Kisah Para Rasul Uram 19

Er Paulus Efesus atei bindoka kuramwe uram

19:1-10

1Ura, er Apolos bira Korintus atei asi tuba kuramwe bok, er Paulus bira yuk mutuk-yuk mutuk yibarkiringnamwe ani, Efesus atei yanmou. Yanmou ura, erci nun Du Yesus bisi miliramnyi nang mikbaryi ab ebdanmai. 2Ebdanmaici, er Paulus biryi sunsi ato eboka asibdenmou, “Ni kwit yabwe, sunda nun Du Yesus bisi dib tenebkalibmandau ba, Er Imtamnyi biryi Er Kanya Roh Kudus sunsi dongobmasou do kum do?” Ato eboka asibmou ba, sunci ersi, “Kum, Er Imtamnyi Kanya Roh Kudus kurur ara nun kum kekebmoubwe,” ebmai. 3Ato ebmai ba, er Paulus biryi sunsi, “Ato ebmarum ura, ninyi aryi sunsi me dongobmasei ara, unanyi si siboka me dongobmasei do?” Ato eboka asibmou uca, sunci ersi, “Er Yohanes biryi ninyi me dongoramwe to, ninyi aryi nunsi me dongobmasei,” ebmai. 4Ebmai uca, er Paulus biryi sunsi ato ebmou, “Er Yohanes biryi ato eboka etereramwe, ‘Sunci sun malyi kun dinyi takloboka Er Imtamnyi kanya asi teleb kurdeirin dinyi akwe kubdarur,’ eboka etereramuryi, erci sun malyi kun dinyi taklobmai nang asi me dongoramwe. Me dongoramuryok, erci sun buluryangaramnyi nang asi ato eramwe, ‘Ni dongtam yankwandanyi bisi dib tenebdarur,’ eramwe. Ara, nun Du Yesus kum yanmou bok, er Yohanes biryi nun Du Yesus bira dongtam yankwamunyi biti ato eboka etereramwe,” ebmou. 5Er Paulus biryi ato ebmou ba, a nang aryi, “Nai o, Er Yesus si deib aryi me dongobsurum,” ebmai uca, erci sunsi me dongobmou. 6Me dongobmou ba, er Paulus biryi er taruk sun deici deibmou uca, Er Imtamnyi Kanya Roh Kudus sun dam yuryanmou. Er Imtamnyi Kanya Roh Kudus yuryanmou akiryi, a dib tenen nang aryi sun minob kum eramnyi to uram yuk-yuk ebmaici, Er Imtamnyi Uram ebmurubmai. 7Er Imtamnyi biryi Er Kanya Roh Kudus dongobmou nang ara ninyi amolbaryi nang asi dongobmou.

8Ura, er Paulus biryi sun akatei kuramnyi Yahudi yala nang aryi buluboka Musa Uram eteren ai wengbindokaburyi, erci ilil kum asa aryi, “Er Imtamnyi biryi arungsurur ati, ersi milibdarur,” en deyok ati etereramwe. Ara, wala winiryi kuboka erci uram ebdaraboka, “Nun Du Yesus bisi dib tenebdarur,” eboka etereramwe. 9Ato eboka etereramwe bok, Yahudi ton nang aryi, “A eterena uram asi kekena nun li,” tenebmaici, sunci, “A uram ara malyi uram aca,” eramnyi. Ara, ninyi ilinto kekebmai ba, sunci ato eramnyi. A deyok aryi, er Paulus ab sun dib teneramnyi nang ab aryi sun Yahudi yala nang molon ai aryi sakweteboka yuk ai bindoka bulubmai. Ara, ninyi si Tiranus eterena ai bindoka bulurbaramnyi. Bulurbina ura, er Paulus biryi Teleb Uram tuba-tuba etereramuryok, erci sun er uram kekebmai nang asi, “Er Yesus bisi dib tenebdarur,” eramwe bok, uram sisingnamnyi. 10Ara, er Paulus biryi ato kuramwe ura, kwalina bitinyi kwalibmou. Kuramwe uca, sun Asia mutuk a kuramnyi nang nirya aryi Er Imtamnyi Uram kekebmai. Ara, sun Yahudi yala nang ababyi sun Yunani yala nang ababyi nun Du Yesus uram Teleb Uram kekebmai.

