लुका 4
4
येसुको परिक्स्या
(मति 4:1-11; मर्कु 1:12-13)
1येसु यर्दन झोरासो घुरिहि वा पबित्तरो आत्मासो पोङघातेङ हिघाहि, वासेहेङ चाका-मान्दा थामे भारि चुम्पुहि। 2इन्ता न्हे कुरि न्हिसिन न्हे कुरि नितिम थेकापा येसु हाइ बुङ चाका-आम्का मान्थुघाहि, साइतान येसुहेङ न्हे कुरि दिना थेकापा जाचिहि, ओदोङ भाअ्सिङ येसु ओसारापाङ म्हितुहि।
3साइतान वासेहेङ दोअ्हि, नाअ् परमेस्वरको चान हिना पानु इदोइ उन्ठुइगेलाइहेङ तोले जेनाको दोअ्तेङ आग्या पितेङ प्रामानित पाअ् कालाउ नाअ् इङको तोले चालि द्वाना।
4येसु साइतानहेङ जोबाफ पिहि, धर्मसास्तरता इसिका लेखेका हि, तोले चाअ्तेङ खिनिङ द्याङ सिन्हुतेङ माहिखे।
5कालाउ साइतान येसुहेङ एनोङ झाउका थामेता चुम्पुहि, कालाउ एघुरिङताङ सुमिङको गोताङ राइजिगेलाइ तिङपातेङ दोअ्हि। 6कालाउ साइतान येसुहेङ दोअ्हि, का इदोइ गोताङ राइजिगेलाइको खाबारा इङको धन-सम्पति कालाउ सरबुङगेलाइ प्याङका इदोइ गोताङ कासेहेङ सुम्पिका हि, कालाउ का जाइहेङ इच्छा पाखा वासेहेङ प्याङका, 7नाअ् कासेहेङ तुघुरतेङ आराधाना पान्हा पानु कालाउ का नासेहेङ इदोइ गोताङ आनेमाने प्याङका।
8येसु जोबाफ पिहि, धर्मसास्तरता इसिका लेखेका हि: नाअ् परमप्रभु नाङको परमेस्वरहेङ खिनिङ सेउपालि कालाउ बाखिन पालि गोइखे, कालाउ वाको खिनिङ सेवा पालि गोइखे!
9कालाउ इङको साइताइन आरोङ येसुहेङ यरुसेलेमता चुम्पुतेङ मुन्दिरको टुप्पाता जाअ्पाहि कालाउ साइतान येसुहेङ दोअ्हि, जेसापा नाअ् दोङ परमेस्वरको चान हिना पानु इतासो लेता धाअ्सितेङ प्रमानित पाअ्, कि नासेहेङ चोट मालागियाङ, 10हाइपालिपानु धर्मसास्तरता इसिका लेखेका हि,
वा दोङ ताइको स्वर्गदुतगेलाइको जिम्माता नासेहेङ प्यावा,
11कालाउ ओबालाइ दोङ नासेहेङ ताइको खुर-खुरता खोअ्तावा,
माकुनुते नाङको खोकोइ उन्ठुइता थुन्हावा।
12येसु जोबाफ पिहि, “धर्मसास्तरता एसा दोअ्का हि, प्रभु नाङको परमेस्वरहेङ माजाचे।”
13साइतान येसुहेङ गोताङ परिक्स्या पालि दोतेङ आले सोमोइको भाअ्सिङ वाहेङ लाअ्तेङ हानेहि।
14येसु पबित्तरो आत्माको सरबुङता गालिल जिल्लाता घुरिहि। कालाउ वाको बारेता काथागेलाइ द्यापाहाङ चार-चाराइहि। 15येसु यहुदिगेलाइको चाउघारा साअ्गेलाइता सिक्स्या पिलि तेङहि, कालाउ झाराङ वाको बाखिन पाघाहि।
नासरत देराता येसुहेङ मासुइकार हि
(मति 13:53-58; मर्कु 6:1-6)
16येसु ताइमि हुर्किका नासरत देराता घुरिहि। कालाउ परमेस्वरको पबित्तरो दिनाता यहुदिगेलाइको चाउघारा साअ्ता हानिहि। कालाउ वा ताइको मुन्धुम आन्सार इन्ता धर्मसास्तरसो पढेलिको भाअ्सिङ जाअ्हि। 17यासाइया परमेस्वरको बक्तापाहासो लेखेका किताप वासेहेङ पिका हिघाहि, कालाउ वा किताप पल्ति पातेङ कालाउ एनोङ थामेता इसिका काथा लेखेका निङहि:
