˑo̱k, neħ nă̱'niˑno̱nˑdoˑgaħ'dă̱ħ heˑyo̱ˑă̱nˑjaˑdeħ heh oˑi'waˑneħˑaˑgo̱h oˑyă̱ħ' ne gaˑiˑwaˑneħˑakˑshăħ, kuh heh gaˑyă̱ħ gaˑiˑwiˑyòsˑdo̱sˑhăħ, kuh heh gaˑdeħ' ne gaˑyaħ'doˑweh'dasˑhăħ.
9Neħ kuh neh, ga'iˑwaˑneħ'akˑshăħ, neħ gaˑi'o̱ˑnih heħ tă̱ħˑă̱h deˑo̱ˑgiˑwaˑgwĕnˑni'yòsˑdo̱o̱ħ.
10Neħ kuh neh, gaˑi'wiˑyòs'do̱sˑhăħ, neħ gaˑi'o̱ˑnih heˑneħˑhuh' ho̱ˑsaˑgeeħ Naaħˑni'neh, neħ'kuh neh to̱'sasˑgwaˑgă̱h oˑnă̱h;
11Neħ kuh neh, gaˑyaħ'doˑweh'dasˑhăħ, neħ gaˑi'o̱ˑnih oˑnă̱h deˑo̱ˑwa̱ˑyaħ'doˑweehˑdo̱h naah'să̱ˑnoˑwaˑnă̱h nă̱ˑgă̱ă̱ he'yo̱ˑă̱nˑjaˑdeħ.
12Neħ nă̱h'so̱h oˑi'waˑweˑsòħ aˑgi'waˑyă̱ħ nă̱ˑgwă̱'o̱s, neħ gwaa ne tă̱ħ'ă̱h taħˑdeˑgaˑyeˑiħ' ne'waħ naˑe'swaħˑniˑgo̱ˑă̱ˑyă̱nˑdaħt.
13Neħˑhuh gwa' naˑeh, noˑnă̱h' neħ Notˑhwa'isˑhăħ ne gaˑi'waˑgwĕnˑniˑyòħ ă̱ˑo̱ˑyo̱ħ', neħ' naeh neħˑhuh hă̱sˑhe'swaˑaħ heˑniˑgaˑyă̱ħ ne' gaˑgweˑgo̱h ne gaˑi'waˑgwĕnˑniˑyòħ; neħ să̱ħˑă̱h ne tă̱ħ'ă̱h neħ ta'asˑnyeh'dʋk ne'aˑo̱hˑhwa̱ħ haˑyaħ'daˑdeħ' o̱n'daˑweehˑdak, neħ gwaa' naˑgwa'naħˑot ă̱ˑo̱'o̱k, neħ ne'neħ ă̱ˑa̱s'nyehˑdʋk; neħ' gwaħˑhuh' ă̱sˑheˑjoˑdah'să̱ħ ne no̱ħˑoˑiˑoħ'dă̱ħˑsho̱ħ ne daˑweħ.
14Neħ nă̱ˑo̱ˑgyaħˑdaˑno'o̱h'go̱ˑo̱k; neħ să̱ħˑă̱h nă̱ˑo̱'yeˑno̱ˑseek niiħ naˑgaˑwă̱h, neħ ne'neħ ă̱sˑheˑjoˑdah'saħˑse'ak.
15Gaˑgweˑgo̱h' heˑniˑyoˑiˑwaˑgee haˑaħ' Naaħ'nih iiħ' aˑgaˑwă̱h; neħ oˑi'waħ aˑgă̱ă̱, neħ dă̱ntˑhah'gwaak niiħ' aˑgaˑwă̱h, neħ neˑneħ ă̱sˑheˑjoˑdah'saħˑse'aak.
16Neħ neh to̱ˑsaˑyo̱'nisˑheħt oˑnă̱h tă̱ħ'ă̱h to̱'sasˑgwaˑgă̱h; da neħ aeħ neh, To̱ˑsaˑyo̱'nisˑheħt oˑnaeħ ă̱chˑgwaˑgă̱ħ; neħ oˑi'waħ he'neħˑhuh' ho̱ˑsaˑgeeħ' heˑtaˑyaħ'daˑdeħ Naaħ'nih.
