साल्न्हाका चात्या 7

माहासभाता स्तिफनको भासन

1कालाउ प्राधान पुजारि स्तिफनहेङ हिअ्हि, “हाइ इदोइ दुसिकागेलाइ सत्ये हि?”

2स्तिफन उत्तारा पिहि, “ओइ खान्धुराइ ओनेगेलाइ कालाउ आगुवागेलाइ हिङपिसु, महिमामय परमेस्वर केलाइको पुर्खा आब्राहामहेङ हारान देराता लोतेङ हिलि खान्तेङ लाम्फा मेसोपोटामिया इलाकाता हिलाउ दर्सन पिका हिघाहि।” 3कालाउ परमेस्वर आब्राहामहेङ दोअ्का हिघाहि, “नाङको सारभि कालाउ ताइको द्‍याङगेलाइसो ओल्लेतेङ इङको सारभिता हाने जेदोङ का नासेहेङ तिङपा पाप्याङका।”

4ओदोङ भाअ्सिङ आब्राहाम कल्दिगेलाइको सारभि#7:4 कल्दिगेलाइको सारभि कल्दि सारभि, इङको थामे हि जेता बेबिलोनि द्याङगेलाइ हिघाहि कालाउ या मेसोपोटामियाको भेनेङ मिङ बुङ हि। लाअ्हि कालाउ हारान देराता हिलि हानिहि। कालाउ आब्राहामको आबाको सिका न्हुसो वासेहेङ परमेस्वर इङको थामेता दिङगिल्हि, जेता एला केलाइ हिनाखे। 5कालाउ आब्राहामहेङ इङको थामेता परमेस्वर जायजेथाको ते काथा मान्थु खोकोइ ताअ्का थामे बुङ मापिहि, कालाउ वाको सान्तान मान्थुलाउ बुङ इङको जायजेथा परमेस्वर इङको थामे वासेहेङ कालाउ वाको हारागुटियासो लोका सान्तानहेङ निजि सम्पतिको रुपता पिका बाचा पाहि। 6परमेस्वर या बुङ वासेहेङ दोअ्हि, “नाङको सान्तानगेलाइ बोमिको मुलुकता हानितेङ हिलि गोयावा, कालाउ उङको द्‍याङगेलाइ इम्बालाइहेङ बान्धाइति बानाइयावा कालाउ द्‍यासाइ बासार थेकापा मारेम्का ब्याबभार पावा।” 7परमेस्वर दोअ्हि, कालाउ इम्बालाइ जेदोङ जातिको बान्धाइति जेङतेङ ह्यावा उङको जातिको न्याय का पाङका। कालाउ न्हुसो इम्बालाइ इङको सारभिसो ओल्लितेङ इदोङ थामेता काङको आराधाना पावा। 8परमेस्वर आब्राहाम दोफा खातानाको चिन्हाको बाचा पाहि, कालाउ वासेहेङ बाचाको चिन्हाको रुपता ताइको जाहानको झाराङ वाबालाइको खाताना पालि दोअ्हि। कालाउ न्हुसो आब्राहामको चान इसाहाकको जोलोम जेङहि कालाउ येए दिनाता इसाहाकको खाताना पाहि। कालाउ इसाहाक याकुबको खाताना पाहि कालाउ याकुब तेन्हे कुलको खाताना पाहि।

9कुल पतिगेलाइ ताइको ओने योसेफ दोफा डाहा पातेङ वासेहेङ मिस्रो सारभिता एनोङ बान्धाइतिको रुपता पिइहि। कालाउ परमेस्वर युसुफ दोफा हिघाखे। 10परमेस्वर योसेफहेङ वाको गोताङ कस्टगेलाइसो लाअ्पातेङ मिस्रो सारभिको राजा फारोहोको आगाता वासेहेङ क्रिपा पाहि, कालाउ बुद्दि पिहि। कालाउ राजा फारोहो योसेफहेङ मिस्रो सारभि कालाउ वाको गोताङ दरबारको हाकिम बानाइहि।

