मर्कुस 1
1
बप्तिस्ता पिका युहान्नाको सुसमाचार
(मति 3:1-12; लुक 3:1-18; युहा 1:19-28)
1परमेस्वरको चान येसु ख्रिस्टको बारेता एसापा सुसमाचारको सुरु जेङहि। 2यासाइया परमेस्वरको बक्ता लेखेका कितापता परमेस्वर ताइको चान येसुहेङ दोअ्हि,
“खाङसु, का काङको बानाल चुम्पुका
नाङको लाङ-लाङ दिङगिल्लाङका,
जाइ नाङको दामा तियार पावा।
3हिङसु, चाका-मान्दा थामेता बानाल चुम्पुका को
ह्रिकाइका गाला ओल्लेयावा,
प्रभु लोलिको भाअ्सिङ दामा तियार पासु,
कालाउ इङको दामा सोझाका बानाइसु जेतासो वा ल्वावा।”
4वा दोङ बानाल चुम्पुका बप्तिस्ता पिका युहान्ना हिघाहि, चाका-मान्दा थामेता हानिहि कालाउ वा दोअ्हि, “पाप पालि लाअ्सु बप्तिस्ता ह्रुसु कालाउकि परमेस्वर नाङको पाप स्यामा पाप्याको।” 5हेन्जाङ जोसो यरुसेलेम सहरको कालाउ यहुदिया जिल्लाको द्याङगेलाइ युहान्नाको प्रचार हिङलि चाका-मान्दा थामेता लोहि। जेलाउ ओबालाइ ता-ताइको पाप पालि लाअ्हि, कालाउ युहान्ना इम्बालाइहेङ यर्दन झोराता बप्तिस्ता पिहि। 6युहान्ना उटको मुइसासो थिर्का आदेरमादेरका धाबा होङघाहि, केङखेनेता धालेको तेपाना तेघाहि, कालाउ झारभारिको जिराम बाय्हाँको दिमाइगेलाइ चाघाहि। 7कालाउ वा इसिका दोअ्काताङ सिक्स्या पिहि, “का न्हुसो जाइ एमि ल्वाङ, वा का खान्तेङ हेन्जा माहान हि, कालाउ का वाको खोकोइको जुत्ताको तुना बुङ तुघुरतेङ खाइलि थेकापा सोबाइका मान्थुघा। 8कालाउ नेलाइहेङ का चिको बप्तिस्ता पिका हिघा, एला वा नेलाइहेङ पबित्तरो आत्माको बप्तिस्ता प्यावा।”
येसुको बप्तिस्ता कालाउ जाच
(मति 3:13-17; 4:1-11; लुक 3:21-22; 4:1-13)
9इङको बेलाता येसु गालिल जिल्लाको नासरत देरा पाहासो लोहि। कालाउ यर्दन झोराता युहान्ना बप्तिस्ता पिघाहि कालाउ येसु बुङ युहान्नासो बप्तिस्ता ह्रुहि। 10येसु चिसो ओल्लेतेसाङ आकास फाङगिल्का तिङहि कालाउ ताइ ह्रुता पबित्तरो आत्माहेङ कुर्जा भाइपा खुअ्काताङ पाका तिङहि। 11कालाउ स्वर्गसो परमेस्वरको इसिका एनोङ गाला ओल्लेहि, नाअ् काङको आनाउ सोना तुमलिताको चान, नाअ् दोफा का लेङचाका हिघा।
12येसु बप्तिस्ता ह्रुनासात पबित्तरो आत्मा एन्सालाउ दोङ वासेहेङ चाका-मान्दा थामेता चुम्पुहि। 13साइतानसो जाचितेङ वा न्हे कुरि दिना थेकापा चाका-मान्दा थामेता जिहाँ-जुइलेङ कालाउ गुपुस दोफा हिघाहि, वासेहेङ स्वर्गदुतगेलाइ दोङ इन्ता हिपा भरि सेवा पाहि।
चात्यागेलाइहेङ काइका
(मति 4:18-22; लुक 5:1-11; युहा 1:35-42)
14आले सोमोइ न्हुसो, जेलाउ राजा हेरोद युहान्नाहेङ झ्यालखानाता ह्वालि दोतेङ कालाउ परमेस्वरको सुसमाचार पालि येसु गालिल जिल्लाता हानिहि। 15येसु दोअ्हि, “ठिक बेला लोका हि, परमेस्वरको सासन चेम्ताङ हि। पाप पालि लाअ्सु परमेस्वर भारि घुरिसु कालाउ सुसमाचारता खाङधुरि पासु।”