17Oˑnă̱h gyee naˑgo̱'iˑo̱ˑnyaˑni'ak deˑoˑno̱nˑdaˑdă̱ˑo̱hˑseh, Aˑnaħˑot' neˑgă̱ħ năˑgă̱ă̱ ne sho̱ˑgwă̱ˑo̱hˑseh, Neħ' neh to̱ˑsaˑyo̱ˑnis'heħt oˑnă̱h tă̱ħ'ă̱h to̱'sasˑgwaˑgă̱h; da neħ' aeħ neh to̱ˑsaˑyo̱'nisˑheħt oˑnaeħ' ă̱chˑgwaˑgă̱ħ; neħˑkuh neh, Neħ oˑiˑwaħ he'neħˑhuh ho̱ˑsaˑgeeħ he'taˑyaħ'daˑdeħ Naaħ'nih?
18Neħ dyoˑi'waħ hoˑnă̱ă̱, Aˑnaħˑot neˑgă̱ħ nă̱ˑgă̱ă̱ he'aˑdo̱h, Neħ neh to̱ˑsaˑyo'nisˑheħt'? Tă̱ħˑă̱h deħˑo̱ˑgwaħˑni'go̱ˑă̱ˑyă̱nˑdaħs ne' naħˑot haˑdo̱h.
19Da neħ naeh ne Jeˑsus hoˑno̱h'do̱ħ he'deˑoˑno̱nˑdo̱'ă̱nˑjoˑnih na'o̱ˑwa̱'a̱nˑdo̱o̱ħ, neħ naˑgo̱ˑyă̱ˑo̱hˑsee, Neħ' gă̱h neh deˑswaˑdaˑda'o̱ˑdo̱ˑnyo̱h he'o̱ˑweh iˑgă̱ă̱ nòħ'giħ, Neħ' neh to̱ˑsaˑyo̱'nisˑheħt oˑnă̱h tă̱ħ'ă̱h to̱'sasˑgwaˑgă̱h; da neħ aeħ neh to̱ˑsaˑyo̱'nisˑheħt oˑna'eħ ă̱chˑgwaˑgă̱ħ?
20Doˑgă̱s, doˑgă̱s òħˑgwă̱'o̱s, neħ' ne dă̱ˑswa'gahˑsă'nisˑhă̱ħˑsyo̱o̱ħ ă̱ˑswa'dă̱ˑno̱ħ'seek gwaħˑhuh, neħ gwa' naeh nă̱ˑwa̱'do̱hˑho̱'ă̱ħ he'yo̱ˑă̱nˑjaˑdeħ; neħ gwaħˑhuh nă̱ˑswaħ'niˑgo̱ˑetˑgă̱ħt, neħ' dih heˑnă̱ˑyaˑwă̱h, neh swaħ'niˑgo̱ˑetˑgă̱s'shăħ neħ hă̱ˑwa̱n'daˑdo̱ˑniħ neh siˑgwaa wiˑyòòh nă̱ˑjiˑswaˑdo̱h'ho̱ˑă̱ħ.
21Neħ ne yaˑgo̱ˑgweh noˑnă̱h' daˑyaˑgoˑno̱k'dă̱ħ waħˑeħˑniˑgo̱'etˑgă̱ħt gă̱ă̱s, neħ gaiˑo̱ˑnih heh, oˑnă̱h hwaħˑaˑgoˑiˑwaˑeˑwă̱ħ heˑniˑdyo'isˑdaaħˑeh; neħ gwa heˑniˑyòs'noˑweħ noˑnă̱h waˑă̱'no̱ˑgăăt naakˑsaħ'aˑah, oˑnă̱h sho̱' kuh saˑya'gòħˑniˑgo̱hˑhă̱h he'no̱ħˑe'o̱ˑyaˑgă̱ħ, neħ oˑi'waħ heˑno̱ħˑo̱ˑdo̱hˑho̱'ă̱ħ he'waˑă̱ˑno̱ˑgăăt no̱'gweh he'yo̱ˑă̱nˑjaˑdeħ.
