मर्कुस 10
10
खाति पोकाको बारेता
(मति 19:1-9)
1येसु ताइको चात्यागेलाइ दोफा कर्फनहुम सहर लाअ्तेङ यहुदिया जिल्ला पाहासो यर्दन झोराको ओदोइ पार हानिहि। आरोङ बुङ हेन्जाङ द्याङगेलाइको जेर इन्ता जोम्हि कालाउ वा जेलाउ बुङ भाइपा इम्बालाइहेङ सिक्स्या पिलि तेङहि।
2कालाउ फारिसिगेलाइ येसुकोता लोतेङ वासेहेङ जाचिलिको भाअ्सिङ हिअ्हि, “हाइ मोसाको व्यवस्थाता एमि द्याङ ताइको बे हेङ खाति पोलि एल रो?”
3येसु इम्बालाइहेङ हिअ्हि, “मोसा नेलाइहेङ खाति पोकाको बिसोइता हाइ आग्या पाका हि?”
4इम्बालाइ दोअ्हि, “मोसाते एनोङ खाति पोका पात्तारा लेखेतेङ ताइको बे हेङ लाअ्लिको भाअ्सिङ मन्जुरि नामा पाका आनुमति पात्तारा पिलि दोअ्का हिघाहि।”
5येसु इम्बालाइहेङ दोअ्हि, “मोसा दोङ या आनुमति नेलाइको भाअ्सिङ व्यवस्थाको रुपता लेखेपिका हिघाहि। हाइपालिपानु नेलाइको ह्रदय राङका हिघाहि। 6कालाउ बचनता इसिका लेखेका हि, कि जेलाउ परमेस्वर इदोइ सुमिङहेङ सिरजाइहि वा दोङ एमि वाजान कालाउ एमि बेजान बानाइहि। 7ओदोङ भाअ्सिङ वाबाल द्याङ ताइको आबा आमाइहेङ लाअ्तेङ ताइको बे दोफाङ हिखे। 8कालाउ उङको न्हेमि एनोङ दोङ जेनावा ओदोङ भाअ्सिङ एला इम्बालाइ न्हेमि भाइका माको कालाउ एनोङ दोङ द्याङ भाइका दोङ जेनावा। 9ओदोङ भाअ्सिङ जाइहेङ परमेस्वर दोङ बेबाल कालाउ वाबालहेङ एनोङ दोङ बानाइहि, वासेहेङ हासु बुङ लाअ्पालि माएल।”
10जेलाउ आरोङ येसु ताइको चात्यागेलाइ दोफा इङको साअ्ता एकलाङ हिघाहि, इम्बालाइ वाको दोफा याको बिसोइता हिअ्हि। 11येसु इम्बालाइहेङ उत्तारा पिहि, “ताइको बे हेङ लाअ्तेङ भेनेङहेङ बिहु पाका वाबाल द्याङ लाम्फा बे को बिरोधता कासिबिरि पाखे। 12एन्साङ पातेङ ताइको के हेङ लाअ्तेङ भेनेङ दोफा बिहु पाका बेबाल द्याङ बुङ कासिबिरि पाखे।”
जामाललाइहेङ येसुको आसिरबाद
(मति 19:13-15; लुक 18:15-17)
13येसु ताइको खुर ताअ्तेङ आसिस प्याको दोअ्तेङ द्याङगेलाइ ताइको जामाललाइहेङ वाकोता चुमाहि। या तिङतेङ चात्यागेलाइ उङको द्याङगेलाइहेङ चेरहि। 14येसु इसिका तिङतेङ ताइको चात्यागेलाइ दोफा चेर ताम्पातेङ दोअ्हि, उङको जामाललाइहेङ काङको दोफा लोलि पिसु इम्बालाइहेङ मागोराइसु, हाइपालिपानु परमेस्वरको सासन इसकालाइको दोङ हि। 15जातिङ भारि का नेलाइहेङ दोअ्खा, परमेस्वर ताइको सासनता खिनिङ इम्बालाइहेङ सुइकार पावा जाइ दोङ परमेस्वरको सासनहेङ जामाल भाइपा सुइकार पावा। 16कालाउ येसु जामाललाइहेङ ताइको कोल्हेता ताअ्तेङ इम्बालाइ ह्रुता खुर ताअ्तेङ आसिरबाद पिहि।
धनि द्याङ कालाउ स्वर्गको राइजि
(मति 19:16-30; लुक 18:18-30)
17येसु ताइको चात्यागेलाइ दोफा दामाता हानिकाताङ पालाउ एमि द्याङ धाअ्तेङसाङ लोतेङ वाको खोकोइता तिरु थोअ्तेङ हिअ्हि, “ओइ एल्का प्रभु, परमेस्वरसो आनान्त जिबन निङलिको भाअ्सिङ का हाइ काम पालि गोयाङ?”