11जेलाउ योसेफ मन्त्रि हिघाहि गोताङ मिस्रो सारभि कालाउ कानान सारभिता आनिकाल जेङतेङ बार्का दुख जेङहि, कालाउ केलाइको पुर्खागेलाइ चालि मानिङहि। 12मिस्रो सारभिता आन्न हि दोअ्का काथा हिङतेङ याकुब ताइको चानगेलाइहेङ लाङ पोल्ति इङको सारभिता आन्न चोल्लि दिङगिल्हि। इम्बालाइ योसेफहेङ दुसुहि कालाउ आन्न चोल्हि कालाउ इम्बालाइ योसेफहेङ चाहि मानाल्हि। 13कालाउ न्हे पोल्ति जेलाउ इम्बालाइ आन्न चोल्लि हानिहि, कालाउ योसेफ वाको दादा-ओनेगेलाइहेङ ताइको परिचय पिहि। कालाउ योसेफको जाहानको बारेता राजा फारोहोहेङ बुङ थाहा जेङहि। 14कालाउ योसेफ ताइको आबा याकुबहेङ गोताङ जाहान चुम्तेङ मिस्रो सारभिता लोलि दोअ्तेङ बानाल पिगिल्हि। कालाउ याकुब ताइको सुम कुरि तेना झनाको जाहान चुम्पुतेङ मिस्रो सारभिता लोहि। 15कालाउ याकुब मिस्रो सारभिता हानिहि, कालाउ ओताङ वा सिहि, कालाउ आले सोमोइ न्हुसो केलाइको पुर्खागेलाइ बुङ इन्ताङ सिहि। 16इम्बालाइ याकुब कालाउ वाको चानगेलाइको सिका जिउगेलाइ केलाइको सारभि कानानता चुमाहि कालाउ इम्बालाइ याकुबको सिका जिउहेङ इङको तोमता लिहि जेदोङ आब्राहाम आधे ताकाहोइ चोल्का हिघाहि। कालाउ इम्बालाइ याकुबको चानगेलाइको सिका जिउहेङ सकेम सहरता लिपुहि जेदोङ याकुब हामोरको चानगेलाइसो चोल्का हिघाहि।

17कालाउ जेलाउ परमेस्वर आब्राहामहेङ पाका बाचा पुरा जेङका सोमोइ भेरपाङ लोहि, कालाउ मिस्रो सारभिता उङको द्‍याङगेलाइ बाढेलि तेङहि, कालाउ इम्बालाइको सङख्याता ब्रिधि जेङहि। 18कालाउ न्हुसो एमि भेनेङ राजा मिस्रो सारभिता सासन पालि तेङहि वा योसेफहेङ मानाल्घाहि। 19वा केलाइको पुर्खागेलाइको बिरोधता जाल रोचिहि कालाउ इम्बालाइहेङ आत्याचार पाहि। कालाउ वा इस्राएलगेलाइ ताइको भरखर जोलोमलि दोनासात जामाललाइ स्याको दोअ्तेङ बाहार थाइगिल्लि कर लागाइहि।

20ओदोङ बेला मोसाको जोलोम जेङहि। उङको परमेस्वरको नजरता सुन्दर हिघाहि। कालाउ वासेहेङ सुम माइना थेकापा वाको आमाइ आबा म्होतेङ पोसिहि। 21जेलाउ न्हुसो म्होलि मादोअ्तेङ साअ् बाहार ताअ्लाउ राजा फारोहको चामिन्दि मोसाहेङ चुम्पुतेङ ताइकोङ चान भाइपाङ पातेङ पोसिहि। 22मोसाहेङ मिस्रिगेलाइको गोताङ बिद्‍याको बिसोइता सिक्स्या पिहि, कालाउ मोसा ताइको बोलिचालि कालाउ कामता सरबुङसाइका जेङहि।

23जेलाउ मोसा द्‍या कुरि बासार थुकाहि, कालाउ ताइको इस्राएल सानाइतिगेलाइहेङ भेतिलि बिचार वाको मनता लोहि। 24इन्ता मोसा एमि इस्राएललिहेङ एमि मिस्रि आत्याचार पाका तिङहि मोसा वाको रक्स्या पाहि, कालाउ उङको आत्याचार पाका मिस्रहेङ सेअ्तेङ इस्राएललि द्‍याङ ह्रुता जेङका आत्याचारको बाद्ला ह्रुहि। 25परमेस्वर काङकोसो दोङ इस्राएललिगेलाइहेङ बान्धाइतिसो लाअ्पालि खाङका हि दोअ्का ताइकोङ इस्राएललि ओनेगेलाइ बुझियाङबे दोअ्तेङ मोसा सोचिका हिघाहि। कालाउ इम्बालाइ या काथा माबुझिहि। 26न्हु दिना न्हेमि इस्राएललि ता-ताइमिता फेसुकाको बेलाता मोसा लोहि, वा इम्बालाइहेङ मिलि पालि कोसिस पातेङ दोअ्हि, ओइ द्‍याङगेलाइ! नेलाइ दादा-ओनेगेलाइ दोङ हिसुना कालाउ हाइ पालि नेलाइ एमिसो-भेनेङहेङ मारेम्का ब्यभाहार पासुखेना?

