मर्कुस 9
9
1येसु ताइको चात्यागेलाइहेङ कालाउ जेरहेङ दोअ्हि, “जातिङ भारि का नेलाइहेङ दोअ्खा, इता हिकालाइ सिलि खान्तेङ लाम्फा परमेस्वरको सासन एनोङ नावा कालाउ सरबुङसाइका रुपता तिङस्वाना।”
येसुको जिउ भाङगाइन्हाहि
(मति 17:1-13; लुक 9:28-36)
2आथार दिना न्हुसो येसु पतरुस, याकुब कालाउ युहान्नाहेङ दोफाङ चुम्पुतेङ एनोङ झाउका तिकारता हानिहि। कालाउ चात्यागेलाइ खाङकाताङ-खाङकाताङ परमेस्वर येसुको जिउ भाङघाइ पापिहि। 3वाको धाबा एसापा जेङहि कि फेलाउ बुङ सुमिङ भरि हासु बुङ इन्सिका जाहाँका पालि मादोधाङ। 4ओदोङ बेला उङको न्हेमि परमेस्वरको बक्ता मोसा कालाउ एलिया देखाल जेङल्हाहि कालाउ येसु दोफा काथा पालि तेङहि।
5इसिका तिङतेङ पतरुस येसुहेङ दोअ्हि। “गुरु ज्यु, केलाइ बुङ इता हिका एल्काङ जेङहि। केलाइ इता सुमलोङ खोपारा धामाइने, एनोङ नाङको भाअ्सिङ, भेनेङ मोसाको भाअ्सिङ, आरोङ भेनेङ एलियाको भाअ्सिङ।” 6पतरुस मागिघाखे कि वा हाइ दोअ्खे हाइपालिपानु पतरुस, याकुव कालाउ युहान्ना मेनाङ थिनाङ। येसु इम्बालाइहेङ हाइ दोअ्का हिघाहि इङको मागिहि।
7ओदोङ घुरि बादेल लोहि कालाउ इङकोहोइ ओबालाइहेङ थुम्हि। कालाउ बादेल लितासो परमेस्वर नुइ धुइलि तेङहि, “वा काङको मायारु चान, नाअ् दोफा का लेङचाका हिघा वाको दोअ्का काथाता मन पिसु।”
8इसिका दोअ्का हिङतेङ चात्यागेलाइ कोरपाहाङ खाङलाउ हासुहेङ बुङ तिङलि मादोहि। मोसा कालाउ एलिया इन्तासो हानिलि दोका हिघाहि, कालाउ इम्बालाइ येसुहेङ खिनिङ ताइमि दोफा तिङहि।
9जेलाउ येसु कालाउ वाको सुमि चात्यागेलाइ तिकारसो खुअ्काताङ पालाउ, वा ओबालाइहेङ दोअ्हि, नेलाइ तिङका काथा हासुहेङ बुङ मादोअ्सु जेलाउ थेकापा “का द्याङको चान सिकासो मासिन्हुपा धाउ।” 10ओदोङ भाअ्सिङ, ओबालाइ वाको दोअ्का काथा ताइमि दोफा ताअ्हि कालाउ ता-ताइमिता चाहि इसिका काथा पालि तेङहि कि सिकासो मासिन्हुपा दोअ्का मतलोप हाइ वाला।
11कालाउ चात्यागेलाइ येसुहेङ हिअ्हि, हाइ व्यवस्था धिरपाका द्याङगेलाइको काथा सहि दोङ हि, कि या जरुरि हि कि वा ख्रिस्ट खान्तेङ लाम्फा एलिया लोलि गोयाङ? जेसापा जातिङकोनु, वा एला थेकापा हाइ पालि लोका मान्थु?
