Johan 1

Kerhei Dieu

1Sietsenu Dieu tuo, mu Dieu Ukepenuopfü ze tuo, mu Dieu Ukepenuopfü zo. 2Puoe sietsenu Ukepenuopfü ze tuo. 3Puo geinu mha pete chülie, mu chükelieko puorei puo sa mo di chü mo. 4Puo gei kerhei tuo, mu kerhei süu themia pete kezieu zo. 5Kezieu kezei va pezie tuoya mu kezeiu süu zhalie mo.

6Ukepenuopfüe mia puo ketseshü, puo zae Johan. 7Puo kezieu zhapu chütuoü vor, puo geinu mia pete bu pelelieketuo la. 8Puo we kezieu mo, derei puo kezieu zhapu chütuoü kevor zo. 9Kezie ketho süu mia pete va pezietuoü kijü nu vor.

10Puo kijü nu tuo, mu puo geinu kijü chülie ürei kijüu puo silie mo. 11Puo thuo puo vieko ki vor,#1:11 Moro puo thuo puo kinu vor. derei puo themiako puo zelie mo. 12Sirei puo zekelie khe, puo za nunu pelekelieko, puo süko bu Ukepenuopfü nuonuo chütaketuo kekuo khashüwate; 13sükoe chüüzie nunu, morei chüüphou medo nunu, morei themia medo nunu monyü Ukepenuopfü nunu penuokelie zo.

14Siro Dieu chüüphou mevi vor hie donu lhou, mu hie puo zayieu, ngukemezhie mu ketho bu tshukepfü, puo nuo pfuliu zo ükecü zayieu ngu. 15(Johan puo zhapu chü shiekhoui di sie, “ ‘Mia puo a sie vorzhü, derei puo a ki zhakuo, a penuokelie mhodzü puo tuota zokecü la’ idi a puo dze kepuu sü hau zo.”) 16Puo tshupfüketuo geinu we ngukemezhie sie rei ngukemezhie ngu phrelie. 17Mosa geinu thezho-u khashü; derei ngukemezhie mu ketho-u we Jisu Khrista geinu zo. 18Miapuorei mhakipuorei Ukepenuopfü ngu mo. Süu Ukepenuopfü Nuo pfuliu, puo Puo merü gei kebau#1:18 Gk Puo khrieu. thuo mia bu puo sikelie chükeshü zo.

Johan Mia Dzülukepfüu Dielie

(Mat 3:1-12; Mark 1:1-8; Luk 3:1-18)

19Siro Jerusalem nu Judakoe zievoko mu Leviko ketsepie Johan ki shü di puo ki, “No supuo ga?” idi ketsokeshü ki Johan-e zhapu chükeshü die haha zo. 20Süki puo mha pushü mu phra mvüta mo zo, derei “A Khristau mo ho,” si. 21Sitse uko puo ketso di, “Siro ki-a? No Elija me?” Puo sie, “A süu mo.” Süsie “No siedzekesiu me?” Puo sie, “Mo.” 22Sitse uko puo ki, “Siro no supuo ga? Hie ketsekeshümia ki pu la morosuomu. No n thuo n üse supuo üya mu? 23Puo sie,

“Mia puo rayha nu shiekhoui di,

‘Nieko Niepuu cha chü kemezhüliecie,’ iketuo pfheu sü a zo,”

idi thiedzü siedzekesiu Isayae pupiezhü.

24Sükoe Farisiko kinu ketseshü. 25Sitse uko puo ketso di, “Noe Khrista rei mo, Elija rei mo, siedzekesiu rei mo üro, no kiüdi mia dzülu khashüya ga?” 26Johan sie uko ki, “A we dzü nunu dzülu khashüyakezha zo, derei nieko donu nieko puo si kemo puo tuo. 27Puo a sie vorzhü, a puo phikoupha rei phreilie sü mo.” 28Mha hako Johan mia dzülukepfüu Jordan rüu khie niathutsa Bethani nunu chü.

