Keriekitho 49
49
Jakob Die Thelako
1Süsie Jakob puo nuoko kielie di sie, “Nieko vor kengulie, a bu thie nie gei kedipuo chü vortie shi nie ki pushüketuo la.
2“Vor kengulie di rünyülie,
Jakob nuonuoko,
nieko puo Israel pfhe rünyüliecie.
3“Reuben, no sü a nuo nuorieu,
a kekuou mu a shürhei si therieu zo.
Therhu kerükrietho mu kekuo kekhotho.
4Dzü tuoi bajü mo, no mha kekhotho-u nu tuo sa motatuo,
noe n puo zhü gei siekewa la;
sidi no süu perhuwa,
no a zhü gei siewate!
5“Simeon mu Levi nnie sü siezedzürie zo;
mha kepeka rünyieko sü nnie zhiecha zo.
6Harie a bu nnie kehou nu vo hiecie;
harie, a bu nnie ze kekrotho hie üthienyü,
nnie nnie nouyie nunu mia dukhrikewa la,
siro nnie thuo nnie medo chü di thudo phimhi nu puo nyhiero duthewa.
7Rüse bu nnie nouyie gei pfülie; süue kemeriecü la!
Mu nnie noupfhünouyie gei rei pfücie,
süue puo zhosuocü la!
A Jakob nunu nnie kezawatuo,
sidi nnie bie ketsieyapie Israel nu shüwatuo.
8“Juda, n siezedzürieko n tshetuo,
n dzie bu n ngumvüko vo gei pfütuo;
n puo nuonuoko bu n mhodzü nerhu tsutuo.
9Juda sü Loshanuo puo zo ru,
a nuo, khunuo chüteu nunu, taliete.
Puoe Losha puo tuoi,
rünuotsu zhü, prousietuo üdi,
mu Loshakrü puo tuoi,
supuonie michie mo di puo kesoulie ta?
10Juda kinu kedi theu tuotalie lho,
mha kekhakecü theu rei puo phinie cielie lho,
mia khezhanuo puo tsü,#49:10 Moro Shilo nu vor kemochie moro puo Shilo nu vor kemochie moro (Syr nu) puo thuo puo vieu nu vor kemochie. mu
die ze vor kemochie.
11Puoe kier nuo pie khubebo gei khetuo,
tsiu puoe gadanuo pie khubebo kevitho-u gei khetuo,
puo khubezu nunu puo pfhe menyi,
tsiu puoe boulie pie khubesi zie nu menyituo;
12puo mhi-e khubezu ki rei teikuotuo,
mu puo hue mithunudzü ki rei krakuo tuo.
13“Zebulun-e dzükezha khiera lhoutuo;
puoe rouko la rüleichü puo chütuo;
mu puo kijü rieko Sidon tsotuo.
14“Isakar sü Gada kekuo puo zo,
tekuokroko donu zhüya;
15puoe rüleichüu vikecü ngushü;
mu süu kijü u neikecü ngu;
süla puo süu pfhülietuo üdi puo bouka kerünuoshü;
sidi puo kemvü chüpie mia theke chüta.
16“Dan-e puo themiako capi chütuo,
Israel nu seyie puo chü di.
17Dan-e cha nu tinyhü puo chütuo,
chatse nu nyhübvüpfü,
kier phitshü medu di puo gei ketuou bu mela tsutuo.
18“Ae n kelakelieu pfhe bawe, O Jihova.
19“Mia pekawayakezha kro puoe Gad peka vortuo;
derei puo uko phitshü geinu uko pekawatuo.
20“Asher#49:20 Gk Vg Syr: Ibri Asher nunu. kecüca nyi phituo,
sidi kedimia la kecüca keviko khashütuo.
21“Naftali sü chüzhie petakeshü puo nuonuo u nei sekecü keneipfü zo.
22Josef-e puosi vüshüyakezha seico puo,
dzüluo khieki puosi vülieyakezha seico puo;
puo cokoe sozha zie vo kebau.
23Theükepieko khrie se di puo petsou zo;
sidi puo va, tsiu puo re phi zo.
24Sizorei puo theüu metei balie,
Jakob Kekuou thuo puo dzienie chü kemetei seshüte.
Israel Tsiekrieu mu Kepfheu za nunu.
25N puo Kepenuopfü n khruohishüketuou,
tsiu Kuokejokejüu#49:25 Ibri Shaddai. tei pesogei thejako se jashü n tsüketuou,
theja kesou lukhro rüshükezhü thejako,
n merü gei mu nuobvü nu thejau rei sa.
26N puonuoko thejakoe kijüthou kekra theja ki zhakuo,
kechachie bayakezha#49:26 Cn pie Gk ze kemejülie: Ibri A puotsanuo therieko ketso. kijükhruko,
süko bu Josef gei vorliecie,
mu puo siezedzürieko kinu puo chükhowaketau gei vorliecie.
27“Benjamin sü mia tekecü socie puo zo,
khise gei rei puo chüteu te cü,
mu mhavako kezatuo.”
28Hako pete-e Israel seyie kerekenieko; mu uko puoe japie uko tsükeshü ki hakemhie di uko rüchü, kehoupuorei puo la viketuou le di japie uko tsü.
Jakob Se mu Puo Kekhru
29Süsie puoe uko ki pu di sie, “A ze a themiako ki votatuo üzhie, süla Hit-u Efron lie nu tsiepfüu nunu a puonuoko ze di a khru zocie. 30Abraham-e se mekhru chü chütuo üdi Hit-u Efron kinu khrükelie, Kanan nu Mamre kepenuoki Makpela nu lieu tsiepfüu nu. 31Sünu Abraham mu puo kimia Sara khrupiezhü; sünu Isak mu puo kimia Rebeka khrupiezhü mu sünu a Leah khrupiezhü. 32Hitmia kinu lie süu mu sünu kezhü tsiepfüu khrüpiezhü.” 33Siro Jakob-e puo nuonuoko ki mha pushükewa sie, puo phipie puo zhü gei pfülie di puo keha khashüwa, sidi puoe puo themiako ki vota.
Currently Selected:
Keriekitho 49: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