18येसु वासेहेङ उत्तारा पिहि, “नाअ् हाइ पालि कासेहेङ एल्का हिना दोअ्खेना? एमि परमेस्वर खिनिङ एल्का हि, वा बाहेक हासु बुङ एल्का मान्थु।” 19परमेस्वरको आग्यागेलाइते नेलाइहेङ थाहा दोङ हि, जेसापा: “मारा मापालि, कासिबिरि मापालि, माखुलि, आखेका काथा मादोअ्गिल्लि, माधाताइलि कालाउ ताइको आबा-आमाइको आदार केम्लि।”
20उङको येसुहेङ दोअ्हि, “गुरु, इदोइ गोताङ आग्यागेलाइते का ते धाअ्नासोङ पातेङ लोघा हिघा। इदोइ बाहेक का आरोङ हाइ पालि रो।”
21येसु वासेहेङ मायारु पातेङ खाङहि कालाउ दोअ्हि, “नाअ् एनोङ भेनेङ काम पालि जरुरि हि। हानितेङ ताइको गोताङ धन-सम्पति पिइतेङ ताका गरिबगेलाइहेङ पि। परिनाम स्वरुप नाङको भाअ्सिङ स्वर्गता धन ह्यवा। लौउ कालाउ काङको चात्या जेङ।”
22इदोइ काथा हिङतेङसाङ उङको द्याङ ह्राइ दाअ्पाहि कालाउ ओसारापाङ बार्का पिर पातेङ हानिहि हाइपालिपानु वाको दोफा इस्तु धन-सम्पति हिघाहि।
23येसु कोरपाहाङ खाङतेङ चात्यागेलाइहेङ दोअ्हि, “धनि द्याङहेङ परमेस्वरको सासनता दुल्लि हेन्जा मुसकिल हि!”
24येसुको काथा हिङतेङ चात्यागेलाइ आवाइतुहि। कालाउ येसु आरोङ दोअ्हि, “ओइ काङको मायारु ओने या, धनि द्याङहेङ परमेस्वरको सासनता दुल्लि हेन्जा मुसकिल हि!” 25एनोङ उटहेङ बिन्दुको कानासो दुल्लि मुसकिल माजेङखे भरु, “एमि धनि द्याङहेङ परमेस्वरको सासनता दुल्लि हेन्जा मुसकिल हि!”
26इदोइ चात्यागेलाइ मेनाङ आवाइतुहि एमिसो भेनेङहेङ दोअ्हि, “आरोङ हासुहेङ बुङ परमेस्वरको सासनता दुल्लिको भाअ्सिङ बान्चिपालि हेसा सम्भब हि?”
