Kisah Para Rasul Uram 10
10
Er Petrus ab yin doun nang sienyi si Kornelius ab ebdanmarei uram
10:1-48
1Kaisarea atei aryi ninyi tentok si Kornelius kuramwe. Anyi bira sun Roma atei yin doun nang meici kukoka yubwa si, “Italia,” wekamunyi kuboka seratus baryi nang asi bomenengnanyi kuramwe. 2Anyi Kornelius bira telebto kuramuryok, er ab er mabwe silib ab aryi Imtamnyi bisi boukwe kuboka Er Uram kekeramnyi mabwe silib kuramnyi. Erci sun bona bon kum nang asi kareramunyi kuramuryok, erci Er Imtamnyi bisi tuba-tuba moloramwe. 3Uki tentok tum aryi, kiting yakna winiryi kubmou ba, Er Imtamnyi Uram eryuryangananyi tentok yandoka, “Kornelius,” eboka ersi nabmou. 4Asi, Er Kornelius biryi ersi eibmou ura, ilil kuboka, “Ni nai, unatoa do?” eboka asibmou. Asibmou ba, erci ersi, “Er Imtamnyi biryi kan molorandim to kekeboka teneibmakir. Tonda, kanci sun bona bon kum nang asi karerandim ati, Er Imtamnyi biryi asing eiboka teneibmakir. 5Ati, ukuryok kanci ninyi arukminyi ba, Yope atei bindoka ninyi tentok si Simon, uruma si Petrus bisi nambinung. 6Anyi bira ninyi si Simon bisam kala kikninanyi ab tonkwa kunmaring. Er ai ara me kwan lingkwa damasi kurur,” ebmou. 7Er Imtamnyi Uram eryuryangananyi ato ebmou ura, bindobmou. Ura, er Kornelius biryi er ai wa in nang bitinyi ton, yin dounanyi tentoknyi bira er kwit urunanyi kuboka telebto kuramunyi ton asi nabmou. 8Nabmou ba, yanmai ura, erci sunsi, “Ato-ato kubdurum,” eboka nukmouci, “Yope atei asi bindarur,” eboka arukmou ba, er Petrus bisi nambinmai.
9Binmaici, mabmai ani, Yope atei dam yanganmai. Yanganmai ani, kiting yakna winiryi kubmou ba, er Petrus biryi Er Imtamnyi bisi molobkwamou ati alib ai welebinmou. 10Ara, yibkwamaici, kwaning kikninmai ba, er Petrus atan aryi, “Kwaning yibtinyi,” tenenmou ba, kunumna asing eibmou. 11Ara, imtam kukmou ba, kut kala aling ato dinyi tukwetam asi yuryanmou asi asing eibmou. Akaling kubkub dumbaryi asi tukwetam dobkwetebmou. 12Akaling umbura ara yan deib yibarande dinyi utotoa ab, mundu deib yibarande dinyi utotoa ab, maka utotoa ab asing eibmou. 13Asing dinmou ba, imtam aryi kuboka uram ton ebmou, “Petrus, ur oyibdum,” ebmou. 14Ebmou bok, er Petrus biryi uram doboka, “Nai Imtamnyi, ni kum yibkwan. A dinyi ara, ‘Yina mem,’ teneramib dinyi ati, ton yina kum yibkwan,” ebmou. 15Ebmou bok, imtam aryi kuboka uram tubto ersi ebmou. Ara, “Er Imtamnyi biryi, ‘Ur yibdum,’ ebmaci dinyi asi kanci, ‘Mem,’ ena mem,” ebmou. 16Ura, liki bitinyi winiryi dinyi neiktoto kubmou ura, a kut aling tubto imtam libdobmou.
17Libdobmou ura, er Petrus biryi, “A kunumna ara una kubkwande ati eibman do?” teneboka er kanya kankana kubmou. Kankana kubmou ba, kanya teneinmou talak aryi er Kornelius biryi arukmou nang aryi yanganmai ani, “Simon ai dantam da?” ebmaici, bublan dam tikmai. 18Asibmai cok, sunci, “Ninyi si Simon uruma si Petrus akai ton kurur do?” eboka asibmai.
