लुका 1
1
1आनाउ थियोफिलस, हाइपालिपानु हेन्जा द्याङगेलाइ केलाइको माझाता जेङका घाटानागेलाइको बिसोइता बिबरन लेखेलि कोसिस पाका हि। 2इम्बालाइ ओदोङ काथागेलाइ दोङ लेखेका हि: जेदोङ केलाइहेङ दोअ्का हिघाहि, उङको द्याङगेलाइसो जाइ दोङ येसुको सेवाकाइ लाम्फासोङ तिङका हिघाहि कालाउ न्हुसो इम्बालाइ परमेस्वरको बचनको सेवक जेङहि। 3ओदोङ भाअ्सिङ आनाउ थियोफिलस का ताइमिङ लाम्फासोङ ध्यान पातेङ गोताङ काथागेलाइको बिसोइता भोका हिघा कासेहेङ या रेम्का लागिहि कि, का नाङको भाअ्सिङ इदोइ घाटानागेलाइ सारिपासोङ लेखेदोङखा। 4का इदोइ काथागेलाइ ओदोङ भाअ्सिङ लेखेदोङखा, कि नेलाइहेङ पुर्न रुपता सत्ये काथा थाहा जेनाको जेदोङ नेलाइहेङ द्याङगेलाइ दोअ्का हि।
बप्तिस्ता पिका युहान्नाको जोलोमको आगमबानि
5जेलाउ राजा हेरोद यहुदिया जिल्लाता सासन पाकाताङ हिघाहि, कालाउ जकरिया मिङ हिका एमि पुजारि हिघाहि। वा पुजारिगेलाइको इङको समुहता हिघाहि, जेदोङ आबिया पुजारिको मिङता बानाइका हिघाहि। वाको बे को मिङ एलिसिबा हिघाहि कालाउ वा बुङ इस्राएलको लाङति पुजारिको हारुनको हारागुटियासो हिघाहि। 6उधिन्हेमि परमेस्वरको आगाता धर्मि जिबन बितिपाघाखे। इम्बालाइ परमप्रभुको गोताङ आग्या कालाउ मुन्धुमगेलाइ माबिराइसिङ मानिघाहि। 7कालाउ जकरिया कालाउ एलिसिबाको हिदोइ बुङ सान्तान मान्थुघाहि, हाइपालिपानु एलिसिबा गान्घि तेअ्लि मादोहि, उधिन्हेमि वाराङ बेराङ जेङलि दोअ्का हिघाहि।
8एनि जकरियाको पुजारिगेलाइको समुहको इङको आथारता पाला आन्सार यरुसेलेम सहरको मुन्दिरता परमेस्वरको आगाता पुजारिको काम पादोङघाखे। 9पुजारिगेलाइको चलन आन्सार चिट्ठा लागाइहि, कि हासु हाइ पालि गोयाङ दोअ्तेङ। कालाउ चिट्ठा#1:9 पुजारिगेलाइको चिट्ठा आअ्का मुन्धुम हिघाहि, इदोइ निर्नय पालिको भाअ्सिङ मुन्दिरता हिदोइ काम हासु पालि दोअ्तेङ। लागाइलाउ बेदिता धुमाना जोलाइलि पाला जकरियाको मिङता परिहि। ओदोङ भाअ्सिङ वा परमप्रभुको मुन्दिरता धुमाना जोलाइलि हानिहि। 10धुमाना जोलाइका सोमोइता बाहार मुन्दिरको सालेङता गोताङ द्याङगेलाइ प्रार्थाना पाघाखे।
11एन्सालाउ दोङ जकरियाकोता परमप्रभुको एमि स्वर्गदुत तिङचाल्हाहि कालाउ धुमाना जोलाइका बेदिको दाम्पाहा जाअ्हि। 12जेलाउ जकरिया स्वर्गदुतहेङ तिङहि, वा आवाइतुहि कालाउ मारफाङ थिहि। 13कालाउ इङको स्वर्गदुत जकरियाहेङ दोअ्हि, जकरिया माअ्थि, नाङको प्रार्थाना परमेस्वर हिङपिका हि, नाङको बे एलिसिबा एनोङ चानको जोलोम प्यावा। वाको मिङ नाअ् युहान्ना ताअ्पि। 