27येसु इम्बालाइहेङ खाङतेङ दोअ्हि, इदोइ द्याङगेलाइको भाअ्सिङ आसम्भब काम हि, कालाउ परमेस्वरको भाअ्सिङ आसम्भब मान्थु, हाइपालिपानु परमेस्वरको भाअ्सिङ गोताङ काम सम्भब हि।
28कालाउ पतरुस दोअ्हि, “केलाइको भाअ्सिङ हाइ हि? केलाइ नाङको चात्या जेङलिको भाअ्सिङ गोताङ काथा लाअ्न्हाहि।”
29-30येसु दोअ्हि, “का नेलाइहेङ जातिङ भारि दोअ्खा जाइ काङको चात्या जेङलिको भाअ्सिङ कालाउ सुसमाचारको भाअ्सिङ ताइको साअ्, दादा-ओने बाइ-ओने, आमाइ आबा, चान-चामिन्दि कालाउ मिलिङगेलाइ लाअ्खे, वा इदोइ दोङ युगता जातिङको ओदोङ आमेने हेन्जाङ गुना घुरिपापियावा। इदोइ सुमिङता साताइन्हालाउ बुङ लोका युगता आनान्त जिबन निनावा।” 31कालाउ हेन्जा लाम्फा जाइ हिघाहि, इङको सोमोइता न्हु जेनावा, कालाउ हेन्जाङ झना जाइ एला न्हुतावा, इङको सोमोइता लाङ जेनावा।
येसु ताइको सिकाको बारेता भविस्यबानि
(मति 20:17-19; लुक 18:31-33)
32येसु कालाउ वाको चात्यागेलाइ यरुसेलेम सहर हानिदोङघाहि, कालाउ येसु बुङ चात्यागेलाइको लाङ-लाङ तेअ्काताङ हानिघाहि। चात्यागेलाइ मेनाङ आवाइतुतेङ हिघाहि, हाइपालिपानु आरोङ न्हु-न्हु लोकालाइ थितेङ हिघाहि। जेता कि यरुसेलेम सहरता वाको दोफा हाइ जेनाङ, एखे आरोङ येसु ताइको तेन्हे चात्यागेलाइहेङ एपाहा काइतेङ ताइमि दोफा जेङलि खाङका काथाको बारेता दोअ्हि। 33“हिङसु, केलाइ यरुसेलेम सहर भारि हानिन्हाखे। वा दोअ्हि इन्ता थुकातेङ का द्याङको चानहेङ मुलि पुजारिगेलाइ कालाउ व्यवस्था धिरपाका द्याङगेलाइको खुरता रिम्पातेङ सुम्पि प्यावा। इम्बालाइ कासेहेङ सेअ्लि गोयाङ दोअ्तेङ गैर-यहुदिगेलाइको जिम्माता चुम्पु प्यावा। 34ओबालाइ कासेहेङ खुजालाइयावा, थोअ्तावा द्वालिहोइ म्हेतावा कालाउ सेअ्तावा कालाउ आरोङ का सुम्निता सिकासो सिन्हुतेङ ल्होकाङका।”
याकुब कालाउ युहान्नाको बिन्ति पाका
(मति 20:20-28)
35कालाउ न्हुसो जब्दियाको न्हेमि चान याकुब कालाउ युहान्ना येसुकोता लोतेङ वासेहेङ दोअ्हि, “गुरु ज्यु, केलाइको मनको इच्छा पुरा पापि दोअ्तेङ केलाइ बिन्ति चाढाइलि लोका हिनाहि।”
36येसु इम्बालाइहेङ दोअ्हि, “नेलाइ दोअ्सु हाइ भोसुखेना कि का नेलाइको भाअ्सिङ हाइ पाअ्पिलि?”
37इम्बालाइ जोबाफ पिहि, “जेलाउ नादोङ महिमाता सासन पालि सुरु पाना, कालाउ नेउ केलाइहेङ नाङको दोफा हिलि आनुमति पि। एमिहेङ नाङको दाम्पाहा कालाउ भेनेङहेङ केपाहा।”
38येसु इम्बालाइहेङ दोअ्हि, नेलाइ जेदोङ ह्रेसुखेना इङको नेलाइ मागिसुखेना। “हाइ नेलाइ इङको दुख ल्होपालि दोस्वाना #10:38 दुखको जाम बाति जेदोङ का ल्होपालि हानिखा? हाइ नेलाइ सेअ्न्हालि तियार हिसुना#10:38 दुखको बप्तिस्ता जेसापा का सेअ्न्हाङका?”
