Keriekitho 4
4
Kain mu Abel
1Siro Adam puo kimia Iv ze kesiwa, ru puo nuonipfülie sidi Kain penuolie tse puoe, Jihova a khruohishü di a nuo thepfunuomia puo nguliete idi puo za thopie Kain chülie. 2Süsie rei puo kimiae Kain siezeu Abel penuo lalie. Siro Abel tekuo peri, mu Kain lieciemia puo chüta. 3Si tuo ru Kain-e puo lieyie nunu puosi se vor ruosuo chüpie Jihova tsü, 4mu Abel liro puo kuoko donu nuorieko se vor di süko geinu puoshuo kevithoko se ruosuo chüpie Jihova tsü. Sitse Jihovae Abel mu puo ruosuo rei ngu puo neilie, 5derei puo Kain mu puo ruosuo rhu mota. Sitse Kain puo nei mo seta, di puo nou kemeyiepfü puo dzüshie chüta. 6Süla Jihovae Kain üse “No kiüdi n nou meyie mu n dzüshie chüta ga? 7No rei mha puotouu chülie ro, n lielie lho üme? Derei no mha puotouu chülie moro kephouma n kikha ki zhü zo, süu n mengutuo, derei no süu penyülie morosuo.” 8Süsie Kain-e puo siezeu Abel ki, “Avu lie nu tsu khe,” si. Hai di unie tsu lie nu ketuo ki Kain-e puo siezeu Abel gei puo nei mo sier di puo dukhriwa. 9Sitse Jihovae Kain ki, “N siezeu Abel kirapuo ba ga?” siru puoe sie, “A si mo. A a siezeu kepfheu me?” 10Sitse Jihovae “No kedipuo chüwata ga? N siezeu zie-e kijü nu a kiezhüte. 11Tsie no kijü nunu rüsepfüte ho, süu n dzie nunu n siezeu zie lielietuoü mekuolie. 12No lie cieshü rei; kijüu mhapuorei rüchüpie n tsülie lho; n bu kijü nu kitamia mu rühou ketuomia chütatuo.” 13Sitse Kain-e Jihova ki, “Siazha hau a la mesithorte. 14Noe kijüu geinu a whuowa di a bu n mhodzüki ba motatuo üzhie. Ae kijü nu kitamia mu rühou ketuomia puo chütatie, mu themia kehoupuorei a ngulie ro a dukhriwatie.” 15Derei Jihovae puo ki, “Silie lho! Kehoupuorei Kain dukhriwa ro, sümia gei khepu süde thenie lietuo.” Sidi Jihovae mia puo dukhrikewa keprei la zasi puo chüpie Kain gei shüwa. 16Mu Kain Jihova mhinguki nu tuota di vo Iden niathutsa Nod#4:16 Puoca rühou ketuo. kijü nu lhouta.
Kain Nuosenuoyieko
17Kain puo kimia siwa, mu hapfüe nuonipfülie di Inok penuolie. Süsie Kain nadi puo chülie di puo nuo Inok za pie nadi süu za tholie. 18Siro Inok nuou Irad, mu Irad nuou za Mehujael mu Mehujael nuou za Methushael mu Methushael nuou za liro Lamek. 19Siro Lamek puo kimia kenie nyi, unie za liro Ada mu Zila. 20Ada geinu Jabal penuolie, puoe pfheki nu lhou di perinuo periyakezhako krüu chü. 21Siro puo siezeu za liro Jubal, puoe lyre mu luoü seyakezha ü kechümiako krüu. 22Zila geinu Tubal-kain penuolie, puoe mese mu thegi dapie mhanya neiüko rükrei se parkeshüu. Tubal üpfü za ro Nama.
23Siro Lamek-e puo kimianie ki:
“Ada mu Zila nnie a pfhe rünyüshücie;
Lamek kimianie, a kepu rünyüshücie:
mia puo a vü kerüzakeshü la a puo dukhriwa,
khriesamia puo a pechükeshü la.
24Kain dukhrikewa la kerheiro thenie lietuo üro
a dukhrikewa sie kerheiro hietheniethenie lietuo.”
25Adam puo kimia si lawa, mu süpfü thepfu puo penuolie. Sitse puo kimiae süze “Ukepenuopfüe Kain bu puo dukhrikewa Abel sou nu a nuo thepfu puo kha lashüte” idi puo za pie Seth tholie. 26Seth rei puo nuo thepfu puo ngulie di puo za pie Enosh tholie. Ha mese kinu themiae Jihova za kie sedete.
Currently Selected:
Keriekitho 4: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
