Ibriko 7

Melkizedek Zievo-u

1“Melkizedek hau Salem nu kediu, Kerükrietho Ukepenuopfü zievo rei chü, Abraham-e kediko penyüwa di la vorkezhü ki puo ze kese di japie puo tsüshü;” 2mu Abraham “Mha ngukelie kehoupuo nu rei ker-zapuo” khapie puo tsü. Puo za ca kerieu ro, “kemiatho kediu si,” süsie puo Salem kediu rei sa, puoca, “vitho kediu.” 3Puo puo, puo zuo, mu puo krü puo pfutsanuoko dze, puo penuokelie mu puo se dze puorei jü, derei puo Ukepenuopfü Nuou kemhie puota zo; puoe kechachie zievo chü sei bate.

4Puo zhapie kedipfü chü shi! Abraham, u pfutsau zorei terhü nu ngukelie pete nu ker-zapuo pie puo tsü. 5Levi yiemiako bu zievo chü mu thezho-u nu uko bu u siezedzürie Israelmia puoca Abraham yiemiako kinu ker-zapuou pfhülienu pupie zhü. 6Derei themia hau we Levi yie geinu lhou sier mo, derei phrakeshüko ngukelie Abraham kinu ker-zapuou lielie di japie puo tsüshü. 7Süu japie mia ketsüu theja piekelieu ki rei zhakuo zo. 8Kesia phou kepfüko bu ker-zapuou lieya, derei puoca kekreiu nu we, rhei tuoya zo üdi pu tuoketau bu süu lie. 9Süla ca puo nu ro Abraham-e ker-zapuou khakeshü ki, Levi rei ker zau khashüwata zo, 10kekreilamonyü Melkizedek puo ze kesekecü ki puoe puotsanuo vanu tuo zoluo.

Melkizedek Tuoicü Zievo Kekreiu

11Siro zievo kechü zho-u pemvü di vi tseikecü ngulieya üro, themiakoe zievo mhatho khronu thezho-u nguliecü la, kiüdi Melkizedek mhiekecü, Aron mhie kemo zievo kekrei puo bu la sier morokesuo pu lata ga? 12Kekreilamonyü zievo kedikecü ze di thezho-u nu rei mha huo kedi morosuotaya. 13Siro puo dze pupie kezhü hako lesie ro puo seyie rei krei, puo seyie nunu miapuorei ruosuoba nu lietho chü mo. 14Kekreilamonyü u Niepuu Juda yie geinu siercü we si ba, mu Mosa zorei zievoko dze pu kesie ki seyie hau pu mo zo.

15Tsie we Melkizedek kemhie zievo kekrei puo sierkelie geinu hau dze si kemeciekuo parte, 16puoe chüüzie zho geinu monyü pekawalie kelho kerheiro kekuo puo nunu zievo chülie. 17Kekreilamonyü süu dze pukecü,

“Melkizedek kemhiei,

no kechachie zievo chüte,” si.

18Tsie we die khakeshü kerieu khawate, kekreilamonyü süu thachü mu kemethuo puo zokecü la, 19(Mosa zho-u mhapuorei chü pevi tseishülie kenjücü la); tsie we u kemerü kesa puo khashüte, süu geinu we Ukepenuopfü penuo volieya.

20Hau we rüse puo se mvü kemeteilie; kekreilamonyü kekreiko we zievo pie pfükecü rüse mo, 21derei hau we rüse puose, kekreilamonyü puo ki pukeshüue sie:

“Niepuue rüseshüte mu puo die vawalie lho,

‘No kechachie zievo chütuo,’ ”

isiwaketa la. 22Süu medzi di Jisu rei vikuokecü dietseidiekho puo la zhapu pfüliete.

23Kekrei puo liro, thiedzü zievomia kekra tuo rei kesia bu uko kedeiwawa di u mhatho chü salie lhotata vor; 24derei puo we zievo mhatho-u chü sei vo zotuo, kekreilamonyü pue kechachie batuo. 25Süla puo geinu Ukepenuopfü ki kevo khe kelalietuo,#7:25 Moro kela tseilie vi. puo kechachie rhei tuo di süko la cha sei bayacü la.

26Kekreilamonyü we zievokezhatho haikecü se morosuo tuoya, puoe mesa, pejolie lho, rhuta mo, kephoumamia kinu kelakreilie di teiko ki rei rükriekuo. 27Puoe zievokezhatho kekreiko mhie mo, puoe puo thuo puo la mu süsie themiako kephouma la teisonhie ruosuo khakeshü mhatho-u chü morei vite; hau puoe puo phou pie vapuochü ruosuo chüwata zo. 28Thezho-u zowe kethachü nu ketuo kro puo kedapie zievokezhathoko chü, derei thezho-u sie nu kevor rüse dieue kechachie vi tseikecü Nuo puo bu chüliete.

Currently Selected:

Ibriko 7: ANBRBSI

Highlight

Copy