39इम्बालाइ जोबाफ पिहि, “एइ केलाइ पालि द्वाङ।” कालाउ येसु इम्बालाइहेङ दोअ्हि, नेलाइ बुङ दुख ल्होपास्वाना जेसाङ का दुख ल्होपाङका नेलाइ सेअ्न्हास्वाना जेसाङ का बुङ सेअ्न्हाङका। 40कालाउ कासेहेङ इदोइ काम पालि खाबारा मान्थु कि हासु काङको दाम्पाहा कालाउ केपाहा कालाउ हासु इङको सम्मानको थामे निनावा। परमेस्वर ताइमिङ इङको थामेगेलाइ तियार पाका हि। जाइहेङ वा दोङ साल्का हि वासेहेङ प्यावा।
41या काथा हिङतेङ आरोङ तेमि चात्यागेलाइ याकुब कालाउ युहान्ना दोफा चेर ताम्पाहि। 42कालाउ येसु इम्बालाइ झाराङहेङ एनोङ थामेता काइतेङ दोअ्हि, “नेलाइहेङ थाहा हि, कि जाइ इदोइ सुमिङता सासन पालि गिखे, ओबालाइ ताइको खाबाराको प्रयोग ताइको खाबाराता हिकागेलाइ ह्रुता चालाइखे। वाको आगुवागेलाइहेङ ताइको दोअ्का काथा साअ्पालिको भाअ्सिङ इम्बालाइको ह्रुता ताइको खाबारा प्रयोग पाखे। 43-44कालाउ नेलाइता चाहि इसिका हिलि माएल, कालाउ जाइ नेलाइ मध्येसो बार्का जेङलि खाङकालाइ झाराङको चाकारिया जेङनाङ सेवा पालि गोइखे। 45का इसिका ओदोङ भाअ्सिङ दोअ्तेङ हिघा, हाइपालिपानु का द्याङको चान, बोगेलाइको सेवा पालि इदोइ सुमिङता लोघा। कालाउ का एसापा लोका माको कि बोगेलाइ दोङ काङको सेवा पाको। का हेन्जाङ झनाहेङ आरु द्याङगेलाउको पापसो लाअ्पालिको भाअ्सिङ ताइको जिउ पिलि लोका हिघा।”
कान्हाँ बारतिमोइ
(मति 20:29-34; लुक 18:35-43)
46यरुसेलेम सहरसो हानिकाताङ पालाउ येसु कालाउ वाको चात्यागेलाइ यरिहो सहरता थुकालि लोहि। जेलाउ येसु कालाउ वाको चात्यागेलाइ आरोङ हेन्जाङ द्याङगेलाइको जेर इङको सहरहेङ लाअ्तेङ हानिघाहि, दामाको काम्भेता बारतिमोइ दोअ्का एमि कान्हाँ भिखारि योम्तेङ हिघाहि। उङको तिमोइको चान हिघाहि। 47जेलाउ वा हिङहि कि येसु जेदोङ नासरत सहरको हिघाहि, इङको दामा पाहासो हानिदोङघाहि, वा दोङ ह्रिकाइतेङ दोअ्हि, “हे येसु, राजा दाउदको हारागुटिया, का ह्रुता दाया पापि।”
48हेन्जाङ झना वासेहेङ चेरहि कालाउ वासेहेङ दोअ्हि सिकापा हि। कालाउ वा झन ह्रिकाइतेङ-ह्रिकाइतेङ दोअ्लि तेङहि, “हे येसु राजा दाउदको चान, नाअ् का ह्रुता दाया पाअ्।”
49जेलाउ येसु वाको नुइ धुइका हिङहि, वा लोतेङ वाको दोफा जाअ्का द्याङगेलाइहेङ दोअ्हि, वासेहेङ इता काइसु, ओबालाइ उङको कान्हाँ द्याङहेङ काइतेङ दोअ्हि, “नाअ् खुसि जेङ, वा दोङ नासेहेङ काइतेङ हि, धेमाङ लौउ!” 50कालाउ कान्हाँ द्याङ ताइको धाबा थाल्तेङ मा-मारफा ल्होहि कालाउ येसुकोता लोहि।
51येसु वासेहेङ हिअ्हि, “नाङको भाअ्सिङ का हाइ पालि?” “प्रभु का मिसियाँ तिङलि द्वाको!” कान्हाँ बिन्ति पाहि।
52येसु वासेहेङ दोअ्हि, सिता हाने का नासेहेङ एल्पाघा हाइपालिपानु नाअ् का ह्रुता खाङधुरि पाखेना। एन्सालाउसो दोङ वा मिसियाँ तिङलि दोका जेङहि कालाउ आरोङ द्याङगेलाइ दोफा मिलितेङ येसुको लेसारा पिताइपुहि।
Currently Selected:
मर्कुस 10: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
