लुका 20
20
येसुको खाबाराको बारेता प्रस्न
(मति 21:23-27; मर्कु 11:27-33)
1एनि मुन्दिरता येसु द्याङगेलाइहेङ सिक्स्या पिकाताङ हिघाहि, वा परमेस्वरको सासनको बिसोइता प्राचार पादोङघाहि। मुलि पुजारिगेलाइ कालाउ व्यवस्था धिरपाका द्याङगेलाइ कालाउ आरु यहुदि आगुवागेलाइ लोहि। 2कालाउ वासेहेङ हिअ्हि, केलाइहेङ दोअ्, हिदोइ खाबाराहोइ नाअ् इदोइ काम पाखेना? माकुनु नासेहेङ इदोइ खाबारा पिका हासु?
3येसु इम्बालाइहेङ जोबाफ पिहि, का बुङ नेलाइहेङ एनोङ काथा हिताङका कासेहेङ दोअ्सु। 4युहान्ना दोङ द्याङगेलाइहेङ बप्तिस्ता पिका खाबारा स्वर्गको परमेस्वर पाहासो ना द्याङगेलाइसो लोहि? कासेहेङ दोअ्सु।
5जेलाउ इम्बालाइता-ताइमिता नाइसुलि तेङसुहि कालाउ दोअ्हि, जेसापा केलाइ स्वर्गको परमेस्वर पाहासो दोअ्नु वा दोङ केलाइहेङ हिअ्तावा आरोङ “नेलाइ हाइ पालि वाको ह्रुता खाङधुरि मापासुन्हा?” 6युहान्नाको बप्तिस्ता द्याङ पाहासो जेङका हि दोअ्नु, कालाउ झाराङ द्याङगेलाइ केलाइहेङ उन्ठुइहोइ तोअ्तेङ सेअ्तावा, हाइपालिपानु इम्बालाइ युहान्नाहेङ परमेस्वरको बक्ताको रुपता पाक्का खाङधुरि पाखे।
7कालाउ इम्बालाइ येसुहेङ जोबाफ पिहि, “केलाइ मागिनाखे, हिसोसो लोका हि।”
8कालाउ येसु इम्बालाइहेङ दोअ्हि, “एन्सा पानु का हिदोइ खाबारासो इदोइ काम पादोङखा, का बुङ नेलाइहेङ मादोअ्ताङका।”
मोहिगेलाइको निङपिका
(मति 21:33-46; मर्कु 12:1-12)
9वा द्याङगेलाइहेङ इदोइ निङपितेङ एनोङ काथा दोअ्हि: एमि द्याङ आङगुरको बारि लागाइहि, कालाउ मोहिगेलाइहेङ पितेङ हेन्जा दिनाको भाअ्सिङ परदेस हानिहि। 10कालाउ न्हुसो आङगुरको गिह्रि मिलिङता आङगुरको सेका फल नालि दोअ्तेङ एमि चाकारियाहेङ मोहिगेलाइकोता दिङगिल्हि। कालाउ उङको मोहिगेलाइ वासेहेङ दानाइतेङ, कालाउ खालिङ खुर दिङगिल्हि। 11वा आरोङ भेनेङ चाकारियाहेङ दिङगिल्हि, कालाउ बुङ उङको मोहिगेलाइ वासेहेङ मान मापाहि भरु वासेहेङ बुङ दानाइहि कालाउ बेइज्यत पातेङ खालि खुर दिङगिल्हि। 12वा आरोङ सुमतेङ चाकारियाहेङ दिङगिल्हि, कालाउ मोहिगेलाइ आरोङ वासेहेङ बुङ आधामारा पातेङ इन्तासो ओल्ला पातेङ बाहार थाइगिल्हि।
13“उङको आङगुरको बारिको गिह्रि दोअ्हि, एला का हाइ पालि गोइका हि? का काङको मायारु चानहेङ दिङगिल्लाङका, जेङलि दोनु मोहिगेलाइ काङको चानहेङ आदार पावा।
14जेलाउ मोहिगेलाइ चानहेङ तिङहि, इम्बालाइ ता-ताइमिता दोअ्हि, ‘या केलाइको गिह्रिको चान, इदोइ मिलिङ वाकोङ जेनावा। यासिहेङ सेअ्ताइने, कालाउ इङको मिलिङ केलाइको जेनावा।’ 15एसा दोअ्तेङ इम्बालाइ येसुहेङ रिम्तेङ सेअ्हि कालाउ सिका जिउहेङ आङगुरको बारिसो बाहार चुम्पुतेङ थाल्पुहि। नासेहेङ हाइ लागिखे कि आङगुरको बारिको गिह्रि एला हाइ पावा? 16वा ताइमिङ लोतेङ उङको दुस्ट मोहिगेलाइहेङ पाक्का दोङ सेअ्तावा कालाउ ताइको आङगुरको बारि भेनेङगेलाइहेङ कामाइलि प्यावा। कालाउ न्हुसो द्याङगेलाइ इसिका हिङतेङ दोअ्हि, परमेस्वर इसिका मापा।”
17येसु द्याङगेलाइहेङ खाङतेङ दोअ्हि, कालाउ इदोइ धर्मसास्तरता लेखेकाको माने हाइ कुनु?