14इङको बेला नेलाइता खुसि कालाउ आनान्द जेनावा कालाउ आरु हेन्जाङ द्याङगेलाइ वाको जोलोमता आनान्द पावा। 15परमप्रभुको आगाता युहान्ना एमि माहान द्याङ जेनावा। वा हिदोइ बुङ दाखरस या हिदोइ बुङ म्हाका आमेने माआमावा। वा ताइको जोलोम सोङ पबित्तरो आत्माहोइ भरितेङ ह्यावा। 16वा दोङ इस्राएल सारभिको हेन्जाङ द्याङगेलाइहेङ ताइको प्रभु परमेस्वर भारि घुरिपातेङ चुमावा। 17युहान्ना एमि इसिका द्याङ जेनावा जाइ परमेस्वरको बक्ता एलिया भाइका आत्मा कालाउ सरबुङता ह्यावा। वा दोङ प्रभु लोलिको भाअ्सिङ दामा तियार पावा। वा दोङ आबा कालाउ चान-चामिन्दिगेलाइको माझाता मेलमिलाप चुमावा, कालाउ आनाग्या कारिगेलाइहेङ परमेस्वरको ग्यानहेङ सुइकार पापावा। एसापा दोङ वा द्याङगेलाइहेङ प्रभुको भाअ्सिङ तियार पावा।
18जकरिया स्वर्गदुतहेङ दोअ्हि, “इदोइ काथा केलाइ दोफा जेनाङ दोअ्तेङ हेसा थाहा गिलि? हाइपालिपानु का वाराङ जेङहोइका कालाउ काङको बे बुङ बेराङ जेङहोइ।”
19स्वर्गदुत उत्तारा पिहि, का गाब्रिएल परमेस्वरको आगाता जाअ्ताङका, वा दोङ कासेहेङ नाङको दोफा खुसिको काथा पालि कालाउ प्राचार पालि दिङगिल्का हि। 20काङको दोअ्का काथा ठिक सोमोइता पुरा जेनावा। कालाउ नाअ् नुइ धुइलि माद्वाना हाइपालिपानु नाअ् काङको दोअ्का काथा खाङधुरि मापानाङ जेलाउ थेकापा जामालको जोलोम माजेनावा नाअ् नुइ धुइलि माद्वाना।
21बाहार मुन्दिरको सालेङता द्याङगेलाइ जकरियाहेङ ह्रुम्तेङ हिघाहि। हाइपालिपानु धुमाना जोलाइलि दोतेङ, पुजारि बाहार लोतेङ द्याङगेलाइहेङ आसिरबाद पिघाहि। कालाउ वा हेन्जा बेलोम्पा थेकापा मालोनाङ इम्बालाइ भाङ-भाङतेङ हिघाहि। 22जेलाउ जकरिया बाहार ओल्लेहि, वा नुइ धुइलि मादोका हिघाहि। एन्सा जेङनाङ द्याङगेलाइ मुन्दिर लिता वा दर्सन निङहि दोअ्का काथा थाहा गिहि। वा नुइ धुइलि मादोनाङ बाहार ह्रुम्तेङ हिका द्याङगेलाइहेङ खुरहोइ इसारा पाहि।
23जेलाउ मुन्दिरता जकरिया पुजारिको रुपता वाको सेवाको आथार पुरा जेङहि, कालाउ वा यरुसेलेमसो ताइको साअ् भारि हानिहि। 24आले दिना न्हुसो वाको बे एलिसिबा गान्घि तेअ्हि। कालाउ न्हुसो एलिसिबा नाअ् माइना थेकापा आरु द्याङगेलाइसो दुरे दोङ हितेङ साअ्ताङ हि। 25एलिसिबा दोअ्हि, “प्रभु काङको भाअ्सिङ भोलो काम पाका हि। वा दोङ का ह्रुता दाया पातेङ द्याङगेलाइको आगाता कासेहेङ लेदेरपाकासो जोगाइहि।”
येसुको जोलोमको आगमबानि
