मर्कुस 15
15
पिलातसको आगाता येसु
(मति 27:11-31; लुक 23:2-3; 18-25; युहा 18:28-40; 19:1-16)
1एह्रिमाङ मुलि पुजारिगेलाइ, यहुदिगेलाइको आगुवा, व्यवस्था धिरपाका द्याङगेलाइ कालाउ यहुदि माहासभाको झाराङ सदस्यगेलाइ बोइथोक योम्हि कालाउ येसुहेङ रिम्तेङ झिनन्झिरिहोइ धेउतेङ इम्बालाइ न्यायको भाअ्सिङ यहुदिया इलाकाको रोमि सारकार पिलातसको साअ्ता पिपुहि।
2पिलातस येसुहेङ हिअ्हि, “हाइ नाअ् यहुदिगेलाइको राजा दोङ?” येसु दोअ्हि, “नाअ् ताइमिङ दोअ्खेना कि नाअ् दोङ दोअ्तेङ।”
3मुलि पुजारिगेलाइ येसुहेङ हेन्जा काथागेलाइहोइ दुसिहि। 4पिलातस येसुहेङ आरोङ हिअ्हि, “हाइ नासेहेङ ताइको बारेता हाइ बुङ दोअ्लि मान्थु? खाङ त इम्बालाइ नासेहेङ वथे हेन्जा दुसितेङ हि?”
5येसु सिकापा हि, या तिङतेङ इता थेकापा कि पिलातस सक्क परिहि।
6बासार किपाङ निस्तार पार्बाको सोमोइता द्याङगेलाइको माग एमि कैदिहेङ लाअ्पिका चलन हिघाहि। 7ओदोङ सोमोइता बारब्बा मिङ हिका द्याङ हेन्जाङ बिद्रोहि पानाङ झ्यालखानाता ह्वाका हिघाहि, इम्बालाइ रोमि सारकारको बिद्रोहता हेन्जा द्याङगेलाइहेङ सेअ्का हिघाहि। 8कालाउ द्याङगेलाइको जेर पिलातसकोता लोतेङ दोअ्हि, लाम्फाको बासार भाइपाङ इदोइ बासार बुङ एमि कैदिहेङ लाअ्पि।
9पिलातस दोअ्हि, “नेलाइ हाइ भोसुखेना, कि का नेलाइको भाअ्सिङ यहुदिगेलाइको राजाहेङ लाअ्पिया कुनु?” 10हाइपालिपानु वासेहेङ थाहा हिघाहि कि मुलि पुजारिगेलाइ डाहा पातेङ येसुहेङ रिम्का हिघाहि। 11कालाउ मुलि पुजारिगेलाइ जेरहेङ तोम्पाहि कि येसुको बाद्लाता बारब्बाहेङ लाअ्पिलिको भाअ्सिङ पिलातसहेङ दोअ्हि।
12पिलातस आरोङ द्याङगेलाइहेङ हिअ्हि, “एन्सा पानु जाइ नेलाइ यहुदिगेलाइको राजा दोअ्सुखेना, वासेहेङ चाहि का हाइ पालि कुनु?”
13द्याङगेलाइको जेर आरोङ ह्रिकाइतेङ दोअ्हि, “वासेहेङ क्रुस्टा तोइतेङ सेअ्सु।”
14पिलातस इम्बालाइहेङ हिअ्हि, “वा हाइ आपाराध पाका हि रो?” कालाउ झन इम्बालाइ पिलातसहेङ ह्रिकाइतेङ दोअ्हि, “वासेहेङ क्रुस्टा तोइतेङ सेअ्सु।”
15कालाउ पिलातस जेरहेङ लेङचापालिको भाअ्सिङ कालाउ ओबालाइको भाअ्सिङ बारब्बाहेङ लाअ्पिहि, कालाउ येसुहेङ द्वालिहोइ म्हेतेङ क्रुस्टा तोइलि रोमि सिपालाइहेङ सुम्पिपिहि।
16कालाउ पिलातसको सिपालाइ येसुहेङ गर्बनरको दरबारको सालेङता चुम्पुहि (जाइहेङ प्रेटोरियन दोअ्खे) कालाउ गोताङ सिपालाइहेङ जोम्पाहि। 17सिपालाइ येसुहेङ राजाको भाइपा गाङगाउरा रङको धाबा होङपाहि, कालाउ चुइको मुकुट पुइतेङ पुरिङता तुअ्पातेङ, आभिनाय पातेङ खुजालाइलि। 18कालाउ इम्बालाइ साम्मान तिङपातेङ पाका हि दोअ्तेङ सेउपालि तेङहि कालाउ चेरतेङ दोअ्हि, “यहुदिगेलाइको राजाको जय ज्याको!” 19इम्बालाइ बाराम्बार निगालोको लाठिहोइ वाको पुरिङता दान्हाइघाखे, इम्बालाइ वासेहेङ आपामान पालिको भाअ्सिङ हेथेते वाको ह्रुता थोअ्हि, कालाउ इम्बालाइ साम्मान पिलि आभिनाय पातेङ वासेहेङ तुघुरतेङ सेउपालि तेङहि। 20कालाउ येसुहेङ खुजालाइलि दोतेङ इम्बालाइ नेल्पा धाबा खाइपिहि, कालाउ वाको ताइकोङ धाबा होङपाहि। इन्तासो इम्बालाइ वासेहेङ क्रुस्टा तोइलि येसुहेङ बाहार ओल्लेपाहि।