22Neħ' dih waeh ne'waħ oˑnă̱h swaħˑniˑgo̱'etˑgă̱ħs; neħ gwa' naeh naaħ'deˑgaˑgo̱nt saˑgat'gatˑhoħ heˑswaˑyaħ'daˑdeħ, da neħ nă̱ˑwa'do̱hˑho̱ˑă̱ħ ne swă̱ˑnyahˑsaħ, neħ' gwaħˑhòh heˑnă̱ˑswa'do̱hˑho̱'ă̱h, tă̱ħˑă̱h deħˑso̱ˑgaaħ no̱ˑgweh' ta'yechˑhih'gwah.
23Da neħ dih noˑnă̱h ne'neħ hă̱ˑwă̱ˑnisˑhăˑeħ deħˑtaħ'gwĭsˑdă̱ħ to̱'sasˑgwa'o̱nˑdo̱o̱. Doˑgă̱s, doˑgă̱s oħˑgwă̱'a̱s, Neħ na'diħˑgwa'naħˑot ă̱sˑhe'swaˑdo̱ˑeˑsyo̱h'gwă̱h Naaħ'nih, neħ nă̱ch'heˑjo̱ħ ne'neħ aˑgehˑsă̱ˑno̱ħ ă̱ˑwa̱ˑdye'ăħˑdʋk.
24Ne'waħ heˑniˑyoˑweħ' heˑga'wiħs deħˑtaħˑgwĭsˑdă̱ħ naˑgeh'să̱ˑno̱ˑgo̱o̱ deħˑswa'do̱ˑe'syo̱hˑgwas'o̱h; jaˑdo̱'eˑsyo̱k, neħ ne'huh naaħ'deˑgaˑgo̱nt' eˑswaˑyeˑno̱o̱ħ.
25Neħ nă̱ˑgă̱ă̱ heˑniˑyò'iˑwaˑgee heˑno̱ħˑgyeeħ hoħˑgwas'nyeħs, neħ neh deˑga'yă̱ˑo̱nˑdăăh'gwaˑno̱ħ; neħ dih heˑniˑyo'isˑdaaħˑeeh daˑweħ, noˑnă̱h niiħ tă̱ħ'ă̱h ă̱ˑgă̱'a̱a̱k deħˑjoˑgweˑnyo̱o̱h' neh deˑgaˑyă̱ˑo̱nˑdăăh'gwaˑno̱ħ o̱ˑsaˑgwas'nyehˑdah'gwă̱ħ; neħ gwaa' nă̱ˑgyo'dahˑsă̱ħ ă̱ˑyòˑdoˑgaħ'do̱ˑo̱k haˑyaħ'daˑdeħ Nòòħ'nih.
26Neħ' noˑnă̱h ne'neħ dwă̱ˑnĭs'hăˑdeħ neħ naˑgeh'să̱ˑno̱ħ ă̱ˑswaˑdyeˑăħˑdʋk heh ă̱ˑswaˑdo̱ˑeˑsyo̱k; neħ kuh neˑtă̱ħˑă̱h ta'gwă̱ˑo̱s, neħ nă̱'eˑyaˑdă̱ˑno̱ˑyă̱'o̱s Nòòħˑnih iis' o̱ˑdeˑswa'iˑwaħˑgă̱ˑo̱o̱k;
27Neħ să̱ħ'ă̱h gaˑiˑoˑnih ne'aˑo̱ˑhwa̱ħ Nòòħ'nih sheˑswaˑno'o̱hˑgwaħ, neħ oˑi'waħ heh sgwaˑno'o̱hˑgwaħ nă̱ă̱ħ' iiħ, swa'iˑwaˑgwĕnˑniˑyòs'do̱h gwaħˑhuh he'neħˑhuh dwaˑgya'gă̱ħˑo̱h haˑyaħ'daˑdeħ Na'wĕnˑniˑyòħ.
