मर्कुस 7
7
सुद्द कालाउ आसुद्द
(मति 15:1-20)
1एनि यरुसेलेम सहरसो लोका फारिसिगेलाइ कालाउ मोसाको व्यवस्था धिरपाका द्याङगेलाइ येसुकोता परमेस्वरको बचन हिङलि वाको कोरपाहाङ योम्हि। 2कालाउ येसुको आधिमि चात्यागेलाइ खुर माझासिङ तोले चाकाताङ पाका इम्बालाइ तिङहि जेसाङ कि ओबालाइको खुर मुन्धुम आन्सार जाहाँका मान्थुघाहि। याको माने इदोइ दोङ कि ओबालाइ ताइको खुर यहुदि मुन्धुमको आन्सार झाका मान्थुघाहि। 3हाइपालिपानु गोताङ यहुदिगेलाइ मध्ये बिसेस पातेङ फारिसिगेलाइ इम्बालाइको पुर्खागेलाइको पिका मुन्धुम आन्सार खुर माझासिङ उम माचाघाहि। 4हाते बाजारसो लोलाउ मुन्धुम आन्सार चिउतेङ सुद्द माजेम्पा इम्बालाइ माचाघाखे, इदोइ झोको खिनिङ माको, इम्बालाइ इसिका आरोङ हेन्जाङ मुन्धुमगेलाइ मानिखे, कालाउ थालि, बात्ति, कालाउ गोताङ कासको ताखाला भान्डा झाका चलन हि।
5ओदोङ भाअ्सिङ फारिसिगेलाइ कालाउ व्यवस्था धिरपाका द्याङगेलाइ येसुहेङ हिअ्हि, “नाङको चात्यागेलाइ पुर्खासो लोका मुन्धुम हाइ पालि माकेम्खे! इम्बालाइ उचित तरिकासो ताइको खुर माझासिङ तोले चाखे!”
6कालाउ येसु इम्बालाइहेङ जोबाफ पिहि, यासाइया परमेस्वरको बक्ता नाअ् कपटिगेलाइको बिसोइता पबित्तरो धर्मसास्तर ठिक आगमबानि पाहि,
काङको बारेता सभ्य धुइसुखेना,
कालाउ बास्ताबिक का दोफा प्रेम मापाखे।
7इम्बालाइ ब्यर्थाता काङको बाखिन पाखे,
हाइपालिपानु इम्बालाइ द्याङगेलाइको बानाइका
आग्यागेलाइ केम्लि धिरपाखे जेदोङ
8नेलाइ परमेस्वरको आग्याहेङ लाअ्तेङ पुर्खासोङ पातेङ लोका मुन्धुमहेङ मानिसुखेना। 9येसु इम्बालाइहेङ दोअ्हि, “नेलाइ ताइको मुन्धुम माअ्पालिको भाअ्सिङ, परमेस्वरको आग्यागेलाइहेङ लाअ्लि दामा भोसुखेना।” 10उधारनको भाअ्सिङ मोसाको व्यवस्था धिरपाका द्याङगेलाइ दोअ्का हि, “ताइको आमाइ आबाको आदार पासु, कालाउ जाइ आमाइ-आबाको बिरोधता मारेम्का काथा दोअ्खे, उङकोहेङ सेअ्लि दोङ गोयाङ।” 11-12कालाउ आधिमि दोअ्खे कि, “का ताइको आमाइ-आबाहेङ साघाइलि मादाङका, हाइपालिपानु जेदोङ का नासेहेङ पिलि गोइका हिघाहि इङको परमेस्वरहेङ पिका बाचा पाका हिघा। ओदोङ भाअ्सिङ जेदोङ इङको साघाइ आमाइ आबाहेङ पालि गोइका इङको खिनिङ परमेस्वरको भाअ्सिङ हि।” ओदोङ भाअ्सिङ जेलाउ थेकापा, नाअ् उङको द्याङहेङ वाको आमाइ-आबाहेङ साघाइलि आनुमति मापिध्यास्वाना जेदोङ कि परमेस्वरको आग्याहोइ धिरपाखे। 13कालाउ नेलाइ परमेस्वरको व्यवस्था उलङगन पासुखेना जेदोङ परमेस्वरको बचन नेलाइहेङ पिका हि, कालाउकि नाअ् मुन्धुमगेलाइ केम्लि दोअ्सु जेदोङ नेलाइको हारागुटियागेलाइ नेलाइहेङ सुम्पिका हि। कालाउ इसिकाङ मारेम्का कामगेलाइ पासुखेना।
