Mhasidie 16
16
Themia Kelhou Zhorüli Dze Mhasidie
1U nou se mharhükecü themia gei ba,
derei u meü se mia die kelakecü Jihova kinu vorya.
2Mia puoe puo mhiki puo thuo puoü mesa übaya,
derei Jihovae süko shükesie mehoya.
3N mhathoko khapie Jihova ki shülie,
sitse n nou keleko chülietuo.
4Jihova mhachükeshü pete puoca nyi di chüshü,
themia kerüzhüko zorei kemezhieketuo teisozha puo la.
5Jihovae kelhieyakezha kehoupuorei rütseya;
si touliecie,
puo bu siazha chü motalie lho.
6Ngukemezhie mu kemiatho üse kejokemou chü kemesalieya,
tsiu themia Jihova khrüpreikelie geinu mha kesuo therhielieya.
7Seyie puoe Jihova nei chükelie ki,
puoe puo ngumvümia chüpie puo ze kezevilieya.
8Mha huoyo dietho di se kebae
miatho mo di mha kekra se keba ki vikuo.
9Themia noue puo cha rhü baya,
derei Jihovae puo phichako thashüya.
10Mha kevi pepilieyakezhae kedimia tie nu baya,
puo tie-e dienya kecükecü ki jotaya mo.
11Roshükhou puotoukecüe Jihova vie,
likhuo nu kemejü tsieko pete-e puo mhatho zo.
12Kedimia mha kesuo kechüe kerütse zo,
kekreilamonyü kemiatho geinu kedibau sedekelie la.
13Kedimiae kemiatho tie u neiya,
mu ukoe die puotou pushüyakezhamia khrieya.
14Kediu nouyie sü kesia dieliemia puo zo,
derei mhakesimia süu chü kemenewaya.
15Kediu puo dzüzie keba gei kerhei ba,
mu puo keneie bayie teirü kemhie zo.
16Suna ki rei mhasi ngukelie kide vikuo shi!
rakachü mo di mhacamhala sikelie kedakelie-e vikuo zo.
17Kemezhümia chapfüchaü sü mha kesuo therhiekelieu,
puo cha rüguose tuokeliemia puo kelhou pekruse balieya.
18Kepeka mhodzü kemiakokecü sierya,
mu tetsuketa mhodzü kerüzhakecü sierya.
19Mhakejümia ze di u nou rünuo kebau we,
kemiakokecümia ze mha vakelie kezakecüu ki vikuo.
20Mia die rünyülietuoü u khashülieyakezhamia vi kehielietuo,
mu Jihova pele kebamia u nei baya.
21U nou mhakesimia üse kemenuomia üya,
mu die kevi kepumia mhasi miemielieya.
22Mhasi u gei ketuomia sü kerhei dzüluo dzükhou puo mhie zo,
derei kerhanyakecü sü kenyamia siazha zo.
23Mhakesimia meloue puo diepuko se menuolieya,
mu mhasi pie ba salieya.
24U kenei diekoe mepfhida dzü tuoi zo,
u ruopfü la mou mu umo la keshürho.
25Lakipuo cha puo mezhükecü mhie zhüya,
derei cha süu thelaue kesia nu kevo chataya.
26Puo me kevi la mhachümhalieya,
puo va kemerüe süu chü keshürheishüya.
27Kerüzhümia mha kesuo thieya,
mu puo diepue u thekecü mi mhie zo.
28Kerüpfhimia kegeitsia prushüya,
mu mia noupuyakezhamia khrietho chü khowaya.
29Zhosuomiae puo zanuomia
shüta ze cha vi kemonu votaya.
30Themia kemhipfiyakezhamia mharhi kemo rhüya,
puoe puo tie wewe di mha kesuo se vorya.
31Tsüpoue thetshe tsüla puo zo,
süu kemiatho kelhou nunu ngulieya.
32U nouchakecümia kekuomia ki rei vikuo,
mu puo thuo puo kekhakeliemia nadi puo liekelie ki vikuo.
33Dapeshüte,
derei mha pepishüketuoe Jihova rübei zo.
Currently Selected:
Mhasidie 16: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