28Neħˑhuh' dwaˑgah'dă̱ˑdyo̱o̱ heˑtaˑyaħ'daˑdeħ Naaħ'nih, aˑgyo̱s'o̱h neħˑhuh nĕkˑhuh yo̱ˑă̱ˑjaħˑgĕh; neħ' dih aeħ, nă̱sˑga'do̱ħˑneek he'yo̱ˑă̱ˑjaˑdeħ neħˑhuh' ho̱ˑsaˑgeeħ he'tă̱ħˑdyo̱ħ Naaħ'nih.
29Oˑnă̱h naˑgo̱'iˑo̱ˑnyaˑnih ho̱ˑwă̱'o̱hˑseeh, Satˑgaˑă̱ˑo̱h, oˑnă̱h' neħ òħˑses'nyehˑdak noˑdoˑgaħt; tă̱ħˑă̱h' neħ deˑji'sasˑnyeh'dahˑgo̱o̱ħ ne deˑga'yă̱ˑo̱nˑdăăh'gwaˑno̱ħ.
30Oˑnă̱h oˑdo'gă̱ħˑo̱o̱ħ he'no̱ħˑo̱ˑwă̱h naˑgwaħ'niˑgo̱ˑă̱ħˑgĕh heh haħˑdeˑyòˑiˑwaˑgee heh'syă̱nˑdeˑih, tă̱ħˑă̱h kuh daħ'deˑyoˑdo̱'ă̱ˑjo'o̱h' neħ so̱ˑgaaħ' no̱'gweh a'yaˑo̱nˑdo̱o̱ħ; neħˑhuh' no̱nˑdaˑgaˑye'ăħˑdak nă̱ˑgă̱ă̱ waħˑaˑgwa'iˑwaˑgwĕnˑniˑyòs he'neħˑhuh diˑseh'dahˑgo̱h hetˑhaˑyaħ'daˑdeħ Na'wĕnˑniˑyòħ.
31Do̱ˑsa'go̱ˑwă̱ˑno̱ħ'săˑgòħ ne Jeˑsus, haˑwă̱ă̱, Oˑnă̱h gă̱h eˑswa'iˑwaˑgwĕnˑniˑyòs?
32Swatˑga'ă̱ˑo̱h, neħ heˑniˑdyo'isˑdaaħˑeeh daˑweħ', oˑnă̱h gwa' naeh heˑyo'eeh, neħ nă̱ˑgă̱ă̱' neh' dă̱'swa'doˑgòħ, haħˑdeˑyo̱'gweħ'daˑgee kuh naeh gă̱ă̱s neħˑhuh' hă̱ˑeeħ he'o̱ˑweh ne'aˑo̱ˑhwa̱ħ' toˑno̱h'sòòt; neħ nă̱sˑgwaˑyaħˑdaatˑgaħ haħˑdă̱ˑswa̱ˑgyaħ'dis; neħˑhuh gwaa' naeh ahˑso̱h' naeh neħ nă̱ˑgă̱'a̱a̱k deħ'a'go̱hˑho̱ħ'geˑah, neħ gai'o̱ˑnih heh deˑya'gyaˑdii' naeh Naaħˑnih.
33Neħ' nă̱ˑgă̱ă̱ no̱ħˑo'iˑoħ'dă̱ħˑsho̱ħ oħˑgwas'nyehˑdah'gwă̱ħ, neħˑhuh iˑgă̱ă̱ he'gyaħˑdaˑdeħ no̱ˑdaˑya'wehˑdah'go̱ˑo̱k aˑeˑswaħˑniˑgo̱'iˑyòˑaak. Neħ să̱ħ'ă̱h naaħ'deˑgaˑgo̱nt naeh dă̱ˑswaˑdeˑyă̱ħ'hihˑda'niˑaak, ă̱ˑswă̱'o̱ˑyaaˑgă̱ħ nĕkˑhuh yo̱ˑă̱'jaħˑgĕh, neħ gwaa'' sho̱ neˑswă̱ˑdet'găˑdeek; Iiħ' naeh oˑnă̱h heħtˑgă̱h aˑgat'hăhˑgo̱h he'yo̱ˑă̱nˑjaˑdeħ.
Currently Selected:
John 16: SEE
Highlight
Share
Copy
Want to have your highlights saved across all your devices? Sign up or sign in
Gospels published by the American Bible Society in 1872, Psalms in 1892.