16एनि येसु गालिल समुन्द्रको आलि-आलि हानिकाताङ पालाउ वा सिमोन कालाउ वाको ओने आन्द्रियासहेङ समुन्द्रता जाले आकाताङ पाका तिङहि। हाइपालिपानु इम्बालाइ हाया माङकालाइ हिघाहि। 17येसु इम्बालाइहेङ दोअ्हि, का दोफा लोसु कालाउ काङको चात्या जेङसु का नेलाइहेङ धिरपाङका कि हेसा द्याङगेलाइहेङ कासेहेङ खाङधुरि पाका बानाइलि। 18सिमोन कालाउ आन्द्रिरियास एन्सालाउ दोङ ताइको जाले लाअ्तेङ येसुको चात्यागेलाइ जेङलि येसु दोफा हानिहि।
19कालाउ आसा फारापा थुकातेङ जब्दियाको न्हेमि चान याकुब कालाउ युहान्नाहेङ नाउ ह्रुता योम्तेङ आउलिका जाले लाअ्पाकाताङ पाका येसु तिङहि। 20येसु इम्बालाइहेङ एन्सालाउ दोङ काइहि, कालाउ उङको न्हेमिहेङ दोअ्हि का दोफा लोसु कालाउ काङको चात्या जेङसु, कालाउ इम्बालाइ ताइको आबा जब्दियाहेङ काम पाकालाइ दोफा नाउता सिधितेङ वा दोफा हानिलि तेङहि।
भुत-आत्मा हिका द्याङ
(लुक 4:31-37)
21येसु कालाउ वाको चात्यागेलाइ कर्फनहुम सहरता हानिहि, एन्सालाउ परमेस्वरको पबित्तरो दिनाको सोमोइ जेङनाङ यहुदिगेलाइको चाउघारा साअ्ता हानितेङ सिक्स्या पिलि तेङहि। 22कालाउ द्याङगेलाइ वाको धिरपाकाता भाङ-भाङहि। हाइपालिपानु येसु इम्बालाइहेङ मोसाको व्यवस्था धिरपाका द्याङगेलाइ भाइपा माको, वाते इसिका सिक्सक हि कि वाको खाबाराता धिरपाघाहि। 23जेलाउ येसु यहुदिगेलाइको चाउघारा साअ्ता सिक्स्या धिरपाघाहि, ओदोङ बेला एमि भुत-आत्माहोइ साताइन्हाका द्याङ इन्ता हिघाहि, 24उङको एसा दोअ्काताङ ह्रिकाइघाहि, “हे नासरत देराको येसु, केलाइहेङ नाअ् दोफा हाइ सोरोकार हि? नाअ् हाइ पालि केलाइहेङ नासा पालि लोन्हा? का नासेहेङ नाल्खा, नाअ् परमेस्वरको जन हिना।”
25कालाउ येसु भुत-आत्माहेङ चेरहि, “सिकापा हि, कालाउ उङको द्याङसो ओल्लेतेङ हाने।” 26कालाउ उङको द्याङहेङ फेतेङ इङको भुत-आत्मा बार्का गालाहोइ ह्रिकाइतेङ उङको द्याङसो ओल्लेतेङ हानिहि।
27कालाउ झाराङ द्याङगेलाइ इन्ता हिघाहि जाइ इन्ता हिघाहि ओबालाइ भारभुसाइहि। इसिका दोअ्काताङ ता-ताइमिता हिअ्लि तेङहि, इदोइ हाइ? “इदोइ हिदोइ बुङ नावा खाल्को खाबाराको सिक्स्या हिलि गोयाङ! याते खाबारासोङ हुकुम पाखे, कालाउ भुत-आत्मागेलाइ बुङ वाको काथा साअ्खे।” 28कालाउ येसुको मिङ गालिल जिल्लाको हेन्जा जोसो गोताङ थामे भारि नावाइ चार-चाराइहि।
हेन्जाङ द्याङगेलाइ एल्हि
(मति 8:14-17; लुक 4:38-41)