14येसु आरोङ झाराङ द्याङगेलाइहेङ ताइ दोफा काइहि कालाउ ओबालाइहेङ दोअ्हि, “नेलाइ झाराङ काङको काथा हिङसु कालाउ गिसु। 15बाहारसो द्याङ लिता दुल्का हिदोइ बुङ काथाहोइ द्याङहेङ आसुद्द पालि मादोअ्खे। कालाउ मनसो बाहार ओल्लेका काथाहोइ कि द्याङहेङ आसुद्द पाखे। 16जाइ काङको या काथा हिङदोङखे, वा इङको काथाहेङ ध्यान पितेङ हिनाको।”
17जेलाउ येसु द्याङगेलाइको जेरहेङ लाअ्तेङ साअ् लिता दुल्हि कालाउ वाको चात्यागेलाइ जेदोङ दोअ्का हिघाहि या निङपिका को माने वासेहेङ हिअ्हि। 18येसु इम्बालाइहेङ दोअ्हि, “हाइ एला बुङ नेलाइ बोगेलाइ भाइपा आबुझदोङ जेङका हिसुना? हाइ नेलाइ माबुझिसुखेना कि केलाइको नुइसो लिता दुल्का जेदोङ चानाखे इङकोहोइ केलाइहेङ परमेस्वरको आगाता आसुद्द माबानाइखे? 19हाइपालिपानु इङको चाका ह्रदय मानिखे कालाउ हामुता दुल्खे कालाउ हामुसो बाहार ओल्लेखे। एसापा दोअ्का हि, येसुको आर्थ हिघाहि कि गोताङ खाल्को चाका आनेमाने परमेस्वरहेङ सुइकार हि।”
20येसु दोअ्हि, जेदोङ द्याङगेलाइ सोचिखे, धुइखे कालाउ पाखे इङको काथागेलाइहोइ परमेस्वरको आगाता आसुद्द बानाइखे। 21हाइपालिपानु गोताङ खाल्को खाराब मुल मन लिता सोङ ओल्लेतेङ लोखे। जेसाङ: कासिबिरि, खुगिल्का, मारा पाका, उलिगिल्का, 22दिका, दुस्ट, धाताइका, भानाइदारि, बोमिहेङ मि तुपाका, खाङलि माकिका, मन्दा माताका काथा दोअ्गिल्का, घमन्ड कालाउ मुर्खता काम पाका। 23इदोइ गोताङ काथागेलाइ द्याङको मन लिता सोङ ओल्लेखे। कालाउ इङकोङ काथागेलाइहोइ परमेस्वरको आगाता आसुद्द पाखे।
सिरिया फोनिकिको बेलाल
(मति 15:21-28)
24कालाउ न्हुसो इन्तासो, येसु कालाउ वाको चात्यागेलाइ इङको थामेहेङ लाअ्तेङ टुरोस कालाउ सिदोन मिङ पाका सहरको कोर्पाहाङको इलाकाता हानिहि। आधिमि थाहा माग्याको दोअ्तेङ वा एमिको साअ् लिता दुल्हि। कालाउ बुङ द्याङगेलाइ धेमाङ थाहा गिहि। 25एमि भुत-आत्मा धेल्का बेजानको आमाइ येसुको बारेता हिङतेङसा वाकोता लोहि कालाउ वाको खोकोइता तुघुरहि। 26उङको बेबाल चाहि ग्रिक हिघाहि, वा सिरिया मौजाको फोनिके दोअ्का थामेता जोलोम जेङका हिघाहि। वा एसा दोअ्तेङ येसुहेङ बिन्ति पाहि, काङको चामिन्दिसो भुत-आत्मा ओल्लेपातेङ एल्पापि।
27कालाउ येसु दोअ्हि, “लाम्फा का ताइकोङ यहुदि द्याङगेलाइहेङ साघाइलि गोयाङ। #7:27 युहुदिगेलाइ ताइमिहेङ सोचिघाखे गैर-यहुदिगेलाइ खान्तेङ रेम्का जेलाउ-सेलाउ खिया दोअ्तेङ काइखे। माकुनुते इसिका जेनाङ चान चामिन्दिकोसो तोले घिङतेङ खियाहेङ पिलि।”
28उङको बेबाल येसुको दोअ्का काथा बुझिहि कि वा गैर-यहुदिगेलाइहेङ खिया कालाउ यहुदिगेलाइको चान-चामिन्दिगेलाइ काङको दोअ्तेङ सम्बोधन पाका हि, ओदोङ भाअ्सिङ वा दोअ्हि, “एइ प्रभु, इङकोते थिकोङ हि! कालाउ खियागेलाइ बुङते चाङ चाउकि लेता जामालाइ चालाउ होपाका, राइनाकागेलाइ हुल्का चालि निङखेते!”
