मति 17
17
येसुको जिउ भाङगाइन्हाहि
(मर्कु 9:2-13; लुक 9:28-36)
1आथार दिना न्हुसो येसु दोङ पतरुस, याकुब कालाउ वाको ओने युहान्नाहेङ ताइ दोफा चुम्पुतेङ एनोङ झाउका तिकारता हानिहि। 2इम्बालाइको मिसियाँ आगाता, येसुको जिउ भाङगाइन्हाहि कालाउ वाको ह्राइ सान्हे भाइपाङ चिल्का हि कालाउ वाको धाबा प्रकास भाइका फाइसालामका जे:का जेङहि। 3ओदोङ बेला उङको न्हेमि परमेस्वरको बक्ता मोसा कालाउ एलिया देखाल जेङल्हाहि कालाउ येसु दोफा काथा पालि तेङहि।
4इसिका तिङतेङ पतरुस येसुहेङ दोअ्हि, गुरु ज्यु, इदोइ केलाइ इता हिका एल्काङ जेङहि। जेसापा नाअ् मन पानु का इता सुमलोङ खोपारा धामाङका, एनोङ नाङको भाअ्सिङ, भेनेङ मोसाको भाअ्सिङ कालाउ एनोङ चाहि एलियाको भाअ्सिङ।
5जेलाउ पतरुस काथा पाकाताङ हिघाहि, एन्सालाउ दोङ ह्रिवापा एनोङ फाइसालामका बादेलहोइ इम्बालाइहेङ थुम्हि। बादेल लितासो परमेस्वर नुइ धुइलि तेङहि, “वा काङको मायारु चान, वा दोफा का लेङचाका हिघा वाको दोअ्का काथाता मन पिसु।”
6चात्यागेलाइ इङको गाला हिङहि। इम्बालाइ मेनाङ थिहि, कालाउ ओबालाइ पोम्भेलेहि। 7येसु ताइ चात्यागेलाइ दोफा लोहि, कालाउ ओबालाइहेङ साइहि कालाउ वा दोअ्हि, ल्होसु नेलाइ थिलि मागोइस्वाना। 8चात्यागेलाइ झेल्मापा खाङहि, “हासुहेङ बुङ मातिङहि इन्ता येसु खिनिङ हिघाहि।”
9येसु कालाउ वाको सुमि चात्यागेलाइ तिकारसो लेता खुअ्दोङधाखे वा चात्यागेलाइहेङ आग्या पिहि, नेलाइ तिङका काथा हासुहेङ बुङ माअ्दोसु का द्याङको चान सिकासो सिन्हुतेङ माल्होपा धाउ कालाउ न्हुसो खिनिङ नेलाइ तिङका काथागेलाइ द्याङगेलाइहेङ दोअ्सु। 10कालाउ चात्यागेलाइ येसुहेङ हिअ्हि, “हाइपालिपानु व्यवस्था धिरपाका द्याङगेलाइ ख्रिस्ट लोका खान्तेङ लाम्फा एलिया लोलि गोयाङ दोअ्खे?”
11कालाउ येसु दोअ्हि, “जातिङ भारि या सत्ये हि, कि एलिया लोदोङखे दोअ्तेङ ओबालाइ थिकोङ दोअ्का हि। कालाउ या जातिङ भारि एलिया दोङ ल्वाङ कालाउ गोताङ काथा ठिकसो आरोङ ब्यबस्था पाङ। 12का नेलाइहेङ दोअ्खा, एलिया लाम्फाङ लोलि दोहोइ, कालाउ बुङ इम्बालाइ वासेहेङ मानाल्खे, वासेहेङ ओबालाइ जेदोङ पालि खाङघाखे एन्साङ पाहि। एन्साङ का द्याङको चानहेङ बुङ ओबालाइको खुरसो दान्हाइ निन्चापावा।” 13कालाउ खिनिङ चात्यागेलाइ इम्बालाइहेङ बप्तिस्ता पिका युहान्नाको बिसोइता दोअ्का काथा बुझिहि।
भुत धेल्का वाजान
(मर्कु 9:14-29; लुक 9:37-43)
14कालाउ येसु कालाउ वाको चात्यागेलाइ द्याङगेलाइको हुदा हिका भारि लोहि कालाउ एमि द्याङ एसा दोअ्काताङ येसुको आगाता तिह्रु थोतेङ दोअ्हि, 15“प्रभु, काङको चानहेङ दाया पापि, वा झाका लोङका बेथा खोअ्का हि। इदोइ बेथासो वा हेन्जा दुख निङका हि। वा घुरिघुरि मेता कालाउ चिता लोङखे। 16का काङको चानहेङ नाङको चात्यागेलाइकोता चुमाघा, कालाउ ओबालाइ वासेहेङ एल्पालि मादोअ्हि।”
17येसु इम्बालाइहेङ दोअ्हि, “ओइ खाङधुरि मापाका कालाउ भ्रस्ट हारागुटियागेलाइ, का नेलाइ दोफा हेथे सोमोइ थेकापा हिलि? का एला नेलाइहेङ हेथे थेकापा सहितेङ हिलि? उङको वाजानहेङ काङकोता चुमासु।” 18येसु उङको वाजान लिता हिका भुत-आत्माहेङ चेरहि कालाउ भुत-आत्मा बाहार ओल्लेहि, कालाउ एन्सालाउसो दोङ उङको वाजान एल्हि।
19कालाउ चात्यागेलाइ ए-कुन्हाता लोतेङ येसुहेङ दोअ्हि, “केलाइ उङको भुत-आत्माहेङ हाइ पालि ओल्लेपालि मादोन्हाहि?”
