मति 12
12
परमेस्वर पबित्तरो दिनाको प्रभु
(मर्कु 2:23-28; 3:1-6; लुक 6:1-11)
1इङको बेला येसु परमेस्वरको पबित्तरो दिनाता मिलिङ भारिसो हानिघाखे, वाको चात्यागेलाइ म्हितुतेङ हिघाहि कालाउ मिङका सिसा पेतेङ चालि तेङहि। 2कालाउ फारिसिगेलाइ इङको तिङतेङ येसुहेङ दोअ्हि, “खाङ, नाङको चात्यागेलाइ परमेस्वरको पबित्तरो दिनाता मिङका सिसा चादोङखे। जेदोङ चाहि व्यवस्थाको बिरोध हि।”
3येसु इम्बालाइहेङ दोअ्हि, जेलाउ राजा दाउद कालाउ वाको दोफा हिकालाइ चाका-आम्का मान्थुतेङ लालाइ गिल्का हिघाहि। कालाउ म्हितुपाङ हिलाउ राजा दाउद हाइ पाका हिघाहि? नेलाइ हेलाउ पढेका मान्थु सुन्हा? 4हेसा पातेङ राजा दाउद परमेस्वरको मुन्दिरको साअ् लिता दुल्हि, कालाउ परमेस्वरहेङ चाढाइका तोले चाहि। कालाउ ताइको सानाइतिगेलाइहेङ बुङ पिहि, इङको तोले चाहि मोसाको व्यवस्था आन्सार झाराङ खान्तेङ बारका पुजारिहेङ खिनिङ तोले चालि खाबारा हिघाहि। 5हाइ मोसाको व्यवस्थाता लेखेका पढेका मान्थु घासुखेना, कि मुन्दिरता पुजारिगेलाइ परमेस्वरको पबित्तरो दिनाता जेलाउ बुङ काम पाखे। एसापा इम्बालाइ परमेस्वरको पबित्तरो दिनाको आग्या माकिखे! कालाउ बुङ इम्बालाइ दुसिका मामानिखे। 6कालाउ का नेलाइहेङ दोअ्खा, मुन्दिर खान्तेङ बुङ बार्का एमि हि। 7का गुपुसको बलि माको, कालाउ का चाहिखा, कि नेलाइ बोगेलाइको पाका दाया परमेस्वर दोङ दोअ्का काथा नेलाइ बुझिकानु काङको निरदुसि चात्यागेलाइहेङ मादुसिधाना। 8हाइपालिपानु का द्याङको चान परमेस्वरको पबित्तरो दिनाको प्रभु।
9येसु इङको थामे लाअ्तेङ, यहुदिगेलाइको चाउघारा साअ्ता हानिहि। 10इन्ता एमि खुर सेङका द्याङ हिघाखे। इम्बालाइ येसुहेङ दुसिलि दाउ भोघाहि, ओदोङ भाअ्सिङ वासेहेङ हिअ्हि, “हाइ परमेस्वरको पबित्तरो दिनाता हासुहेङ बुङ एल्पालि ठिक हि?”
11येसु इम्बालाइहेङ जोबाफ पिहि, नेलाइकोसो एमिको एनोङ भेडा हिनु, कालाउ परमेस्वरको पबित्तरो दिनाता इङको वाङखाराका खाराता वाल्लानु, हाइ वा इङकोहेङ बाहार माओल्लेपावा रो? 12एमि द्याङ भेडा खान्तेङ हेन्जा दामको हिखे, ओदोङ भाअ्सिङ परमेस्वरको पबित्तरो दिनाता मोसाको व्यवस्था आन्सार रेम्का काम पालि ठिक थोहोरिखे।
13कालाउ येसु उङको द्याङहेङ दोअ्हि, नाङको खुर फेनापा। वा ताइको खुर फेनापाहि, कालाउ इङको खुर भेनेङपाहाको खुर भाइपाङ एल्का जेङहि। 14कालाउ फारिसिगेलाइ यहुदि चाउघारा साअ्सो बाहार हानेतेङ येसुहेङ हेसा पातेङ सेअ्लि द्वाङ वाला दोअ्तेङ वाको बिरोधता ल्होहि।
परमेस्वरसो छाल्का सेवक
15इङको काथा गितेङ येसु इन्तासो हानिहि, कालाउ हेन्जाङ द्याङ वाको लेसारा पिताइहि, कालाउ वा इम्बालाइ झाराङहेङ एल्पाहि। 16हिदोइ बुङ द्याङ वा हासु दोअ्तेङ हिअ्लाउ बुङ मादोअ्पिसु दोअ्तेङ इम्बालाइहेङ थाङका आग्या पितेङ थिपाहि। 17यासाइया परमेस्वरको बक्तासो दोअ्का, काथा पुरा जेनाको दोअ्तेङ एसा जेङहि।
18काङको बान्धाइति का वासेहेङ छाल्का हिघा:
काङको मायारु चान का वाकोसो हाउसाइघा,
का काङको आत्मा वाकोता ताअ्पियाङका,
कालाउ वा गोताङ गैर-यहुदिगेलाइहेङ
न्यायको प्राचार पाङ।
19वा ना ते चेरस्वावा,
ना ते ह्रिकाइतेङ जोगेरियावा,
ना ते वा दामागेलाइता बारका गालाहोइ
द्याङगेलाइहेङ भासनदोङ पावा।
20वा हासुको बुङ हान्ति मापाङ
जाइ एनोङ ताइमिङ थुरका निगालो भाइका हि,
हासुहेङ बुङ समस्या हि पानु
वा चिपा-चिपापा जोल्का गेसा भाइका हि,
वा दोङ इङको गेसाहेङ मासेताङ।
वा दोङ न्यायहेङ जितिलि माप्याङ।
21कालाउ वाको ह्रुता गोताङ गैर-यहुदिगेलाइ खाङधुरि पावा।
येसु कालाउ साइतान
(मर्कु 3:20-30; लुक 6:43-45; 11:14-23)
22भुत-आत्मा धेल्का एमि कान्हाँ कालाउ लाता द्याङहेङ येसुकोता चुमाहि। येसु वासेहेङ एल्पाहि, उङको नुइ धुइलि कालाउ तिङलि तेङहि। 23कालाउ झाराङ जेरगेलाइ भाङ-भाङतेङ दोअ्हि, हाइ या राजा दाउदको चान दोङ रो?