12-13येसु दोअ्हि, “जातिङ भारि का नेलाइहेङ दोअ्खा या सत्ये हि कि परमेस्वर एलियाहेङ दिङगिल्लाङका दोअ्तेङ केरा चाका हिघाहि, कि वा गोताङ काथा ठिक पालिको भाअ्सिङ लाम्फा ल्वाङ। कालाउ एलिया लाम्फा दोङ लोलि दोका हि, कालाउ केलाइको आगुवागेलाइ वाको दोफा मेनाङ मारेम्का ब्यभार पाहि। जेलाउ वा पालि भोघाखे, जेसाङ कि परमेस्वरको बक्ता हेन्जाङ लाम्फा दोङ दोअ्का हिघाहि कि वा पावा। कालाउ का द्याङको चान, काङको बारेता धर्मसास्तरता हेन्जाङ काथा इसिका लेखेका हि, बचन दोङ दोअ्खे कि का हेन्जा दुख भोगिलि गोयाङ कालाउ द्याङगेलाइ कासेहेङ माकिताङ।”
भुत-आत्मा धेल्का वाजान
(मति 17:14-21; लुक 9:37-43)
14जेलाउ येसु कालाउ वाको सुमि चात्यागेलाइ तिकारसो खुतेङ लेता लोहि आरोङ चात्यागेलाइ हिका थामेता लोहि, इम्बालाइ इन्ता एनोङ बारका द्याङगेलाइको जेर वाको कोरपाहाङ तिङहि कालाउ व्यवस्था धिरपाका द्याङगेलाइ चात्यागेलाइ दोफा नाइसुतेङ हिघाहि। 15येसुहेङ तिङतेङसाङ द्याङगेलाइ भाङ-भाङहि, कालाउ धाअ्तेङसाङ हानितेङ सेउपाहि।
16येसु इम्बालाइहेङ हिअ्हि, “हिदोइ काथाको बारेता नेलाइ गालाबाजि पातेङ हिसुना?”
17द्याङको जेरसो एमि द्याङ येसुहेङ बिन्ति पाकाताङ दोअ्हि “प्रभु, काङको चान नाङकोता चुमाका हिघा। वाकोता भुत-आत्मा हि ओदोङ भाअ्सिङ वा नुइ धुइलि मादोखे। 18जेलाउ बुङ भुत-आत्मा वाको ह्रुता झाअ्मिरिखे, भोनोइता लोङपाखे कालाउ वा नुइसो थोसि बिरखे, तासिङ रेअ्खे कालाउ रानथिउ-थिउखे कालाउ चाल मालाइलि मादोखे। का नाङको चात्यागेलाइहेङ भुत-आत्मा ओल्लेपालि दोअ्तेङ बिन्ति पाघा कालाउ ओबालाइ मादोहि।”
19येसु इम्बालाइहेङ दोअ्हि, “ओइ खाङधुरि मापाका हारागुटियागेलाइ, का नेलाइ दोफा हेथे सोमोइ थेकापा हिलि? का एला नेलाइहेङ हेथे थेकापा सहितेङ हिलि? उङको वाजानहेङ काङकोता चुमासु।” 20कालाउ इम्बालाइ उङको वाजानहेङ येसुकोता पिपुहि। जेलाउ भुत-आत्मा येसुहेङ तिङहि उङको वाजान झाका लोङहि कालाउ उङको वाजान नुइ भरि थोसि बिर्तेङ भोनोइता लोताइलि तेङहि।
21कालाउ येसु वाको आबाहेङ हिअ्हि, “यासेहेङ इसिका जेङका हेथे जेङहि?” जामालसोङ इसिका जेङका हि दोअ्तेङ वाको आबा जोबाफ पिहि। 22“भुत-आत्मासो वासेहेङ हेन्जा पोल्ति मेता कालाउ चिता लोङपातेङ सेअ्लि भोखे। नाअ् दोअ्न्हा पानु केलाइ ह्रुता दाया पातेङ साघाइपि।”