27कालाउ जेदोङ द्‍याङ भेनेङ द्‍याङ दोफा कुब्यभार पाघाखे वा मोसाहेङ धाकालाइहि कालाउ दोअ्हि, हासु नासेहेङ केलाइ ह्रुता सासक कालाउ न्याय कर्ता बानाइहि? 28जेसाङ नाअ् आन्जि मिस्रि द्‍याङहेङ सेन्हा, एन्साङ दोङ कासेहेङ बुङ सेअ्लि भोखेना? 29इन्सिका काथा हिङतेङ मोसा थिहि कालाउ मिस्रो सारभिसो खाअ्तेङ मिद्‍यान सारभिता हानेतेङ हि। इन्ता वाको न्हेमि चानको जोलोम जेङहि।

30मोसा मिद्‍यान सारभिता न्हे कुरि बासार हिलि दोतेङ, सिनै लाखको चाका-मान्दा थामेता दालदालाइतेङ हिका मेको झुन्झिता परमेस्वर मोसाको आगाता एमि स्वर्गदुत भाइपा देखाल जेङहि। 31जेलाउ मोसा जोल्न्हातेङ हिका झुन्झिरि तिङहि इङको चाहि मागाङघाहि, कालाउ वा भाङ-भाङहि, कालाउ वा रेम्फा खाङलि इङको झुन्झिरिको भेरपा हानिलाउ मोसा प्रभुको गाला हिङहि। 32का नाङको आबाको पुर्खा आब्राहाम, इसाहाक, कालाउ याकुबको परमेस्वर हिघा। या हिङतेङ मोसा थितेङ फिरलि तेङहि कालाउ वा खाङलि बुङ साहास मापाहि।

33कालाउ प्रभु मोसाहेङ दोअ्हि, कासेहेङ आदार पालि नाङको जुत्ता होअ् हाइपालिपानु नाअ् जाअ्का थामे पबित्तरो हि। 34मिस्रो सारभिता हिका काङको द्‍याङगेलाइ दुख कस्टगेलाइ भोगिका का तिङघा कालाउ इम्बालाइको मन आउलिका कालाउ खारतेङ हिका हिङका हिघा। ओदोङ भाअ्सिङ का इम्बालाइहेङ बान्चिपालि लोघा, कालाउ इदोइ कामको भाअ्सिङ का नासेहेङ मिस्रो सारभिता दिङगिल्लाङका।

35इदोइ मोसा, इङकोङ द्‍याङ हिघाहि जाइहेङ इस्राएललिगेलाइ हासु नासेहेङ सासक कालाउ न्याय कर्ता बानाइहि दोअ्तेङ इन्कार पाका हिघाहि। कालाउ मोसाहेङ परमेस्वर झुन्झिता देखाल परिका स्वर्गदुतसो सासक कालाउ उद्दार कर्ता बानाइतेङ दिङगिल्का हिघाहि। 36इदोङ मोसा मिस्रो सारभिता कालाउ लाल समुन्द्र पाहासो द्‍या कुरि बासार थेकापा चाका-मान्दा थामेता भारभुसाइका कामगेलाइ कालाउ चिन्हागेलाइ पातेङ इस्राएललिगेलाइहेङ बाहार चुमाहि।