29या हिङतेङ येसु दोअ्हि, “हाइपालिपानु नाङको खाङधुरिहोइ उत्तारा पिन्हा, ओदोङ भाअ्सिङ का भुत-आत्माहेङ नाङको चामिन्दिसो बाहार ओल्ले पापिघा, एला नाअ् धुक्क जेङतेङ सिता हाने।”
30उङको घुरितेङ सिता थुकालाउते चामिन्दि एल्तेङ चाउकिता जिम्तेङ हिघाहि। जातिङ भारि चामिन्दिसो भुत-आत्मा ओल्लेलि दोका हिघाहि।
बैइरा कालाउ लाता द्याङ
31कालाउ न्हुसो येसु वाको चात्यागेलाइ टुरोसको इलाकासो ओल्लेतेङ ओबालाइ सिदोन सहर पाहासो डेकापोलोस इलाकाको सिमाना पाहासो हानिहि, कालाउ ओबालाइ गालिल समुन्द्रको वरिपरिको देरा भारि थुकाहि। 32इन्ता द्याङगेलाइ एमि बैइरा कालाउ लाता द्याङहेङ येसुकोता चुमाहि, कालाउ वाको ह्रुता खुर ताअ्पि दोअ्तेङ वासेहेङ बिन्ति पाहि कालाउकि वा एल्लि द्वाको।
33येसु उङको द्याङहेङ जेरगेलाइसो एक्लाङ खेङतेङ आसापा चुम्पुहि। कालाउ वाको न्हातोङता आङगुलि युकाइ पिहि कालाउ ताइको आङगुलिता थोअ्तेङ वाको देतोङता साइपिहि। 34कालाउ न्हुसो येसु स्वर्ग भारि म्हाल्तेङ ह्रिङका हुसि सितेङ वासेहेङ दोअ्हि, “इफ्फाता” जाइको आर्था हिब्रु भासाता दोअ्का चाहि, “हिनाको!” 35एन्सालाउ दोङ उङको द्याङ रेम्फा न्हातोङ हिङलि तेङहि, कालाउ वाको देतोङ हेङगालाइन्हाहि, कालाउ वा रेम्फा नुइ धुइलि तेङहि।
36येसु ओबालाइ झाराङहेङ दोअ्हि या काथा हासुहेङ बुङ माअ्दो कि वा हाइ पाहि। कालाउ जेथे वा दोङ माअ्दोलि दोअ्का आग्या पिहि, इङको दोङ हेन्जा खुसिहोइ एमिसो-भेनेङ दोफा इदोइ दोअ्लि तेङहि। 37या काथा हिङकालाइ झाराङ हेन्जाङ आवाइतुतेङ दोअ्हि, “वा गोताङ काथा रेम्का पाहि! इता थेकापा कि बहिराहेङ हिङका कालाउ लाताहेङ नुइ धुइलि योग्य पाहि।”
Currently Selected:
मर्कुस 7: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