29जेलाउ येसु यहुदिगेलाइको चाउघारा साअ्सो ओल्लेतेसाङ वाको चात्या सिमोन कालाउ आन्द्रियासको साअ्ता हानिहि, इन्ता याकुब कालाउ युहान्ना बुङ वाको दोफा हिघाहि। 30इङको सोमोइता सिमोनको जुबे मिसासो ल्होलि दोका मान्थुघाहि। जेलाउ वाको साअ्ता येसु लोहि येसुहेङ वाको मिसा लोका हि दोअ्तेङ एन्सालाउ दोङ हिङपाहि। 31येसु वाको भेरपाङ हानितेङ वाको खुर चातेङ ल्होपाहि। एन्सालाउ दोङ वा मिसासो एल्हि, कालाउ वा इम्बालाइहेङ साम्हेर्लि तेङहि।
32जेलाउ इङको बेल्हाका पहर यहुदिगेलाइ परमेस्वरको पबित्तरो दिना दोतेङ द्याङगेलाइ येसुकोता मासाधेकालाइ, भुत-आत्मा धेल्कालाइ गोताङहेङ चुमाहि। 33हेन्जा जोसो सहरको द्याङगेलाइ सिमोन कालाउ एन्द्रियासको साअ्को सालेङता जोम्का हिघाहि। 34येसु हेन्जा उल्लि-दुल्लिको मासाधेका मिसागेलाइहेङ एल्पाहि। कालाउ हेन्जा भुत-आत्मागेलाइहेङ ओल्लापापिहि हाइपालिपानु भुत-आत्मा गिघाखे कि वा परमेस्वरको चान हिघाहि, वा दोङ भुत-आत्मागेलाइहेङ नुइ धुइलि मापिहि।
चाका-मान्दा थामेता येसुको प्रार्थाना
(लुक 4:42-44)
35ह्रिमा झेङलि खान्तेङ लाम्फा वा चाका-मान्दा थामेता हानिहि, कालाउकि वा एक्लाङ हितेङ कालाउ प्रार्थाना पालि द्वावाको। 36जेलाउ सिमोन कालाउ वाको सानाइतिगेलाइ या थाहा गिहि कि कालाउ ओबालाइ येसुहेङ भोकाताङ हानिहि। 37जेलाउ इम्बालाइ वासेहेङ दुसुहि, इम्बालाइ दोअ्हि, “हेन्जा जोसो कर्फनहुम सहरको द्याङगेलाइ नासेहेङ भोदोङखे।”
38कालाउ येसु इम्बालाइहेङ दोअ्हि, “लोसु, केलाइ भेरपाङको देरा भारि हानाइने, हाइपालिपानु का इदोइ उदेस्यहोइ सुमिङता द्याङगेलाइहेङ परमेस्वरको बचन सुसमाचार पालि लोका हिघा।” 39जेलाउ येसु कालाउ वाको चात्यागेलाइ गालिल जिल्लाको हेन्जा जोसो थामेगेलाइता, यहुदिगेलाइको चाउघारा साअ्ता सुसमाचार पाकाताङ भुत-आत्मागेलाइहेङ ओल्लेपापितेङ हिगिल्हि।
दुन्दिया रोग्याहेङ एल्पाका
(मति 8:1-4; लुक 5:12-16)
40एनि एमि दुन्दिया रोग्या खोअ्का द्याङ येसुकोता लोतेङ, तुघुरतेङ दोअ्हि, जेसापा नाअ् मन पानु कासेहेङ एल्पालि द्वाना,
41“इदोइ हिङतेङ येसुको ह्रदय दायाहोइ पोङघाहि, कालाउ वाको ह्रुता खुर ताअ्तेङ दोअ्हि का मन पाखा नाअ् एल।” 42कालाउ ओदोङ घुरि वाको रोग्या खोअ्का एल्हि कालाउ सुद्द जेङहि।
43एल्लि दोतेङसाङ बिदा पितेङ येसु वासेहेङ थाङका आग्या पितेङ दिङगिल्हि। 44“हासुहेङ बुङ माअ्दो, हाने मुलि यहुदि पुजारिकोता तिङपा कालाउ मोसाको आग्या आन्सार पाका भेति चढाइ, कालाउ द्याङगेलाइहेङ प्रमानित ज्याको।” 45ओदोङ भाअ्सिङ उङको द्याङ हानितेङ ताइमि एल्का द्यायापाहाङ हिङपाहि, ओदोङ भाअ्सिङ येसु हिदोइ बुङ सहरता भाइ-भाइ पाअ् हिगिल्लि मादोअ्लि तेङहि, एन्सानाङ येसु एकोन्हा थामेगेलाइता हिलि हानिहि। कालाउ बुङ इन्ता कोर्पाहाङसो द्याङगेलाइ वाकोता लोलि तेङहि।
Currently Selected:
मर्कुस 1: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
