Ibriko 6

Kepele Vakewa Kemichie

1Süla Khrista dze kepetha die sede kerieko khapie zhüwa di vi tseilieketuo dzetsa le petoulie khe. Puo mvüdze kesa la mo di kesia mhathotsanu thenoukedikecü mu Ukepenuopfü kitsa kepele, 2siro dzülukepfü tsiu u dzie khapie mia tsü gei keshü siro kesiamia rheilakesie mu kechachie la u capi chüketuo dze kepetha dieko bode kesa molie khe. 3Mu Ukepenuopfü u bu hau chülienu ro, we süu chütuo.#6:3 Leshü kewe huo nu úko chü khe. 4Kekreilamonyü thiedzü huomia u kenei ngulie, mu teigei mhaphruo rei metha tsiu Kemesa Ruopfü rei u ya nyilie, 5siro u thuo u geinu Ukepenuopfü dieu rei vi zo ücü mu thiesie vorketuo kelhou dze kekuo rei metha, 6sidi tetsu lata ro, themia sikecüko chü kesa lalie di thenoukedilieketuo chülie kenjü, kekreilamonyü ukoe Ukepenuopfü Nuou gou la mu mia bu puo peseketuo chüwate. 7Kijü kehoupuorei tsiekenuo teirü tsurkecüu krielie di mha leikeshüko petsüpethepie ciekeshümia tsüya liro Ukepenuopfü theja ngu salietuo. 8Derei mhanuü sünu kikhahuko mu nharhuko lhou sierta ro, süu kemethuote; mu rüsewaketuo penuo mu mi bu thewaketuo zote.

9Hie khrieko, hie die hakemhie pushü shierei, hie nie pelekhrupfü ba zo, mu mha vikuocüu sü kelakelie dzeko zo. 10Kekreilamonyü Ukepenuopfü dietho motaya mo; puo nie mhachükeshüko morei puo za la nie kekhrie nunu mia khruohikeshü mu tsie rei nie kezemia kemesamiako gei süu chüshü bayakezhako rükra motalie lho. 11Hie kemenguu sü nieko mia puopuokecü bu shürhei zo tha thela tsolie mu nie kemerü puo kebau ngu toulieketuou zo, 12sidi nie bu mecüta mo di pelekelieko mu shügeshühielieketako tuoi phrapie kezhüko wekelieu zo.

Ukepenuopfü Phrakeshüko Chü Touketuo

13Ukepenuopfü puo die phrapie Abraham ki keshü ki, kekreimia puo ki zhakuokecü puo za se rüseketuo ba moketa la, puo thuo puo za se rüseshü, 14sidi sie, “A japie n tsü tou zotuo mu n chü pekrashütuo” sishü. 15Sümhie di Abraham shügeshühiepfü pfhe ba zolie, sidi phrakeshüu ngulie. 16Themiae rüse ro, puoe puo ki zhakuokecümia puo za pu rüseya, sidi süu geinu dienya pete pepiwa di thela chüwaya. 17Sütuoi Ukepenuopfü rei mha pupie tsütuo ükezhü ngulieketuoko ki puo die kediwalie kelho rüse di pukeshü geinu u bu si toulieta zo. 18Sidi rüditalie kelho kenie geinu, Ukepenuopfü mhakipuorei tijütalie lho zo ükecü geinu we ta puo khrükhro kevoko bu u mhodzütsa kezhü siedzeu thezetsase tuolieketuo le u kethepfu nyi selieketuo chüshü. 19We u kemerü baketa hau, u chüpie khrukhre tsiu u ruopfü la roucawi puo tuoi khe kemeteise bate, mu kemerü süu zo kinu le pfhe lhapiekezhau pfüthe kemesatho chüu nu lete, 20sünu Jisu, Melkizedek tuoi kechachie zievokezhatho-u chü di u la pedzüperie sünu lete.

Currently Selected:

Ibriko 6: ANBRBSI

Highlight

Copy