Mathi 4
4
Jisu Kedokecü
(Mark 1:12-13; Luk 4:1-13)
1Süsie Ruopfüue Jisu hü ze rayha nu vota, Satan bu puo kedotuo üdi. 2Siro puo teisozha hiedia mu teizeizha hiedia mevo tuota, süla puo va merüta. 3Sitse kedokecüu vor di sie puo ki, “No Ukepenuopfü Nuou üro, ketsie hako ki pushü di uko bu niekhrüda meviliecie,” sita. 4Derei puo sie,
“ ‘Themia niekhrüda rübei la zomonyü Kepenuopfü tie nunu kepar die kehoupuo la rei rheilie zotuo,’ ikecü thupie zhü.”
5Süsie Satan puo ze kemesa nadiu nu vo di puo bu rüsuokiu tsüle gei balie, 6di sie puo ki, “No Kepenuopfü Nuou üro, n thuo hageinu tetsucie;
kekreilamonyü, ‘Puo n la puo dieliemia ketseshütuo;’
tsiu ‘Süko u dzie pie n mezalietuo,
sidi n bu tsu ketsie geinu n phi zorei kesewa molietuo,’
icü thupie kezhü la.”
7Sitse Jisu puo ki, “ ‘No Niepuu n Kepenuopfü kedo lho,’ sikecü rei thupie zhü zo.”
8Süsie Satan puo ze kijüthou kerükrie se puo gei vo di kijü nu kedirüvie vithedze chü zokecü pete tha puo kie; 9sidi sie, “No tsu a rüsuo ro, a mha hako pete pie n tsüwatuo.” 10Sitse Jisu puo ki, “No tuotaliecie, Satan! Kekreilamonyü,
‘No Niepuu n Kepenuopfü rüsuo
mu puo lie rübei chücü zotuo,’ sikecü thupie kezhü la.”
11Sitse Satan puo khawata, siro teigeidielieko mhai vor puo meholieta.
Galil nu Jisu Mhatho Therieko
(Mark 1:14-15; Luk 4:14-15)
12Siro Jisue mia Johan telieketa sishü tse, puo tuo rüdi Galil nu vota. 13Puo Nazaret khawa di vo Zebulun mu Naftali kijütsa dzükezha khie keba Kapernaum nu lhouta, 14mha hau chüketa thiedzü siedzekesiu Isaya geinu:
15“Zebulun kijü nu, Naftali kijü,
dzükezha khie kezhü chau,
Jordan rü khie lutsatie kebanie, Galil, Judakemoko kijüu,
16Kezeiu nu ketuo themiako,
kezie kezha puo ngushüte,
kesia khrü kijü nu kebako gei zie vorte,”
sidi pupie kezhüu tseilieketuo la. 17Siro sü yawinu Jisu mia petha sede di, “Nieko nou kediliecie, teigei kedi vor penuotei#4:17 Moro u dzieki bate. bate,” si tuota.
Jisu Khuoketemia Dia Kiekelie
(Mark 1:16-20; Luk 5:1-11)
18Siro puo Galil dzükezha khie tuo vozhü ru siezedzürie kenie, Simon, Pitor üyakezhau, mu puo siezeu Andria unie jal pie dzükezha nu khuo va ba di ngulie, unie khuoketemiacü la. 19Sitse puo unie ki, “A siemedziliecie, siro a nnie pie themia ketemia chülietuo.” 20Sitse unie unie jal kha mhawa di puo siemedzita. 21Siro puo tuo sa phizhü ru siezedzürie kekrei kenie, Zebedi nuo Jakob tsiu Johan, unie-e unie puo Zebedi ze di rouu nu jal pekhuo ba di ngu lalie, mu puo unie kieshü. 22Sitse unie rou mu unie puo kha mhawa di puo siemedzita.
Jisu Mia Petha mu Chü Keshürhokecü
(Luk 6:17-19)
23Süsie Jisu tuo Galil kijü pete nu vo di sinagogko nunu mia petha mu kedi dze dieliekevi pupie mia kie, sidi kechükenyü neiüko pete chü keshürhoshü. 24Süki mia puo dze pu Siria kijü pete nu keza vota, süla mia kechükenyü neiü chü di kemezhie ketuo pete, terhuo kesuoko bu u kebi zetuoketako, terhuovüzieko mu rünyie tuoketako ze puo ki vor ru puo süko chü keshürhoshü. 25Sitse Galil, Dekapoli, Jerusalem, Judia mu Jordan rü khie lutsatie keba themia krodi keze puo siemedzita.
Currently Selected:
Mathi 4: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More