26एलिसिबा गान्धि तेअ्का तु माइना जेङलाउ परमेस्वर गाब्रिएल स्वर्गदुतहेङ गालिल जिल्लाको नासरत देराता हिका एमि बेजानकोता दिङगिल्हि। 27जाइहेङ राजा दाउदको हारागुटिया योसेफ मिङ पाका द्याङ दोफा बिहु पालि ह्रेका हिघाहि उङको बेजानको मिङ मरियम हिघाहि। 28स्वर्गदुत मरियमकोता हानितेङ दोअ्हि, सेउपाखा, परमेस्वर नाङको ह्रुता क्रिपा पाका हि, प्रभु नाङको दोफा हि।
29उङको स्वर्गदुत दोअ्का काथाता मरियम आवाइतुतेङ सोचिलि तेङहि, इदोइ आभिबादनको माने हाइ वाला? 30कालाउ उङको स्वर्गदुत दोअ्हि, थिलि मागोइयाङ मरियम, हाइपालिपानु परमेस्वरको दाया नाअ् दोफा हि। 31एला हिङ, नाअ् गान्घि तेअ्ताना कालाउ नाअ् एनोङ चानको जोलोम प्याना। उङको चानको मिङ नाअ् येसु ताअ्पि। 32वा माहान जेनावा कालाउ सर्बोच्च परमेस्वरको चान दोअ्न्हावा। प्रभु परमेस्वर वासेहेङ वाको पुर्खा राजा दाउद भाइपा राजा बानाइयाङ। 33वा याकुबको हारागुटिया ह्रुता सासन पावा। येसु जेलाउलाउको भाअ्सिङ राजाको रुपता सासन पावा।
34मरियम उङको स्वर्गदुतहेङ दोअ्हि, का बिहु पाका मान्थुघा, या हेसा जेनावा?
35उङको स्वर्गदुत मरियमहेङ दोअ्हि, पबित्तरो आत्मा नाअ् दोफा ल्वाङ कालाउ सर्बोच्च परमेस्वरको सरबुङहोइ गान्धि तेअ्ताना, ओदोङ भाअ्सिङ जोलोम जेङका जामाल पबित्तरो जेनावा कालाउ परमेस्वरको चान दोअ्न्हावा। 36कालाउ हिङ, नाङको ताइको द्याङ एलिसिबा बेराङ जेङका आबास्थाता गान्धि तेअ्का हि। एला वाको कोल्हेता तु माइनाको जामाल हि, वाकोते जामाल दोङ माजेनाङ दोअ्का हिघाहि। 37हाइपालिपानु परमेस्वर गोताङ काम पालि द्वाङ।
38मरियम दोअ्हि, का परमप्रभुको बान्धाइति, नाअ् दोअ्का भाइकाङ काङको जिबनता जेनाको कालाउ न्हुसो स्वर्गदुत वासेहेङ लाअ्तेङ हानिहि।
मरियम कालाउ एलिसिबा दुसुका
39आले दिना न्हुसो मरियम हातार पातेङ यहुदिया जिल्लाता परेका एनोङ तिकारको इलाकाको देराता हानिहि जेता जकरिया कालाउ एलिसिबा हिघाहि। 40कालाउ मरियम जकरियाको साअ्ता हानिहि कालाउ एलिसिबाहेङ सेउपाहि। 41जेलाउ एलिसिबा मरियमको सुभकामना हिङहि, एन्सालाउ वाको हामुको जामाल टोङहि, कालाउ एलिसिबा ओदोङ घुरि पबित्तरो आत्मासो पोङघाहि। 42एलिसिबा चेराका गालाहोइ ह्रिकाइहि कालाउ दोअ्हि, परमेस्वर नासेहेङ गोताङ बेबालाइ खान्तेङ धन्यको बानाइका हि। कालाउ नाङकोसो जोलोम जेङलि तोम्का जामाल बुङ धन्यको हि। 43का नासेहेङ इता निङकाता का ताइमिङहेङ साम्मानित महसुस जेङखे, कि काङको प्रभुको आमाइ कासेहेङ भेतिलि लोहि। 44जेलाउ का नाङको आभिबादन हिङघा, काङको हामु लिताको जामाल हाउसा जेङतेङ टोङहि। 45कालाउ नाअ् धन्यको हिना हाइपालिपानु नाअ् खाङधुरि पाना कि प्रभु जेदोङ नासेहेङ दोअ्का हिघाहि इङको वा पुरा पावा।