19Asibmai bok, er Petrus bira a kunumna ati teneinmou bok, Er Imtamnyi Kanya Roh Kudus aryi ersi ato ebmou, “Petrus kan dirum, ninyi winiryi aryi kanti ingkiringmaking. 20Ati, kanci yurbiminyi ura, a nang asi ur milibdum. Niryi a nang asi arukmonwe ati, kan kanya kankana kuna mem,” ebmou.
21Er Imtamnyi Kanya Roh Kudus aryi ato ebmou ura, er Petrus biryi yurbindoka a nang asi eiboka, “Ni kwit yabwe, sunci niti ingkiringmanurum do? Sunda una kuryanmarum do?” eboka asibmou.
22Asibmou uca, sunci ersi ato ebmai. “Nai, nun nai Kornelius bira yin doun nang seratus baryi bomenengnanyi biryi nunsi arukmasou ba, yanmab. Nun nai bira teleb kuboka kururnyi ton, Er Imtamnyi bisi boukwe kuboka Er Uram kunururnyi kurur ati, sun Yahudi yala nang nirya aryi ersi kisal dangnung. Er Imtamnyi Uram eryuryangananyi biryi nun nai bisi yandoka, ‘Kanci arukminyi ba, er Petrus bisi nambingnyi ura, erci kan ai yaci ura, erci eterebkwansir uram kekebkwandum,’ ebmou ati yanmab,” ebmai. 23Ebmai ura, er Petrus biryi sunsi, “Ni ab tonkwa mabmabyi ani, ambutum aryi binkwayeb,” ebmou. Mabmai ani, berekwe ura, er Petrus ab a nang ab tonkwa Kaisarea atei banmai. Ura, sun Yope atei kuboka Er Yesus bisi dib tenen nang mikbaryi ababyi sun ab tonkwa miliboka banmai. 24Banmai ani, bisik ai mabmai ani, berekwe ura, Kaisarea atei binmai. Binmai bok, er Kornelius biryi sunsi dibde bukmouci, erci er yala nang ab er kwit yabwe ab asi nabmou ura, bulubmai. 25Ura, Petrus er ai wekmou ba, er Kornelius biryi kutam ikdongoboka ersi kibdobmou. 26Kibdobmou bok, er Petrus biryi er taruk taleboka, “Tikokdum. Nira ninyi sirik aca,” ebmou.
27Kibdandoka uram sisikdei ura, ai umbura wengbindoka dinmou uca, ninyi ilinto wekmai asi eibmou. 28Eibmou ura, er Petrus biryi sunsi ato ebmou, “Ni kwit yabwe, nun Yahudi yala nang ara, ‘Yuk yala nang ab uruna ati sun ai asi wengna mem,’ enub ati, bikmarum. Enub bok, Er Imtamnyi biryi nisi eterebnou ara yuk yala nang asi kisirona kum. Ara, mem en yina ati, ‘Ur yibdum,’ eboka Erci nisi ato ebdeibnou. 29A deyok aryi, kanci nisi nabmanoumwe ba, niryi, ‘Ni li,’ tenena kum uca yanman. Ati, ukuryok kanci, ‘A deyok ati nabmakunwe,’ eboka lak ebnurum,” ebmou.
30Er Petrus biryi ato eboka asibmou ba, er Kornelius uram doboka ato ebmou, “Ni tum sintam kiting winiryi kuabwe bok, nira Er Imtamnyi bisi molonmase. Molonmase bok, lukdandoka ninyi tentok kait aling ongobmunyi ni dam tingyanmou. 31Tingyanmou cok, erci nisi, ‘Kornelius, Er Imtamnyi biryi kan molona asi kekebmakir. Tonda, kanci sun bona bon kum nang asi karerandim ati, Er Imtamnyi biryi teneibmakir. 32Ati, kanci ninyi arukmin ba, ninyi si Simon uruma si Petrus bisi nambinung. Anyi bira ninyi si Simon bisam kala aling kikninanyi ab tonkwa kunmaring. Anyi ai ara me kwan lingkwa dam kurur ati ebman,’ ebmou. 33Er kait aling ongobmounyi biryi ato ebmou ba, niryi arukmase ati, a nang aryi kansi nambinmakei. Ati, kan yanmarim ara ni kanya teleb kubmanir. Nun nirya ara, ‘Er Imtamnyi biryi kansi ebdeibmakou uram asi kekebtibyi,’ tenen Er Imtamnyi urasintam ato buluboka wekmab,” eboka Kornelius biryi ebmou.