24इदोइ काथा हिङतेङ फारिसिगेलाइ दोअ्हि, इदोइ द्याङ भुत-आत्मागेलाइको गिह्रि साइतानको सरबुङ पाहासो भुत-आत्मागेलाइहेङ ओल्लेपाखे।
25येसु इम्बालाइको मारेम्का काथा थाहा गितेङ इम्बालाइहेङ दोअ्हि, “हिदोइ बुङ सारभिको द्याङ ता-ताइमिता खेङन्हाहि पानु इङको सारभि तिकितेङ हिलि माद्वावा। एन्साङ पातेङ एनोङ जाहान एमिसो-भेनेङको बिरोधता हि पानु, इङको जाहान ए दोफाङ हिलि माद्वावा।” 26एनोङ साइतान भेनेङ साइतानहेङ ओल्लेपानु, इङको ताइकोङ बिरोधता बाखाराइन्हावा, कालाउ वाको सासन हेसा पातेङ तिक्यावा रो? 27जेसापा का साइतानसो भुत-आत्मागेलाइहेङ ओल्लेपानु, नेलाइको चानगेलाइ चाहि हासु पाहासो ओल्लेपाखे? ओदोङ भाअ्सिङ ओबालाइ दोङ नेलाइको न्याय कर्ता जेनावा। 28जेसापा का परमेस्वरको आत्मासो भुत-आत्मागेलाइहेङ ओल्लेपानु परमेस्वरको सासन नेलाइकोता लोहोइ दोअ्तेङ गिसु।
29आरोङ एसापा येसु दोङ इता साइतानको तुलाना एमि बल्लियाका द्याङ दोफा पाका हि, जाइ दोफा एनोङ साअ् हि। हिदोइ बुङ द्याङ लाम्फा बल्लियाका द्याङहेङ जिङलि गोइखे कालाउ खिनिङ वाको साअ्को धन-सम्पति कालाउ साअ् खुलि द्वावा।
30जाइ काङको दोफा मान्थु, वा काङको बिरोधता हि, कालाउ जाइ का दोफा माजोम्पाखे वा राइखे। 31ओदोङ भाअ्सिङ का नेलाइहेङ दोअ्खा, द्याङगेलाइको पाका पाप हिसिकालाउ बुङ स्यामा जेनाङ कालाउ परमेस्वरहेङ मारेम्का दोअ्कालाइहेङ बुङ स्यामा जेनाङ, कालाउ पबित्तरो आत्माको बिरोधता मन्दा माताकालाइहेङ मिधुलाउ बुङ परमेस्वर स्यामा माप्याङ। 32हासु बुङ का द्याङको चानको बिरोधता जेदोङ दोअ्लाउ बुङ वासेहेङ स्यामा जेनावा, कालाउ हासु बुङ पबित्तरो आत्माको बिरोधता दोअ्नु वासेहेङ इदोइ युगता कालाउ लोका युगता बुङ स्यामा माजेनाङ।
33ओदोङ भाअ्सिङ जेसापा सप्रेका सिङ हिनु वा सप्रेका सेका फल पिखे। कालाउ जेसापा सिङदोङ सप्रेका मान्थुनु सेका बुङ मासप्रेखे। हाइपालिपानु सिङहेङ वाको सेकासो नाल्खे। 34ओइ बिस हिका पुय्याँको सान्तानगेलाइ भाइका, नेलाइ मारेम्का जेङतेङ बुङ हेसा रेम्का काथा दोअ्लि दोअ्स्वाना? जेदोङ मनता हि, ओदोङ द्याङगेलाइ दोअ्खे। 35कालाउ आसल द्याङ, ताइको मनता हिका आसल काथा भाकारसो आसल काथा दोङ ओल्लेपाखे। खाराब द्याङ खाराब दोङ काथा भाकारसो ओल्लेपाखे। 36का नेलाइहेङ दोअ्खा, माजेङका काथा दोअ्का काथा न्यायको दिनाता वाको पाहि-पाहिपा हिसाब पिलि गोयावा। 37इम्बालाइको दोअ्का काथाहोइ परमेस्वर दोङ इम्बालाइहेङ न्यायको दिनाता दुसिका याते मादुसिका थोहराइयावा।
चिन्हा खाङलि मन पाका
(मर्कु 8:11-12; लुक 11:29-32)