20येसु जोबाफ पिहि, नेलाइ भुत ओल्लेपालि मादोअ्सुना, हाइपालिपानु नेलाइकोता खाङधुरि एकदम आतुइसा हि। का नेलाइहेङ जातिङको दोअ्खा। जेसापा नेलाइको खाङधुरि पासाइको चालाइ झोको खिनिङ हिलाउबुङते इङको तिकारहेङ इतासो हाने दोअ्तेङ नेलाइ इङकोहेङ दोअ्लि दोसुधाना। कालाउ इङको इन्तासो हानिधावा। नेलाइको भाअ्सिङ या गोताङ काथा सम्भब हिघाहि। 21कालाउ बुङ इसिका भाइका प्रार्थाना पालाउ चाहि भुत-आत्मा कालाउ उपबाससो माकोसिङ माओल्यावा।
येसु ताइको सिकाको बारे न्हेतेङ आगमबानि
(मर्कु 9:30-32; लुक 9:43-45)
22कालाउ न्हुसो, “चात्यागेलाइ गालिल जिल्लाता जोम्हि। येसु इम्बालाइहेङ दोअ्हि, का द्याङको चानहेङ द्याङगेलाइको काबुता ताअ्तावा। 23कालाउ इम्बालाइ कासेहेङ सेअ्तावा कालाउ सुम्निता सिकासो सिन्हुतेङ ल्होकाङका। या हिङतेङ चात्यागेलाइ हेन्जा दुखि जेङहि।
मुन्दिरको पोत ल्होपाका
24येसु चात्यागेलाइहेङ चुम्पुतेङ कर्फनहुम सहरता हानिहि आधिमि द्याङ पतरुसकोता लोहि, इदोइ द्याङगेलाइ न्हे पल्ति मुन्दिरता पोत ल्होपाकालाइ हिघाहि। ओबालाइ पतरुसहेङ हिअ्हि, हाइ नेलाइको गुरु पोत मातिरेखे?”
25पतरुस जोबाफ पिहि, एइ येसु इङको पोतगेलाइ तिरेखे। “कालाउ पतरुस येसु हिका साअ्ता हानिहि। पतरुस नुइ धुइलि खाङलाउ लाम्फाङ येसु दोअ्हि, ओइ सिमोन इदोइ नाअ् हाइ बिचार पाखेना? सुमिङता राजा द्याङगेलाइ पाहासो खालखालको पोतगेलाइ निङखे। कालाउ पोत तिरिका द्याङगेलाइ चाहि हासु? हाइ इम्बालाइ राजाको साअ्को चानगेलाइसो ना इङको भेनेङ बो द्याङगेलाइसो?”
26पतरुस जोबाफ पिहि, भेनेङ द्याङगेलाइ पोत तिरेखे। येसु दोअ्हि एन्सा पानु राजाको ताइको जाहान पोत तिरिलि मागोइखे। 27कालाउ बुङ केलाइ उङको द्याङगेलाइहेङ थेस माप्याइने, नाअ् पोखरिता हाने कालाउ जाअ्ले आअ्। नाअ् लाम्फा रिम्का हाया चुमा, वाको नुइ आअ् कालाउ एनोङ चान्दिको थुरि निनाना। इङको थुरि पोत ल्होपाकालाइता चुम्पुतेङ किधिन्हेमिको पोत बुझाइ।
Currently Selected:
मति 17: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