जेदोङ उन्ठुइहेङ मिस्तिरिगेलाइ थाइगिल्हि
इङको ओदोङ मुलि उन्ठुइ हि,
जेदोङ साअ् धाम्लि मुलि उन्ठुइ जेङहि।
18कालाउ हासुलाउ बुङ इङको उन्ठुइ ह्रुता हुल्लावा वा टुक्रा-टुक्रा जेङतेङ पोङन्हावा, कालाउ इङको उन्ठुइ हासुकोङ बुङ ह्रुता हुल्नु इङको वासेहेङ धुला भाइपाङ बानाइयावा।
19येसुको दोअ्का इङको काथा व्यवस्था धिरपाका द्याङगेलाइ कालाउ मुलि पुजारिगेलाइ हिङहि, ओबालाइकोङ भाअ्सिङ दोअ्का भाइका बुझिहि। ओदोङ भाअ्सिङ इम्बालाइ ओदोङ घुरि येसुहेङ रिम्लि खाङघाखे, इम्बालाइ चाहि द्याङगेलाइको दोअ्का काथासो बुङ थिहि।
रोमि साम्रातहेङ पोत तिरिका
(मति 22:15-22; मर्कु 12:13-17)
20कालाउ न्हुसो व्यवस्था धिरपाका द्याङगेलाइ कालाउ मुलि पुजारिगेलाइ येसुहेङ फोसेपालिको भाअ्सिङ जासुसगेलाइ दिङगिल्हि। येसुको दोअ्का काथागेलाइता वासेहेङ मारेम्का बानाइतेङ आधिकारिगेलाइ हाकिमको खुरता वासेहेङ जिम्मा पिलि दाउ भोघाखे। 21इम्बालाइ वासेहेङ दोअ्हि, गुरु ज्यु केलाइ गिन्हाखे, नाअ् ठिक दोङ दोअ्खेना कालाउ रेम्का काथागेलाइ धिरपाखेना, कालाउ हासुको बुङ पक्स्य पात मापाखेना, भरु सत्ये दोफाङ परमेस्वरको दामा धिरपाखेन्हा। 22केलाइहेङ दोअ्पि, हाइ केलाइ रोमि साम्रातहेङ पोत तिरिलि ठिक हि या मान्थु?
23कालाउ येसु ओबालाइको नक्कल पाका थाहा गितेङ वा ओबालाइहेङ दोअ्हि, 24एनोङ ताकाको थुरि कासेहेङ पिसु इङको थुरिता हासुको मिङ हि? कालाउ इङकोता हासुको चित्तरो हि? ओबालाइ दोअ्हि, रोमि साम्रातको।
25येसु ओबालाइहेङ दोअ्हि, एन्सानु रोमि साम्रातको जेदोङ हि इङको रोमि साम्रातहेङ पिसु, कालाउ जेदोङ परमेस्वरको हि परमेस्वरहेङ पिसु?
26द्याङगेलाइको आगाता ओबालाइ वासेहेङ काथाता फासिपालि मादोअ्हि, कालाउ वाको ग्यानमय उत्ताराता भाङ-भाङतेङ सिकापा हि कालाउ इम्बालाइ हाइ दोङ दोअ्लि मादोहि।
सिन्चाल कालाउ बिहु
(मति 22:23-33; मर्कु 12:18-27)
27आधिमि सदुकिगेलाइ आधे प्रस्नगेलाइ चुमातेङ येसुकोता लोहि, कालाउ ओबालाइ खाङधुरि मापाघाखे कि सिका द्याङ आरोङ हेलाउ बुङ सिन्चालतेङ माल्होखे दोअ्तेङ ओबालाइ येसुहेङ दोअ्हि, 28गुरु ज्यु, मोसा लेखेका हि, कि जेसापा हिदोइ बुङ बिहु पाका द्याङ जामाल माजेङसिङ सिनु वाको बे हेङ ओने दादाको जामालको भाअ्सिङ बिहु पालि कालाउ दादाको भाअ्सिङ जामाल जेङपालि गोइखे। 29हिदोइ बुङ एनोङ सोमोइता न्हिमि दादा-ओने हिघाहि। जेठा एमि बेजानहेङ बिहु पाहि, कालाउ वाते सिहि, वाको एमि बुङ जामाल माजेङहि। 30कालाउ माइला ओने बुङ उङको बेबालहेङ बिहु पाहि वा बुङ सान्तानको जोलोम माजेङसिङ सिहि, एन्सा पातेङ साइला ओनेङ बुङ सिहि। 31उङको न्हिमि दोङ दादा-ओने सान्तानको जोलोम माजेङसिङ सिहि 32कालाउ न्हुसो उङको बेबाल बुङ सिहि। 33एला उङको बेबाल दोफा न्हिमि दादा-ओनेगेलाइ वासेहेङ बिहु पाका हिघाहि, “एला सिकासो सिन्चाल्लाउ उङको बेबाल हासुको बे जेनावा?”