38कालाउ व्यवस्था धिरपाका द्याङगेलाइ कालाउ फारिसिगेलाइ मध्येसो आधिमि वासेहेङ दोअ्हि, गुरु ज्यु, केलाइ नाङकोसो एनोङ चिन्हा खाङलि खाङनाखे।
39येसु इम्बालाइहेङ दोअ्हि, दुस्ट कालाउ कासिबिरि पुस्तागेलाइ चिन्हा भोखे। कालाउ इदोइ पुस्ताहेङ खिनिङ परमेस्वरको बक्ता योनाको जेदोङ चिन्हा जेङहि इङको बाहेक आरु हिदोइ बुङ चिन्हा तिङलि मानिनाङ। 40हाइपालिपानु जेसाङ योना बारका हायाको हामुङ लिता सुम दिना कालाउ सुम न्हिसिन हिघाहि, ओसाङ दोङ का द्याङको चान बुङ प्रिथिबि लिता सुम दिना कालाउ सुम न्हिसिन ह्याङका। 41निनवे सहरको द्याङगेलाइ न्यायको दिनाता इदोइ पुस्ता दोफा जाअ्लि गोयावा, कालाउ वासेहेङ इम्बालाइ, नेलाइहेङ दुसिलि तेनावा, हाइपालिपानु इम्बालाइ योनासो सुसमाचार हिङतेङ ताइको पापसो पाप पालि लाअ्हि। कालाउ खाङसु इता एमि माहान हि। कालाउ नेलाइ चाहि पाप पालि लाअ्लिसो इन्कार पासुखेना। 42न्यायको दिनाता माहेको रानि एलाको द्याङगेलाइहेङ दुसियावा, हाइपालिपानु राजा सोलोमोनको बुद्दिको काथा हिङलि हेन्जा दुरेसो लोका हिघाहि। खाङसु, राजा सोलोमोन खान्तेङ गोताङ काथा गिका एमि द्याङ इता हि। नेलाइ चाहि पाप पालिसो लाअ्लि इन्कार पासुखेना। 43“हिदोइ बुङ द्याङसो जेलाउ भुत-आत्मा ओल्लेतेङ इङको थाइ-थाइका थामे भोलि द्यापाहाङ हानितेङ सुकापा हिलि दोका थामे भोकाताङ हिगिल्हि। 44जेलाउ वा इन्सिका थामे हिसो बुङ मानिङलाउ लाम्फाको हिका द्याङकोता हानाङका दोअ्तेङ वा घुरिखे। इन्ता लोलाउ उङको द्याङको जिबन एनोङ जाहाका कालाउ खालि साअ् भाइका निङखे। 45कालाउ वा हानेतेङ झन ताइमि खान्तेङ सरबुङसाइका न्हि लोङ दुस्ट भुत-आत्मागेलाइ चुमातेङ उङको द्याङ लिता दुल्तेङ हिखे। कालाउ उङको द्याङको दासा लाम्फाको खान्तेङ न्हुसोको झन मारेम्का जेनावा। नानिको दुस्ट द्याङगेलाइ दोफा बुङ इसिकाङ जेनावा।”
येसुको आमाइ कालाउ ओनेगेलाइ
(मर्कु 3:31-35; लुक 8:19-21)
46येसु जेरगेलाइ दोफा काथा पाकाताङ पालाउ, वाको आमाइ कालाउ ओनेगेलाइ येसु दोफा काथा पालि हि, दोअ्तेङ बाहार दोङ ह्रुम्तेङ हि। 47एमि द्याङ येसुहेङ दोअ्हि, “गुरु ज्यु नाङको आमाइ कालाउ नाङको ओनेगेलाइ नासेहेङ बाहार ह्रुम्तेङ हि, नाङको दोफा काथा पालि खाङखे।”
48येसु बानाल चुमाका द्याङहेङ दोअ्हि, “काङको आमाइ कालाउ काङको ओनेगेलाइ हासु?” 49कालाउ वा ताइको चात्यागेलाइहेङ आङगुलिहोइ तिङपातेङ दोअ्हि, खाङसु काङको आमाइ कालाउ ओनेगेलाइ एबालाइ दोङ। 50हाइपालिपानु जाइ स्वर्गता हिका काङको परमेस्वर आबाको मन भाइपा पाखे, वा दोङ काङको ओनेगेलाइ, कालाउ काङको बेजान ओनेगेलाइ, कालाउ काङको आमाइ।
Currently Selected:
मति 12: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