Skewa er mabwe aryi, “Isa asi yakdonoktibyi,” tenen ukubdenmai uram

19:11-20

11Ura, er Paulus biryi Er Imtamnyi Uram etereramwe ba, Er Imtamnyi biryi ersi miliboka iya ilil weik tenen dinyi kikniramwe. 12Ara, sun ninyi aryi er Paulus taruk kilina asi bobin ura, u yin nang deici deibdongobne uca, “Nai e,” a nang ara nakiroramnyi. Tonda, er Paulus biryi der aringnamwe kain asi doboka abniryi, u yin nang deici deibdongobne uca, a nang ara nakiroramnyi. Tonda, er Paulus biryi sun ninyi koukwe umbura wekan isa yakwetebne ba, anabkaboka baroramnyi. 13-14A talak ara isa yangdonongna nang tabaryi Efesus atei asi yanmai. A nang ara Yahudi yala nang ninyi si Skewa er mabwe asi yanmai. Anyi Skewa bira Er Imtamnyi kan ninyi kan antanirdeirin deyoknyi kuramwe. Kuramwe bok, er mabwe tabaryi ara akatei okatei bina yibinkirikoka, isa asi yakdonoknin yibaramnyi. Yibaramiryi, Efesus atei yanmai ura, sunci, “Er Yesus si siboka isa yakdonoktibyi,” tenen ukubdenmai. Ukubdenmaici, sunci isa asi, “Er Paulus biryi si siramunyi si Yesus deib aryi yakwetebkwinsib,” ebmai.

15Ebmai ba, isa aryi yu weik kuboka sunsi ato ebmou, “Er Yesus si ara ni bingnun. Er Paulus si ababyi ni bingnun. Eda, sun si ara ni kum bingsunun. Sunci nisi yakdonoknumunyei,” ebmou. 16Isa wekamunyi biryi ato ebmou cok, erci sun Skewa mabwe asi kablibokaburyi, taleboka obmou. Taleboka onmouci, sun ongon aling kwilikmou ba, dilaka ilinto sakmou. Sakmou bok, Skewa mabwe ara sun ilil aryi cungdorbinmai. 17Ura, sun Yahudi yala nang nirya ab ton sun Efesus nang nirya aryi a kubmou to kekebmai ura, sun kanya ilil weik kubmou. Ilil weik kubmou akiryi ninyi nirya aryi Er Yesus biti, “Nun nai,” tenebmai. 18Ura, dib tenebmai nang ilinto aryi, “Lak ebtibyi,” tenen sunci sun malyi kuramnyi dinyi nirya lak ebmai. 19A nang kankan ara kwemdeina si siboka ninyi kweten nang ton, kir don nang ton kuramnyi. A nang ara, “Er Yesus bisi milibtibyi,” tenen sun kwemdeina dinyi eterena kerek sengna nirya asi bulubdeiboka uk dabmai. Ninyi ilinto asing dinmai bok, sunci sun kwemdeina kerek sengna ara dengna weik kareboka dekamnyi dinyi asi uk dabmai. 20Ato kuboka ninyi ilinto aryi nun Du Yesus uram Teleb Uram kekebmaici, dib tenebmai.

Sun Efesus atei nang aryi yu kuboka bulubmai uram

19:21-41

21A sirya ura, er Paulus biryi, “Makedonia mutuk ton Akhaya mutuk ton yibindoka abniryi, Yerusalem atei binkwan,” tenebmou. Tenebmou cok, erci ato ebmou, “Yerusalem atei binmanyi ani, iya weik sien atei Roma asi binkwan. Er Imtamnyi biryi ato eboka arukmanir uca, Roma atei bana ara bisik sekman kum kurur,” ebmou. 22Ato ebmou ura, er Paulus biryi er milirandei nang si Timotius ab Erastus ab asi ato eboka ebdeibmou, “Ni kwit yabwe. Nira uki mitikanun Asia mutuk kunmanyi ura, sunda Makedonia mutuk dam birurum. Ura, uki mikbaryi mabmabnyi ani, nira sun dam yankwan,” eboka er Paulus biryi er kwit yabwe Timotius ab Erastus ab asi Makedonia mutuk bokdonokmou.