34येसु उङको सदुकिगेलाइहेङ दोअ्हि, इदोइ सुमिङता द्याङगेलाइ बिहु पाखे कालाउ बिहु पापिखे। 35कालाउ इङको युग थेकापा थुकालि योग्य जेङकालाइ, कालाउ सिकासो सिन्चाल्कालाइ बान्चितेङ ल्होतेङ योग्य जेङकालाइ ना ते बिहु पाखे ना ते बिहु दोङ पापिखे। 36ओदोङ बेला नेलाइ स्वर्गदुत भाइपाङ जेङस्वाना कालाउ मासिस्वाना, नेलाइ परमेस्वरको चान-चामिन्दि जेङस्वाना। हाइपालिपानु इम्बालाइहेङ आरोङ सिकासो सिन्चाल्पाखे। 37मोसा एनोङ झुन्झिता मे दाल-दालाइकाको बरनन ओसारा रेम्फा बुझिपातेङ दोअ्का हि, “कि द्याङगेलाइ सिकासो सिन्हुतेङ ल्होकाङ, हाइपालिपानु मोसा प्रभु परमेस्वरहेङ आब्राहामको परमेस्वर, इसाहाकको परमेस्वर कालाउ याकुबको परमेस्वर दोअ्का हि। 38परमेस्वर सिकालाइको परमेस्वर, माको कालाउ बान्चितेङ हिका द्याङगेलाइको परमेस्वर। झाराङ द्याङगेलाइ जेदोङ परमेस्वरता हि इम्बालाइ सिन्हुका हि।”
39आधिमि व्यवस्था धिरपाका द्याङगेलाइ येसुहेङ जोबाफ पिहि, हे गुरु ज्यु, नाअ् आसल काथा दोअ्ना। 40कालाउ न्हुसो आरोङ हासु बुङ वासेहेङ हिदोइ बुङ प्रस्न हिअ्लि आट मापाहि।
येसु हासुको चान?
(मति 22:41-46; 23:1-7; मर्कु 12:35-40)
41कालाउ न्हुसो येसु इम्बालाइहेङ दोअ्हि, हाइ पालि ख्रिस्टहेङ राजा दाउदको चान दोअ्खे? 42हाइपालिपानु राजा दाउद ताइमिङ लेखेका भजन सङग्रहता इसिका दोअ्का हि,
प्रभु काङको प्रभुहेङ दोअ्हि,
काङको दाम्पाहा योम, 43जेलाउ थेकापा का नाङको सतुरुगेलाइहेङ
पुर्न रुपता माहारिपा धाउ।
44जेलाउ राजा दाउद ताइमि दोङ वासेहेङ प्रभु, ख्रिस्ट दोअ्खे, कुनु वा हेसापा राजा दाउदको चान जेङहि?
45कालाउ झाराङ द्याङगेलाइ हिङकाताङ पालाउ येसु ताइको चात्यागेलाइहेङ दोअ्हि, 46“व्यवस्था धिरपाका द्याङगेलाइसो चङख हिसु, ओबालाइ सार्बजानिक थामेगेलाइता ह्रिङका, कालाउ जाङका लोखन धाबा होङतेङ हिगिल्हि भोघाखे, कालाउ ओबालाइहेङ द्याङगेलाइ आदार पाको कालाउ सेउपाको दोअ्तेङ मन्दा ताअ्घाखे।” ओबालाइ यहुदिगेलाइको चाउघारा साअ्को मुख्य थामे कालाउ भोजता बुङ सम्मानको थामे भोघाखे। 47ओबालाइ धोका पितेङ के सिका बेबालको सम्पति चुम्पुखे ओबालाइ सार्बजनिक थामेता हेन्जा सोमोइ थेकापा प्रार्थाना पाखे कालाउकि द्याङगेलाइ सोचियाको ओबालाइते रेम्का हि, परमेस्वर दोङ निस्चित रुपता ओबालाइहेङ थाङका साजाइ पिका हि।
Currently Selected:
लुका 20: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
