Keriekitho 41

Josef Faro Mhoca Pukeshü

1Siro ciete kenie sie, Faro puo mho geinu Nail rü khieki tha di pema. 2Ru harie, Nail rüu nu mithu thenie par, ngu u nei siei mu luo siro uko tekhrieko donu nhaliecü tuo. 3Süsie rei mithu kekrei thenie uko sie nu Nail rüu nunu par, ngu vi mo mu wetoi, sidi Nail rüu khie kekreitsa tha. 4Sitse ngu vi kemo mu wetoicüko sü ngu u nei siei tsiu luocü thu thenieko cülieta. Süsie Faro cota. 5Süsie puo ze la tsu ru puo mho va kenieu pema; siru harie telhakre thenie puosi puo tshu mu vicü bo puo geinu par. 6Süsie telhakre thenie, puo kelhou suotoi mu niathutsa teikhrie bu he pesotoikecü kro puo la par. 7Sitse telhakre kesuo thenieko sü puosi kevi mu vicü kre thenieko mezulie. Süsie Faro cota. Mu süue puo mho. 8Süsie khise vorlie tse puo nou kemezhie bata; süla puo themia ketsepie Ijipt nu meduoyakezha pete mu sünu mhakesi pete kieshü; sidi Faro puo mho pie uko ki pushü, derei miapuorei süu ca vatshapie Faro kieshülie mota.

9Sitse Faro hiekepie kezhaue Faro ki, “A thie a kejoko rükraliete. 10Va puo Faroe puo kituonie gei puo nei mota di niekhrüda kerie kezhau hienie khapie kedie kepfheko kezhau kinu shüwa. 11Mu hienie mho kepema puo zhü pema phre. Puo mu a u mho pemacü ca nyi phre. 12Sükisü Ibrimia khriesamia puo hienie ze ba, kedie kepfheko kezhau kituo puo; mu hienie puo ki pushü tse, puo hienie mhoca kelashü hienie tsü, hienie mia puopuo u mho kepemau medzi di vatshashü phre. 13Mu puo puoca vatshakeshü tuoi di chüta; a we a kha lapie a mhatho nu lashü, derei niekhrüda kerieu we gouwate.”

14Sitse Faroe mia ketsepie Josef kieshü, ru uko rükri kedieki nunu puo ze vorlie, süsie puo puo tiemie thiewa, mu puo pfhenei kedilie di Faro mhodzünu vor. 15Sitse Faroe Josef ki, “A a mho puo pema mu miapuorei süu ca pupie a kielie mote; mu a mia n dze kepu sicü, no mia mho silie ro puoca kelalieya üsi.” 16Sitse Josef sie Faro ki, “Süusü a gei tuo molie, Kepenuopfü thuo puotou puo kelapie Faro tsü zotuo.” 17Süsie Faro Josef ki pu di, “Harie, a mho geinu ae Nail rü khieki tha; 18sitse mithu keluo mu ngu vicü thenie par; mu uko tekhrie donu nhaliecü tuo. 19Süsie mithu kekrei thenie uko sie la par, lhou pesuo, zisuo mu wetoi zo; a Ijipt kijü pete nu zisuopie sükemhie ngu kemo kro puote. 20Sitse mithu kewe kezisuoko sü mithu kerie keluo thenieko cülieta, 21derei süko cülieta zorei, miapuorei uko süko cülieta ücü silie kenjü; uko ngupie kerieki mhie di suo phi zocü la. Süsie a cosierta. 22Süsie a ze la tsu ru, a mho geinu telhabo puo geinu telhakre thenie par, puosi puo tshu mu vi; 23sitse niathutsa teikhrie bu hekewa kitoicü kre thenie sotoi mu wetoi di kerieko sie par; 24sitse telhakre kesuoko kevi thenieko mezulie. A süu pie meduoyakezhako ki pushü, derei miapuorei süu vatshapie a kieshülie mote.”

25Sitse Josef Faro ki, “Faro mhoko puo zo; Ukepenuopfü thuo chü vortuoü kebau pie Faro pesishüte. 26Mithu kevi theniekoe teicie theniekote, mu telhakre kevi thenieko cie theniete, n mho-u puo zo. 27Siro mithu kewe mu kezisuo thenieko uko sie keparkoe teicie theniekote, mu niathutsa teikhrie bu hekewa telhakre kemethuo thenieko rei cie thenie zo, süko cie thenie pekrie bataketuoko. 28Süusü a Faro ki pukeshü mhie di, Ukepenuopfü thuo mhachütuoü kebau pie Faro pesishüte. 29Ijipt kijü pete nu cie thenie mhanyi sekecü ngutuo. 30Derei süko sie cie thenie pekrie siertuo, sidi Ijipt mhanyi phi sierkecüko rükra motatuo; pekrieue kijü cülietatuo. 31Sidi kijü sünu pekrie kevor la mhanyi phi kevor-u si motatuo, süue re phiketuo la. 32Süla Faro bu puo mho kepema sie pemakecü süu Kepenuopfü thuo chüshü mu Kepenuopfü thuo süu chü mhaishütuo. 33Süla tsie Faro bu themia kemenuo mu mhakesi puo kedalie, sidi puo bu Ijipt kijü nu mha kemeho-u chülie. 34Tsie Faro bu mha kemeho chüketuo la themia kedashülie. Sidi Ijipt nu mhakenyi cie thenieko nu mha ngukelieko za pengou chü di za puo khapie balie. 35Sidi süko bu teicie kevi süko nu kecüca kevorko kengupie Faro khro shülie, di süko bu nadiko nu telha se balie. 36Kecüca süko bu Ijipt nu teicie thenie pekrie vorketuo la kengupie batuo, pekrieu la kijü bu kata molieketuo la.”