18प्रभुको आत्मा काङको ह्रुता हि,
हाइपालिपानु गरिबगेलाइहेङ प्राचार पालिको भाअ्सिङ कासेहेङ आबिसेक पाका हि।
कैदिगेलाइहेङ लाअ्पालिको भाअ्सिङ,
कालाउ कान्हाँगेलाइहेङ तिङपालि दोपालि,
हेन्जाङ आत्याचारता परिकालाइहेङ लाअ्पालिको भाअ्सिङ,
19कालाउ घोसाना पालि कि ताइको द्याङगेलाइहेङ बान्चिपालि
परमप्रभुको ठिक सोमोइ लोका हि।
20कालाउ न्हुसो येसु किताप बन्द पातेङ सेवकहेङ घुरिपाहि कालाउ योम्हि। यहुदिगेलाइको चाउघारा साअ्ता हिका गोताङ द्याङ वासेहेङ खाङतेङ हिघाखे। 21येसु ओबालाइहेङ दोअ्हि, नानि धर्मसास्तरको इदोइ बचन नेलाइ हिङका-हिङकाताङ पुरा जेङका हि।
22गोताङ द्याङगेलाइ येसुको बाखिन पाहि, वाको आनुग्रहोइ भरिका बचन हिङतेङ ओबालाइ भारभुसाइहि। ओबालाइ दोअ्हि, हाइ याते योसेफको चान माको रो?
23येसु ओबालाइहेङ दोअ्हि, का गिखा कि नेलाइ कासेहेङ या निङपिकासो दोअ्स्वाना, ओइ बैधे! ताइमिहेङ एल्पा। नाअ् जेदोङ कर्फनहुम सहरता पान्हा ओदोङ केलाइ हिङन्हाहि। एला नाअ् ताइको देराता बुङ एन्साङ पाअ्। 24कालाउ न्हुसो येसु दोअ्हि, का नेलाइहेङ जातिङ भारि दोअ्खा, परमेस्वरको बक्ताहेङ ताइको देरागेलाइता कालाउ सहरता हेलाउ बुङ स्वागत माजेङखे। 25काङको काथा हिङसु या जातिङको हि कि परमेस्वरको बक्ता एलियाको पालाता गोताङ इस्राएल सारभिता हेन्जाङ के सिका बेबालाइ हिघाहि, ओदोङ बेला सुम बासार-आधा थेकापा आकाससो वाइ मालोहि, इता थेकापा कि पुराङ इस्राएल सारभिता बार्का आनिकाल जेङका हिघाहि। 26कालाउ बुङ एलियाहेङ इस्राएल सारभिता हिदोइ बुङ के सिका बेबालकोता मादिङगिल्हि, कालाउ सिदोन सहरको सारपात देराता एलियाहेङ एमि गैर-यहुदिको के सिका बेबालाइको साअ्ता दिङगिल्हि। 27कालाउ परमेस्वरको बक्ता एलिसाको सोमोइता इस्राएल सारभिता इस्तु रोग्या खोअ्कागेलाइ हिघाहि, कालाउ इम्बालाइ मध्ये सिरिया सारभिको नामान दोअ्का गैर-यहुदि द्याङ बाहेक हासुहेङ बुङ माएल्पाहि।
28गोताङ द्याङगेलाइ जाइ यहुदिगेलाइको चाउघारा साअ्ता हिघाहि, इङको काथागेलाइ हिङहि कालाउ मारफाङ चेर ताम्पाहि। 29इम्बालाइ ल्होहि कालाउ येसुहेङ सहरसो बाहार ओल्ला पातेङ जेदोङ राता इम्बालाइको सहर बानाइका हिघाहि, इङको राको टुप्पाता चुम्पुतेङ वासेहेङ लेता धाअ्कालाइतेङ सेअ्लि खाङघाखे। 30कालाउ बुङ वाते द्याङगेलाइको जेरसो सिरितेङ ताइको दामा हानिहि।
भुत-आत्मा धेल्का द्याङ
(मर्कु 1:21-28)
