Keriekitho 44

Josef-e Benjamin Khase Baketa

1Süsie puoe puo ki kemeho-u ki pu di, “Kecüca uko pfülie kevi chie pie uko nhou nu pelishücie, mu mia puopuo raka pie puo nhoutie nu shü lashülie. 2Sidi a hie, rakachü hieu, pie nhicutho-u nhoutie nu, puo lha mako sa di shüshülie.” Sitse puo Josef pukeshü tuoi chüshü. 3Siro teiso parlie mumetha, themiako mu gadako ketsewa. 4Siro uko tuota derei nadiu ze kepetseta kemonu, Josef-e puo kinu kemeho-u ki, “Sielie, di themiako medzi vocie, mu no uko tsolie tse, uko ki, ‘Kiüdi mha kesuo pie kevi zhadavü ga? Kiüdi a rakachü hieu rügulieta ga? 5Hanunu a niepuu mha krieya mu puo süu geinu mhaca silieyakezhau mo me? Nieko haikecü mha kesuo chüte,’ ishüliecie.”

6Siro puo uko tsokelie ki, die hako pie uko ki pushü. 7Ukoe sie puo ki, “Kiüdi a niepuu die hikecü puta ga? Mha hahikecü bu n kituoko penuo rei suotuo! 8Harie, raka hieko nhoutie nunu ngukelieko rei se la vor Kanan kijü nu n tsüshü ze, di siro hieko kiüdi a niepuu kinu rakachü morei suna rügu ta? 9N kituoko kehoupuo geinu rei ngukelieu bu siatalie, mu hieko rei a niepuu diemia chütatuo.” 10Puo sie, “Nieko kepu mhie chüliecie; puo geinu ngukelieu bu a diemia chütatuo mu kekreiko we khashüwatuo.” 11Sitse uko peteko rei rükri sie u pie lhoupie kijü shülie, di u nhouu phrei phreshü. 12Ru puo phichütho-u nunu sede di nhicutho-u pie puo thela chü di uko lha; sitse tehieu Benjamin nhou nunu ngulieta. 13Sitse uko uko pfheneiko cierhata, mu themia peteko rei gada pie dalie di nadiu nu rürei la vor.

14Juda mu puo siezedzürieko keze Josef kinu la vor, ru puo süki ba zo; sitse uko puo mhodzü nunu te kijü tsuta. 15Sitse Josef uko ki, “Nieko mhatho kikecüpuo chüwata ga? Niekoe a kemhiemia mhaca silieyaücü si mo me?” 16Sitse Juda sie, “Hieko kedipuo se a niepuu rüchü ta? Hieko kedipuo pu ta? Morei kedipuo mhie di hieko thuo hieko chü kemesalie ta? Ukepenuopfü thuo n kituoko kejo nguliete; harie hieko pete a niepuu diemia chüte, hieko mu puo dzie nunu tehieu ngukelieu rei sa.” 17Derei puo sie, “A bu sikecü chü mo zolie! Themia puo dzie nunu tehie ngukelieu rübei bu a diemia chütuo; derei nieko we nieko nou mene di nieko puo ki khotalie.”

Juda Benjamin la Puo Mezhiemelokecü

18Sitse Juda puo ki vor di sie, “He-i, a niepuu, n kituou bu dieca puo pupie n nyie nu shünu di a n ki chaya, mu n nouyie bu n kituou gei bata hiecie, no sü Faro mhie zeru. 19A niepuu puo kituoko ketso di sie, ‘Nieko puo morei nieko siezemia ba me?’ ite. 20Süla hieko a niepuu ki, ‘Hieko puo ketsamia puo mu puo tsa zenu ngukelie nuoyo, hieko siezeu baluowe; puo dzürieu siate, tsiu puo zuo nuo puo rübei keba zote; mu puo puoe puo khrieya, ishüe.’ 21Sitse no n kituoko ki, ‘Puo ze a ki tsurcie, a bu a mhipie puo ngushüketuo la.’ 22Sitse hieko a niepuu ki, ‘Unuoyo puo puo tsetalie kenjülie; puoe puo puo khakeshü sie puo puoe siatatuomu.’ 23Süsie no n kituoko ki, ‘Nieko siezeu ze tsur kemosie nieko a zie ngu salie lhote.’ 24Sitse hie n kituou a puou ki vokelie ki, a niepuu dieko se puo ki pushü. 25Siro hie puo, ‘La vo di kecüca huoyo khrü lalie,’ idi kepu ki, 26hieko sie, ‘Hieko tuolie kenjüte, hieko sieze nhicutho-u bu hieko ze tsutuo üro, hieko tsulietuo, hieko sieze nhicutho-u ze tsu kemosie themiau zie ngulie lhoketa la.’ 27Sitse n kituou hieko puo hie ki, ‘A kimia nuo kenie penuoshü a ketsü nieko si ba; 28siru mia puo a khawate, mu a puya, puo ciechücierhawata mecie zo; a puo ngu laya mo zote ru. 29Siro nieko hayo rei a kinu zeta, di kemezhiekecü puo gei vota ro, nieko a bu nousuo mu tsüpou ze Sheol nu tsu zotie,’ ilie. 30Süla tsie, n kituou a puo ki vocü ki, unuoyo hieko ze tuo mota liro, puo kerheiro unuoyo kerheiro gei bata zo. 31Puo unuoyo hieko ze tuo moketa ngucü sie puo siata zotuo; siliro n kituou hieko puo, puo tsüpou bu nousuo sa di khapie Sheol nu shüwatie. 32N kituou, unuoyo la thepieu pfülietuoü a puo ki pu di sie, ‘A puo ze n kinu la vorshü mota ro, kechachie a puo mhodzünu kejo-u pfü tuotatuo.’ 33Süla tsie, a n ki chaya, n kituou bu unuoyo sou nu a niepuu die chü batalie; sidi unuoyo bu puo dzürieko ze la votacie. 34Unuoyo a ze tuo moro, a bu kedipuo mhie di a puo ki la volie ta? A puo gei kemezhiekecü vorketa ngucü preilie.”

Currently Selected:

Keriekitho 44: ANBRBSI

Highlight

Copy