Josef Ijipt Kijü nu Kuosierkelie

37Mharhü hau Faro mu puo kituoko pete u neilie. 38Süla Faroe puo kituoko ki, “Úko themia haicü puo ngulie vi me? Ukepenuopfü ruopfüu u nou ketuomia.” 39Sitse Faroe Josef ki, “Ukepenuopfü thuo mha pete pie n pekieshü eru, miapuorei n de, mhale menuo mu mhasikecü ba mowe. 40N bu a kiu mhokezha chütuo, mu a themiako pete no ahza khakeshüko se u kelhou kekhatuo; kedibau gei rübei a n ki zhakuocü zotuo.” 41Sidi Faroe Josef ki, “Mehocie, a n chüpie Ijipt kijü pete mho shüwate.” 42Sidi Faroe puo dzie nunu puo dziekha zasiu bielie, di pie Josef dzie nu shüwa, di linen pfhe kemese pfhenei pie puo ketsoshü, siro suna cü puo pie puo vo nu shü. 43Süsie puo bu puo kierbagei kenieu gei balie, siro mia puo mhodzünu melie di sie, “Khoutoulie#41:43 Abrek, Ijiptmia die, puo pfhephra Ibri die nu Khoutou icüu ze kemhie pekruo.” si tuota. Sümhie di puoe puo chüpie Ijipt pete mho shüwa. 44Süsie rei Faroe Josef ki, “Ae Faro, mu mia puo bu rei n sanyü mo di Ijipt kijü pete nu puo dzie morei puo phi chashülie lho zo.” 45Siro Faroe Josef za pie Zafenat-pania chüwa; mu On nu zievo-u Potifera nuopfü Asenat pie puo ki penyishü.

46Siro Josef Ijipt nu kediu Faro lie chükelie ki cie serta. Ru Josef Faro mhodzü nunu prata, di Ijipt kijü nu rühou voshü. 47Siro mhakenyi cie thenieko nu kijüu gei mha rüchü philie. 48Sidi puo Ijipt kijü nunu cie thenieko nu mha ketshukelhuo bakecü ki kecücako kengulie, sidi kecücako kengupie nadiko nu shülie. Puo nadi pete khiera lieko nunu kecüca ngukelie khe se vor nadiko nu shülie. 49Siro Josef-e telha kengupie dzükezha nu huoca tuoilie, mu puo süko mejü sa mota, süko phrü hulie kenjüketa la.

50Siro pekriekecü teicie vor kemonu Josef-e puo nuo thepfumia kenie nyilie. On zievo-u nuopfü Asenat geinu penuopie puo tsüshü. 51Sitse Josef-e puo nuo nuorieu za pie Manasseh#41:51 Puoca Rükra motaketuo chükecü. chülie; puo sie, “Ukepenuopfüe a bu a mezhieko mu a puo kinuko rükra moketa chükeshü la.” 52Siro puo nuo kenieu pie Efraim#41:52 Ibri nu Kruokelie icüu nunu par. chülie, “Ukepenuopfüe a kemezhiekecü kijü hau nunu a chü pekruoshüketa la.”

53Siro Ijipt kijü nu mhakenyi cie thenieko tseita; 54di pekriekecü teicie thenieko vor sedelie, Josef pukeshü tuoi di. Kijü pete nu pekrieta, derei Ijipt kijü nu we kecüca balie. 55Siro Ijipt kijü pete nu mhajüta tse, themiako Faro ki kecüca cha, Faro Ijiptmia pete ki, “Josef ki volie, puo nieko ki mhakehoupuo pu shierei süu chüliecie.” 56Siro kijü pete nu pekrieu bata, sitse Josef telha kiko khrüshü; di Ijiptko ki mha zeshü; Ijipt kijü nu pekrieu re seketa la. 57Sizomonyü kijü pete nu telha khrütuo üdi Ijipt kijü nu Josef ki vor, kijü pete nu pekrieu re seketa la.

Currently Selected:

Keriekitho 41: ANBRBSI

Highlight

Copy