23येसु दोअ्हि, “का इसिका पालि माद्वाङ दोअ्तेङ नाअ् लिता साङखा हिलि माएल! जेसापा हिदोइ बुङ द्याङ का ह्रुता खाङधुरि पाखे कालाउ गोताङ काथा सम्भब हि।”
24इसिका हिङतेङ आबा चाहि ह्रिकाइतेङ दोअ्हि, “नेउ, का खाङधुरि पाङका। काङको खाङधुरि मापाकाता कासेहेङ साघाइपि।”
25जेलाउ येसु आरोङ बुङ तिङहि, हेन्जा जेर वासेहेङ खाङलि जोम्तेङ हिघाहि वा दोङ भुत-आत्माहेङ चेरकाताङ दोअ्हि, “ओइ लाता कालाउ बहिरा पाका भुत-आत्मा, इदोइ वाजानसो ओल्लेतेङ लौउ, कालाउ वाको लिता आरोङ हेलाउ बुङ मादुल।”
26इङको भुत-आत्मा ह्रिकाइतेङ कालाउ वाजानहेङ फेअ्न्हापातेङ ओल्लेतेङ हानिहि। वाजान चाहि सिनाङ भाइपाङ जेङहि। कालाउ झाराङ या वाजानते सिहोइ दोअ्लि तेङहि। 27कालाउ येसु वाको खुर चातेङ ल्होपाहि कालाउ वाजान जाराक-जुरुकपा ल्होहि कालाउ एल्हि।
28येसु कालाउ चात्यागेलाइ साअ् भारि घुरिहि चात्यागेलाइ ए-कुन्हाता येसुहेङ हिअ्हि, “केलाइ चाहि इङको भुत-आत्माहेङ हाइ पालि ओल्लेपालि मादोन्हाहि?”
29कालाउ येसु दोअ्हि, “इन्सिका खाल्को भुत-आत्माहेङते प्रार्थानासो खिनिङ ओल्लेपालि दोअ्खे।”
30न्हुसो येसु कालाउ चात्यागेलाइ इङको थामेहेङ लाअ्तेङ गालिल जिल्ला पाहासो हानिलि तेङहि। येसु मन पाघाखे कि इदोइ काथा हासु बुङ थाहा माग्याको, 31हाइपालिपानु येसु ताइको चात्यागेलाइ दोफा हेन्जाङ सोमोइ बितिपालि कालाउ धिरपालि खाङघाखे। वा इम्बालाइहेङ दोअ्हि, “धेमाङ का द्याङको चानहेङ सतुरुगेलाइको खाबाराता सुम्पि प्याङ, कालाउ इम्बालाइ कासेहेङ सेअ्तावा, कालाउ सुम्निता सिकासो सिन्हुतेङ ल्होकाङका।” 32चात्यागेलाइ इदोइ काथा दोअ्का माबुझिहि, कालाउ वासेहेङ हिअ्लि बुङ थिघाहि।
माहान हासु हि?
(मति 18:1-5; लुक 9:46-48)
33येसु कालाउ वाको चात्यागेलाइ कर्फनहुम सहरता ताइको साअ्ता लोहि। साअ् लिता दुल्लाउ येसु इम्बालाइहेङ हिअ्हि, “दामाता लोलाउ नेलाइ हाइको बारेता काथा पाघासुखेना?” 34कालाउ इम्बालाइ हाइ दोङ मादोअ्हि, हाइपालिपानु इदोइ दोअ्तेङ नाइसु घाखे कि, “केलाइ मध्येसो हासु बारका वाला?”