37ओदोङ मोसा हिघाहि, जाइ इस्राएललिगेलाइहेङ दोअ्का हिघाहि, परमेस्वर नेलाइको भाअ्सिङ का भाइकाङ एमि ओने नेलाइको माझासो ताइको बक्ताहेङ दिङगिल प्याङ। 38वा ओदोङ मोसा दोङ जाइ पुर्खागेलाइको आगुवा हिघाहि, जेलाउ इम्बालाइ चाका-मान्दा थामेता जोम्का हिघाहि। कालाउ परमेस्वर एमि स्वर्गदुत दिङगिल्हि जाइ मोसा दोफा सिनै लाखता नुइ धुइहि कालाउ वासेहेङ केलाइको भाअ्सिङ नियमगेलाइ पिहि कालाउ मोसा इङको नियमगेलाइ केलाइको पुर्खागेलाइहेङ पिहि। इन्ता दोङ मोसा जिबन पिका बचन निङहि कालाउ केलाइहेङ पिहि।

39कालाउ बुङ केलाइको पुर्खागेलाइ मोसाको आग्या मासाहि। भरु इम्बालाइ मोसाहेङ लाअ्तेङ मिस्रो सारभिता घुरितेङ हानिलि मन पाहि। 40इम्बालाइ मोसाको दादा हारुनहेङ एसा दोअ्हि, “केलाइहेङ मिस्रो सारभिता घुरितेङ हानिका आधे देउतागेलाइ केलाइको भाअ्सिङ बानाइपि। हाइपालिपानु केलाइहेङ मिस्रो सारभिसो ओल्ला पातेङ चुमाका मोसाहेङ हाइ जेङहि माजेङहि केलाइहेङ थाहा मान्थु। 41ओदोङ भाअ्सिङ द्‍याङगेलाइ इङको दिनाता एनोङ बाच्छा भाइका मुर्ति बानाइहि, कालाउ इङकोता भोग बुङ चढाइहि, कालाउ ताइकोङ खुरहोइ इन्सिका आमेने बानाइन्हाहि दोअ्तेङ मेनाङ लेङचाहि। 42कालाउ परमेस्वर इम्बालाइहेङ लाअ्हि, कालाउ वा आकासको फुरुगेलाइ इम्बालाइको इस्वर कोनिङ आराधाना पासु दोअ्तेङ लाअ्पिहि, जेसाङ परमेस्वरको बक्तागेलाइको कितापता लेखेका हि,

‘इस्राएलको द्‍याङगेलाइ,

हाइ नेलाइ द्‍या कुरि बासार थेकापा इदोइ चाका-मान्दा थामेता

काङको भाअ्सिङ गुपुसगेलाइको कालाउ भोग भेतिगेलाइ चढाइसुन्हा?

माको, नेलाइते इङको आरु दिरगेलाइहेङ चढाइसुन्हा।

43नेलाइ ताइको दिर मोलेकको मुर्ति

कालाउ रेफन फुरुको मुर्ति हिका पाल ल्होपा सुन्हा।

कालाउ पुजिलिको भाअ्सिङ इङको मुर्तिगेलाइ बानाइसुन्हा।

ओदोङ भाअ्सिङ का नेलाइहेङ दन्ड पिलि

बेबिलोन सारभि पारि थेकापा दिङगिल्याङका।’

44चाका-मान्दा थामेता केलाइको पुर्खागेलाइको साक्सिको खोपारा हिघाहि। मोसा इङको साक्सिको खोपारा चाहि परमेस्वर तिङपाका नामुना आन्सार दोङ बानाइका हिघाहि। 45हेन्जा बासार न्हुसो, यहोसु केलाइको पुर्खागेलाइहेङ बो जातिगेलाइको सारभिगेलाइहेङ खाबाराता चुमालाउ आगुवाइ पिहि। कालाउ परमेस्वर इङको बो जातिगेलाइहेङ गिल्हि कालाउ केलाइको द्‍याङगेलाइ इदोइ नावा सारभिता हानिहि। इङको सोमोइता इम्बालाइ इङको पाल बुङ चुमाहि जेदोङ इम्बालाइ ताइको पुर्खागेलाइसो निङका हिघाहि। कालाउ राजा दाउदको सोमोइ थेकापा इङको पाल इन्ताङ दोङ हि। 46राजा दाउद परमेस्वरको दाया निङहि, कालाउ याकुबको परमेस्वरको भाअ्सिङ एनोङ मुन्दिर धाम्लि पि दोअ्तेङ परमेस्वरहेङ सेउपाहि। 47कालाउ परमेस्वरको भाअ्सिङ मुन्दिर चाहि वाको चान सोलोमोन धाम्हि।

48कालाउ द्‍याङको खुरहोइ धाम्का मुन्दिरगेलाइता सर्बोच्च परमेस्वर माहिखे, जेसाङ यासाइया परमेस्वरको बक्ताको कितापता लेखेका हि, परमेस्वर दोअ्खे,

49‘स्वर्ग काङको सिङहासन दोङ कालाउ

प्रिथिबि काङको पाइताला ताअ्का थामे।

कालाउ नेलाइ काङको भाअ्सिङ

हिसिका खाल्को मुन्दिर धाम्स्वाना?