31येसु गालिल जिल्लाको कर्फनहुम सहरता हानिहि, कालाउ वा परमेस्वरको पबित्तरो दिना द्याङगेलाइहेङ सिक्स्या पिलि तेङहि। 32इम्बालाइ येसुको धिरपाकाता भाङ-भाङहि। हाइपालिपानु वा खाबारासो धिरपाघाखे।
33यहुदिगेलाइको चाउघारा साअ्ता एमि भुत-आत्मा साताइन्हाका द्याङ इन्ता हिघाहि उङको द्याङ एसा दोअ्काताङ ह्रिकाइहि, 34ओइ नासरत देराको येसु, केलाइहेङ नाअ् दोफा हाइ सोरोकार हि? नाअ् हाइ पालि केलाइहेङ नासा पालि लोन्हा? का नासेहेङ नाल्खा, नाअ् परमेस्वरको जन हिना।
35कालाउ बुङ येसु इङको भुत-आत्माहेङ चेरतेङ दोअ्हि, सिकापा हि, उङको द्याङसो बाहार ओल्लेतेङ हाने। उङको द्याङहेङ भोनोइता फेन्हापातेङ उङको द्याङहेङ हाइ दोङ हान्ति मापासिङ भुत-आत्मा ओल्लेतेङ हानिहि।
36गोताङ द्याङगेलाइ भारभुसाइहि कालाउ ओबालाइता-ताइमिता काथा पाहि, इदोइ हाइ खाल्को सिक्स्या? “इदोइ हिदोइ बुङ नावा खाल्को खाबाराको सिक्स्या हिलि गोयाङ! याते खाबारा कालाउ सरबुङता हुकुम पाखे, कालाउ भुत-आत्मागेलाइ बुङ वाको काथा बुङ साअ्खे।” 37कालाउ न्हुसो इङको थामेको गोताङ थामेता येसुको नावाइ चार-चाराइहि।
38येसु यहुदिगेलाइको चाउघारा साअ् लाअ्तेङ वा सिमोनको साअ्ता हानिहि। सिमोनको जुबे ओसारापाङ मिसा लोतेङ सिधाउताङ थाला जेङतेङ हिघाहि, ओबालाइ वाको भाअ्सिङ हाइ दोङ पापिलि दोअ्तेङ येसु दोफा सेउपाहि। 39येसु वाको भेरपा हानिहि कालाउ मिसाहेङ इन्तासो हाने दोअ्तेङ चेरहि कालाउ मिसा लाअ्तेङ हानिहि, कालाउ वा ल्होहि इम्बालाइहेङ साम्हेर्लि तेङहि।
40बेल्हाका पहर यहुदिगेलाइ परमेस्वरको पबित्तरो दिना दोतेङ द्याङगेलाइ हेन्जा खाल्को मासाधेका द्याङगेलाइहेङ येसुकोता चुमाहि। येसु झाराङ मासाधेकालाइहेङ साइतेङ एल्पाहि। 41हेन्जाङ द्याङगेलाइसो भुत-आत्मागेलाइ बाहार ओल्लेतेङ हानिहि भुत-आत्मागेलाइ आहुतेङ हिघाहि, नाअ् परमेस्वरको चान हिना। कालाउ येसु भुत-आत्मागेलाइहेङ सिकापा हिलि आग्या पाहि, येसु दोङ ख्रिस्ट हि दोअ्तेङ भुत-आत्मागेलाइ गिका हिघाहि।
42ह्रिमा जेङतेङ येसु चाका-मान्दा हिका थामेता हानिहि। कालाउ एनोङ बार्का हुदागेलाइ वासेहेङ भोकाताङ वाकोता लोहि, कालाउ केलाइहेङ लाअ्तेङ मान्हे दोअ्तेङ रोकिलि कोसिस पाघाखे। 43कालाउ येसु इम्बालाइहेङ दोअ्हि, का भेनेङ सहरगेलाइता बुङ परमेस्वरको सासनको बारेता सुसमाचारगेलाइ प्राचार पालि गोइका हि, याकोङ भाअ्सिङ कासेहेङ दिङगिल्का हि। 44कालाउ येसु यहुदिगेलाइको चाउघारा साअ्गेलाइता सिक्स्या पिलि तेङहि।
Currently Selected:
लुका 4: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