Ukepenuopfü Kuonuou

29Süsienhie Johan Jisu puo ki vorkezhü ngulie di sie, “Harie, kijüu kephouma chü setakezha Ukepenuopfü Kuonuou sü! 30Hauha a puo dze pu di, ‘Mia puo a sie vorzhü mu puo a ki zhakuo, puo a mhodzü tuota zokecü la,’ ikeshüu zo. 31A thuo rei puo süu zo ükecü silie mota zo; derei puo pie Israelmia pesishüketuo la a dzü nunu mia dzülu khashü kevor zo.” 32Tsiu Johan zhapu chü sa di, “Ruopfüu teigei nu mekhru mhiei ker di puo gei bakelie ngu. 33Siro a rei puo silie mota zo, derei a ketsepie a bu dzü nu mia dzülu khashünukecüue sie a ki, ‘No Ruopfüu ker themiau gei bakelie ngulietuo, mu süu Kemesa Ruopfü nunu mia dzülu khashüketuou ho.’ 34A thuo süu nguwate, süla a nie ki puo Ukepenuopfü Nuou#1:34 Leshü kewe huo nu Ukepenuopfü thuo kedakelieu si. zo ükecü zhapu chüya ho.”

Jisu Siedzi Kerieko

35Süsienhie Johan puoe pethakelie kenie ze tha ru, 36Jisu reketuo meho di, “Lere-i, luu Ukepenuopfü Kuonuou zo.” 37Sitse pethakelienie puoe süu kepu silie, sidi unie Jisu siemedzita. 38Süla Jisu reipra unie puo siemedziketuo ngulie di sie, “Nnie kedipuo pfhüya ga?” Unie sie puo ki, “Rabi (puoca Kepethau) no kirapuo baya ga?” 39Puo unie ki, “Vor di mehocie.” Sitse unie vo di puo kebachü ngulie; sidi unie sünhie puo ze bata. Süki thehesie keba dia meseta. 40Siro Johan diepu si di puo siemedziketanie mia puo ro Simon Pitor siezeu Andria. 41Puo vo puo dzürieu Simon pfhülie rie di sie puo ki, “Hie Messiah nguliete,” (Puoca kenhekelieu.) 42Sidi puo Simon ze Jisu ki vorlie, sitse puoe puo meho di sie, “No Johan Nuou Simon te ha. No üse Kefa (puoca Pitor#1:42 Aramaik nu (kefa) mu Grik nu (Petra), puoca Tsiekrie.) ütuo.”

Filip mu Nathaniel Kiekelie

43Süsienhie Jisu Galil nu voketuo rhülie. Sitse puo Filip ngulie di sie puo ki, “A siemedziliecie,” sishü. 44Mu Filip-e Bethsaidamia, Andria mu Pitor unie ramia. 45Filip-e Nathaniel ngulie di puo ki, “Hie thiedzü Mosa Thezho nu mu Siedzekesiko puo dze thupie ketuou nguliete, puo Josef nuou Jisu Nazaret-u zo.” 46Sitse Nathaniel sie puo ki, “Nazaret nunu mha kevi parlie vi me?” Filip sie puo ki, “Vor di mehocie.” 47Sitse Jisu Nathaniel puo ki vorkezhü ngu tse puo dze pu di, “Haki Israelmia ketho, mha kese puorei puo gei tuo kemo puo vorzhie.” 48Sitse Nathaniel puo ki, “No kimhie di a silie ga?” idi ketso. Jisu sie, “Filip n kiekelie mhodzü no chiedebo khro keba ki a n nguwe.” 49Sitse Nathaniel puo ki, “Kepethau, no Ukepenuopfü Nuou zo! No Israel kediu zo!” 50Jisu puo ki, “No chiedebo-u khro keba ki a n nguwaketa pukeshü la no pelete me? No hau ki rei mha kezha phi ngu satuo.” 51Sidi puo sie puo ki, “A nieko ki ketho-u puya, tei khrüshü di nieko bu Themia Nuou mho gei Ukepenuopfü dieliemiako kho mu ke keba ngutuo.”

Currently Selected:

Johan 1: ANBRBSI

Highlight

Copy