Jakob 5

Mhakenyimia Bu Menuolienukecü

1Harie mhakenyiko, nieko a die rünyüliecie, kemezhiekecü nieko gei phirtuoü keba la nieko krakhouilie. 2Nie kinyiko cieürietazhie mu nie pfhe nie neiko shülhe bu cülietazhie. 3Nie suna mu rakachüko mhouthietazhie mu mhouthie süu nie kejo tha nie kieshütuo, tsiu süu mi mhiei nie chü cülietuo. Nie thelatsa la nie kinyiko kenguliete.#5:3 Moro nie chü cütuo, nie mi kenguse bacü la. 4Rünyüliecie! Nie mia nie lie nu mhachükeshüko zha chü moketako zha thuo shiekhoui zhüte, mu nie lie rekeshüko shiekeshü pfhe si kho krodiko Niepuu tsote. 5Nie kijü hau nu lhou ketheguo mu nie nei nie nyüko chüwate; sidi nie nou thuo nie chü peluopie dukhriketuo zhau pfhe bate. 6Nieko themia kemiathoko pejo mu dukhriwa, sükoe nie mese chü mo zo.

Kemezhiekecü nu Shügeshühiekelie

7Süla a khrieko,#5:7 Gk Siezedzürieko. Niepuu vor kemochie shügeshühie balie. Lieciemia shügeshühiepfü di puo lieyie bu vilieketuo la teirü kerieu mu kenuou pfhe terüpfü baya. 8Süla nie rei shügeshühiepfü balie. Nie nou jükrepfü ba zolie, Niepuu kevor tei penuoketa la. 9A khrieko, nieko huoniehuo gei panyapara hiecie, sitse nie pejo molietuo. Harie, mia Ketsoketuou kikha ki tha zo! 10A khrieko, Niepuu za se die pu kevor siedzekesiko rei kemezhiekecü nu rei hiepfü thalie üdi thakie puo chükeshü rükrashücie. 11Ketho zo, we shügeshühiekeliemia üse thejakepfümia üya. Nie Job shügeshühiekelie dze silie mu nie Niepuu mharhüu kedipuo shicü ngulie, Niepuue mia khrie mu mia ngumezhie phiyakecü.

12A khrieko, ba hurei nie tei rei morei kijü rei morei phrakeshü kehoupuorei se rüse hie, derei nie die ro “U” ülie mu moro “Mo” üliecie, nie pejokewa nu leta molieketuo la.

Kepele Kecha

13Nie donu miapuonie kemezhie ba me? Sümia bu kecha chülie. Miapuonie u nei ba me? U bu ketshe pfhe chü kelilie. 14Miapuonie mhachü ba me? Puo bu kehou nu phichüko kielie di uko bu puo la chashülie mu Niepuu za nunu tier pie puo kenheshülie. 15Pele di chakeshü la mhachükezhüu bu la sielietuo, mu Niepuu puo thuo süu bu shürholietuo, tsiu puo phoumawa shierei vashü puo tsütuo. 16Süla nie shürholieketuo la huoniehuo mhodzünu nie kejokemouko phrawalie mu huoniehuo la chaliecie. Kemiathomia kechae kuo phi mu chükhrielieya. 17Elija rei u kemhiemia puo zo, ru puo thenou thetho chü di tei bu rü hienu cha ba tse, cie se di puotie teirü bu kijü tsur mota. 18Süsie puo cha lashü ru tei bu rülie, sidi mha bu kijü nu lhou la parlie zo.

19A siezedzürieko, nieko donu huomia ketho-u therhieta di yo tuota, sidi huomia puo nou chü kedi lalie ro, 20sümia bu si touliecie, mha kesuo chüketau nou chü kedipie puo bu puo kejokemou kechü chau therhielieketau, puo kesia nunu kephoumau#5:20 Gk Puo. ruopfü kelalietuo tsiu kejokemou kekra whelietuo.

Currently Selected:

Jakob 5: ANBRBSI

Highlight

Copy