Mhasidie 28
28
Kerüzhü mu Kemiatho
1Miapuorei u whuo tuo morei kerüzhümiae ta tuoya,
derei kemiathomiae losha tuoi thepfu thaya.
2Krüta kekra bata liro
kijüu keperhie bataya;
derei mhasimhale kenyimia ba ro
süu khrukhre di ba pechalieya.
3Kekuokesemia#28:3 Cn: Ibri Kejümia. thuo kejümia pesekecüe teirü phi di
kecüca peka lotsokewa mhie zo.
4Thezho medziyakemomia kerüzhümia tshetuoya,
derei thezho-u se bayakezhamia süko ze keperhieya.
5Themia kesuokoe kethocau silieya mo,
derei Jihova pfhüyakezhamiae mha pete siya.
6Mhajü rei kemiatho cha nu ketuomia we kenyimia chü di dietho mo ketuou ki vikuo.
7Thezho-u se bakeliemia sü kesimia nuonuo zo,
derei kecahuokecümia ze kepekroyakezhamia puo puo bu mengalieya.
8Puoprapuoshü geinu mevipie puo kinyi chü pekralieyakezhaue
kejümia ngumezhieyakezhamia puo la kengupie keba zo.
9Thezho-u rünyü mvü di puo nyie kerei seketamia
puo kecha zorei kerütsetaya.
10Kemezhümia ketsipie kesuo cha nu
shüyakezhau puo thuo puo kheho nu tetsutuo,
derei kejo kejümia mha kevi welietuo.
11Kenyimia puo mhiki puo thuo puoü mhasi übaya,
derei mhacamhala siyakezha mhakejüue kenyiu pfhü se parshüya.
12Kemiathomia kuokelie ki, u neithor baya;
derei kerüzhümia kuo sierta tse, themiako u thuo u kevietaya.
13Puo kephoumako whese ketuomia vi kehielie lho,
derei phrawa mu süko khawaketamia ngukemezhie ngulietuo.
14Khrüprei jü mo di tuoyakezhamia thejakepfütho zo,
derei puo nou keremia mha kere nu tetsutuo.
15Kerüzhümia kejümia mho dikecüe
losha kemeho mu thega mia whuo kevo tuoi zo.
16Mhasimhale kejü kezhaue puo zhosuo di mia peseya;
derei mha dietho kemo ngumecüyakezhamia puo teisozhako chü pechalietuo.
17Mia puoe mia zie pupie pfüta ro,
puo se ketso puo bu kitamia chütacie;
miapuorei bu puo khruohi hie.
18Lhou mezhü tuoyakezhamia kelalietuo,
derei puo chako kekrükecümia te Thekhe nu tsutatuo.
19Lie ciekeliemia kecüca kekra batuo,
derei kemethuo puo sie whuo ketuomia mhajü pfütatuo.
20Kemiathomia theja kekra ngulietuo,
derei mhanyi mhailie nyü kebamia siazha ngu motalie lho.
21U nei si kreikecü vi mo,
kekreilamonyü niekhrüda yopuo la themia kekrütaya.
22Kemeteimiae mhanyi mhailie nyü tuoya,
mu ketsopfhü puo gei vorketuo siya mo.
23Mia kerhieshüyakezhau we kethera di puotie pie
mia tshetuoyakezhau ki rei kenuotsa mia nei pfükuotuo.
24Puo puo morei puo zuo vie rügulie di,
“Süu kephouma mo” isikezhau,
mha pekayakezha dzieseu zo.
25Mha mehoukezhamiae kegei pesieshüya,
derei Jihova peleyakezhamia ro chü penyishütuo.
26Puo thuo puo peleyakezhamia kenyamia zo,
derei mhasi nu tuoyakezhamia kelalietuo.
27Mha pie kejümia tsüyakezhamia tsopfhütalie lho,
derei puo mhi kerei seketamia rüse pfütuo.
28Kerüzhümia kuo kesier ki,
themia rüshütaya,
derei uko kaketa ki,
kemiathomia kra parlieya.
Currently Selected:
Mhasidie 28: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