येसुहेङ क्रुसता तोइका
(मति 27:32-44; लुक 23:33-43; युहा 19:17-27)
21सहरसो बाहार हानिकाताङ पालाउ सिमोन मिङ पाका एमि द्याङ देरासो यरुसेलेम सहरता लोका हिघाहि, सिमोन कुरेनि सहरसो लोका हिघाहि कालाउ उङको आलेक्जेन्डर कालाउ रुफसको आबा हिघाहि, सिपालाइ वासेहेङ येसुको क्रुस फाअ्लि कर लागाइहि जेता ओबालाइ येसुहेङ क्रुसता तोयाङ। 22कालाउ येसुहेङ इम्बालाइ गलगथा दोअ्का थामेता चुमाहि। हिब्रु भासाता गलगथा दोअ्का चाहि “खप्परे” थामे। 23इन्ता थुकातेङ सिपालाइ येसुहेङ म्हाका मुर्र मिस्लाइका दाखरस पिहि, कालाउकि वासेहेङ आतुइसा साघाइ मिलियाको। कालाउ येसु इङको माआम्हि। 24कालाउ न्हुसो इम्बालाइ येसुहेङ काटि ताराइतेङ क्रुस्टा तोइहि। वाको धाबागेलाइ हासु-हासुको भागता परियाङ दोअ्तेङ इम्बालाइ चिट्ठा ताअ्तेङ बाख्राइहि।
25येसुहेङ क्रुस्टा तोइलाउ ह्रिमाको क्वाहा बजिका हिघाहि। 26सिपालाइ येसुको पुरिङ ह्रुता एनोङ दुसिका पात्तारा लेखेतेङ ताराइका हिघाहि, इन्ता वासेहेङ क्रुस ह्रुता तोइका कारान लेखेका हिघाहि कालाउ वाको ह्रुता इदोइ सब्दगेलाइ लेखेका हिघाहि, “यहुदिगेलाइको राजा।” 27येसुहेङ क्रुस्टा तोइलाउ इम्बालाइ न्हेमि डाकागेलाइहेङ बुङ क्रुस्टा येसुको दाम्पाहा कालाउ केपाहा तोइहि। 28एसापा धर्मसास्तरता ख्रिस्टको बारेता लेखेका काथा सत्ये जेङहि कि “वा आपाराधिगेलाइदोफा गान्दिन्हाहि।” 29इङको दामा पाहासो तेकालाइ लोकालाइ-हानिकालाइ निर्घा मेतेङ-मेतेङ येसुहेङ इसिका दोअ्तेङ खुजालाइहि, “ते दोअ्, मुन्दिरहेङ ह्राअ्तेङ सुम्निता धाम्लि खाङका द्याङ नाआङ माको? 30एला ताइमिहेङ बान्चिपातेङ क्रुससो खुअ्तेङ लौउ!”
31मुलि पुजारिगेलाइ, कालाउ व्यवस्था धिरपाका द्याङगेलाइ कालाउ यहुदिगेलाइको आगुवा इन्ताङ हिघाहि। उङको द्याङगेलाइ बुङ येसुहेङ खुजालाइतेङ दोअ्हि “या आरुहेङ बान्चिपालि दोहि, कालाउ एला ताइमिहेङ बान्चिपालि माद्वाङ। 32ओइ इस्राएल सारभिको राजा ख्रिस्ट एला क्रुससो लेता खुअ्तेङ लौउ, कालाउकि केलाइ बुङ खानाङ! कालाउकि खाङधुरि पाङ” कि इदोइ केलाइको राजा हि। वाको दोफाङ क्रुस्टा तोइन्हाका एमि बुङ वासेहेङ खुजालाइहि,
33नितिमा तेन्हे बजेसो सुम बजे थेकापा इदोइ प्रिथिबि भरि दोङ कितिकितिहि। 34ह्रिमाको सुम बजे येसु इसिका दोअ्तेङ बार्का गालाहोइ ह्रिकाइतेङ दोअ्हि, “इलोइ-इलोइ लामा सबखथानि?” इदोइ दोअ्का आर्थ चाहि, “हे काङको परमेस्वर, कासेहेङ हाइ पालि लाअ्न्हा?”