34Er Kornelius biryi ato ebmou ura, er Petrus biryi sun bulubmai nang asi ato ebmou. “Ni kwit yabwe, Er Imtamnyi bira ninyi wimna kum kururnyi kurur ati, ukuryok aryi ni bikdobman. 35Ara, im dangna tukwe dangna yala nang kankan Ersi boukwe kuboka Er Uram kunuramingnyi nang ab teleb kuboka kuramingnyi nang ab asi Erci dororande. 36Er Imtamnyi biryi sun Israel yala nang asi a Teleb Uram ebdeibmou. Ara, sun im dangna tukwe dangna nang sienyi si Yesus Kristus biriman aryi ninyi nirya ara antanibdeibkwande ati ebmou. 37Ni kwit yabwe, sunci sun Yahudi yala nang nirya aryi ebde baraming uram asi sirya kekerandau. Ara, er Yohanes biryi Galilea mutuk aryi deyok kouboka, ‘Me dongobkwansin,’ eboka etereramwe. 38Etereramwe ura, Er Imtamnyi biryi Er Yesus Nazaret ateinyi bisi Er Kanya Roh Kudus karebmouci, Ersi mikib kubdeibmou. Kubdeibmou ba, Er Yesus biryi telebto kuboka sun isa wengnamwe nang asi yakdonokoka kweteramwe. Ati, Er Imtamnyi biryi Yesus bisi miliramwe ena uram kekerandau. 39Ati, nun Yahudi mutuk ab Yerusalem atei ab aryi kuramwe to ara nunci asing eiramoubwe. Ara, Er Yesus bisi co lase deici likniboka obmai ati ebman. 40Obmai ba, dibmou ani, uki winiryi tum berekwe ura, Er Imtamnyi biryi Ersi kam bukeibmou. Ura, Erci ninyi ab ebdandoka, ‘Kam bukokman,’ eboka sun dam lak kibde yibinmou. 41Ara, ninyi nirya asi lak kum kibmou. Erda Er Imtamnyi biryi minob wiansou nang asi lak kibmasou. Lak kibsou ura, nunda kam bukokmounyi ab tonkwa yiramoubwe. 42A sirya ura, Erci nunsi, ‘Ni kwit yabwe, sunci ninyi nirya asi Teleb Uram etereboka Niti, “Anyi biryi kam nang ab din nang ab asi liliboka wibkwande ati, Er Imtamnyi biryi Ersi erebdeibwe,” lak ebdarur,’ ebdeibsou. 43Sun minob Er Imtamnyi Uram ebdeibmaci to lak etereramnyi nang nirya aryi Erti kerek sengnamnyi. Ara, ‘Anyi bisi dib teneramingnyi nang nirya ara Er Imtamnyi biryi Anyi si deib aryi sun malyi dinyi kilibkwande.’ Ato eboka kerek sengnamnyi,” ebmou.
44Er Petrus bira a uram tuba enmou bok, Er Imtamnyi Kanya Roh Kudus aryi sun ersi kekenmai nang dam yuryandoka sun kanya yuk-yuk asi langkibdeibmou. 45Sun er Petrus ab tonkwa yanmai Yahudi yala nang aryi asing eibmai ura, sunci, “Nai e, sun yuk yala nang sun dam ababyi Er Imtamnyi Kanya Roh Kudus yuryanmar,” tenebmai. 46Ara, er Kornelius mabwe silib aryi sun kum bingdamnyi uram deib aryi Er Imtamnyi si weik ebmai ati, “Nai e,” tenebmai. Ura, er Petrus biryi ato ebmou. 47“Er Imtamnyi biryi nunda Yahudi yala nang asi Er Kanya karebmasou to, Erci ukuryok sun yuk yala nang ababyi Er Kanya Roh Kudus asi karebmar. Ati, a nang asi me dongona ara ninyi nirya aryi bisik sekingnyei tenen ebman,” ebmou. 48Ebmou cok, er Petrus biryi sunsi, “Er Yesus si deib aryi me dongona teleb,” eboka arukmou. Sirya me dongobmai ura, er Kornelius mabwe silib aryi, “Nun ab tonkwa kunmabyi ani,” eboka molobmai ura, er Petrus uki mikbaryi sun ab tonkwa kubmai.
Currently Selected:
Kisah Para Rasul Uram 10: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
