Mathi 1

Jisu Khrista Pfutsanuoko

(Luk 3:23-38)

1Abraham nuo David, David nuo Jisu Khrista pfutsanuoko za keru leshü.

2Abraham nuo Isak, Isak nuo Jakob, Jakob nuo Juda mu puo siezedzürieko, 3mu Tamarpfü geinu Juda nuo Perez mu Zera unie penuolie; siro Perez nuo Hezron, mu Hezron nuo Aram. 4Siro Aram nuo Aminadab, mu Aminadab nuo Nashon, tsiu Nashon nuo Salmon. 5Siro Rahabpfü geinu Salmon nuo Boaz penuolie, mu Ruthpfü geinu Boaz nuo Obed penuolie, siro Obed nuo Jese, 6mu Jese nuo Kediu David.

Siro Uria kimiapfü geinu David nuo Solomon penuolie, 7mu Solomon nuo Rehoboam mu Rehoboam nuo Abija; tsiu Abija nuo Asaf#1:7 Leshü kewe keviko nu ro Asa., 8tsiu Asaf nuo Jehoshafat, siro Jehoshafat nuo Joram, mu Joram nuo Uzia, 9tsiu Uzia nuo Jotham, mu Jotham nuo Ahaz, siro Ahaz nuo Hezekia. 10Siro Hezekia nuo Manasseh mu Manasseh nuo Amon#1:10 Leshü kewe keviko nu ro Amos. tsiu Amon nuo Josia, 11Siro uko teze Babilon nu kevo meseki Josia nuo Jekonia mu puo siezedzürieko penuolie.

12Siro uko teze Babilon nu voketa sie nu Jekonia nuo Salathiel penuolie, siro Salathiel nuo Zerubabel, 13tsiu Zerubabel nuo Abiud, mu Abiud nuo Eliakim, siro Eliakim nuo Azor. 14Azor nuo Zadok mu Zadok nuo Akim, siro Akim nuo Eliud, 15tsiu Eliud nuo Eliazar mu Eliazar nuo Mathan, siro Mathan nuo Jakob, 16mu Jakob nuo Maria nupfu Josef penuolie, mu puo geinu Jisu Khrista ükecüu penuolie.

17Süla Abraham nunu vo David ketso phou keredia, siro David nunu vo uko teze Babilon nu kevo ketso phou keredia, mu uko teze Babilon nu kevo nunu vo Khrista penuokelie ketso phou keredia.

Jisu Khrista Kepenuo

(Luk 2:1-7)

18Siro Jisu Khrista penuokecü hamhie. Puo zuo Maria bu Josef ze kerituoü kevakhase tuota, derei unie thenuthepfu chü lhouketa mhodzü süpfüe Kemesa Ruopfü geinu nuonipfü tuoketa silie. 19Siro puo nupfu Josef miathomia puo zocü la mechü mhodzünu puo bu thetha pfü nyü mo di pekhre puo khawa nyüta. 20Sidi puo mha hau le keba nu, puo mho geinu Niepuu dieliemia puo puo ki vor di sie, “David nuo Josef, no Maria liepie n kimia chü michie hiecie, puo nuo lhoupfü kebayo Kemesa Ruopfü geinu zokecü la. 21Puo thepfunuomia puo penuolietuo, mu no puo za thopie Jisu chüliecie, kekreilamonyü puoe puo themiako kephouma nunu uko kelalie zotuocü la,” sita. 22Mha hako pete chüketa thiedzü Niepuue siedzekesiu geinu pupie kezhüu chü tseilieketuo la zo.

23“Harie, rüü phousepfü nuonipfülie di thepfunuomia puo penuolietuo,

mu uko puo za thopie Immanuel chütuo,”

mu Immanuel ca, “Ukepenuopfü u ze bate,” isi. 24Süsie Josef cosierlie tse Niepuu dielieu puo ki pukeshü tuoi, süpfü liepie puo kimia chülie, 25derei puo puo nuoyo#1:25 Leshü Kewe keviko nu puo nuo nuorieu. penuolie kemochie puo kimia si mo; sidi puoe unuoyo za thopie Jisu chülie.

Currently Selected:

Mathi 1: ANBRBSI

Highlight

Copy