23Bokdonokmou ura, er Paulus bira Efesus atei a kuramwe ba, Efesus atei nang ilinto buluboka uram lilim weik eboka, “Er Yesus eterena nun li,” ebde banmai. 24Ninyi si Demetrius biryi deyok koubmou uca, sun yuk nang ababyi ersi miliboka, “Er Yesus eterena nun li,” ebde banmai. Anyi Demetrius bira dengna weik keil si perak doboka utotoa dinyi kikniramunyi kuramwe. Kuramuryok, erci keil si perak aryi doboka kwemdeina molon dinyi kikniramwe. Ninyi ilinto aryi, “Kwemdeina dinyi dektibyi,” teneramnyi ati, er Demetrius ab ton kwemdeina dinyi kikniramnyi nang yuk nang ab aryi co bok ilinto dororamnyi. 25Dororamnyi bok, ninyi ilinto Er Yesus bisi dib tenebmai ati, er Demetrius biryi ato tenebmou. “Ninyi ilinto aryi Er Yesus bisi dib tenebingiryi, kwemdeina dinyi takloboka, kwemdeina dinyi tubto kum dekingnyei. Ato kuboka, co bok waniksinibingnyei,” tenebmouci, er Demetrius biryi er kwit yabwe kwemdeina dinyi kiknin nang ab ton sun perak doboka utotoa dinyi kiknin nang yuk nang ab asi nabmou. Nabmou ba, sirya bulubmai ura, er Demetrius biryi sunsi ato ebmou. “Ni kwit yabwe o. Nunda nun kwemdeina ner si Artemis molon dinyi kikninub uca, co bok ilinto doramib. 26Asi, ukuryok ara, anyi Paulus biryi etererande uram asi sun nirya kekebmarum. Ara, erci ato erur, ‘Ninyi aryi kiknibmangnyi dinyi ara talyi dinyi akwe kurur. A dinyi ara molon dinyi diboka kum kurur.’ Ato eboka malyi uram etererande uca, ninyi ilinto ersi milinung ara sun asing eibmandau. Ara, nun atei Efesus nang akwe kuma. Eda, nun mutuk Asia nirya ninyi ilinto aryi er eterena uram asi dib tenebmang. 27A deyok aryi, ninyi nirya aryi, ‘Kwemdeina molon dinyi asi tubto dekibyei,’ eboka nun kikniramib dinyi dokdonokingnyei. Tonda, ninyi nirya aryi nun kwemdeina molon ner si Artemis bisi dokdonokoka ina ngilikingnyei. Ninyi nirya nun du ner si weik eraming. Ara, nun mutuk Asia nang ab sun im dangna tukwe dangna nang nirya aryi ato kuraming. Kuraming bok, ukuryok ara ninyi nirya aryi nun du ner Artemis asi ina ngilikingnyei,” ebmou.

28Er Demetrius biryi ato ebmou ba, sun bulubmai nang sun kanya asi yu weik kubmou. Yu weik kubmou bok, sunci ngolokoka uram weik ebde banmai. Ara, sunci, “Nun du ner Artemis bira iya erebdob ner kusurur. Ati, nun Efesus nang ara Artemis bisi tuba-tuba molobkwayeb,” ebmai. 29Ato eboka ngolokde banmai ura, sun Efesus nang yuk nang ababyi bulubmaici, sunbabyi miliboka uram doboka ngolokde banmai. Ngolokde banmai cok, sun bulubmai nang aryi Gayus ab Aristarkhus ab asi asing eibmai. A bitinyi nang ara Makedonia mutuk nang asi, er Paulus ab tonkwa milin nang kurandei. Sun bulubmai nang aryi a nang asi asing eibmai ura, sunci a bitinyi nang asi taleboka sun Efesus nang buluramnyi ai kiliboka bobinmai. 30Kiliboka bobinmai ba, er Paulus biryi, “Ni kwit yabwe asi lemdeirbitinyi,” tenebmou. Tenebmou bok, sun akatei kuramnyi dib tenen nang aryi er Paulus bisi bisik sekmai. Ara, sunci ersi ato ebmai, “Kanda adikum biminyi asi sun a bulubmang nang aryi kansi obkingnyei ati bana mem,” ebmai. 31Ura, sun Asia mutuk sien nang ton nang ara er Paulus uruna nang kuramnyi. A sien nang aryi sun arungna nang asi bokdonokmai ura, sunci er Paulus bisi uram ton ebdeibmai. Ara, sunci, “Kanda sun Efesus atei nang buluraming ai ara bana mem,” eboka bokdeibmai.