35इन्ता जाअ्कालाइ मध्ये हिङतेङ आधिमि गलत सम्झिहि कालाउ दोअ्लि तेङहि, “हिङसु, याते आगमबक्ता एलियाहेङ ताइमिहेङ साघाइलिको भाअ्सिङ काइदोङखे!”
36इम्बालाइ मध्येसो एमि लोतेङ चेन्थ्रा चुकता चोबितेङ निगालोको लागासिता खोइतेङ चुमाहि कालाउ उङको चेन्थ्रा येसुको नुइता युपितेङ वा दोअ्हि, “ह्रुम्सु-ह्रुम्सु खानाइने वासेहेङ एलिया क्रुससो खुअ्पालि ल्वाङ बे।”
37कालाउ ओदोङ घुरि येसु बार्का गाला ओल्ला पातेङ ह्रिकाइतेङ प्रान लाअ्हि।
38ओदोङ सोमोइता मुन्दिरको लिता तोइका पर्दा ह्रुतासो लेता थेकापा न्हे पाना जेङतेङ थेअ्हि, कालाउ इदोइ झाराङहेङ परमेस्वरको उपस्थितिसो दुल्लि रोकिहि। 39येसु एसापा ताइको प्रान लाअ्का तिङतेङ क्रुसको भेरपा जाअ्तेङ हिका रोमि कप्तान दोअ्हि, “जातिङको या द्याङते परमेस्वरको चान दोङ हिघाहि भाने।”
40आधे बेबालाइ बुङ दुरेसोङ जाअ्तेङ खाङतेङ हिघाहि। इम्बालाइ मध्येसो मग्दल देराको मरियम हिघाहि, म्हुइका याकुब कालाउ योसेफको आमाइ कालाउ मरियम कालाउ सलोमि हिघाहि। 41लाम्फा जेलाउ येसु गालिल जिल्लाको द्यापाहाङ हिगिल्हि कालाउ वासेहेङ सुमि बेबालाइ वाको चात्यागेलाइ भाइपाङ सामाराइहि, वासेहेङ जेदोङ गोइघाहि पुरा पापिघाहि। आरोङ हेन्जाङ बेबालाइ बुङ गालिल जिल्लाता वाको दोफा हिघाहि कालाउ वाको दोफाङ यरुसेलेम सहरता लोका हिघाहि।
येसुहेङ तोम्ता लिका
(मति 27:57-61; लुक 23:50-56; युहा 19:38-42)
42-43योसेफ मिङ हिका एमि द्याङ हिघाहि जाइ आरिमाथिया सहरसो हिघाहि। वा माहा चाउघारा साअ्को एमि मुलि सदस्य हिघाहि कालाउ वा ताइमिङ परमेस्वरको सासनको आस पातेङ हिघाहि। वा बाहादुरिसो पिलातसकोता हानितेङ कालाउ येसुको सिका जिउ ह्रेहि कालाउकि वासेहेङ लिइलि। वा एसा पाहि हाइपालिपानु इङको दिना चाहि तियार पाका दिना हिघाहि कालाउ बेल्हाका हिघाहि। इदोइ यहुदिगेलाइको परमेस्वरको पबित्तरो दिनाको लाङ दिना हिघाहि जेलाउ ओबालाइहेङ सिका जिउ लिइलि मापिका हिघाहि। 44जेलाउ पिलातस दोङ हिङहि कि येसु आन्चाङ सिलि दोअ्का हि, वा भाङ-भाङहि कालाउ वा रोमि कप्तानहेङ हिअ्हि, “हाइ येसु आन्चाङ सिहोइ?” 45कप्तान दोङ जातिङको येसु सिका हि दोअ्तेङ पिलातसहेङ दोअ्हि कालाउ पिलातस योसेफहेङ येसुको सिका जिउ चुम्पुलि आनुमति पिहि। 46जेलाउ योसेफ मेनाङ जाङका जाहाँका धाबा चोल्तेङ चुमाहि, कालाउ येसुको सिका जिउ क्रुससो लेता खुअ्पाहि कालाउ वासेहेङ यहुदि मुन्धुम आन्सार मानचाउलिहोइ सिका जिउहेङ लुन्धाइहि कालाउ येसुको जिउहेङ एनोङ आरडाङता बानाइका उन्ठुइको तोमता ताअ्हि। कालाउ वाको ह्रुता बार्का उन्ठुइ गुम्बाराइतेङ थुम्हि। 47मग्दल देरासो मरियम लोका हिघाहि कालाउ योसेफको आमाइ मरियम येसुहेङ तोमता ताअ्का खाङतेङ हिघाहि।
Currently Selected:
मर्कुस 15: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
