Thekrü 1
1
Themia Jüketa Nadiu
1Kiüdi themia ketshu chüpfü keba nadiu nu themia tuo mote shi!
Kiüdi puo bu samipfü tuoite shi,
puoe seyieko donu kezhau chü!
Puoe kedirüvieko donu kedipfü chü ba ru kituomia chüte.
2Puoe theva gei kra phi baya,
puo mhidzü puo dzo kerhiekerho pfü di;
puo kekhrieko donu miapuorei puo nou thupeluoketuo ba mo;
puo zemia pete rei puo gei kelhie,
ukoe puo ngumvümia chüte.
3Judae kemezhie mu miakhro leta di miadie chü vota;
puo tsie seyieko donu lhou tuote,
sidi kerülei chü puorei ngulie mo;
puo kemezhie keba donu rei puo whuo ketuomia pete-e puo penyüliete.
4Zion nu kevo chako thekrü chü,
miapuorei thenyiko nu vor mote;
puo kharuko pete methuote,
puo zievoko meheimelo bate;
puo rüüko thenousuo bate,
mu puo kemezhiekecü nu bate.
5Puo peseyakezhamia bu puo niepumia chüte,
puo ngumvümia vi kehie siete,
Jihovae puo bu kemezhielie, puo kephouma kekra baketa la;
puo nuonuoko ngumvümia mhodzü kedie chü vote.
6Zion nuopfü zivi pete puo ki nu tuote.
Puo kedimia nuonuokoe tekhra nha pfhü pejü ketuo mhiete;
ukoe u kekuo jü di u whuo ketuomia mhodzü tatuote.
7Jerusalem-e mia puo kepese teiki,
tsiu rühou ketuo teiki,
puoe thiedzü mha u kenei ngukecüko pete rükralie.
Puo themiako ngumvümia dzie nu leketa ki,
mu miapuorei puo kekhruohi tuo moketa ki,
puo ngumvümiae puo meho di puo kekrü kreta.
8Jerusalem phoumathorwata zo,
süla puoe mia krenyü chüte;
puo rhuyakezha pete puo rütsete,
uko puo kemethuo ngukewa la;
puo thuo rei meheimelo,
sidi puo zie kereiliete.
9Puo kerhue puo chiecha nu tuote;
puoe puo siedze la mhapuorei le mo;
puo tetsuketae kemerie zo,
miapuorei puo nou thupeluokecü jü.
“He-i Jihova, a kemezhiekecü mehoshüyi,
kekreilamonyü ngumvümiae kuoliete!”
10Ngumvümia u dzie yhapie puo vie puoma kere pete mho gei shüte;
puoe seyieko puo kemesachüu nu whuo leketa rei ngute,
noe u bu n kehou nu lelie suo üdi pukeshüko.
11Puo themia pete niekhrüda pfhü meheimelo bate;
ukoe u kekuo chü kemeteilietuo ükecü la,
uko kinyiko se thelhi chü di kecüca pfhü.
Mehoshücie, he-i Jihova,
sidi leshücie,
ae kidepuo mhacümhatho kemomia chüte shicü.
12Nieko pfüthe vokecü, nie mhapuorei mo zo me?
Mehoshücie sidi leshücie,
a nousuo mhiekecü thenou kesuo huo ba me,
süu a gei vorte,
Jihova puo nei mo pie kemerie chüketa nhie hai di kemezhiekecü pie a gei shüwaketa la.
13Peso geinu puoe mi ketseshü;
süue a ruko nu leta;
puoe a phi la dorü kelhashü;
puo a teshü pesie vote;
puo a kedepie,
teisozha pete a bu phisiate.
14A kephoumako phapie vocie puo chüshü;
puo dzie thuo süko pha kesaliete;
süko pie a vo gei shü,
a kekuo jüte;
Niepuu a khapie a uko ze thalie kenjü zokecüko tsüwate.
15Jihova a khieki nu a terhümiavimia pete meliewate;
puoe a khriesako bie pejüwatuo üdi teisozha puo chiepie a petsoute;
Niepuue khubedzü kethebou tuoi,
Juda nuo rüü phousepfü kedewate.
16Mha hako la a kra;
a mhi nu mhidzü krütsur;
kekreilamonyü thukepeluou a ki nu peciete,
a kekuo chü perheishükezhau rei;
a nuonuoko u dzükezei chü bate,
ngumvümia kuolietakecü la.
17Zion-e puo dzie yhashü,
derei miapuorei puo nou thupeluokeshü jü;
Jihovae Jakob petsoulie nu diekhashü puo siezanuomia bu puo ngumvümia chütaketuo la;
Jerusalem-e süko donu mha kerhu puo chüte.
18Jihova mezhü zo,
kekreilamonyü ae puo die petsoute;
derei rünyüliecie,
nie themia pete,
a rüünuoko mu khriesako miadie chü vote.
19A a neimiako kieshü derei uko a sewate;
a zievoko mu phichümiako uko kekuo chü penyilietuo üdi uko kecüca pfhüketuo ki nadiu nunu kate.
20Harie, Jihova, a kide rei kemezhie batemu;
a va chü bate,
a nou nu a melou ciethewate,
a suothor tuotacü la.
Cha nu liro zhiecha la thenousuo;
kinu liro kesia kemhie zo.
21Ukoe a kidepuo meheimelo ba shi sishüte,
miapuorei a nou thukepeluo jü.
A ngumvümia pete a kemezhie keba sishü;
ukoe no süu chükeshü la uko nei bate.
No shiekeshü teisozhau se vorshücie,
sidi uko bu a kemhietacie.
22Uko kerüzhü pete bu n mhodzü vorlie;
sidi a kephouma peteko la no a gei chükeshü tuoi uko gei rei chüshücie;
kekreilamonyü a meheimelothor bate mu a melou nu a phisiate.
Currently Selected:
Thekrü 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