मरियमको बाखानाइको ले
46कालाउ न्हुसो मरियम दोअ्हि:
का प्रभुको बाखिन पाखा।
47काङको परमेस्वर कासेहेङ मुक्ति पिकाता का आनान्दित हिघा।
48हाइपालिपानु वा दोङ का भाइका तुच्छ बान्धाइति ह्रुता दाया पाहि,
एला कासेहेङ झाराङ द्याङगेलाइ धन्यको दोअ्तावा।
49हाइपालिपानु वा दोङ सरबुङसाइका परमेस्वर काङको भाअ्सिङ माहान कामगेलाइ पापिका हि,
वाको मिङ पबित्तरो हि।
50जाइ परमेस्वरहेङ थिखे वाको दाया
पुस्तासो पुस्ताङ थेकापा हितेङ ह्यावा।
51वा ताइको माहान सरबुङको प्रयोग माहान काम पालिको भाअ्सिङ पाखे।
वा घमन्डिगेलाइहेङ कालाउ इम्बालाइको बिचारगेलाइहेङ हारिपाप्यावा।
52वा सासकगेलाइहेङ वाको सिङहासनसो लाअ्पाका हि,
कालाउ मोनोइगेलाइहेङ वा दोङ तोल्हिका हि।
53वा म्हितुकालाइहेङ रेम्का आनेमानेगेलाइ पितेङ घाइपाका हि।
कालाउ धनिगेलाइहेङ खालि खुर दिङगिल्का हि।
54परमेस्वर केलाइको पुर्खागेलाइ दोफा पाका बाचा फोम पाहि,
कालाउ ताइको बान्धाइति इस्राएल सारभिको द्याङगेलाइहेङ वा दोङ साघाइका हि।
55वा आब्राहाम कालाउ वाको हारागुटियागेलाइहेङ
जेलाउबुङको भाअ्सिङ दाया तिङपालि फोम पाहि।
जेसाङ वा दोङ केलाइको पुर्खागेलाइहेङ दोअ्का हिघाहि।
56मरियम एलिसिबा दोफा सुम माइना थेकापा हि, कालाउ ताइको साअ् भारि घुरिहि।
बप्तिस्ता पिका युहान्नाको जोलोम
57जेलाउ एलिसिबाको तुनिन्चाकाको सोमोइ जेङहि, कालाउ वा एमि चानको जोलोम पिहि। 58वाको देरागेलाइ कालाउ ताइको द्याङगेलाइ वासेहेङ प्रभु परमेस्वर मारफाङ दाया तिङपाका हिङका हिघाहि, कालाउ इम्बालाइ वाको दोफा लेङचाहि।
59जामाल येए दिनाको जेङतेङ देरागेलाइ कालाउ ताइकोगेलाइ वाको खाताना पालि लोहि। कालाउ इम्बालाइ वाको मिङ जकरिया ताअ्लि खाङघाखे, हाइपालिपानु इदोइ वाको आबाको मिङ हिघाहि। 60कालाउ वाको आमाइ एलिसिबा दोअ्हि, माको जामालको मिङ युहान्ना तापिलि गोयाङ।
61द्याङगेलाइ एलिसिबाहेङ दोअ्हि, कालाउ नेलाइको ताइकोगेलाइता इसिका मिङ हिका हासु बुङ मान्थु।
62कालाउ इम्बालाइ जामालको आबाहेङ सोङकेत पाहि, नाअ् जामालको मिङ हाइ ताअ्ताना दोअ्तेङ मन पाखेना। 63जकरिया हाइ बुङ लेखेलि पाति ह्रेहि कालाउ लेखेहि, याको मिङ युहान्ना हि, कालाउ इम्बालाइ भाङ-भाङहि। 64ओदोङ घुरि जकरिया आरोङ नुइ धुइलि दोहि, कालाउ परमेस्वरको बाखानाइ पालि तेङहि। 65कालाउ वाको गोताङ देरागेलाइ थिहि कालाउ इङको काथागेलाइ रा इलाकाको यहुदिया जिल्ला भरि चारचाराइलि तेङहि। 66इदोइ काथा हिङका झाराङ ता-ताइको मनता बिचार पाहि कालाउ दोअ्हि, इदोइ जामाल न्हुसो हिसिका जेनाङ वाला? हाइपालिपानु परमप्रभुको सरबुङ वाको ह्रुता हिघाहि।