35कालाउ येसु योम्हि कालाउ तेन्हे झना चात्यागेलाइहेङ काइतेङ दोअ्हि, “हेन्जा इज्जत भोलि खाङकालाइ झाराङ खान्तेङ म्हुइका जेङतेङ झाराङको काम पालि गोयावा।”
36कालाउ येसु एमि म्हुइका जामालहेङ ताइको दोफा चुमाहि कालाउ जामालहेङ खोम्तेङ दोअ्हि, 37“जेसापा हिदोइ बुङ द्याङ का ह्रुता खाङधुरि पाखे दोअ्तेङ एमि जामालहेङ दाया तिङपाखे पानु वा जातिङको आदार पाखे। कालाउ हिदोइ बुङ द्याङ कासेहेङ आदार पाखे पानु जातिङको परमेस्वरको आदार पाखे जाइ कासेहेङ दिङगिल्हि।”
38युहान्ना येसुहेङ दोअ्हि, “हे गुरु ज्यु, केलाइ एमि द्याङहेङ नाङको मिङ ल्होतेङ भुत-आत्मागेलाइहेङ ओल्लेपातेङ हिका तिङन्हाहि। कालाउ वा केलाइको चात्यागेलाइ मध्येको माकोनाङ वासेहेङ रोकिन्हाहि।”
39-40येसु दोअ्हि, वा केलाइको बिरोधता मान्थु उङको केलाइको पक्स्यताङ हि। ओदोङ भाअ्सिङ जाइ दोङलाउ बुङ काङको मिङता भारबुसाइका काम पाखे, वा तुरुन्तै काङको बिरोधता खाराका काथा धुइलि माद्वाङ ओदोङ भाअ्सिङ वासेहेङ मारोकेसु। 41जातिङ भारि का नेलाइहेङ दोअ्खा, “हासु बुङ नेलाइहेङ ख्रिस्टको द्याङ दोअ्तेङ ए गिलास चि आम्लि खिनिङ पिनु वा हेसा पालाउ बुङ इनाम निनावा।”
बाधा पिकाहेङ चेताउनि
42येसु आरोङ दोअ्हि, हासुहेङ बुङ ताइको निर्घाता जान्ता तोइतेङ समुन्द्रता थाल्लि मारेम्का साजाइ दोङ हि। कालाउ जेसापा हासु बुङ काङको ह्रुता खाङधुरि पाका इदोइ म्हुइकालाइको मध्ये एमिहेङ बाधा पिनु वासेहेङ इदोइ खान्तेङ मारेम्का साजाइ जेनावा। 43जेसापा नेलाइ पाप पालिको भाअ्सिङ ताइको खुरहेङ पाप पालि लागाइलि सोचितेङ हिसुना पानु इङकोहेङ पाल्पि। न्हेनोङ खुर नरकता हानिलि खाङतेङ भरु कुजिया जेङतेङ स्वर्गता दुल्लि हेन्जा रेम्का दोङ जेनाङ। 44नरकता जिउहेङ चाका पेअ्सा हेलाउ बुङ मासिखे कालाउ दालदालाइतेङ हिका मे बुङ हेलाउ बुङ मासिखे। 45जेसापा नेलाइ पाप पालिको भाअ्सिङ ताइको खोकोइहेङ लागाइलि सोचितेङ हिका हिसुना पानु इङकोहेङ पाल्पि। न्हेनोङ खोकोइ नरकता हानिलि खाङतेङ भरु कुजिया जेङतेङ स्वर्गता दुल्लि हेन्जाङ रेम्का दोङ जेनाङ। 46नरकता जिउहेङ चाअ्का पेअ्सा हेलाउ बुङ मासिखे कालाउ दालदालाइतेङ हिका मे बुङ हेलाउ बुङ मासिखे। 47जेसापा नेलाइ पाप पालिको भाअ्सिङ ताइको मिसियाँहेङ पाप पालि लागाइलि सोचितेङ हिका हिसुना पानु इङकोहेङ ओल्ले पापि। न्हेनोङ मिसियाँ नरकता हानिका खाङतेङ भरु कान्हाँ जेङतेङ परमेस्वरको सासनता दुल्लि हेन्जाङ रेम्काङ जेनाङ। 48नरकता जिउहेङ चाका पेअ्सा हेलाउ बुङ मासिखे कालाउ दालदालाइतेङ हिका मे बुङ हेलाउ बुङ मासिखे। 49हाइपालिपानु देसेहोइ बलिदान सुद्द बानाइका भाइपाङ झाराङहेङ मेहोइ खारियावा। 50देसेते एनोङ आवस्यक आमेने दोङ हि कालाउ देसे दोङ चेचेका जेङनु हाइहोइ ताइका बानाइलि? नेलाइको ता-ताइमिता “देसेको गुन हिलि गोइखे कालाउ एमिसो भेनेङ दोफा सान्तिसो मिलितेङ हिलि गोइखे।”
Currently Selected:
मर्कुस 9: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