काङको आराम पाका थामे हिसो हि?

50हाइ का दोङ इदोइ गोताङ आमेनेगेलाइ बानाइका माको रो?’

51ओइ राङका द्‍याङगेलाइ, नेलाइ वाको आग्या केम्लि कालाउ हिङलि इन्कार पासुखेना, कालाउ नेलाइ जेलाउ बुङ पबित्तरो आत्माको बिरोध पासुखेना। नेलाइको पुर्खा जेसाङ पाहि नेलाइ बुङ इन्सिकाङ पासुखेना। 52नेलाइको पुर्खागेलाइ गोताङ परमेस्वरको बक्तागेलाइहेङ साताइहि, कालाउ ख्रिस्ट जाइ धर्मि हि दोअ्तेङ बानाल हिङपाका परमेस्वरको बक्तागेलाइहेङ सुधाङ इम्बालाइ सेअ्हि। कालाउ जेलाउ ख्रिस्ट लोहि वासेहेङ बुङ धोका पितेङ नेलाइ सेअ्सुन्हा। 53नेलाइ इङकोङ द्‍याङगेलाइ हिसुन्हा जाइ स्वर्गदुतगेलाइ पिका मोसाको व्यवस्थाहेङ माकिसुन्हा कालाउ पालन माकेम्सुन्हा।”

स्तिफनहेङ उन्ठुइहोइ तोअ्तेङ सेअ्हि

54जेलाउ यहुदि आगुवागेलाइ इदोइ काथा हिङहि कालाउ ओबालाइ चेर ताम्पातेङ हि कालाउ स्तिफनको बिरोधता तासिङ रेअ्लि तेङहि। 55कालाउ स्तिफन चाहि पबित्तरो आत्माहोइ पोङघातेङ आकास भारि म्हाल्तेङ खाङतेङ हिघाहि। कालाउ वा परमेस्वरको महिमा कालाउ येसुहेङ परमेस्वरको दाम्पाहा भारि जाअ्तेङ हिका तिङहि। 56स्तिफन दोअ्हि, “खाङसु! का आकास हेन्हाका कालाउ द्‍याङको चान परमेस्वरको दाम्पाहा भारि जाअ्तेङ हिका तिङदोङखा।”

57ओदोङ घुरि गोताङ यहुदि आगुवागेलाइ ए दोफाङ बार्का गालाहोइ ह्रिकाइकाताङ ता-ताइको न्हातोङ थुम्हि। कालाउ ओबालाइ झाराङ ए दोफाङ स्तिफन भारि झाअ्मिरिहि। 58ओबालाइ स्तिफनहेङ उन्ठुइहोइ तोअ्तेङ सेअ्लिको भाअ्सिङ यरुसेलेम सहरसो हेरतेङ बाहार ओल्लेपाहि। कालाउ द्‍याङगेलाइ जाइ स्तिफनहेङ दुसिघाखे ता-ताइको कोट होअ्तेङ साउल दोअ्का वाजानको जिम्मा लागाइतेङ स्तिफनहेङ उन्ठुइहोइ तोअ्लि तेङहि।

59जेसाङ ओबालाइ स्तिफनहेङ उन्ठुइहोइ तोतेङ हिघाहि, वा प्रार्थाना पाकाताङ हिघाहि कालाउ वा दोअ्हि, “प्रभु येसु काङको आत्माहेङ ग्रहन पापि।” 60वा तिरु थोतेङ बार्का गालाहोइ ह्रिकाइतेङ दोअ्हि, “हे प्रभु इदोइ पापको दुसिका एबालाइहेङ मालाग्याको” इदोइ झोको दोअ्लि दोअ्तेङ वा सिहि।

Currently Selected:

साल्न्हाका चात्या 7: DHINT

Highlight

Copy