जकरियाको बाखिन कालाउ आगमबानि
67कालाउ न्हुसो युहान्नाको आबा जकरियाकोता पबित्तरो आत्मासो निर्देसन निङहि कालाउ वा इसिका आगमबानि पिलि तेङहि,
68इस्राएल सारभिको प्रभु परमेस्वरको बाखानाइ पासु,
हाइपालिपानु वा ताइको द्याङगेलाइहेङ भेतिलि लोहि,
कालाउ द्याङगेलाइहेङ उद्दार पिहि।
69वा दोङ केलाइको भाअ्सिङ ताइको बान्धाइति राजा दाउदको हारागुटियाता
एमि सरबुङसाइका मुक्ति दाता दिङगिल्का हि।
70हेन्जाङ लाम्फा परमेस्वर ताइको पबित्तरो बक्तागेलाइ पाहासो दोअ्हि,
71वा केलाइहेङ सतुरुगेलाइको कालाउ केलाइहेङ
मन्दा माताका सरबुङसो बान्चि पावा।
72वा केलाइको पुर्खागेलाइहेङ दाया तिङपालि,
कालाउ ताइको पबित्तरो बाचाहेङ फोम पालि।
73वा केलाइको पुर्खा
आब्राहाम दोफा केरा चाअ्तेङ ताइको प्रतिग्या पाहि
कि वा दोङ केलाइहेङ सतुरुगेलाइसो लाअ्पावा।
कालाउकि केलाइ माअ्थिसिङ परमेस्वरको सेवा पालि द्वाको।
74वा केलाइहेङ केलाइको
सतुरुगेलाइको खुरसो लाअ्पाङ
कालाउकि केलाइ हासुहेङ बुङ माअ्थिसिङ
परमेस्वरको सेवा पालि द्वाको।
75जेलाउ थेकापा केलाइ सिन्हुतेङ ह्याङ,
परमेस्वरको आगाता पबित्तरो कालाउ धर्मि जिबन जियाङ।
76जकरिया ताइको जामालहेङ दोअ्हि,
ओइ जामाल नाअ् दोङ सर्बोच्च परमेस्वरको बक्ता दोअ्न्हाना,
हाइपालिपानु नादोङ प्रभको दामा तियार पालि
वाको आगा-आगा हानाना,
77वा दोङ ताइको द्याङगेलाइहेङ ओबालाइको
पापगेलाइ स्यामा पापितेङ ओबालाइहेङ
मुक्तिको बारेता ग्यान प्याङ।
78हाइपालिपानु केलाइको परमेस्वर क्रिपालु कालाउ मायारु हि।
ओदोङ भाअ्सिङ जेसाङ बेला केलाइहेङ सान्हे पिलि चिल्कातावा,
एन्साङ पातेङ ख्रिस्ट बुङ केलाइको माझाता स्वर्गसो ल्वाङ।
79वा दाकिलकिलकाता हिकालाइ
कालाउ आनान्त कालको भाअ्सिङ सिलि तोम्कालाइहेङ
फाइसालामका प्यावा।
इङको फाइसालामकाहोइ केलाइहेङ
परमेस्वरको सान्तिको दामाता थोअ्नावा।
80कालाउ एसाङ दोङ उङको जामाल युहान्ना बाराकाताङ हानिहि कालाउ आत्माता बलियाकाताङ हानिहि। जेलाउ थेकापा इस्राएल सारभिको द्याङगेलाइहेङ प्रचार पालि माअ्लोहि, ओदोङ बेला थेकापा युहान्ना चाका-मान्दा थामेता हितेङदोङ हि।
Currently Selected:
लुका 1: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