32Ura, er Paulus kum binmou bok, sun Efesus atei nang buluramnyi ai asi ninyi ilinto buluryanmai. Buluryanmai bok, sun kanya kankana kubmou. Ara, ninyi ilinto bulubmai uca, sunci, “Una deyok aryi bulubmab do?” tenen bita kum bikdanmai. Sun kanya kankana kubmou bok, ton nang ara yuk dinyi eboka ngolokmai bok, ton nang ara yuk dinyi eboka ngolokmai. 33Tuba ngolokmai bok, sun akatei kuramnyi Yahudi yala nang aryi, “Sun Efesus atei nang aryi nunda Yahudi yala nang asi tatab-tatab ebsingnyei,” tenebmai. Tenebmai ati, sunci ninyi si Aleksander bisi, “Kanci nunsi libdobsurum,” ebmai. Ebmai cok, sunci ersi menekeiboka dokdonoknin binmai. Ura, sun bulubmai nang kankan nang ninyi mikbaryi aryi, “Ato-ato ebdum,” ebmai ura, er Aleksander biryi ninyi urasintam tikokmou. Tikokaburyi, erci, “Ni limdana uram asi kekebting,” tenen erci er taruk mobmob ebdongobmou. 34Mobmob ebdongobmou bok, sun bulubmai nang aryi asing eibmai ura, sunci, “Anyi bira Yahudi yala nang kurur ati, er uram kekena nun li,” tenebmai. Tenebmai cok, sunci uram weik ngolokoka, “Nun du ner Artemis iya erebdob ner kusurur. Artemis bisi nun Efesus nang aryi tuba-tuba molobkwayeb,” eboka uram donmai asi kiting yakna bitinyi bisibmou bok, sunci antaniboka ato ebde banmai.

35-36Ebde banmai bok, sienyi tentok aryi tikokaburyi, erci sunsi, “Uram kilikdarur,” ebmou uca, sun uram doboka ngolokmai nang uram kilikmai. Kilikmai ura, a sienyi bira uram sengkwetena kerek sengnamunyi biryi sun bulubmai nang asi ato ebmou. “Ni kwit yabwe Efesus atei nang o. Nunda Efesus atei nang ara nun du ner Artemis er ai kalingna nang kunub. Sun im dangna tukwe dangna nang nirya aryi a bingnung. Tonda, kwemdeina keil ara imtam aryi kuboka sakmou asi nunda Efesus nang aryi kalingnub. A dinyi ara ninyi tentok ababyi, ‘Tola,’ kum ebte. A deyok aryi, sunci uram kilikmunci, talyi dinyi ukubmunyei. 37Sun taleboka boyanmarum nang ara malyi dinyi kubmaring do? A nang ara nun molon ai asi wekoka dengna weik dinyi ukula dobmaring do? Ato tenen kum. A nang ara nun du ner Artemis bisi ina ngilikmaring do? Ato tenen kum. 38Er Demetrius ab sun er ab tonkwa neik wa in nang ab aryi a nang asi tatab-tatab ebtingnyi ura, sunci a nang asi sun deyok liliboka uram sengkwetena nang urasintam tatab-tatab ebting. Ara, deyok lilibkwaming uki tum dibde buktingnyi ura, sunci a nang asi tatab-tatab ebting. 39Ura, sunci, ‘Uram ton sisikwayeb,’ tenebdate ura, nun sien nang aryi sunda Efesus nang asi nabibyi ura, uram liliboka sisiktibyi. 40Ukuryok ara talyi deyok ati bulubmarum ati, sun yuk atei-yuk atei nang aryi nunsi tatab-tatab ebsingnyei. Ara, sunci nunti, ‘Weik sienyi si Kaisar uram yan yanibmang,’ eboka tatab-tatab ebsingnyei. Talyi deyok ati bulubmarum ati, lilibdanman kum kubibyei,” ebmou. 41Er uram sengkwetena kerek sengnamunyi biryi ato ebmou ura, erci sun bulubmai nang asi, “Sun ai yuk-yuk bindarur,” ebmou. Ato eboka bokdonokmou ura, sun Efesus atei nang ara sun ai yuk-yuk binmai.

Currently Selected:

Kisah Para Rasul Uram 19: MTG

Highlight

Copy